COUNG" NGHEI 16
1 O" Mangsoo we"- ngoo gi nang riza: loem khau" nyid.
Houg: yoomo ngoo ri lhoug zung" goem coung: byid: we'.
2 ?nang gi nga" Aseing nyang: nghoid
ngoo shoug" kham zo: da" ge khyoo: dangain" gi
re" jang" mo za: nghoid? ein: ngoo Aseing ri tid nyid.
3 Aseing da" nheigloem: zung" byu yigi khayhi' ge thang lha".
Ngoo vho: ngei thang da" zigi
houg: bang: yo' dage" bo shoug" nyid wa shid re" nghoid.
4 Goo tu: da" yu phara" khyoo: moo: cang khaid loo mo, gi
atho' tid da" sho" jhen kyi" khyeug khyoo:
thoung" shoug" zoo: goo" wa zi nghoid.
Ngoo gi nyangnu" da" xoin" to' jang: moo:
bo loem wa zi anghoid.
5 Nang gi dangain" da" Aseing nghoid lho:
ngoo vho: ca" nyid khyoo: dangain" ri
nang gi ngoo ri byid: nyid.
Nga" ju" loo wa khyoo: dangain" gi
re" lo, khoug: moo: za: bo nyid.
6 Nang ngoo ri byid: da" jeju" joem gi
khayhi' mau" pho" zi nghoid lha".
Houg: gi khayhi' ge zi nghoid lha".
7 Aseing gi ngoo ri: khyoo: shed byid: nyid yoomo
ngoo gi nyang: ri coung" nghei nyid lho:
nga" myid soin: emyed ri
myen" ayo, moo ngoo ri: tid poin" khyoo: shed byid: nyid.
8 Aseing gi ngoo yo' khanham we' dage" nyid ziri ngoo se' nyid.
Nyang: gi nga" nam tain" moo: nyid yoomo
ce: noem we' ngoo ri yo" leu" nhang: wa zi anghoid.
9 Hougsu" nghoid yoomo ngoo nheugshid: yoem: yo" yu.
Gau yi lho: ce" gyi we' aboo loo: myenjham" nyid bye:.
10 Khasu" wim gari nang gi ngoo ri
moo: vo, moug: yoem: so' mo goem loem yu byid: bye:.
Hau: lho: nang jheddab su: ri- moo: vo, moug: moo:
she: pyam, too" wa zi anghoid.
11 Nang gi ngoo ri kangso' dei wa da"
khyoo" moo toin" shed byid: wa nghoid.
Nang gi nga" da" nam, moo: nyid yoomo
ngoo gi gau yi ngei pyo: ziyo' apyaid atoo: moo:
myenjham" nheugdeug nhang: nyid bye:.