PETRU
LHID" FOIN: KAID DA" MOUGSOUG" DALOEM:
(1Peter)
Lagyoo: Petru xang: she" lhid" to" da" lhid" pug gi Asha zoo: mougzhung: du khyoo:- byo sain" nyid da" Khristain phung: byu yi shid re" lhid" kaid da" mougsoug" nghoid. He: da" mougsoug" moo houg: bang: ri Mangsoo khyen: yu to" da" byu phung: ga: wigi myheung to" boem- he: mougsoug" pug, da" myid soin' to" da" byu phung: ga: nyhang" nyang: kham: yu loem" jeing" bye: da" khyoo: nghoid yoomo sho" jhen: kyikhyeug shen" yhen shau" nyid da" phung: byu yi ri yoem: byid: da" dang: tid kaid zi nghoid. He: mougsoug" lhid" da" dang: gung gi nyangnu" da" laloem, lakhau: yoomo shen" yhen shau" da" he: mougsoug" nghab mo, ri yoem: byid: nyid zi nghoid. Houg: su" yoem: yo" byid: wa shid re" mougsoug" lhid" su: gi he: mougsoug" da" myid byu to" da" ayang: gi loemkhau: khyoo: yoomo pyi: sho:- shen" yhen shau" nyid da" he: mougsoug" lhoem: nghab mo, ri yoem: byid: nyid zi nghoid.
Nyangnu" ri yoem: yo" byid: sho' mougsoug" lhid" su: gi Aseing Yesu da" ngeibu: lu dang: nghoid da" Yesu gi shid: kham: lho: doem dei to' lo ziyo' mougmyid khyoo: doem ju" gyoo" loo wa da" Dang: thang" cab byid: too" yoomo yo" yu da" loem" jeing" bang: da" nheig byu joyoo ri nyangnu" ri doem myid boin: nhang: khyoo" nghoid. Hougsu" nghoid yoomo nyang: nu' gi lhoem: yo" kham zeing: wa ziyo' hau: shen" yhen khyoo: gi loem" jeing" khyoo: gyeung" la"- agyeung" la"? ga: kyeung yu" da" khyoo: nghoid ziyo' Aseing Yesu doem gyoo" lo da" bidnyid moo nyangnu" gi coung" nghei byid: da" jhungshug yo" yu wa ziri nheig nhei: lho: hau: pyi: sho: shen" yhen khyoo: ri yo" kham: zeung: boem wa shid re" yoem: byid: kaid. Hid: su" jam shau" nyid wa ayo, moo yoem: byid: dang: yo' dage" mougsoug" lhid" su: gi nya: da mougsoug" lhoem: nghab mo, ri Yesu Khristu seung: da" byu yi khyo" kangso dei nyid boem wa shid re" jhoug, jhoin" kaid.
1
1 Aseing Yesu Khristu da" lagyoo: Petru jhang mo Puntu: Galati- Kapadokia Asha mung" yo' Bethuni mung" joem moo byo sain" nyid mo, Mangsoo khyen: yu to" da" byu phung: yi jhang khyoo: mougsoug" lhid" kaid.
2 Phoo Mangsoo gi nyang: myid to" ziyo' dakhyoo" ti" Yesu Khristu ri tam" gyoo: wa ziyo' nya: suid" yo' cid" yung" cid" lhoo' wa shid re" phoo' Mangsoo gi nyang: soin' nyheung ziyo' dakhyoo" ti" nanu" ri khyen: yu bye: ziyo' nya: da" Venyi: gi nanu" ri gyeungshang: da" byu yi bue" loo nhang: bye jeju" yo' myen, jham" khyoo: gi nanu" moo myo: tham: loo baja" o".
3 Ngoonu" gi ngoonu" Aseing Yesu da" nya: phoo' Mangsoo ri jeju" boin: nyid boem shang- khasu" wim gari Mangsoo gi atho' tid da" nheigkhyeig shoomyen: si su: nghoid yoomo Aseing Yesu Khristu ri shid: jangmo doem dei to'' loo nhang: khyo" wigi ngoonu" ri kangso aseig byid: bye:- houg: yoomo ngoonu" moo dei nyid wa da" nheig byu joyoo ri yo" yu boem bye:.
