COUNG" NGHEI 78
1 Nga" da" byumyu" yi we' nga" da"
jhoug" myeing" jhoug" thui: ri tam" gyo: yu we'.
Ngoo tid da" dang: ri we' gyo: yu we'.
2-3 Ngoonu" da" nya: phoug" nya: pho, bi" ngoonu" ri tid kyoo" bye: yoomo
ngoonu" se' too" bye: da" moo" zoo" jid: zoo" joem yo'
lai loo bye: pyaid mo yhoem" to" da- mau" pho" khyoo: joem ri
phajhi" dang: joem yo' nanu" ri ngoo tid kyeung kyoo" ba.
4 Hau: khyoo: joem ri ngoonu" gi ngoonu" da" nya: myid: nya: zoo yi da"
shidkhoin" moo yhoem" too" byid: wa zi anghoid. Aseing yoem moo" so, zeung: da" khyoo:
nya: da" gyi: thang moo" zeing yo' nyang: zei: bye: da" mau" pho" moo" zoo" joem ri
thang: phyang" pyaid mo byumyu" yiri ngoonu" tid kyo" nyid wa nghoid.
5 Nang gi Israela byu yiri tarha" byid: to" lho:
Yaku da" nya: zoo: nya: myid: yiri Dang: theing khoin" byid: too" bye:.
Nyang: gi nyang: pyeung: to" da" tarha" yo'
nyangnu" da" nya: myid: nya: zoo: yiri jhau" byid: wa shid re"
ngoonu" da" phoug" phyid" yiri tid too" byid: bye:.
6 Hougsu" koid da" khyoo: gi thang: phyang" byunyid xiyam: moo
yo" jhau" kham: yu lho: doem yo" lheung: tid kyoo" goo" baja".
7 Nheigloem: thain: lho: thougtheung to" boem da" byukung-
phoug" phyid" yi yhang: ti" abue" nyid loo: goo.
Hau: phoug" phyid" yigi nyeing" zoo: tam" gyo: khyoo: abo ziyo'
Mangsoo moo: nheigloem: azung" mo, nghoid ago".
8 Gyivoo joem yo' atam" gyoo: bang-
Mangsoo ri loem" jeung" khyoo: moo khanham we' ageung: teing mo, yo'
nyang: moo: nheigloem: azoung" da" nyangnu" phoug" phyed yi yhang: ti"
Nyangnu" gi bui" loo: wa nghoid
9 Lid: joem yo' myoo: joem ri ci: lho:
meing: zain: se' da" Ephrim byumyu" yigi
gyi khaid bidnyid moo: phang: lo" byoug boem bye:.
10 Nyangnu" gi Mangsoo yo' dangsoo" too" go" khyoo: ri azoem: too" loo: za:
nya: da" pyeung: dang: tarha" ri cang loo" wa shid re" ngeug pyam nyid ago".
11 Nyangnu" gi nyang: koid bye: da" moo" zoo" joem yo'
Nyangnu" myang yu" bye: da" mau" pho" alhoo: again' joem ri
to" myhed pyam boem bye:.
12 Egutu meing: moo: jo, da- Zoan siyoo khoug: moo
Nyangnu" da" nya: phoug" nya: phyid" bi" yu" nyid uri
Mangsoo gi mau" pho" alhoo: again joem ri toin" shed bye:.
13 Nyang: gi panglai: gyid ri eig gang kho' gam pyam lho:
gyid gi eig shoid goin- xiyam, yhang: ti" yab jo, nhang: wigi
nyangnu" ri houg: khyo" shu" loo bye:.
14 Nyang: gi nyangnu" ri nyid" ri jhoemmoug" myen" rigi myi: yo' shu" loo bye:.
15 Nyang: gi siyoo khoug: mo lug moo" boem ri baid phang kaid lho: wigi
Nyangnu" ri no, da" joyoo moo gyid ri byid: jhug bye:.
16 Nyang: gi lug moo" boem mo gyid ri thu' loo nhang: lho:
gyid moo" lang su" yau, loo" nhang:.
17 Nghoid loug we' nyangnu" gi Mangsoo ri
tu: lhoin" da" yooboo- daxo, koid nyid boem ziyo'
siyoo khoug: moo: we' myhang: thang su: ri
nyangnu" ngeug se: tu: lhoin" pyam nyid ago".
