24
(Mar 13:1-2: Luk 21:5-6)
1 Yesu gi yhoem: moo" mo doem so" thu' lo" da uri Nya: cangzoo: yi gi nya: jhang tain" re" boem wigi yhoem: joem zheing: toin" shid boem.
2 Nyang: tid ?Nghoid bye: zigi He: yhoem: dangain" ziri nanu" myang wa nanu" ri ngoo tid ba"- he: lug yhoem: zeing gi lug daloem: tho' moo daloem: ake" too" loo sho' phyo' sain" khyo pyam zi shau" wa nghoid.?
(Mar 13:3-13: Luk 21:7-19)
3 Yesu gi zhainloin: boem tho' moo zhoung: jo, da" uri cangzoo: yi gi nya: jhang moo nyangnu" kyeing" re" lho: nyangnu" myid: da" zigi ?Hau: khyoo: gi kha: yo, kha u" moo bue" loo wa lha". Aseing doem gyoo" loo wa da" bidnyid yo' he: da" thang lo" da" jhang moo ce: ja: alhoo: again myang thu' loo wa lha". Ngoonu" ri tid kyoo" we'? ga: zheung: myid: boem.
4 Yesu phoug gi ?Nanu" ri hang" we' ayo" jhuphyo' loo" baja" zid" nyid ge.
5 Byu myoo" sho' mo, ?Ngoo gi Meshia nghoid? ga: nga" myeing voin lho: khyoo shu" vhang: lo boem wa.
6 Nanu" gi vi: mo jhang mo, gyi pui" lu dang: ri shau" gyo: lo boem wa. Nghoid loug we' agyug adain goo". He: da" khyoo: gi bui" nyang bue" loo wa zi nghoid. Nghoid loug we' mougmyid thang lo" da" ayo, gi anghoid shi.
7 Damoug: yo' damoug:- mungdain: daloem: yo" daloem:- gyipui" bue" lo boem wa joyoo khyi khang" moo" moo phang" khoug myid leig leig loo wa.
8 He: da" khyoo: dangain" gi Zoo: khu: wa su: bidnyid ju" wigi no shid" re" ziyo' dadu nyid.
9 ?Hau: thang: rigi nanu" ri myheig: lho: yooboo foin: dam kaid wigi said pyam wa shid re" byu yi da" lo, moo ab pyam boem wa. Nga" myeing yoomo byu dangain" mo, gi nanu" ri ngheing" loo goo" wa.
10 Hau: uri byu myoo" sho' mo gi nyangnu" loem" jeing" khyoo: mo thoem: tho: leung lo" lho: dayug vhuloem ri dayug ung" zoo: go" wigi anoug angei go" da" zi bue" loo wa nghoid.
11 Hau: tho' moo gootu: mhau da" lapi: we' myoo" sho' thu' lo wigi byu myoo" sho' ri khyoo: shu" vhang: lo" boem wa.
12 Akhyeing" ashoeb da" moozoo" myo: loo yoomo byu yi da" jheddab nheigloem: gi shoem: lo" byug boem wa.
13 Nghoid loug we' lo" thang bidnyid ju" sho' zeung: kham: nyid su: gi khyoid yu zi shau" wa nghoid.
14 He: mungdain: da" ngeibu: lu dang: ri byu bain sho' shid moo sagsi bui" wa shid re" Mougmyid gyab' goin" kho" kyo" loo" wa zi nghoid. Hau: thang: ri mougmyid thang da" ayo, ju" loo wa zi nghoid.
(Mar 13:14-23: Luk 21:20-24)
15 ?Lapi: Daniela kho" kyoo" khare" da" ?gyoug dain' ca" da" aco' ajhoid da"? zigi gyeungshang: da" joyoo moo yab jo, ziri nanu" myang wa.? (Mougsoug" nghab' su: se' gyoo: baja")
16 ?Houg: su" shau" myang da" uri Yuda mung" mo mo, gi boug gung tho' khyoo phang: lo" boem baja.
17 Yhoemkhung: tho' moo nyid su: gi ziyo' yu wa shid re" yhoem: khoug: khyoo avang loo" baja.
18 Khyam: yoo moo nyid su: we' nya: byisheung: yu wa ga: yhoem: khyoo aloo" loo: baja.
19 Hau: da" bidnyid moo zoonu" gung ci: da" myhi' zeing yi yo' noug" nu" shu" bang: gi soo" soo" yau: khe" da zi shau" wa nghoid.