4 Hougsu" nghoid yoomo ngoonu" gi Mangso byu phung: shid re" Mangsoo nyang: shoung: too" byid: bye: da" agyid asoo: ri yo" kham: zoo: wa ziri nheig byu lang" nyid boem. Mangsoo gi hau: da" agyid asoo: ri nanu" shid re" mougkhung: mougdi moo young: too" byid: bye:. Houg: yoomo hau" agyid asoo: gi abyo, abei- young" gyeung"- ashoem: abyo, lo: da" zi nghoid.
5 Hau: agyid asoo: gi nanu" shid re" nghoid- nanu" gi loem khau loem" jeing" yoomo Mangso yoemso yo' lo" thang bidnyid moo yo" toin' shed' wa jen" bye: da" khyoid yu khyoo: yoo" sho' zung" lhug zi shau" mo, nghoid ago".
6 Nanu" gi jham" ca: yu" da" jhuphyo' aja: ja: thoung" shau" yoomo akhid" daso' dadam myidmyoo: ungloug zi shau" nyid boem nghoid loug we' tid lid loo bye: da" khyoo: yoomo gau yi ngei pyo: nyid ge.
7 Hougsu" jham" ca: yu" da" jhuphyo' shau" khyoo: gi Mangsoo ri nanu" loem" jeing" khyoo: gyeung" ziri toin" shid khyoo: nghoid. Byug thang loo" se' da" ngei sheing: rilang" myi: yo' jham" ca: yu" zi shau" nyid Houg: yo' dakhyoo" ti" sheing: tho' moo je phau" da" nanu" da" loem" jeing" nheigloem: ri we' gyeungshang: lho: geingteing wa shid re" myi: moo kyeung zi shau" nyid Hougsu" nghoid lang" nanu" gi Aseing Yesu doem gyoo" lo da" bidnyid moo myonhoo: bug thu' sheing" jhu" ziyo' coung" nghei zi shau" kham: yu boem wa zi nghoid.
8 Nanu" gi Khristu ri amyang yu" boem nghoid loug we' jheddab nyid- akhid" amyang shi" nghoid loug we' nanu" gi Aseing ri loem" jeing" nyid bye:- hougsu" nghoid yoomo nanu" gi nhoid, yo' tid loo, aoung: loo: sho' gau yi ngei pyo: ziyo' ngei pyo: nyid boem bye:.
9 Khasu" wim ga: ri nanu" gi Aseing Yesu ri loemkhau: loem" jeing" bye: yoomo nanu" da" kangso ri khyoid yu zi shau" boem bye:.
10 Lapi: yi gi hau: khyoid yu khyoo: yo' sen: lho: wigi voin: tang: cang phoid: sho: lo" boem bye:- nanu" gi Mangsoo nanu" ri byid: wa ga: da" he: da" jhungshug khyoo: ri Lapi: pe: kyo" boem bye:.
11 He: da" khyoid yu khyoo: gi kha: yo' kha: khyeing: mo: ju" ri" wa zi we' ce: ja: ce: khyoo" re" bue" thu' loo wa ziri se' loo" wa shid re" phoid: sho: yu" boem bye:. Nyangnu" da" akhoug: moo bo vang zei: nyid da" Khristu da" Venyi: gi Yesu shau" kham zoo: wa dam shid re" we' hougsu" bain kham zo: da" thang: ri shau" kham zoo: wa da" myonhoo: phung" yoeb, ri we' no re toin" shid to" uri he: da" ayo, ri toin" shid zi nghoid nyid.
12 Mangsoo hid: bang: ri' toin" shid zigi akyu" yoo" wa shid re" anghoid- nanu" da" akyu" shid re" danghoid. Khasu" wim ga: ri nyangnu" gi nanu" akhid" lagyoo: yi jhang mo shau" gyo: yu da" ngeibu: lu dang: yo' sen: lho: no re tid to" boem- hau" ngeibu: lu dang: gi mougkhung: khyo" nhang: kaid da" gyeungshang: da" Venyi: yoemso yo' lu dang: voin lagyoo: yi tid fu" byid: bye:- hau: da" khyoo: yi ri moug: lagyoo: yi lang" bo se' gyoo: nau nyid boem.