18 Nyangnu" gi nyangnu" zoo: nau da" zoo: noem ri mho' khyo" wigi
Mangsoo ri pa: yhi: yhi: jham" yu" nyid boem ago".
19 Nyangnu" da" Mangsoo ri thougtheung dang: tid boem zigi
siyoo khoug: moo: Mangsoo gi nanu" ri zoo: noem yo" byid: zhoo" wa la".
20 Lug moo" boem mo gyid baid thu lho:
gyid moo" lang youg nhang: zigi deing bye:.
Nghoid loug we' nyang: ngoonu" ri zoo: noem zooyho, yo'
nya: byumyu" yiri shoo" yo" byid: zhoo" wa la" ga: wigi tid nyid boem.
21 Hougsu" nyangnu" tid go" nyid da" dang: ri nyang: shoug" gyoo: lang"
Aseing gi nheug yo: nyid bye:- nya: byumyu" yiri
myi: yo' nyang: zain: lho: nya: nheug yo: emyed gi
nyangnu" tho' moo: je" je myo: loung: lo nyid bye:.
22 Khasu" wim gari nyangnu" gi nyang: ri aloem" ajeung" ziyo'
nyang: yo" khyoid yu khyoo: ri nyangnu" aloem" jeing" yoomo nghoid.
23 Nghoid loug we' nyang: gi tho' mo mougkhung: ri tid ziyo'
mougkhung: khoem" joem ri phang wa shid re" tid kaid bye:.
24 Nyang: gi nyangnu" zoo: wa shid re" Manna ri vo, khyoo byid: wigi
mougkhung: mo gugzoo meiloem: ri nyang: gi nyangnu" ri byid: abye:.
25 Hougsu" Nyangnu" gi moug: lagyoo: yi da" zoo: noem ri bo shoug" zo: ziyo'
Nyangnu" vho: zi dangain" ri Mangsoo gi nyangnu" ri byid: abye:.
26 Bid thu shoid mo lid ri we' hau, loo nhang: wigi nyang: yoem zeing so, moo" yo'
mougpyi: lid ri we' nyang: houg nhang: kaid lho:
27 Gyid yam moo: jo, da" midcoo: doem: yhang: ti" myo: tham: da" ngho' joem ri we'
nya: byumyu" yi shid re" nyang: khyoo, byid: kaid bye:.
28 Nyangnu" nyid da" dab, agung moo: we'
nyangnu" nyid da" zoem" yam mo ayam' aqei: moo: we'
hau: ziri khyoo byid: bye:.
29 Houg: yoomo byu yigi zoo: noem shoug" zo: boem ziyo' nheugshid: nyid abye: go".
Nyangnu" vho: nheig byu nyid da" khyoo: ri
Mangsoo gi nyangnu" ri byid: nyid bye:.
30 Nghoid loug we' nyangnu" gi houg: yhi' shoug" zoo: nghoid loug-
nheug atho' shid: boem shi" nghoid ago".
31 Hau: uri Mangsoo gi nyangnu" ri nheig yo: wigi
Israela da" yoem bo thang zoolu: yiri nyang: said toem" pyam byid: bye:.
32 He: khyoo: dangain" ri nyangnu" thoung" shoug" nyid nghoid loug we'
byumyu" yigi yooboo khyoo: moo daxo, koid jhen" yhe: lo" nyid ago".
Nya: da" mau" pho" alhoo: again' joem ri toin" shed nyid.
Nghoid loug we' nyangnu" gi nyang: ri aloem khoug" nghoid nyid ago".
33 Hougsu" nghoid yoomo nyangnu" da" bidnyid joem gi
so' dalheung: thid she: yhang: ti" za: thang lo" lho:
nyangnu" da" kangso' joem gi nyeigdain tung" da"
shid: gyoin' yo' thang loo" nhang: boem.
34 Nyangnu" mo dayham" ri nyang: said pyam.
Ayo, khang" moo" moo: deung dei nyid mo, gi
nya: jhang khyoo: lheung: lo boem ziyo'
nyangnu" gi nheigloem: thid wigi
Aseing moo: ayoo" atho' akyu" mho' nyid boem.
35 Mangsoo gi nyangnu" ri goem loem byid: nyid su: nghoid ziyo'
nyangnu" ri pang" thoug yu wa shid re"
athang agoin yoem moo" bo nyid su: ju" re" nyid bye: ziri
nyangnu" gi myid boin: nyid boem.
