33
1 Vhoo: mo joyoo myeing joem gi Israela byumyu" yi Moshe yo' Arun vhujhung: koid da" akhoug: moo: nyangnu" Egutu mo thu' lo thang: ri dab koid wigi nyid lo da" joyoo myeing joem nghoid.
2 Moshe gi Aseing da" amyeing" dang: khyo" nyangnu" dab koid theing: lo da" joyoo myeing loem: khang" moo" ri lhid" too" bye:.
3-4 Israela byumyu" yigi zain seig khyab daxe: wim: nyid" ein: nyid" lid: kaid pui" thang: nyid moo: Egutu mo thu lo boem ago". Nyangnu" gi Aseing lhoug zung" da" khau: moo: Aseing wigi said pyam da" zooshid" yuggi zoo: yiri myhoeb shoung: nyid boem da" Ramese voogung mo Egutu byu yi myo, shed ti: moo nyang: thu lo" ago". Hid: su" koid khyo" wigi Aseing gi Egutu byu yi da" yu phara" tho' je yoem: so' gyi: ziri ci: shug zi nghoid.
5 Israela byumyu" yigi Ramese mo thu lo wigi Sukhod moo: dab koid nyid boem.
6 Nyangnu" xo' yhe: lo" wigi dain" pyoid yoozoin" mo Etham moo: dab koid nyid boem.
7 Hau: joyoo mo nyangnu" gi Bala Zephon da" bidthu shoid Pi Hahirod khyoo: doem tau" phang: lo" wigi Migdola nam moo: dab koid nyid boem.
8 Nyangnu" gi Pi Hahirod mo to' wigi Thoem" Ni khyo" Shura dain" pyoid yoo khyoo: lid phyed yhe: ago". Soem" nyid" xo' so" lo" thang: nyangnu" gi Mara moo: dab koid nyid boem.
9 Hau: joyoo mo nyangnu" gi Elim khyoo: yhe: lho: hougmoo: dab koid nyid ago". Ciwim gari: hau: joyoo moo: gyid daxe: eig lang yo' thab gam nyhed xi: gam jo, da:.
10 Nyangnu" gi Elim mo to' lho: Thoem" Ni nam moo dab lo" koid nyid.
11 Hau: thang: rigi dab ri Sin dain" pyoid yoo moo koid da:.
12 Hau: thang: nyangnu" gi Dopkha moo: dab doem koid.
13 Houg: lho: hau: thang: Alusha moo: dab koid.
14 Hau: thang: nyangnu" shid re" shug gyid ajo, da" Rephidim moo koid boem.
15-37 Rephidim mo Hora boem ju" sho' Nyangnu" gi vhoo: moo: bo da" joyoo joem moo: dab koid boem ago". Sina dain" pyoid yoo- Kibrod Hatava (anghoid lang" mhain: mo, da" loeb)- Hazerod- Rithma- Rimon Pereza- Libna- Rissa- Kehelad- Shephera boem- Harada- Makhelod- Tahad- Tera- Mitkha- Hashmora- Moserod- Bene Yakan- Hora Hagidgad- Yotbatha- Abrona- Eziongebera- Zin dain" pyoid yoo (Hau: zigi Kadesha) yo' Edom moug: yam mo Hora boem joem nghoid ago".
38-39 Aseing amyeing" dang: khyo" khainjung Arun gi Hora boem khyoo: do, yhe: da:. Nyang: gi apyaid 123 zain- Israela byumyu" yi Egutu mo thu' lo thang: myid: xi: zain- Lhammoo" wim: khyab- lhoo' xain" nyid" ri shid: loo" bye:.
40 Khanan mung" mougpyi: shoid mo khokham Arad gi Israela byumyu" yi lo nyid boem ziri shau" gyo: da:.
41-49 Israela byumyu" yigi Hora boem mo Moba jang: pa: ju" sho' vhoo: mo joyoo joem cang dab koid lo boem ago". Zalmona- Punon- Obod- Moba mougkyoo" Abarim voogung byo, jo, jang" moo Dibon Gad- Almon Diblathaim- Nebo boem nam mo Abarim boem yo' Yerikho mo Yodan gyid lang thei: tab Bed Yeshimod yo' shug janggyoin: agyoo: mo Moba jang: pa: joem nghoid da:.
50 Yerikho mo Yodan gyid lang thei: tab hau: Moba jang: pa: moo: Aseing gi Moshe ri
51 Israela byumyu" yi shid re" vhoo: moo: bo da" jhau" shed dang: joem ri byid: da:. ?Nanu" gi Yodan gyid lang ri gu: dab lho: Khanan mung" khyoo: vang yhe: uri
52 hau: moug: moo nyid da" nyid xoug" yi dangain" ri khaid thu pyam ge'. Nyangnu" da" lugzeing yo' joto' soolhoo: joem yo' nyangnu" noku joyoo dangain" ri phyo' shoin' pyam byid: ge'.
53 Hau: moug: ri yhe: seing: yu lho: yhe: nyid nyid ge'. Ciwim gari: ngoo nanu" ri hau: mung" ri byid: bye: zi nghoid.
54 Gamboem ri kho' lho: hau: mougmyid ri byumyu" kung: khang" moo" yo' ako' khang" moo" ri kho' gam byid: ge'. Byumyu" kung gyi: bang: ri je gyi: da" mougmyid yo' byumyu" kung ngi mo, ri je nge da" mougmyid kho' byid: ge'.
55 Nghoid loug we' nanu" gi hau: moug: mo nyid xoug" bang: ri akhaid thu pyam nghoid rigi nyid thang: gyo" da" bang: gi nanu" da" myojid" mo pheilhoug: yhang: ti" nanu" da" nam zoin" mo zu: yhang: ti" kyi" khyeug byid: goo? wa. Houg: lho: nyangnu" gi nanu" ri gyi koid loo goo" wa.
56 Nanu" gi nyangnu" ri akhaid thu pyam nghoid rigi ngoo nyangnu" ri said toem" pyam wa ein: soin" to" ziyo' dakhyo" nanu" ri phyo' soin' said toem" pyam wa.