COUNG" NGHEI 27
1 Aseing gi nga" da" bidbang yo' khyoid yu khyoo: nghoid yoomo ngoo hang" ri we' gyoug aca" wa.
Pyaid mo too: mo da" Aseing gi gyoug ci' ja: dangain" jang" mo ngoo ri lhoug zung" nyid yoomo
ngoo khanham we' gyoug dain zi ashoug" loo: wa.
2 Akhyeung" bang: gi ngoo ri thougtheung lho: said pyam, wa ga: yoem: kaid lo boem
nghoid loug we' nyangnu" gi thoem: tho: lho: wigi leung lo" boem wa.
3 Gyidab, goin" ngoo ri lheung khoem to" boem nghoid loug we' ngoo gyoug dain' wa zi anghoid.
Gyivoo joem ngoo ri zain: lo boem nghoid loug we' ngoo gi Mangsoo ri za: loem khau: nyid wa.
4 Ngoo gi Aseing ri daja: mho' bye:- ngoo vho: zigi daja: kyeing" za: nghoid.
Aseing da" yhoem: moo: dapyaid goin" shoug" nyid lho:
nya: da" ge khyoo: ri hougmoo: myid fang wigi nyang: khyoo: shed yu wa ziri: mho' nyid.
5 Yau: khe" kyi" khyeug zi thoung" shau" da" bidnyid ri
Aseing nyang: ngoo ri lhoug zung" byid: wa zi nghoid.
Nya: da" Noku Yhoem: Moo" moo ngoo ri myenjham" nyid nhang: lho:
myhang: da" lug moo" boem tho' moo ngoo ri gau: nyu: nhang: nyid.
6 Hougsu" nghoid yoomo ngoo ri lheung khoem to" da" gyivoo joem ri oung: pyam wa nghoid.
Gau, yi ngei pyo: da" thui: yo' nya: Noku Yhoem: Moo" moo xoin" to' byid: wigi
nga" jikhoin" lid jhoem" thui: khyo" Aseing ri coung" byid: nyid wa.
7 Aseing we" nang ri ngoo yoid mho' da" uri tam" gyoo: byid: we'.
ngoo ri: nheug khyeug zoore tu" byid: we'.
8 Nga" da" jang" moo: tain" re" lho: coung" pid we' ga: nang tid uri
ngoo gi Aseing jang" moo: ju" tain" ri" wa ein: tu" bye:.
9 Nga" da" jang" mo re" da" myonhoo: goo khyoo: alheung: loo.
Re" da" deizoo: ngoo ri akhaid thu pyam.
Ngoo ri: nheug ayoo: nang gi ngoo ri pang" thoug nyid su: nghoid.
Nga" da" khyoid yu Aseing Mangsoo we"- ngoo ri ashe: pyam, too.
10 Nga" myhi' phoo yigi ngoo ri she: pyam, nghoid loug we'
Aseing gi ngoo ri lhoug zung" nyid goin coung: nyid.
11 Aseing we" nang zei: nhang: nau da" moo" zoo" ngoo ri jhau" byid: lho:
ngoo ri gau: nyu: da" khyoo: moo: shu" soo" we'.
Khasu" wim ga: ri ngoo moo: gyivoo myoo" sho' nyid.
12 Mhau' kyoug fain" vo lho: thougtheung gyikoid da" gyivoo joem lo, moo
ngoo ri akhaid lham, too.
13 Aseing da" ge lho khyoo: joem ri
ngoo dei nyid shi" da" he: pyaid moo: nyang:-
shau" myang kham' zoo: wa nghoid ziri ngoo se' nyid.
14 Aseing ri loem khau: nyid we' nheigloem: abyo, loem" jeung" nyid we'.
Aseing ri loem khau: nyid we'.