13 Hougsu" nghoid yoomo nanu" da" nheigloem: moo moo" zei: wa shid re" jen" jen" koid lho: akhyoo" cang nyid ge- Aseing Yesu doem gyoo" lo da" uri nanu" kham: yu wa da" jeju" jhungshug yo" yu wa shid re" khanham we' nheig byu nyid ge.
14 Mangsoo ri tam" gyoo: ge'- shid phyang" aboin: asi shi' da" ayo, moo nanu" cang lo yu" bye: da" vhoo: boo myo, no, kangso dei khyoo: akoid loo: za:.
15 Nanu" ri khe: yu su: Mangsoo gi gyeungshang: nyid yhang: ti" nanu" we' byu nyid byu yab, khyoo: ja: khang" moo" moo gyeungshang: nyid ge.
16 Khasu" wim ga: ri ngoo gyeungshang: nyid yhang: ti" nanu" we' gyeungshang: nyid ge' ga: jhoem: mungdang: moo lhid" to".
17 Hau: tho' moo gootu: byu dangain" ri myonhoo: vhu" zung akhyen: loo za- nyangnu" da" moozoo" yo' dakhyoo" ti" tarha" dang: phyed byid: nyid da" Mangso jhang moo akyu" mho' nyid uri nanu" gi Mangsoo ri nga" phoo' we" ga: mho' yoid nyid boem bye:. Houg: yoomo mougmyid moo dei nyid daloo gyoo: moo hau: Aseing ri gyug phau" nyid ge'.
18 Nanu" gi nya: phoug" nya: phyid" yi apyaid mo wigi cang gyo" lo da" akyu' abo da" asam" aved mo byo, loo" se' nyid da" ngei sheing: yo' nanu" ri yo" qei khyoid yu to" zi anghoid.
19 Ce: noo adab da" young" lho' yang nu" yo' du- Khristu da" phoug" dab suid" yo' za: dayo" qei yu.
20 He: da" mougmyid ajo, shi" mo Mangsoo gi nyang: ri khyen: yu to" lho: he: mougmyid lo" thang da" bidnyid moo nanu" da" akyu" shid re" nyang: ri myang nhang: bye:.
21 Nyang: mo wigi nanu" Mangsoo ri loemkhau: loo bye:- Mangsoo gi Yesu ri shid: jangmo doem dei to'' loo nhang: wigi myonhoo: phung" yoeb, thu loo nhang: bye:- Yesu khyo" wigi nanu" hougsu" loem" jeing" loemkhau: nheig byu khyoo: gi Mangsoo moo zoug, jo, wa zi nghoid.
22 Nanu" gi deingmain" da" tarha" ri cang so" loo" yoomo nanu" da" nheigloem: ung: khoug: ri cid" yung' cid" lho, wigi nanu" nyang: cang" we' nheigloem: ung: khoug: bain sho' yo' jheddab go" nyid ge.
23 Khasu" wim ga: ri dadei nyid da" apyaid ato: Mangso mungdang: mo nanu" gi dalheung: dam khu: lo boem bye:- hougsu" nanu" gi shid: noo ase' myhi' pho da" nya: zoo: yi yo" bue" lo boem bye:.
24 Xangsu: byu yi dangain" mo, gi vu, fu" myo, yhang: ti" we'
nyangnu" da" myonhoo: ngeilang: gi sooyo myid: vhoeb bain: boo" yo' we' du nyid
vu, fu" myo, gi kyoug, nyhau" lo" lho: bain: boo" we' te: shoem: lo.
25 Nghoid loug we' Mangso da" mungdang: koem gi apyaid atoo: moo geingteing jo,- ga: wigi jhoem:
mungdang: moo tid to"- hau" mungdang: gi nanu" kho" kyoo" bye: da" ngeibu: lu dang: gi nghoid bye:.