20 Nanu" thu' lo" da" ayo, gi xung" thu' yo, yo' Dougno: Bidnyid ri aeung: loo wa shid re" Mangsoo jhang akyu" mho' nyid ge.
21 Khasu" wim gari hau: da" bidnyid moo gye" gyi: da" sho" jhen yau: khe" da" bidnyid ju" loo wa. Houg: yhi' gyeing" da" kougshu: yau khe" da" bidnyid gi Moug thu' xang: poin: mo he: gu: moo byu xangsu: yi khanham we' athoung" shoug" yu shi" da" jam joug nghoid. Thang: phyang" khanham we' shoug" yu" lo: boem wa anghoid.
22 Nghoid loug we' Mangsoo: gi hau: ayo, bidnyid ri ashoung" kaid nghoid rigi xangsu: byu yi hang" kangso we yo" loid wa zi anghoid. Nghoid loug we' Mangsoo gi nyang: khyen: yu too" mo, shid re" hau: ayo, bidnyid ri shoung" kaid byid: wa nghoid.
23 ?Hau: da" ayo, moo byu dayug yug gi ?Yu" ge' he: joyoo moo Meshia nyid? ga: wigi we' thei: joyoo moo Meshia nyid ga: wigi we' tid lo boem ri nyang ri aloem" goo".
24 Khasu" wim gari mhau' da" Meshia yo" mhau' da" Lapi: thu' lo lho: ge bue" rigi Mangsoo khyen: yu too" bye: mo, rilang" khyoo: yo" shu" vhang: sho' alhoo: again mau" pho" moozoo" zeing yo' zei: shug lo boem wa zi nghoid.
25 Tam" gyoo: ge' he: da" khyoo: abui" loo shi" ri nanu" ri ngoo tid kyoo" bye:.
26 ?Houg: yoomo gyeing" nyang: nyangnu" gi ?Yu" ge' Meshia gi dain" pyoid yoo moo re" nyid? ga: tid boem nghoid ri nanu" athu' yhi: goo". He joyoo moo gau" nyid bye: ga tid nghoid loug we' hau: dang: ri agyo: loem" goo".
27 Bidthu' shoid mo bidvang shoid ju" sho' mougkhung: ri we dangain" bang yi loo" nhang: da" lhab' myeig lo" yhangti" byu da" nya: zoo: doem gyoo" lo ri we' houg: su" wim loo" wa zi nghoid.
28 ?Mang' leung jo, da" khyi' khang" moo" moo Langda joem we' zheung: foem: boem wa nghoid.
(Mar 13:24-27: Luk 21:25-28)
29 ?Houg: te" da" gyoug dain' jam joug khyoo: bain thoug" shau" da" hau: nyid" ri bid gi mougcoid bue" loo" khari" wa. Lhammoo" we bang loo: wa zi anghoid. Kyi" joem gi mougtho' mo byid gyoo" lo boem wa. Mougkhung: moo jo, da" yoemso dangain" we' nyangnu" da" khyoo" mo nain" yu: phang: lo" boem wa.
30 Houg: thang: byu da" nya: zoo: gyoo" loo wa da" alhoo: again gi mougtho moo myang thu' loo: wa. Jhoem: moug" ju: lho: gyi: thang da" myonhoo: phung" yoeb zeing yo' byu da" nya: zoo: gyoo" lo da" ziri mougmyid byu yi bain sho' mo lhoem: myang da" uri ngau nyid boem wa.
31 Byu da" nya: zoo: gi laboo" zeing myeing: lo da" uri nya: da" moug: lagyoo: joem ri mougmyid myonhoo: myid: shoid khyoo nhang: kaid wigi Mougmyid dashoid mo zi dashoid khyoo thang sho' moo nyid da" Aseing khyen: too" mo, ri nyangnu" zeung: foem: nyid wa.
(Mar 13:28-31: Luk 21:29-33)
32 ?Lafoem gam mo he: akhyoo" daja: ri jhau" yu ge. Hau: seiggam mo akung: ako' nu" lo lho: afu' toid loo lang" gi zain vang khoem" ju" loo bye: ziri nanu" se' ago".