36 Nghoid loug we' nyangnu" da" tid sang: da" dang: khoin" moo
mhau, fain' da" dang: khoin" thui: joem za: nghoid nyid ziyo'
nyangnu" tid nyid da" dang: gi nheigloem: dain: khyoo: ci" we' aboo.
37 Nyangnu" gi nyang: moo nheigloem: zung" mo, anghoid boem ziyo'
nyang: yo' dang: theing go" to" da" khyoo: moo: we' loem: lug bang: anghoid boem.
38 Nghoid loug we' Mangsoo gi nyang: byu yiri nheug khyeug nyid.
Nyang: gi nyangnu" ri atoem" pyam loo: za:
nyangnu" da" yooboo joem ri: khyoid pyam byid: lho:
nyang: gi nya: nheigloem: nge" khyoo: ri myoo" sho' lheing: jham" loo" nhang: wigi
nyang: nheug yo: khyoo: ri zeung: pyam nyid.
39 Nyangnu" gi shid: se' da- dei noem daja: nghoid boem wigi
lid hau, lid: lo" ri myheug bei: lo" byoug da" lid yhang: ti"
te: nghoid nyid ziri nyang: boin: nyid.
40 Nyangnu" gi siyoo khoug: moo nyang: ri khamyoo, lheing: ngeug se: tu: lhoin" bye: ziyo'
khamyhoo, lheing: nheug koug nhang: bye: lha!
41 Nyangnu" gi Mangsoo ri dalheing: bain dalheing: ca: jham" yu" wigi
Israela da" gyeung" shang: Mangsoo ri nheigloem: noo nhang: nyid boem ago".
42 Aseing da" nghoid thang yoem so, zeing yo' nyangnu" da" gyivoo joem lo, mo
Nyangnu" ri khyoid yu loo bye: da" bidnyid ri to" myhed pyam boem lho:
43 Egutu meing: Zoan pa: dam moo nya: gooki" lid da"
moo" zoo" joem yo' mau pho" alhoo: again joem ri
koid shed loo bye: da" khyoo: ri we' nyangnu" gi to" myhed pyam boem bye:.
44 Nyang: gi Egutu byu yi gyid ashoug" shug loo: sho'
gyid lang joem ri suid" bue" loo" nhang: yu" bye:.
45 Nyang: gi nyangnu" ri kyi" khyeug yau: nhang: da- mho' joem ri we'-
nyangnu" da" moug: ri shoin' pyam byid: wa shid re" we' poo" joem ri we' nhang: kaid bye:.
46 Nyangnu" da" shivoo: shiloem joem ri zo: pyam byid: lho:
nyangnu" da" khyam: joem ri phyo' shoin' pyam byid: wa shid re"
jhen" khyeug nyoug joem ri nhang: kaid bye:.
47 Nyangnu" da" zabyid khyam: moo leug voo khyo' lho:
nyangnu" da" lafoem khyam: moo
gyu: joem khyo' wigi nyang: said pyam byid: bye:.
48 Nyangnu" da" nulei: nujung joem ri leug voo thung" yo'
Nyangnu" da" coid kyung yang kyung joem ri
mau: lhab' myi: yo' foeb, said pyam byid: bye:.
49 Nyang: gi nya: da" nheug yo: khyoo: foid shoin" kaid wigi
shid: zoug: da" lagyoo: joem ju" lo yhang: ti"
amyen, akhyoid da" yau: khi" azeing- nyangnu" moo: bui" nhang: bye:.
50 Nyang: gi nya: da" nheug yo: nheigloem: ri ano: too" loo: za:
Nyangnu" da" kangso' ri ce: vhoo" abyed loo: za:
noobau: phyoobau: yo' nyangnu" ri said pyam bye:.
51 Egutu meing: yhoem: khang" moo" mo yuggi zooshid" yiri
nyang: said pyam byid: bye:.
52 Hau: thang: ri nyang: gi nya: da" byumyu" yiri yang zung" su: yhang: ti" shu" lo wigi
nyangnu" ri dain" pyoid yoo khyo" shu" vhu" lid loo bye:.
53 Nyang: gi nyangnu" ri gau nyu: khyoo: khyo" shu" loo yoomo
nyangnu" gi ci gyoug anoo".
Nghoid loug we' panglai: gyid gi nyangnu" da" gyivoo joem ri
doin: lhoem" nhau, said pyam bye:.
