16
1-2 Levi byumyu" Kohad kung: mo Izhara da" nya: yuggi zoo: Kora gi Moshe vhujhung: koid khyoo: ri thougtheung gyi koid da:. Nyang: gi Ruben kung: mo byu soem" yug nghoid da" Eliab da" nya: yuggi zoo: tang: Dathan yo' Abiram- Peled da" nya: yuggi zoo: Ona yo' shava byu yi khyen: to" da" myeing gyi: da" Israela vhujhung: 250 yug bang: jang" moo: xo' yu da:.
3 Nyangnu" gi Moshe yo' Arun tang: shidkhoin" moo zeing: foem: nyid lho: nya: tang: ri tid boem zigi ?Re" tang: sung xoo: bye:. Shava byu phung: dangain" ziri Aseing seing: wigi ngoonu" dangain" yo' Aseing dage" bain nghoid nyid bye:. Hougsu" nghoid ri Moshe we" ciwim yoomo re" tang: gi Aseing da" shava byu phung: yi atho' moo: nyid go" lha"? ga: tid.
4 Moshe gi hau: dang: ri shoug" gyoo: lang" nyang: nya: gung ri myidjang khyoo: goeb khyo lho: akyu" mho' nyid.
5 Hau: thang: nyang: gi Kora yo' nya: thang: cang bang: ri ?Aseing gi khayug ri nyang: seing: nyid ziri ngoonu" ri nab yo nyid" nab soin: ci: shug wa nghoid. Nyang: gi nyang: wigi khyen: to" da" yug nghoid da" nyang: wigi seing: da" yug ri phoin: khyoo: nya: jhang ri" nhang: wa nghoid.
6-7 Nab yo nyid" nab soin: nang yo' re" byu yigi myioug" ri yu lho: myi: dab da" myigyu: yo' nam pyo: ja: kaid wigi hau: ziri phoin: khyoo: ci: ri" we'. Houg: lang" ngoonu" mo khayug ri Aseing khyen: yu to" ziri ngoonu" yo" myang wa. Nanu" Levi byumyu" yigi sung nyang: xo: da? ga: tid.
8 Moshe gi Kora ri doem xo' lho: ?Levi byumyu" yi nanu" we"- tam" gyoo: ge'.
9 Nanu" Aseing jang tab yhe: wigi Aseing Zoem" moo nanu" moo" zei: lho: shava byu phung: ri yo" dei byid: wa shid re" Israela Mangsoo gi deing da" shava byu phung: yi mo nanu" ri gootu: kho' yu to" da" khyoo: ri azhei' kyeing" moo" ein: myid jho: nyid go" rhe".
10 Nyang: gi nang yo' gootu: Levi byu dangain" ri he myonhoo: ngilang: yoo" nhang: bye:. Akhid" nanu" gi khainjung aya: ri we' yo" yu wa soin' nyid goo" nhung: lha".
11 Nanu" Arun ri thougtheung myeing" myo: zigi nang yo' re" thang: cang bang: gi gyeing" nyang: Aseing ri thougtheung myeing" myo: nyid boem zi nghoid? ga: tid.
12 Hau: thang: Moshe gi Dathan yo' Abiram ri khi: nhang: kaid. Nghoid loug we' nya: eig yug gi ?Ngoonu" ari" wa.
13 Nang ngoonu" ri he: dain" pyoid yoo moo: said pyam wa shid re" mougmyid nu" da" Egutu mung" mo ngoonu" ri shu" thu lo zi agi" shi rhe". Nang ngoonu" adang moo: zoug: koid shi" wa rhe".
14 Nang gi gigi nyang: ngoonu" ri mougmyid nu" da" mung" khyoo: we' ngoonu" jonu" khyo" yoo yo' zabyid khyam: joem ri we' abyid: too" nghoid da:. Akhid" nang gi ngoonu" ri mhau fain" zoo: wa soin' nyid da:. Ngoonu" ri" wa zi anghoid? ga: tid.
15 Moshe nheig yo: lo wigi Aseing ri ?Houg: bang: ci: re" da" xoin" joem ciri: we' akhab yu o". Ngoo gi nyangnu" ri ci: we' ashoid. Ngoo gi nyangnu" loo zei: joem mo dadu: ri we' ayu byid:? ga: tid.
16 Moshe gi ?Kora ri nab yo nyid" nang yo' re" byu 250 gi Aseing shidkhoin" Zoem" khyoo: ri" ca" wa zi nghoid. Arun we' hougmoo: nyid wa zi nghoid.