33 Hau: ziyo' dakhyoo" ti" tid kyo" lid lo da" khyoo: joem bue" lo ziri myang lang" gi nanu" da" anam, mo vang" khoem" duang moo nyang: ju" ri" bye: ziri si loo ge.
34 Ngoo nanu" ri deing" deing tid ba. He: da" moo" bain sho' gi akhid" dei nyid mo abain shid: shi" ri boin: nyid ge.
35 Mougkhung yo" myidjang lid: loo" nghoid loug we' nga" Mungdang: gi alid: loo" wa.
(Mar 13:32-37: Luk 17:26-30,34-36)
36 ?Houg: su" nghoid loug we' He: da" moozoo" bue" loo wa da" ayo, bidnyid rigi nga" phoo mo lid' lho: hang" we' asi- mougkhung moo nyid da" lagyoo: yi we' asi- nya: zoo: we asi.
37 Noa da" bidnyid moo bue" lo ziyo' dakhyoo ti" byu da" nya: zoo: bidnyid moo we bue" loo wa.
38 Hau: da" bidnyid moo tigyid ashi shi" uri Noa gyid sangphoo yhoem: moo vang lo" da" bidnyid ju" sho' byu yi gi zo: lho: shug lho: myi: yu lo, xo' lho: koid: nyid boem ago".
39 Nyangnu" gi ti gyid shi jang" moo myu: shid: doem lo" da" bidnyid ju" sho' asi aboin: loo: nyid boem ago". Byu da" nya: zoo: doem gyoo" loo wa da" bidnyid moo we' houg: yo' dakhyoo" ti" bue" loo wa zi nghoid.
40 Hau: da" ayo, ri khyam: yoomo byu eig yug moo" zei nyid da" jangmo dayug ri shu" do, lo" byug lho: dayug gi deung gyo" nyid khari" wa zi nghoid.
41 Lug lheung: gyeig nyid da" myiyi: zoo: eig yug mo we' dayug rigi shu" do, lo" byug lho: dayug gi deung nyid khari" wa.
42 Houg: su" nghoid yoomo zid" lhid zoore lang" nyid ge. Nanu" da" Aseing gi kha: yo, kha: u" moo gyoo" loo wa zi nanu" asi.
43 Yhoem: seing: gi nya: yhoem: moo khoug" vang wa da" ayo, akhyeing: ri gyeing" gyeing" nyang: se' nghoid rigi nya: yhoem: ayo" re" khau" baid phoid loo" sho' zung" nyid wa zi anghoid la".
44 Byu da" nya: zoo: gi nanu" amyid to" da" ayo, akhyeing: moo ju" ri" wa nghoid yoomo nanu" khanham we' jen" jen" koid nyid ge'.
(Luk 12:42-48)
45 ?Loem loug ziyo' phajhi" bo da" deizoo: gi hang" nghoid la". Hau: yug gi nya: yhoem: seing: da" deizoo: gootu: ri vhoeb' khang" lho: ayo, ju" lang" zoo: shug thug byid: wa shid re" yhoem: seing: wigi khyen: nhang: too" su: nghoid.
46 Yhoem: seing: doem ju" lo da" ayo, moo moo" loem: lug zei: nyid lang" zi lo shau" myang da" deizoo: koem gi ngilho' nyid.
47 Nanu" ri ngoo deing" deing tid da" zigi yhoem: seing: gi hau: da" deizoo: ri nya: zi jo, moojo, ri yu" goin coung: vhoeb' khang" nyid wa shid re" hau: da" deizoo: ri nyheung' too" zi nghoid.
48 Nghoid loug we' hau: da" deizoo: gang: dayug gi nya: yhoem: seing: gi myab doem loo wa zi anghoid- myang" shi wa ga: myid nyid.
49 Nya deizoo: byencang" yi ri we' yug baid lho: yhid: shug foo" zo: mo, yo' zo: yed shug yed nyid uri
50 Hau: thang mo hau: yug alang" nyid aboin: aso" da" danyid" moo nya: yhoem: seing: doem ju" lo wigi
51 nyang: ri eig du khyo lho: akug void mo kham: zo: wa da:- amyen, akhyoid da" dam kham: nhang: wa nghoid. Hau: jangmoo ngougbyid ngougnhab' yo' zei yang: kyeig ga: ngau nyid wa.