COUNG" NGHEI 48
1 Aseing gi gyi: sheung:- myhang: thang su: nghoid khyoo: ri:
nya: gyeung" shang: da" boem tho' moo: jo, da-
ngoonu" Mangso da" voogung moo coung" nghei nyid ge'.
2 Mangso da" boem ein: da" Ziun gi myhang: ziyo' younglho' nyid.
Reung: thang da" khokham pho, voogung gi
moug: gyab, dangain" ri gau yi ngei pyoo: nhang: nyid.
3 Hau: voogung da" gyidab, khoug: moo
nyang: yo dage" gau: nyu: myenjham" nyid ziri
Mangsoo nyang: toin" shed abye:.
4 Ziun boem ri re" zain: wa shid re"
khokham yi dage" zeung: foem nyid abye: go.
5 Nghoid loug we' nyangnu" gi hau: boem ri yhe: myang lang"
Nyangnu" yu" mau" pyam, wigi gyoug dain' ziyo' doem phang lo" ago".
6-7 Nyangnu" gi hau: khyi moo zookhu: wa soin wigi
zookhu: noo no nyid da" myiyi: myhi' yhang: ti"
atho' tid lo: da" uglid zoo" moo mhoo: khyoo: foo: khyoo: she: thoung" kam" yen" da-
sangphoo lhid yo' dakhyoo" ti" gyoug nain" ziyo'
yau: khe" kyi" khyeug zi thoung" shoug" nyid ago".
8 Mangsoo khasu" koid shoug da" moo" zoo" ri
nyangnu" shoug" gyoo: bye: ziyo' dakhyoo" ti"
gyi: myhang: da" Aseing ngoonu" da" Mangso voogung moo
hau: khyoo: ri ngoonu" akhid" shau" myang nyid boem bye:.
Nyang: gi hau" voogung ri apyaid atoo: moo
gau: nyu: geung: teing nhang: nyid wa zi nghoid.
9 Mangsoo we"- re" da" Noku Yhoem: Moo" khoug: moo re" da"
geung: teung jhed khyeing: kang: khyeing: ri ngoonu" myid boin: nyid boem.
10 Nang gi joyoo khang" moo" mo byu yi bain sho bang:
coung" nghei byid: zi shau" nyid.
Re" da" myeing khyang" gi moug: gyab, goin" fu" nhoin: to" ziyo'
nang gi nyeung veung" da" tarha" yo' vhoebkhang" nyid.
11 Ziun da" byumyu" yi gau yi ngei pyo: nyid goo" baja"
jo da" dang: phyed khyoo: ri nang byid: nyid wigi
Yuda meing: mo voogung joem moo gau yi ngei pyo: khyoo: gi dajo, jo, baja" o".
12 Mangso byumyu" yi we' Ziun boem ri so" lheung lo" ziyo'
houg: mo gyipyu, zung ri nghab yu" we'.
13 Thang: phyang" pyaid mo byu yiri doem yo" tid kyoo" wa shid re"
voogung vang khyam: joem ri xoem" to" wigi gyidab, joem ri myid yu" soin: yu" nyid we'.
14 He: Mangsoo gi pyaid didu mo ngoonu" da" Mangsoo nghoid.
Nyang: gi ngoonu" ri ju" loo wa da" kangso' dei khyoo: dangain" moo
khyoo: shed vhu" shu" she: loo" wa zi nghoid ga: wigi
thang: phyang" pyaid mo byu yiri yo" tid kyo" boem wa.