12
1 Vhoo: mo zhayhen" gi Shealtiela da" yuggi zoo: Zerubabela yo' khainjung moo" Yoshu tang: yo' dage" pyoung" she: lo" jang" mo doem tau" lo da" khainjung yi yo' Levi byu yi da" zhayhen" nghoid da:.
2-7 Khainjung yi
Seraia- Yeremia- Ezra- Amaria- Malug- Hatusha- Shekania- Rehum- Meremod- Ido- Ginethoi- Abiya- Miyamin- Madia- Bilga- Shemaia- Yoiarib- Yedaia- Salu- Amog- Hilkia yo' Yedaia bang: nghoid ago". He: yuggi yigi Yoshu pyaid moo nyangnu" khainjung byencang" yi moo vhujhung: bui" bang: nghoid ago".
8 Levi byu yi
Vhoo: mo bang: gi jeju" boin: jikhoin" khoin" jang" moo yu" coung: bang: nghoid ago". Yeshua- Binui- Kadmiela- Sherebia- Yuda yo' Matania bang: nghoid ago".
9 Vhoo: mo bang: gi thid lhoo: thid jikhoin" khoin" phung: bang: nghoid. Bakbukia- Uno yo' nya: eig tang: da" Levi byencang" yi nghoid da:.
10 Yoshu gi Yoiakim da" nya: phoo- Yoiakim gi Elishab da" nya: phoo- Eliashab gi Yoiada da" nya: phoo-
11 Yoiada gi Yonathan da" nya: phoo- Yonathan gi Yadua da" nya: phoo nghoid da:.
12-21 Yoiakim khainjung moo" bui" nyid uri vhoo: mo khainjung yigi khainjung yi da" vhujhung: yi nghoid ago".
22 Vhoo: moo myeing bo da" khainjung moo" yi dei nyid da" ayo, gu: mo Levi byu yhoemkhung: joem yo' khainjung kung: mo yhoemkhung: joem vhujhung: yi da" zhayhen" ri lhid" xoem" to" da:. Khainjung moo" Eliashib- Yoiada- Yonathan yo' Yadua bang: nghoid ago". He: lhid" xoem" ri Persi mung" mo Dari khokham bue" uri lhid" pain' pyam da:.
23 Nghoid loug we' Levi yhoemkhung: joem mo vhujhung: yi zhayhen" ri yung" lhid" xoem" joem moo Eliashid da" nya: myid: Yonathan: pyaid ju" sho' za: dalhid" xoem" to" ago".
24 Levi byu yigi Hashabia- Sherebia- Yeshua- Binui- yo' Kasmiela bang: khyoo: shid da" khyo" cang wigi moo" voin phung: kho' to" ago". Mangso byu khokham David byid: to" da" khyoo: shid ziyo' dakhyo" dalheing: ri eig phung: khyo' lho: Mangsoo ri thid lhoo: thid jikhoin" khoin" coung" byid: nyid ago".
25 Vhoo: mo Noku Yhoem: Moo" zung" bang: gi khoem" moo" joem nam mo zi Noku Yhoem: Moo" agyoo: moo jo, da" zi too" yab joem ri lhoug zung" da" moo" moo yoovoin yu koem" nyid ago". Matania- Gakhukia- Obadia- Meshulam- Talamon yo' Akub bang: nghoid ago".
26 He: byu yigi Yehozadag da" nya: myid:- Yeshua da" yuggi zoo: Yoiakim da" ayo,- mung" zoug: Nehemia da" ayo, yo' tarha" si' su: khainjung Ezra da" ayo, moo nyid lid lo ago".
27 Yerusalem voomoo" vang ri shugbyid: da" uri Levi byu yiri hau: shugbyid: da" pui" moo jeju" coung" da" jikhoin" joem khyo" we' jhabceing joem teing joem ci: lho: yo" bo boo wa shid re" nyangnu" nyid da" joyoo khyi' khang" moo" mo shu" yu ago".
28 Jikhoin" khoin" da" Levi yhoemkhung: joem gi nyangnu" nyang: nyid boem da" Yerusalem aqei: ayam mo yo' Netopha aqei: ayam mo voogung joem mo
29 Betgidgala- Geba- yo' Azmaved mo zeing: foem: re" ago".
30 Khainjung yi yo' Levi byu yigi nyangnu" nya: shid re" mung" byu yi shid re" khoem" moo" joem shid re" yo' voomoo" vang khyam: shid re" thung" khyo" kyeing sain' khyoo: koid ago".
31 Ngoo gi Yuda vhujhung: yiri vang atho' moo zheing" nyhid: to" lho: byu phung: moo" eig phung: voomoo" ri lheing wigi Mangsoo ri jeju" coung" byid: jang" moo koem" yu" nhang: too" bye:.
Xang: shi" phung: bang: gi vang atho' khyo" lo, yo shoid khyoo: mhoid soid khoem" moo" ju" sho' so" lheing lo" ago".
