PHILIMON
JHANG FOIN: KAID MOUGSOUG"
(Philemon)
Philimon gi Kolose phung mo gye" yhau: gyen: thang da" byu dayug nghoid wigi Onesimo ga: da" join pho da" yhoem: seing: we' nghoid nyid. Danyid" ri join pho da" yhoem: seing: jhang mo phang: lo" thang: ri thung: moo loung" jo, da" lagyoo: Polu yo' yhe: shau" go, lagyoo: Polu jhang mo ngeibu: ludang: ri shoug" gyoo: yoomo Onesimo gi Khristain byu dayug bue" loo bye:- Philimon da" mougsoug" moo lagyoo: Polu gi Philimon ri nya: da" join phoo yo' ngei pyo: da" nheigloem: yo' doem yo" zoem" khau: nyid wa shid re" mho' yoid kaid.
Hau: da" join phoo ri lagyoo: Polu gi Philimon jhang khyoo: doem nhang: kaid da" uri Philimon gi nyang: ri yooboo lhoem: khyoid byid: lho: join dayug khyo" we' anghoid loo: za: Khristain mangnhung" dayug nghoid khyo" lhoem: kham: yu wa shid mo Polu mho' yoid kaid.
1
1 Yesu Khristu da" moo" voinvu, yoomo thung: loung" jo, da" ngoo Polu yo' ngoonu" da" mangnhung" phoo Timothi gi nga" eig yug da" bidnoem yo' moo" dage" zoem" voin da" Philimon jhang khyoo: we'
2 Nga" eig yug da" nham" moo" Aphia ri we' nga" eig yug da" gyizoo: byencang" Arkhipo jhang khyoo: we' re" da" yhoem: moo noku nyid da- Phoung: byu yi jhang khyoo: we' mougsoug" lhid" kaid.
3 Ngoonu" da" nya: phoo' Mangsoo yo' Aseing Yesu jhang mo jeju" yo' ngei pyo: da" khyoo: gi nanu" yo' dage" dajo, jo, baja" o".
4 Nga" da" akyu mho' da" ayo, khang" moo" moo re" da" khyoo: ri tid wigi nga" Mangso jhang jeju" ri coung" byid: nyid.
5 Khasu" wim ga: ri nang gi Mangso byumyu" dangain" bang: ri jheddab nyid wigi Khristu Yesu ri loem" jeing" nyid da" khyoo: ri ngoo shau" gyo: nyid.
6 Ngoonu" gi nang yo' loem" jeing" da" byu yi nyang: cang" shau" zoem" khoug: wigi nyhang" gi Khristu yo' dadeing: za: bue" loo yoomo kangso dei da" khyoo: moo yo" yu da" jeju" dangain" ri je" no, khyo" se' gyo: loo wa shid mo ngoo akyu" mho' nyid.
7 Mangnhung" phoo' we"- re" da" jheddab nheigloem: gi ngoo ri gye" gau yi nhang: lho: nheigloem: yoem: vhoo" azeing' yo" yu nhang: nyid. Nang gi Mangso byu yi da" nheigloem: ung: khoug: dangain" ri yo" pyoo: byid: abye:.
8 Khyoo" he: khaid yoomo Khristain mangnhung" dayug khyo" wigi nang zei: ca" da" moo" ri zei: wa shid re" asho' agyug loo za: zei: nhang: da" dang: pyeing: kaid.
9 Ngoo gi Khristu Yesu da" lagyoo: lamang: nghoid nyid ziyo' akhid" uri nyang: yoomo thung: lung" su: Polu nghoid nyid nghoid loug we' ngoo gi nang ri jheddab yoomo mho' yoid kaid.
10 Khristu moo nga" da" zoo: gyeing" nghoid nyid da" Onesimo shid re" ngoo nang ri mho' yoid kaid. Khasu" wim ga: ri ngoo thung: loung" jo, jang" moo nya: da" Venyi: shoid mo, nya: phoo' bue" loo bye:.
