COUNG" NGHEI 141
1 Aseing we"- nang ri ngoo yoid mho' nyid-
ngoo ri akhid" nyang: pang" thoug yu we'
nang ri ngoo yoid mho' nyid uri ngoo ri tam" gyoo: byid: we'.
2 Nga" da" akyu" mho' thui: ri nam, pyo: da" xoin" yo' dakhyoo" ti"
ngoo tu: ci: da" lo, ri myen" ri ngei" byid: da" xoin" yo' dakhyoo" ti" lhoem: kham: yu byid: we'.
3 Aseing we" nga" da" nhoid moo: goem loem su: dayug-
nga" nhoid yid khoem" duang: moo khoem" zung su: dayug nyheung too" byid: we'.
4 Shoid vhang: da" moo" zei: nau nyid jang" mo we'
ashoeb mo, nyangnu" da" akhyeung" moo" zoo" moo bo vang zei: nau nyid jang" mo we'
ngoo ri ve: gang: loo" nhang: we'.
Nyangnu" da" zoo: shug pui" moo: ngoo khanham we' abo vang loem" baja".
5 Byugi: yigi ngoo ri shen" yhen lho: nheig khyeug ziyo'
ngoo ri jhau' mho' nyid goo" baja" Nghoid loug we'
Nyangnu" da" akhyeing" moo" zoo" ri ngoo thougtheung lho:
khanham we' akyu" damho, nyid yoomo akhyeing" bang: da" coung" nghei ngi: shab da" khyoo: ri
ngoo khanham we' lhoem: kham: yu wa zi anghoid.
6 Nyangnu" da" mung" zoug: khoin" voin mo, gi
lug pyo' phyoo" mo du" khyo' pyam zi shoug" nyid da" uri
mung" byu yigi nga" da" dang: khoin" joem gi
deingmain" nyid ziri yhe: yu" boem wa nghoid.
7 Nyangnu" da" shooyoug: shooyang joem gi
boug kho' to" da" thang" khyam" yhang: ti" adu, atoem bue" lo" byug bye:.
Houg: yoomo nyangnu" da" shooyoug: joem ri
loeb nhoid khoin" yam, cang: lhu: sain" to" boem ago".
8 Nghoid loug we' nga" da" myhang: thang Aseing we"-
ngoo gi: nang ri daloem khau: nyid.
nang goem loem byid: wa ziri ngoo dasho: nyid.
Ngoo ri ashid: nhang: shi" o".
9 Nga" shid re" Nyangnu" thoung: to" da" lhid joem mo we'
akhyeing" da" moo" zei: mo da" tei" joem mo we' ngoo ri goem loem yu byid: we'.
10 Ngoo gi ce" goo, aduang loo: za: yhe: lo" uri
akhyeing ashoeb, bang: koem gi
Nyangnu" nya: da" gyoin: moo gyoo" goo" baja".