17 Nanu" yugkhang" moo" gi nyang: nya: myioug" ri yu wigi houg moo nam pyo: ja: kaid lho: hau: ziri phoin: moo: yhe: shugbyid: ge'? ga: tid.
18 Houg: yoomo yuggi yugkhang" moo" nyang: nya: myioug" ri yu ci wigi myi: dab da" myigyu: yo' nam pyo: ja: kaid lho: Zoem" khoem" duang: moo Moshe yo' Arun yo' dage" yab jo, ago".
19 Hau: thang: Kora gi shava byu phung: ri khe: zheing" yu wigi nyangnu" gi Zoem" khoem" duang: moo: Moshe yo' Arun jhang myonhoo: shu: lho: yab jo, boem. Nyeigdain tung" shava byu phung: goin" moo: Aseing phung" yoeb bang thu lo lho:
20 Aseing gi Moshe yo' Arun ri
21 ?He: byu yi jang" mo phang: thu' loo" ge'. Akhid" nyang: ngoo nyangnu" ri said pyam wa zi nghoid? ga: tid.
22 Nghoid loug we' Moshe yo' Arun gi nya: tang: myonhoo: ri myidjang khyoo: goeb pid wigi ?O" Mangsoo we"- nang gi kangso' dangain" da" ajhung: nghoid da:. Dayug kyeing" yooboo koid ri shava phung: dangain" ri nheig yo: rhe"? ga: tid.
23 Aseing gi Moshe ri
24 ?Shava byu phung: yiri Kora- Dathan- Abiram bang: da" zoem" joem mo vi: khyoo: phang: thu' wa shid re" tid we'? ga: tid.
25 Hau: thang: Moshe gi Israela vhujhung: yi yo' dage" Dathan yo' Abiram tang: jang" khyoo: yhe: da:.
26 Nyang: gi byumyu" yiri ?He: akhyeing" da" byu yi da" dab mo vi: khyoo: phang: ge'. Houg: lho: nyangnu" yo' sen: da" zi ciri: we' atain" goo". Hougsu" anghoid lang" nyangnu" da" yooboo dangain shid re" nanu" we' nyangnu" yo' dage" said pyam zi shoug" goo" wa? ga: tid.
27 Houg: yoomo nyangnu" gi Kora- Dathan- Abiram bang: da" zoem" mo vi: khyoo: phang: thu' boem bye:.
Dathan yo' Abiram gi thu re" wigi zoem" khoem" duang: moo: nya: yhoem: seing: myhi' nya: zoo: bang: yo' dage" yab jo, da:.
28 Moshe gi byumyu" yiri ?Ngoo gi he: moo" dangain" ri zei: wa shid re" Aseing wigi nhang: too" yug nghoid ziyo' hau: moo" joem ri ngoo nyang: myid khyo" koid zi anghoid ziri hid: su" khyo" nanu" se' loo goo" wa.
29 He: byu yi Mangso yooboo dam byid: zi aboo loo: za: yu" yu" shid: boem nghoid rigi ngoo gi Aseing wigi nhang: kaid yug anghoid wa.
30 Nghoid loug we' Aseing gi gooki lid koid wigi mougmyid go, gyam: re" ziyo' nyangnu" gi moovo moug: khyoo: adei gung gyoo" loo" wa shid re" nyangnu" yo" gu: dangain" yo' dage" myhau: pyam nghoid rigi he: byu yi Aseing ri ngeug he: pyam mo, nghoid ago" ziri nanu" se ri" goo" wa? ga: tid.
31 Nyang: dang: bain tid yo' dalheing: dam Datham yo' Abiram da" khyid: yang: moo: go, gyam: lo wigi
32 Nya: eig yug yo' nya: tang: yhoem: byu yi Kora da" thang: cang bang: yo' nyangnu" jonu" joem dangain" ri myhau: pyam bye:.
33 Houg: yoomo nyangnu" gi nyangnu" jonu" yo' dage" adei: nyang: moovo moug: khyoo: gyoo" lo" ago". Myid gung: gi nyangnu" adang mo: doem myhid" zhoem: lo" wigi nyangnu" byug loo" khari" bye:.
34 Houg moo: nyid boem da" Israela byumyu" dangain" bang: gi houg: bang: nyhoo: thui: ri shoug" gyoo: lang" tang" phang: boem ago". Nyangnu" gi ?Tang" phang: ge'. Myidgung: gi ngoonu" ri we' myhau: pyam wa? ga: yoid nyho: ago".