11 Dalheung: rigi nya: shid re" ce" akyu" aboo nghoid loug we' akhid" gi re" da" shid re" we' nga" shid re" we' akyu" boo su: bue" loo bye:.
12 Akhid" ngoo nyang: ri re" jhang khyoo: nhang: kaid bye:- nga" jheddab myid we' nyang: yo' dage" bo re" loo bye:.
13 hau: ngeibu: ludang: yoomo thung: loung" jang" moo nyang: gi re" da" shid re" ngoo ri pang" thoug dei byid: wa shid re" nyang: ri he: jang" moo ngoo shu" nyid nau.
14 Nghoid sho loug we' ngoo ri pang" thoug yu wa shid re" nang ri nhang: khyo" ngoo akoid noug nanyang: gye" myid pyo: ziyo' bo pang" thoug wa ziri ngoo vho: ngei nyid. Houg: yoomo nang myid aveung" zi ce" noem we' ngoo akoid wa.
15 Onesimo gi khanham we' nang yo' doem yo" nyid wa shid re" nang yo' dayo, daboin: za: gang: go" lo" zi date: nghoid wa
16 Akhid" gi join za: we' anghoid loo- join tho' moo je" jain" da" jheddab da" Khristain mangnhung" dayug bue" loo bye:. Nyang: gi nga" da" shid re" khayhi' gyeing" phoug" dab su: bue" loo bye: lha! Re" shid re" join dayug khyo" we' Khristu moo mangnhung" dayug khyo" we' re" shid re" we' khayhi' gyeing" phoug" dab su: bue" loo wa lha!
17 Houg: su" nghoid yoomo nang gi ngoo ri re" da" nheig dab byencang" phoo' yhang: ti" shau" ngham" yu nghoid rigi ngoo ri yhang: ti" nyang: ri lhoem doem kham: yu we'.
18 Nyang: gi nang ri daja: ja: shoid vhang" to"- hougsu" anghoid lang" gi jhen: dab jo, nghoid ri we' hau: zi gi nga" jhen: khyo" soin: yu byid: we.
19 Ngoo Polu gi hau: jhen: ri xab byid: wa"- ein; wigi ngoo nya: lo, yo' nyang: lhid" kaid bye:. Nghoid sho loug we' nanyang:- re" da" kangso shid re" ngoo ri jhen: ein: wigi atid thu noo" loo.
20 Hougsu" nghoid yoomo nga" mangnhung" phoo' we"- hau: Aseing; da" myonhoo: ri tu: lho: wigi jeju" yo' hid: ngoo mo, tid kaid da" khyoo: ri zei: bui" byid: we' Khristu moo mangnhung" nyang: cang" khyo" wigi nga" nheigloem: emyed ri ngei bu: nhang: we.
21 Nang gi ngoo mho' yoid yang: ti" zei: byid: wim bye: ein: loemkhau: zoo re" he: mougsoug" ri lhid" nyid zi nghoid. Gyeing" nyang: ngoo tid nyid tho' ri jain" sho' koid wim bye: ein: ngoo se' nyid.
22 Hau: tho' moo je" wigi nga" shid re" joyoo daloem: ri bo nyheung too" byid: we. Khasu" wim ga: ri Mangsoo gi nanu" dangain" mo, da" akyu" mho' da" dang: ri tam" gyoo: byid: wigi nanu" jhang khyoo: ngoo ri doem yo" ju" ri" nhang: wa ziri ngoo nheig byu nyid.
23 Khristu Yesu da" khyoo: ri kho" kyoo" yoomo ngoo yo' dage" thung: loung" jo, da" nga" byencang" Epaphra gi nang ri vhu" kaid da.
24 Ngoo ri bo pang" thoug mo, nghoid da" Marku- Aristaku- Dema- Luka bang: we' nang ri vhu" kaid boem.
25 Aseing Yesu Khristu da" jeju" gi nanu" dangain" bang: yo' dage" dabo jo, baja" o".