COUNG" NGHEI 132
1 Aseing we"- David yo' nyang: kham zo: lid loo bye: khyoo: dangain" ri ato" myhed pyam.
2 Aseing we"- nyang: dangsoo" byid: to" ziri we'
Yaku da" myhang: thang Mangsoo-
nang ri nyang: dang: theing to" ziri we' myid boin: nyid we'. Hau: dang: gi
3-5 Ngoo gi Yaku da" gyi: myhang: Mangso shid re" yhoem: daloem-
Aseing shid re" joyoo daloem abain koid koid gi
ngoo gi yhoem: khyoo: aloo" wa yhoeb yoo avang wa
ngoo gi doug anoo: wa yhoeb we' ayhoeb wa.
6 Bedlehem voogung moo Dang: Theing Kuid: khyoo: ri ngoonu" shau" gyo: lho:
hau: Kuid: ri Yearim da" dain" moo: ngoonu" myang boem bye:.
7 Aseing yhoem: khyoo: nyhang" yhe: loo" loo: shang-
nya: khokham zhungtang shidkhoin" moo
nyhang" coung" pid boem shang.
Hid: moo: khanham we' danyid nyid we'.
8 Aseing we' re" da" yoem: so' alhoo: again nghoid da-
Dang: Theing Kuid: yo' dage"
Mangso Noku Yhoem: Moo" khyoo: ri" we'.
Hid: moo: khanham we' danyid nyid we'.
9 Re" da" khainjung yigi deingmain" da khyoo: ri
khanham we' dakoid nyid goo' baja"-
re" da" byumyu" yi we' gau yi lho: coung" nyid goo" baja".
10 Aseing we" nang gi re" da" deizoo: David ri dangsoo' khoin" byid: too" bye:-
re" da" khyen: to" khokham ri ashe: pyam lhe.
11 nang gi David ri geung: teung dangsoo" khoin" byid: too" bye:-
dangsoo khoin" ri: nang doem yoeb yu wa zi anghoid-
hau: dangsoo" khoin" gi ngoo gi re" zoo: yi mo dayug ri
khokham bui" nhang: lho: nyang: gi re" thang: moo: khoo" zhung: wa zi nghoid.
12 Re" da" zoo: yigi nga" dangsoo" khoin" yo'
ngoo nyangnu" ri byid: to" da" amyeing" dang: joem moo
deingmain" nyid boem nghoid rigi
nyangnu" da" zooshang: yi we'-
ayo, bain sho' moo: re" khyoo: ri shoug" seung: nyid boem wa nghoid ga: tid to".
13 Aseing gi: Ziun ri khyen: yu bye:- nyang: gi hau: ziri
nya: yhoem: koid nau nyid.
14 He: joyoo gi ngoo khokham we' nyid wa joyoo nghoid.
He: zigi ngoo khoo" zhung: wa vho: ngei da" joyoo nghoid.
15 Ngoo gi Ziun voogung ri nyang: moo: ca" yo nyid da" khyoo: dangain" ri
agoin agoo" pang" thoug byid: wa zi nghoid.
Ngoo gi: nya: da" sho" jhen: jang" moo zoo: noem yo" zho" jhoug gyi: loo nhang: wa.
16 Ngoo gi nya: khainjung yi zei: da" moo" zoo" dangain" jang" moo mainkaid byid: wa.
Hau: lho: nya: byumyu" yigi ngei pyoo: yoomo
jihkoin" khoin" lho: nyho: phau: lo boem wa.
17 He: joyoo moo ngoo gi David da" amyed ashen yi mo
dayug ri khokham zeing bue" lo nhang: wa nghoid.
18 Ngoo gi nya: da" gyivoo joem ri sho' phu" nhang: wa nghoid.
Nghoid loug we' nya: da" khokham mungdain: gi
yo" loo de, lo wigi bug thu' sheing" jhu" loo wa nghoid ga: tid.