1 Aseing gi Moshe yo' Arun ri 2 ?Vhoo: moo: lhid" to" da" thung" tarha" joem ri Israela byumyu" yiri byid: wa shid re" amyeing" byid: da:. Hau: zigi ce: noo dam abo ziyo' khanham we' moo" azei: yu" da" nu: ni dadu: ri she: re" wigi 3 hau: ziri khainjung Eleaza ri byid: ge'. Hau: ziri dab tunggung shoid khyoo: she: thu yhe: lho: nya: shidkhoin" moo: said wa zi nghoid. 4 Hau: thang: Eleaza gi houg mo suid" dayham" ri yu wigi nya: lo, nyhoug" yo' Zoem" shoid khyoo: nyhed lheing: peig zhain' wa zi nghoid. 5 Shooyid- Shoo"- Suid"- vhu: joem we' wigi gung goin" ri khainjung pho da" shidkhoin" moo nghe' pyam wa zi nghoid. 6 Hau: thang: nyang: gi shamu jab- pagyoem yo' khyeing: ni khuang ri myikhyoem khyoo: du" zei kaid wa zi nghoid. 7 Hau: thang: ri nyang: gi nya: byimi ri cid" pyam- nyang: nya: gung ri cid" lho: nyang: gi dab khyoo: vang loo" wa zi nghoid. Nghoid loug we' nyang: gi myen" thang: ju" sho' thung" khyo" ayung" alho' bue" jo, da:. 8 Nu: ri nghe' da" yug we' nya: byimi ri cid"- nya: gung ri cid" ca" wa zi nghoid. Nghoid loug we' nyang: gi myen" thang: ju" sho' ayung" alho' bue" nyid wa. 9 Hau: thang: thung" khyo" younglho' yug gi hau: nu: da" myimoeb joem ri shoem" zheing" yu wigi thung" khyo" younglho' da" joyoo dab tunggung shoid moo: hau: joem ri yhe: too" wa zi nghoid. Houg moo: thung" khyo" ayung" alho' da" ziri yu pyam da" gyid phung: yu wa jang" moo ci: wa khyo" Israela shava byu shid re" hau: ziri zoem: too" wa zi nghoid da:. He: thung" tarha" gi yooboo ri yo" khyoid pyam da" moo" zoo" nghoid da:. 10 Myimoeb ri shoem" zheing" yu su: gi nya: byimi ri cid" ca" wa. Nghoid loug we' nyang: gi myen" thang" ju" sho' ayung" alho' nghoid da:. He: thung" tarha" gi Israela byumyu" yi yo' nyangnu" akhoug: moo: nyid da" tungbau byu yi shid re" ju" loo: wa da" ayo, dangain" moo: tarha" vang da" thung" tarha" nghoid da:.

11 Shid: mang moo: zhang" tain" da" hang" nghoid loug we' thung" khyo" nyhed nyid" ayung" alho' nghoid da:. 12 Nyang: gi nyang: nya: gung ri younglho' pyam wa shid re" soem" nyid" ein: nyid" yo' nyhed nyid" ein: nyid" ri gyid yo' younglho' pyam khyoo: koid ca". Hau: thang: nyang: gi younglho' wa zi nghoid. Nghoid loug we' soem" nyid" ein: nyid" yo' nyhed nyid" ein: nyid" moo nyang: nya: gung ri acid" sain pyam nghoid rigi nyang: gi ayung" alho' nghoid da:. 13 Shid: mang moo: zhang" tain" da" hang" nghoid loug we' nyang: nya: gung ri younglho' pyam khyoo: akoid da" yug gi ayung" alho' nghoid da:. Ciwim ga: ri younglho' byid: da" shid re" nya: adang moo: gyid apeig sain" byid: shi" yoomo nghoid da:. Nyang: gi Aseing da" Zoem" ri ayung" alho' bui" nhang: wigi nyang: gi Mangso byumyu" byu dayug khyo" myid jho: yu zi ashau" loo: wa.

14 Zoem" khoug: moo: byu shid: da" uri nyid da" yug hang" nghoid loug anghoid lang" hau: uri vang loo su: hang" nghoid loug nyhed nyid" ayung" alho' nghoid da:. 15 Zoem" khoug: moo: jo, da" amyhid" abo da" juang: yo' oug" khyab khang" moo" we' ayounglho' nghoid da:. 16 Said pyam shoug" su: anghoid lang" tunggung moo: nyang: nya: za: shid: da" yug ri dayug yug zang" tain" nghoid ri we' byu shooyoug: anghoid lang" loeb ri dayug yug zang" tain" nghoid rigi nyang: gi nyhed nyid" ayounglho' nghoid da:.

17 Hau: ayounglho' ziri yu pyam wa shid re" yooboo yu pyam wa nghe' ngei" byid: da" nu: ni da" myimoeb dayham" ri yu wigi oug" daloem: moo kaid lho: hougmoo: gyid gyeing: kaid wa zi nghoid. 18 Xang shi" da" moo" gi thung" khyo" younglho' da" byu dayug yug pagyoem kyang: ri yu wigi houg ziri gyid khu moo: doin: joem lho: Zoem" we' houg moo jo, da" jonu" ja: khang" moo" yo' houg moo nyid da" byu joem ri peig zhain' gyoin: wa zi nghoid. Moo" eig loem: ein: loem: gi thung" khyo" younglho' da" byu dayug yug gi byu shooyoug: ri anghoid lang" byu shid: mang ri anghoid lang" loeb ri zang" tain" da" yug da" adang moo: gyid peig zhain' wa zi nghoid. 19 Soem" nyid" ein: nyid" yo' nyhed nyid" ein: nyid" ri thung" khyo" kyeing sain' yug gi ayoung" alho' yug bang: da" adang moo: gyid peig zhain' gyoin: wa zi nghoid da:. Nyhed nyid" nyid" ri hau: kyeing sain' yug gi nya: byimi joem ri cid" lho: nyang: nya: gung ri cid" yu da" younglho' pyam khyoo: koid pyam wa zi nghoid lho: nyang: gi bidvang yo, ri thung" khyo" younglho' yug bue" loo: wa zi nghoid.

20 Byu dayug yug gi thung" khyo" ayounglho' bue" wigi nyang: nya: gung ri kyeing sain khyoo: akoid da" yug gi ayounglho' nghoid da:. Ciwim gari: kyeung sain byid: da" shid re" nya: adang moo: gyid apyi: sain" byid: shi" yoomo nghoid da:. Nyang: gi Aseing da" Zoem" ri ayoung" lhoo' bui" nhang: wigi nyang: gi Mangso byumyu" dayug khyo" myid jho: yu zi ashau" loo: wa. 21 Nanu" gi he: tarha" ri ju" loo wa da" ayo, dangain" moo phau" myang: cang yhi: goo" wa zi nghoid. Kyeing sain byid: moo" shid re" gyid peig zhain' gyoin: da" yug we' nyang: byimi joem ri cid" pyam ca" da:. Hau: gyid ri zang" tain" da" yug hang" nghoid loug we' myen" thang: ju" sho' thung" khyo" ayounglho' bue" jo, da:. 22 Ayounglho' da" yug wigi tain" da" ja: ci: nghoid loug we' ayounglho' nghoid da:. Hau: ziri tain" da" gootu: dayug yug we' myen" thang: ju" sho' ayounglho' bue" jo, wa zi nghoid.