32 Hoshaia gi jikhoin" bang: da" thang: moo so" lho: houg: bang: thang: moo Yuda vhujhung: agung dayi" cang yhe: ago".
33-35 Vhoo: moo bo da" khainjung yigi laboo" joem ri moid lho: nyangnu" thang: moo Azaria- Ezra- Meshulam- Yuda- Benyamin- Shemaia yo' Yeremia bang: cang yhe: ago". Hau: thang: moo Shemaia da" myid: zoo:- Yonathan da" yuggi zoo: Zekharia cang yhe: da:. (Nya: da" phoug" phyid" bang: moo bo boo bang: zi Asab kung: mo Matania- Mikhaia yo' Zakhura bang: nghoid ago".)
36 Nya: thang: moo nya: kung: mo gootu: Shemia Azarela- Milalai- Gilalai- Maai- Nethanela- Yuda yo' Hanani bang: bo lho: nyangnu" dangain" bang: gi Mangso byu khokham David baid da" teing yhang: te" ja: vu, ago". Jhoem: phajhi" seing: Ezra gi he: phung: bang: ri shu" so" jen yen" da:.
37 Nyangnu" gi gyidbug khoem" moo" mo zi David da" voomoo" khyoo: do, lo" da" zoem" lhang: khyo" so" do, lo" lho: David da" khokham kho" ri lid too" kho' ago". Houg: lho: voomoo" da" bidthu shoid gyid khoem" moo" khyoo: doem tau" lo" ago".
38 Jeju" coung" da" goo" phung: gi vang khyoo" wigi lo, kung" shoid khyoo: so" yhe: lo" ago". Houg: lho: ngoo gi mung" byu agung dayi" yo' cang yhe: loo" bye:. Ngoonu" gi myikhyoem gyi pyuzung mo zi lam: da" vang khyoo: so" yhe: lo" lho:
39 Hau: joyoo mo Ephrim khoem" moo"- Yeshana khoem" moo"- wimdo, khoem" moo"- Hananela gyi pyuzung yo' gyi pyuzung dashoo: mo zi yang khoem" moo" ju" sho' lid yhe: loo" bye:. Ngoonu" gi Noku Yhoem: Moo" khyoo: vang yhe: da" khoem" moo" nam moo so" thang pyam boem bye:.
40 Houg: yoomo Mangsoo ri jeju" coung" byid: da" eig phung: goin" Noku Yhoem: Moo" joyoo khyoo: ju" yhe: loo" bye:.
Hau: tho' agoo" ngoo yo' dage" bo bo da" vhujhung: yi mo jain" wigi
41 nga" phung: moo vhoo: mo bang: nghoid da" khainjung yi laboo" joem ri moid wigi bo bo ago". Eliakim- Maseia- Miniamin- Mikhaia- Eloenai- Zekharia yo' Hanania bang: nghoid ago".
42 Houg: lho: nyangnu" thang: moo Maseia- Shemaia- Eleaza- Uzi- Yehohanan- Malkhiya- Elam- yo' Ezera bang: cang ago". Yezrahia wigi shu" da" jikhoin" phung: gi nyangnu" da" thui: ri myhang: thang mo nyho: khoin" ago".
43 Hau: nyid" moo xoin" myoo" sho' ngei" byid: wigi mung" byu yi gye" ngei pyo: boem ago". Ciwim gari Mangso wigi nyangnu" ri gye" ngei pyoo: nhang: abye:. Myiyi: yi yo' zooshang: yigi hau: pui" moo bo boo yoomo nyangnu" lu: fu: nyid da" thui: ri khyoo: main: su: shau" gyo: da:.
44 Hau: ayo, moo yuggi yiri daxi: boem daboem yo' zain khang" moo" xang: shi" zei: da" shivoo: yo' shi" joem ri Noku Yhoem: Moo" shid re" jhungshug kaid to" da" yab joem ri yu" coung: wa shid re" khyen: to" ago". He: bang: gi tarha" moo tid to" ziyo' dakhyoo" khainjung yi yo' Levi byu yi shid re" jhungshug ri voomoo" myoo: sho' da" aqei: ayam moo jo, da" yoo joem mo khyui: zheing" wa yoovoin yo" ago". Yuda mung" byu yi dangain" bang: gi khainjung yi yo' Levi byu yi da" adang moo nheugdeug ago".
45 Ciwim gari nyangnu" gi kyeing sain' da" laloem lakhoug moo" yo' Mangso wigi amyeing" byid: to" da" gootu: thung" ri: joem ri cang koid ago". Noku Yhoem: Moo" mo music phung: yo' Noku Yhoem: Moo" zung" bang: we' khokham David yo' nya: zoo: Sholumon byid: too" kho' da" thung" ri yo' dakhyo" nyangnu" da" moo" ri zei: ago".
46 Goonham' khokham David yo' music si' su: Asab da" ayo, mo he: gu: music phung: bang: gi Mangsoo ri coung" da" jikhoin" yo' jeju" boin: so" da" jikhoin" joem ri shu" khoin" lo ago".
47 Zerubabela da" apyaid moo we' Nehemia da" apyaid moo we' Israela byumyu" dangain" bang: gi Noku Yhoem: Moo" mo music phung: yo' Noku Yhoem: Moo" zung" bang: shid re" nyid" khang" moo" jhungshug pang" thoug byid: ago". Meing: byu yigi Levi byu yiri gyeung" shang: da" xoin" ri byid: lho: Levi byu yigi khainjung yiri byid: ca" da" gu: ri byid: ago".