COUNG" NGHEI 108
1 Phoo,Mangsoo we"- ngoo gi nang ri bain" sho' loem bye:.
Ngoo gi nang ri jihkoin" yo' coung" nghei wa zi nghoid.
Nga" da" soozoo: we" boin: gyeing: re.
2 Nga" da" teing yo' khalhang we'
boin: gyeing: ge bid moo" khyab, ri we'
ngoo nhau" kaid wa nghoid.
3 Aseing we" byumyu" yi da" mo, phung gung moo
nang ri ngoo jeju" daboin: nyid wa zi nghoid.
Byumyu" yi da" shidkhoin" moo
ngoo nang ri coung" nghei nyid wa nghoid.
4 Re" da" geung: teung jhed khyeing: kang khyeing: gi
mougkhung: mougdi moo: ju" sho myhi: jo, wigi
re" da" dangsoo" khoin" gi moug: laid phyoo" moo: ju" jo.
5 Mangsoo we"- mougkhung: moo: re" da" gye nghoid thang khyoo: yo'
myidjang tho' moo: nghoid loug we'
re" da" myonhoo: phung" yoeb doug bang jo, ziri toin" shed byid: baja" o".
6 Re" da" yoem: so' yo"- ngoonu" ri khyoid yu we'.
Ngoonu" da" akyu" mho" thui: ri we' tam" gyoo: byid: we'.
Houg: khyo" wigi nang jheddab da" byumyu" yigi
khyoid yu zi shau" boem wa nghoid.
7 Mangsoo gi nya: da" gyeung" shang: joyoo mo wigi tid nyid zigi
oung: doid lo" khyoo: moo ngoo Shekhem ri gam byid: wa nghoid.
Sukhod koolhang ri we' nga" byumyu" yi da" lo, moo:
ab byid: pyam wa zi nghoid.
8 Geliad gi nga" zi nghoid Manashe we' nga" zi nghoid nyid
Ephrim gi nga" da" joto' mug nghoid wigi
Yuda gi nga" da" amyeing" lhamdung: nghoid.
9 Nghoid loug we' Moba ri gi nga" da" khyid cid" bain khyo" ci: pyam wa nghoid.
Edom tho' moo: we' nga" khyid baid ri du" ke" too" wa
hau: zigi ngoo seung: yu wa ein: da" alhoo: nghoid.
Philisti da" atho' moo ngoo gi oung: doid lo" da" nyho: phau: loo wa ga: tid.
10 Mangsoo we"- hau" geung: teung da" voogung khyoo:
ngoo ri: hang" se' shu" yhe: loo" wa lha".
Edom khyoo: ngoo ri hang" shu" vang yhe: loo" wa lha".
11 Nang gi ngoonu" ri gyeing" gyeing" nyang: she: pyam, too" bye: la".
Ngoonu" da" gyiphung moo" yo' dage nang athu ri" loo: la".
12 Gyivoo phoo ri lhoem: thoug shang" wa shid re" ngoonu" ri pang" yu we'
byu yi da" pang" thoug khyoo: gi akoem: za: danghoid nyid.
13 Mangsoo gi yha" da" tab, khyoo: bo yab nghoid rigi
ngoonu" gi oung: doid lo" khyoo: ri yo" yu boem wa nghoid.
Nyang: gi ngoonu" da" gyivoo joem ri soem" joem: loo" nhang: wa nghoid.