35 Hau: thang: ri Aseing gi myiyham: ri nhang: kaid wigi nam pyo: ja: ri shugbyid: go" da: byu 250 yug ri nghe pyam da:.
36 Hau: thang: Aseing gi Moshe ri
37 ?Hau: myioug" joem gi gye" gyeung" shang: zi nghoid yoomo myi: wigi nghe' pyam zi shoug" mo, da" gyid: mid" myioug" joem ri we' joyoo khang" moo" abyoo asain" bue" jo, da" myigyu: joem ri yhe: koid: zheing" yu wa shid re" Arun da" nya: yuggi zoo: khainjung Eleaza ri tid wa.
38 Hau: joem gi Aseing da" phoin: moo: shugbyid: lang" gyeung" shang: lo boem ago". Houg: yoomo nyangnu" yooboo yoomo said pyam shau" boem da" hau: byu yi da" myioug" joem ri yu lho: poo" poo" baid pye" wigi phoin: shid re" amyhid" koid ge'. Hau: zigi Israela byumyu" yi shid re" tid poin" byid: zi nghoid ri" wa? ga: tid.
39 Houg: yoomo khainjung Eleaza gi hau: myioug" joem ri yu lho: phoin: amyhid" koid wa shid re" hau: joem ri poo" poo" baid pye" nhang: da:.
40 He: zigi Arun da" amyed ashen yi anghoid da" yug hang" nghoid loug we' Aseing shid re" nam pyo: ja nghe' ngei" wa phoin: khyoo: ari" wa ziri Israela byumyu" yiri tid poin" zi nghoid da:. Hougsu" anghoid lang" nyang: gi Kora yo' nya: byu yiri yo' dakhyoo" ti" said pyam loo wa. He: zi dangain" gi Aseing wigi Moshe khyo" Eleaza ri amyeing" byid: ziyo' dakhyoo" ti" koid zi nghoid.
41 Hau: thang: nyid" ri shava byu phung: goin" gi Moshe yo' Arun ri thougtheung myeing" myo: wigi ?Re" eig yug gi Aseing da" byu dayham" ri said pyam abye: go" da? ga: tid.
42 Nyangnu" Moshe yo' Arun ri ngeug hi: wa shid re" bain zeing: foem: thang: ri nyangnu" gi Zoem" shoid khyoo: phug lo" boem ri jhoemmoug" zoo" gi Zoem" moo neing" jo, lho: Aseing da" phung" yoeb thu jo, ziri myang boem ago".
43 Moshe yo' Arun yhe: wigi Zoem" shidkhoin" moo: yab jo, boem.
44 Houg: lho: Aseing gi Moshe ri
45 ?He: byu phung: mo vi: khyoo: yhe: loo" we'. Hid: bang: ri ngoo akhid" nyang: said toem" pyam wa? ga: tid.
Nya: eig tang: myonhoo: myidgung khyoo: goeb pid wigi
46 Moshe gi Arun ri ?Re" myioug" ri yu wigi phoin: dang mo myi: dab da" myigyu: kaid ziyo' hau: myigyu tho' moo: nam pyo: ja: dajhi' ri kaid we'. Houg: lho: hau: zi byumyu" yi jang" khyoo: myab myab ci: yhe: lho: nyangnu" shid re" thung" khyo" younglho' byid: khyoo: yhe: koid we'. Myab we' Aseing nheig yo: zigi bain bug go, jo, bye: ziyo' lang: yoem" bue" jo, abye:? ga: tid.
47 Arun gi dang: tam" gyo: wigi nya: myioug" ri ci: lho: shava byu phung: gung khyoo: ci: tang" yhe bye:. Lang: yoem" bui" nyid bye: ziri nyang: myang lang" nyang: gi myigyu tho' moo: nam pyo: ja: kaid wigi byumyu" yi shid re" thung" khyo" younglho' pyam khyoo: ri koid bye:.
48 He: zigi lang: yoem" ri theing: pyam nhang: da:. Houg: lho: nyang: gi shid: mo, yo' dei mo, agyoo: moo yab jo, da:.
49 Shid: mo, gi Kora da" thougtheung gyi koid jang" moo shid: ziri abo nghab ri 14,700 yug nghoid ago".
50 Lang: yoem" bue" zi theing: byug lang" Arun gi Zoem" khoem" duang: mo Moshe jang" khyoo: doem tau" loo" bye:.