COUNG" NGHEI 33
1 Deung byeung" bang: dangain" mo, we'
Aseing koid bye: da" moo" zo" shid re"
ngei pyo: ziyo' yoid phau: nyid we'.
Nya: dang: tam" gyoo: bang: dangain" mo, we'
nyang: ri coung" nghei we'.
2 Teing baid lho: Aseing ri jeju" boin: ge'.
tei" dab, lho: acang: joeb baid myheung ja: yo' nyang: ri jikhoin" khoin" we'.
3 Jikhoin" dang: seig yo' nyang: ri khoin" we'.
teing ri jhang: jhang: baid lho: ngei pyoo: tung" nyho: yhang: nyid we'.
4 Aseing da" dang: joem gi deingmain" lho: nyang: zei: da" moo"
dangain" we' loem ge" zi nghoid.
5 Aseing gi nyeung veung" ziyo' deing byeung" da" khyoo: ri jheddab nyid.
Mougmyid ri nya: geung: teung jhed khyeing: kang: khyeing: yo' byeung" nhang: to".
6 Aseing gi nya: da" amyeing" yo' mougkhung: mougdi ri phain" so: too" bye:.
Bid, kyi: lhammoo" ri we' nya: dang: dakhoin" yo' phain" so: to".
7 Nyang: gi gyid thoem" moo" joem ri dakhyi, jang: moo: zheung" to".
Nyang: gi no, da" nammugdara joem ri koug: yab joem moo: myhed" lhoung to".
8 Myidjang dangain" Aseing ri coung" pid nyid we'.
Moug: gyab, xangsu: byu yi dangain" nyang: ri phau" myang: nyid we'.
9 Nya: mungdang: khyo" wigi mougmyid bue" loo bye:.
Nya: amyeing" khyo" wigi jo, moo: jo, po thu' loo bye:.
10 Hau: Aseing gi byumyu" yi sham: go" nyid khyoo: ri lhu: soid pyam byid nyid.
Nyang: gi nyangnu" da" soin nyeung to" da" khyoo: joem ri toem' pyam byid: nyid.
11 Nghoid loug we' nyang: myid soin to" khyoo: gi khanham we' dageung: teung jo.
Nyang: myid to" khyoo: we' pyaid moo too: moo: dageung: jo.
12 Mangsoo ri Aseing ga: da" byumyu" yigi ngilho' nyid boem.
Nya: byumyu" khyo" khyen: yu to" da- byu yi we' ngilho' nyid boem.
13 Hau: Aseing gi mougkhung: mougdi mo goeb yu" nyid lho:
xangsu: byu yi dangain" mo, ri myang nyid.
14 Nyang: vhoebkhang" nyid da" joyoo mo mougmyid tho' moo:
dei nyid mo, dangain" ri nyang: goeb yu" nyid
15 Nyang: gi dangain" mo, da" nheigloem: ri phain" so: kaid su: nghoid yoomo
nyangnu" koid moo" zoo" dangain" ri: se' nyid.
16 Khokham phoo gi nya: da" yoem: bo gyiphung: yoomo oung: lo" zi anghoid.
gyizoo: yi we' nyangnu" yoem: boo yoomo oung: lo" zi anghoid.
17 Gyikhaid da" myang: gi oung: doid loo' wa shid re" ce" akyu" aboo.
Nyangnu" da" gyi: thang yoem: vhoo" we' ayo" khyoid yu.
18 Aseing gi nya: da" geung: teung jhed khyeing: kang: khyeing: moo loem khau: lho:
nya: dang: ri tam" gyoo: mo, da" atho' moo lhoug zung" goem coung: nyid.
19 Nyang: gi houg: bang: ri shid: gyoin mo lhoid pyoin yu.
Nyang: gi zooyoid, phang" khoug shau" da" ayo, moo
houg: bang: ri lhoid pyoin' kangso' dei nyid nhang: wa nghoid.
20 Ngoonu" da" nheig byu jang: gi Aseing moo: nghoid nyang: gi: ngoonu" da"
goin coung: su: yo' ngoonu" da" pang" thoug su: nghoid.
21 Ngoonu" gi: nya: gyeung" shang: myeing ri loem khau: nyid.
Ngoonu" gi: nyang: yoomo gau yi ngei pyo: nyid boem.
22 Aseing we' nang gi: ngoonu" da" nheug byu jang nghoid ziyo' dakhyoo" ti"
re" da" geung: teung jhed khyeing: kang: khyeing-
ngoonu" yo' dage" dajo, nyid baja" o".