COUNG" NGHEI 51
1 Mangsoo we"- re" da" geung: teung jo, da" jhed khyeing: kang: khyeing: yoomo
ngoo ri nheug khyeug yu shi" we'.
Re" da" gyi: myhang: nheug khyeug shoo" myen: myid yoomo
nga" da" yooboo joem ri soid pyam byid: we'.
2 Nga" da" akhyeing" ashoeb khyoo: dangain" ri ced" pyam byid: wigi
nga" yooboo mo ngoo ri ced" shang: yu byid: we'.
3 Nga" da" shoid vhang: yooboo joem ri ngoo nyang: xoem" to".
Ngoo: nya: yooboo ri ngoo khanham we' daboin: nyid.
4 Ngoo gi nang ri yooboo koid shoid bye:- nang ri za: shoid bye:.
Nang myid yu" da" akhyeing" ashoeb khyoo: ri ngoo zei: shoid pyam bye:.
Houg: yoomo ngoo ri tarha" dang: phyed khyoo: moo
nang gi deungbyeung" nyid da:.
5 Ngoo khu: re" da" bidnyid mo wigi ngoo gi akhyeing" ashoeb ziyo'
nga" myhi' ung: khoug: mo nyang:- ngoo moo: yooboo dab, gu nghoid bye:.
6 Nang gi nheigloem: dain: ziyo' deingmain" khyoo: ri damho' nyid yoomo
nga" ung: khoug: nheigloem: moo re" da" ung: yeug phajhi" yo' byeung" jo, nhang: we'.
7 Nga" yooboo ri yu pyam byid: we'- houg: lang" ngoo gyeung" shang: loo wa.
Ngoo ri: ced" shang: yu we'- houg: lang" ngoo gi gyu: tho' je phyu: loo wa nghoid.
8 Gau yi ziyo' ngei pyo: da" thui: ngoo ri shoug" gyoo: nhang: we'
nang gi ngoo ri myheug khyau" mhoin' pyam bye:.
Nghoid loug we' ngoo dalheung: doem gau yi ngei pyo: loo wa zi nghoid.
9 Nga" yooboo joem ri amyang loo: baja" re" myojid" ri coem" too" we'.
Nga" da" akhyeing" ashoeb khyoo: dangain" ri boid: soid pyam byid: we'.
10 O" Mangsoo we"- nga" da" akhoug: moo:
younglho' da" nheigloem: ri phain" so: byid: lho:
nheigloem: zung" khyoo: yo' soozoo: aseig ri nga" da" akhoug: moo: kaid byid: we'.
11 Re" da" myo, shid ti: mo ngoo ri akhaid thu pyam, shi".
Re" da" gyeung" shang: Venyi nga" jang" mo ayoeb yu byid.
12 Re" da" khyoid yu khyoo: mo yo" yu da" gau yi ngei pyo: khyoo: ngoo ri doem byid: lho: wigi
nang moo: gau yi tung" tam" gyo: cang yhi: wa shid re" ngoo ri ze" bui" nyid: we'.
13 Houg: lang" re" da" amyeing" dang: joem
youg: noo yooboo yoo" mo, ri ngoo jhau" byid: wa zi nghoid.
Nyangnu" gi Aseing jhang khyoo: doem lheung: lo boem wa nghoid.
14 Mangsoo we"- nga" kangso' ri lhoid pyoin kaid byid: lho: ngoo ri khyoid yu shi" we'.
Re" da" deingmain" khyoo: ri ngoo goug goug yi yi kho" kyo" nyid wa nghoid.
15 Aseing we" dang: yo" tid wa shid re" ngoo ri pang" byid: we'.
Hougsu" ngoo gi nang ri coung" nghei nyid wa.
16 Nang gi xoin" du: joem ri vho: ngei nyid su: anghoid.
Hougsu" anghoid rigi ngoo ngei" byid: wa zi nghoid.
Nang gi myi: nghi, xoin" ri we' vho: ngei nyid zi anghoid.
17 O" Mangsoo we"- nga" da" xoin" du: gi khyo' nyhoem: da" nheigloem: soozoo: nghoid.
Nang gi khyo' nyhoem: khyoo: yo' gyau: moin" da" nheigloem: ri
nang ngeug pyam wa zi anghoid.
18 Mangsoo we"- Ziun ri nheug khyeug lho: wigi nyang: ri pang" thoug byid: we'.
Yerusalem da" vang khyam: joem ri doem tu: zhoug too" we'.
19 Houg: lang" nang gi ce" noo abo da" xoin" du: joem yo'
ngoonu" da" myi: nghi, xoin" joem ri vho: ngei loo wa zi nghoid nyid.
Re" da" phoin: tho' moo: we' nujung loo: joem ri xoin" to' byid: lo boem wa zi nghoid.