54 Nyang: gi nyangnu" ri nya: da" gyeung" shang: mougmyid khyoo:
nyang: zain: oung: to" da" boem khyoo: nyang: shu" loo bye:.
55 Nya: byumyu" yigi shid khyoo: jhen" vang yhe: lo" nyid uri
nyid xoug" yiri nyang: koin" thu' pyam lho:
nyangnu" da" mungzoug: joem ri Israela byumyu" yi kung: khang" mo" da" lo, khyoo:
nyang: kho' byid: wigi nyangnu" da" yhoem: joem ri we' gam byid: bye:.
56 Nghoid loug we' nyangnu" gi myhang: thang da" Mangsoo ri ngeug se: tu: lhoin" nyid lho:
nyang: ri ca: jham" yu" nyid boem.
Nya: Dang: theing khoin" joem ri we' atam" gyo: boem nghoid ago".
57 Nyangnu" da" phoug" phyid" yi yhang: ti" dang: azung" loo: za:
tu: lhoin" mo, nghoid nyid boem ziyo' guid" da" myookhaid yhang: ti" loem age" bang: nghoid nyid boem.
58 Nyangnu" gi Mangsoo ri aloem mo, da noku joyoo yo'
nyang: ri nheug yoo: nhang: lho: nyangnu" da" yu phara" soolhoo: joem yo'
nyang: ri nheug khoo" yoo: nhang: nyid boem.
59 Houg: yhang: te" khyoo: ri nyang: myang da" uri Mangsoo gi nheig yo: loo bye:.
Houg: yoomo nyang: gi nya: byumyu" yiri bain sho' she: pyam bye:.
60 Nyangnu" da" agung moo nyang: nyid loo bye: da-
yhoem: Shilo voogung mo nya: zoem" ri she: pyam too: khoo bye:.
61 Nya: da" yoem zeing so, moo" yo' myonhoo: phung" yoeb da" alhoo: nyid nyid da-
Dang: theing kuid: ri nya" gyivoo joem
lhoid yu wa akhang" nyang: byid: pyam bye:.
62 Nyang: gi nya: byumyu" yiri nheug yo: nyid wigi
Nyangnu" da" gyivoo joem lo, moo said pyam zi shoug" nhang: pyam bye:.
63 Zoolu: joem gi meing: zain jang: moo: said pyam zi shau" wigi zoomyi: yi we'
Nyangnu" ri lo, xo' yu wa zi byu dayug we' anyid byug loo.
64 Khainjung yigi- athoug" akhyoug: leung byed suid" shoin: khyoo: moo shid: lo" byoug boem wigi
Nyangnu" da" coung" moo" myhi' yiri koug shu: ngoug wa da" akhang" abyid.
65 Lo" thang moo: Aseing gi yhoeb myhed jo, su: dain' so" re" yhang: ti"
zabyid yeung yoomo nheigloem: zhu: lo wigi yoem bo da" lu: gi sarhi' phoo yhang: ti"
gyeung: so" to' loo bye:.
66 Nyang: gi nya: da" gyivoo joem ri pyaid moo: too: moo: khaid tau" thu pyam lho: wigi
pyaid moo: too: moo sho' thu' soem" joem: loo" nhang: bye:.
67 Nghoid loug we' Yoseb da" amyed ashen yiri nyang: ngeug pyam lho: wigi
Ephrim byukung: yiri nyang: akhyen: yu nghoid da:.
68 Hau: gung khoo- Yuda byukung: yo' nyang: je jheddab da" Ziun boem ri khyen: yu abye:.
69 Hau: joyoo moo mougkhung: mougdi mo nya: yhoem: yhang: ti"
nya: Noku Yhoem: Moo" ri: zhoug to" abye:.
Pyaid didu moo: geung teung jo, da- mungdain: ri yhang: ti"
hau: ziri nyang: geing: geing: teing teing: tu: zhoug too bye:.
70 Nyang: gi nya: dei zoo: David ri khyen: yu abye:-
yang joem ri lhoug zung" nyid da"
mhain" nu" jang: mo nyang: ri khyen: yu wigi
71 Israela byumyu" yi da" khokham Mangso da" yang lhoug su: bue" jo, wa shid re"
nyang: ri nyheung too" bye:.
72 David gi nheug khyeug shoo" myen: nheigloem: yo'
Nyangnu" zho" jhoug lo lho: se' koung da" lasi phajhi" yo'
Nyangnu" ri shu" vhu" shi: bye:.