COUNG" NGHEI 74
1 Mangsoo we"- nang cikoid ngoonu" ri
hid: yhang: ti" she: pyam, to" lha".
Nanya: byu yiri pyaid moo: too: moo:
nheig dajha" yo: nyid wa ein: la".
2 Goonham gooco' mo nanyang: khyen: yu da" byumyu" yi yo'
nanya: byu kung: bue" nyid wa shid re"
join mo khyoid yu shau" da re" byu yi ri boin: so" nyid we'.
Goonham nang nyid lid lo yu" da" Ziun boem ri myid boin: nyid we'.
3 Jhoid" nyang: byo, yoin" jo, da" joyoo joem mo re" yu" we'.
Ngoonu" da" gyivoo joem gi Noku Yhoem: Moo" khoug: mo
zi yoo joem ri phyo' shoin' to" abye: go".
4 Re" da" gyivoo joem gi oung: doid loo" bye: ga:
re" Noku Yhoem: Moo" khoug: moo nyho: phau: nyid boem bye:.
Nyangnu" da" dungkhoin: joem ri we'
hau: joyoo moo oung: doid loo" bye: da- alhoo: again khyo" zhug to" abye: go".
5 Nyangnu" gi nyangnu" da" voozung: joem yo'
seiggam' joem ri kheing da" seig thug mo, yhang: ti" du nyid.
6 Nyangnu" gi soolhoo: lhid" to" da- seig thi" dangain" ri we'
ladu zeing yo' voozung zeung: wigi youg khyoeb pyam abye: go".
7 Nyangnu" gi re" da" Noku Yhoem: Moo" ri we'
youg khyoeb pyam lho: myi: yo' nghe' pyam abye: go".
Houg: yhang: ti" nang ri noku coung" pid da" joyoo ri
nyangnu" gi aco ajhoid koid pyam abye: go".
8 Nyangnu" gi ngoonu" dangain" mo, ri jhoid" jhoid mhoin' pyam nau nyid ago".
Nyangnu" gi hau: moug: mo gyeung" shang: da" joyoo dangain" ri
myi: wigi nghe' jhoem" too" khare" boem bye:.
9 Ngoonu" da" gyeung" shang: alhoo: again' joem dangain" ajo, loo.
Hau: joyoo moo: Lapi: dayug we' anyid lo: ziyo'
khamyhang myang" sho' hid: yhang: ti"
bue" jo, wa ziri hang" we' asi, loo.
10 Mangsoo we"- re" da" gyivoo joem gi khamyhang myang" sho'
nang ri juang" yi nyid boem wa lha".
Nyangnu" gi re" da" myeing khyang" ri khanham we'
dajha" lu wim: nyid loo: wa la".
11 Nang gi ngoonu" ri pang" thoug byid: wa shid re"
cikoid ngeug pyam nyid lha".
Re" lo, ri ci: yoomo, shoung: pyam lha".
12 Nghoid loug we' nang gi xang: shid mo nyang:-
ngoonu" da" khokham nghoid bye:.
Nang gi ngoonu" ri myoo" sho' lheing: we'
khyoid khyi: yu yu" bye:.
13 Re" da" yoem: moo" phung" yoeb yo'
panglai: gyid thoem" ri kho' kang pyam lho:
panglai: main jung: joem da" vhuloem ri we'
youg khyoeb pyam yu" bye:.
14 Nang gi mainjung Leviathan da" vhuloem ri we' mhoin' pyam wigi
Nya: da" gung shoo" joem ri siyoo moo: nyid da-
gougnyhoug joem ri gam zho" pyam da:.
15 Nang gi gyid bug yo' gyid zoo: joem ri shau, kaid wigi
gyid moo" lang joem ri khyoug kain" loo" nhang: nyid.
16 Nang gi nyid" yo' myen" ri phain" so: to" wigi bid yo' lhammoo" ri we'
Nyangnu" da" joyoo joem ri soin nyeung byid: to".
17 Mougmyid da" kyoo" doem: ri we' nang ke byid: to" lho:
zain' xung" ngam" da" ayo, ri nang phain" so: too" byid: bye:.
18 Nghoid loug we' Aseing we" Mangsoo ayo" ziyo'
nang ri aphoug" akhyoid koid nyid da-
re" gyi voo joem gi nang ri juang" yi nyid boem ziri
nang boin: nyid we'.
19 Pang" thug wa bidnoem ayo" da"
re" byumyu" yiri nheug ase' khyeug da" gyivoo joem da" lo, moo ashe: pyam too.
Shen" yhen pyi: sho: zi shoug" nyid da" re" byumyu" yiri ato" myhed pyam.
20 Nyangnu" yo' nang dang: theing khoin" to" da" ziri
ato" myhid daboin: so" nyid we'.
Mougmyid moo: moug: coid thu: jo, da" jhoin: khang" moo" moo
athoug" akhyoug: da" moo" zoo" joem jo, jo.
21 Doin: zeig zo: ziri shoug" nyid mo ri sho' athu nyid nhang:.
Asho" ajhen: mo, yo' ca" yo nyid bang: gi
nang ri coung" nghei nyid goo" baja" o".
22 Mangsoo we"- nanyang: tho' re" nanya: moo" zoo" ri goem loem byid: we'.
ce" Mangsoo we' abo bang: gi nyid" goin" goin"
nang ri juang" yi nyid boem ziri boin: soo" we'.
23 Re" gyivoo joem gi nheig yoo: nheig teig
nyho: yoid, nyid boem ziyo'
Re" gyivoo joem da" nyho: tei" to" thui: ri ato" myhed nyid.