COUNG" NGHEI 29
1 Mougkhung: moo: dei nyid mo, we' Aseing ri coung" nghei nyid we'.
Nya: da" myonhoo: phung" yoeb yo' yoem: so ri coung" nghei nyid we'.
2 Myonhoo: phung" yoeb yo' byeung" joeb, da" Aseing myeing khyang" ri coung" nghei we'.
Gyeung" shang: su: nyang: thu myhang lo da" uri nya: shidkhoin" moo: goeb pid nyid we'.
3 Aseing da" thui: moo" gi panglai: gyid thoem" mo myeung thu lo.
myonhoo: phung" yoeb yo' byeung" da" Mangso thui: gi moug: goin' thui: yo' du lho:
nya: da" thui: gi nammugdara tho' moo lang: thang: dajha" tu" to".
4 Aseing da" thui: gi damyeung thu lo nyid.
Hau: da" thui: gi yoem: moo" so' moo" yo' byeung" ziri shoug" gyo.
5 Aseing da" thui: yoomo shamu gam joem gyau: moin" lo.
Lebanon boem mo shug gam joem lang" bo gyau: moin" lo.
6 Nyang: gi Lebanon boem joem ri nujung nu" yhang: ti" peug byam, yen" nhang: lho:
Hermon boem ri we' nujung" bam: zoo: yhang: ti" thu' byam, yen" nhang:.
7 Aseing da" thui: gi lhab' myeug da" abang ri bang nhang: nyid.
8 Nya: da" thui: gi dain' pyoid yoo ri nain" nyid nhang:-
nyang: gi Kedesha dain" pyoid yoo ri nain" nhang: nyid.
9 ?Aseing gi myonhoo: phung" yoeb bo jo, baja" o"? ga: nya: Noku Yhoem: Moo" khoug: moo
byu yugkhang" moo" gi coung" nghei nyid da" uri
Aseing da" thui: gi shookhi" gam joem ri nain" nyid nhang: lho:
seiggam joem mo seig fu' joem ri yu, gyo" loo" nhang: pyam.
10 Aseing gi no, thang panglai: gyid thoem" ri vhoebkhang" nyid.
Nyang: gi apyaid atoo: mo khokham yhang: ti" vhoebkhang" nyid.
11 Aseing gi nya: byuphung: yiri geung" teing nhang: to" lho:
Nyangnu" ri myenjham" ngei pyo: ziyo' mainkaid byid: nyid.