COUNG" NGHEI 41
1 Sho" jhen: da" byu yi shid re" myid myoo: ung: bo loug nyid bang: gi ngilho' nyid.
Nyangnu" yau: khe" kyi" khyeug nyid" ri Aseing gi nyangnu" ri pang" thoug yu wa zi nghoid.
2 Aseing gi nyangnu" ri lhoug zung" goem coung: byid: ziyo'
nyangnu" da" kangso' ri zoem: shoung: too" byid: wa zi nghoid.
Nyang: gi mungdain: moo nyangnu" ri gau yi ngei pyoo: nhang: wa.
Nyangnu" da" gyivoo joem lo, moo nyangnu" ri byid: pyam wa zi anghoid.
3 Nyangnu" noo phyoo" shoug" nyid uri Aseing gi nyangnu" ri pang" thoug yu wa zi nghoid wigi
nyangnu" ri yang" zain" khyoo: byid: loo wa zi nghoid.
4 Aseing we" ngoo nang ri yooboo koid bye:- ngoo ri nheug khyeug yu wigi
ngoo ri yang" zain" loo nhang: we" ein: wigi ngoo tid bye:.
5 Nga" da" gyivoo joem gi nga" da" khyoo: ri
akhyeung" khyo" tid go" nyid boem wigi nyangnu" gi ngoo shid: lang" byu yigi
ngoo ri to" myhed pyam boem wa shid re" vho: ngei nyid ago".
6 Nga" jang" moo: lhoung lam" ri" bang: gi nheigloem: yung" mo, anghoid.
Nyangnu" gi nga" khyoo: yo' sen: da: age da" lu dang: ri
zheung" young: to" lho: joyoo khyi, khang" moo" hau: khyoo: ri tid fu" sain" lo boem.
7 Ngoo ri: ngheung" da" byu dangain" bang: gi nyangnu" nyang: cang"
nga" khyoo: ri dang: so, so, go" nyid.
Nyangnu" gi nga" khyoo: ri gye" akhyeung" khyo" myid thu nyid ago".
8 Nyang: gi shid: noo no nyid wigi nya: yhoeb cuang mo khanham we'
yo" too loo zi anghoid" ga: nyangnu" tid go" nyid.
9 Ngoo ri: je nghe: khau: lho: ngoo yo' dage" voem: shoin" zo: da-
nga" seing" tain" byencang" yi lang ngoo ri atoug" khyo" gyi dakoid lo.
10 Aseing we" ngoo ri nheug khyeug yu lho: yang" zain" loo wa khyoo: ngoo ri doem kaid byid: we'
houg: lang" nga" gyivoo joem ri latoo: doem yo" phug wa zi nghoid.
11 Nyangnu" gi ngoo ri yo" oung: loo" wa zi anghoid.
Nang ngoo ri vho: ngei nyid zigi ngoo yo' se' loo wa zi nghoid.
12 Deingmain" da" moo" ri ngoo zei: nyid yoomo nang ngoo ri pang" thoug yu wa zi nghoid.
Nang gi ngoo ri nanya: shidkhoin" moo pyaid didu lhoug zung" nyid wa zi nghoid.
13 Israela da" Mangsoo Aseing ri coung" nghei nyid we'.
Akhid" mo wigi pyaid moo: too: moo coung" nghei nyid boem shang o". Amen Amen.