COUNG" NGHEI 21
David Da" Jikhoin" Daloem:
1 Aseing we" nang gi khokham ri yoem: vhoo" byid: yoomo nyang: gi gau yi nyid.
nang gi nyang: ri oung: doid loo" nhang: yoomo nyang: gi ngei pyo: nyid.
2 Nang gi nyang: myid vho: nyid khyoo: ri byid: bye:.
Nang gi nyang: mho' da" khyoo: ri tam" gyoo: byid: bye:.
3 Nang gi nya jhang khyoo: gyi: thang mainkaid jeju" yo' re" lho:
nang gi nya: vhuloem moo sheing: bidmug ri zhung" byid: bye:.
4 Nyang: gi kangso' ri mho' yoomo nang gi nyang: ri sheung: da"
jang: kham: kangso' jhung" xi" ri byid: bye:.
5 Re" da" pang" thoug khyoo: yoomo nya: da" myonhoo: phung" yoeb gyi: sheung: jo.
Nang gi nyang: ri myeing fu" loo" wa da" yoem: yo'
phoug" ge" da" yoeb bang ri byid: too" bye:.
6 Re" da" mainkaid jeju" gi nyang: moo: khanham we'
byeung: abyed dajo, jo, lho: re" shidkhoin" moo:
nyang: nyid nyid yoomo ngei pyo: khyoo: byeung" jo.
7 Khokham gi Aseing ri loem khau: nyid.
Myhang: thang su: da" geung: teung jhed khyeing: kang: khyeing: yoomo
nyang: gi khanham we' shoug" gau: nyu: nyid.
8 Khokham gi nya: gyivoo dangain" ri myheug tei" loo wa.
Nyang: gi nyang: ri ngheing" mo yugkhang" moo" ri we'
myheug tei" loo wa zi nghoid.
9 Nyang: thu lo uri myiyham: wigi mhe: kyoug pyam yhang: ti"
nyangnu" ri mhoin pyam loo wa.
Aseing gi nheug khoo" yo: ziyo' nyangnu" ri myhau: pyam, lho:
myi: gi nyangnu" ri nge" joem: pyam loo wa nghoid.
10 Khokham gi nyangnu" da" nya: myid: nya: zoo: yi dangain" ri
shid: joem: byo, yoin" loo" nhang: wa
nyangnu" gi byukung: ayo" doem xo' boem loo: wa.
11 Nyangnu" gi nyang: ri zain: wa shid re" nyheung soin lho:
akhyoo" shoo nghoid loug we'
nyangnu" gi oung: loo" wa zi anghoid.
12 Nyang: gi nya: myookhaid joem ri beug kaid wigi
Nyangnu" ri phang: tau" loo" nhang: wa.
13 O" Aseing we" re" da" yoem: moo" yoomo nang ri ngoonu" coung" byid: nyid.
Ngoonu" gi re" da" yoem: so' ri coung" nghei lid jhoem" yang" nyid boem wa.