21
(Mar 11:1-11: Luk 19:28-40: Yoh 12:12-19)
1 Aseing yo" cangzoo: yi gi Yerusalem voo moo jhang lo boem ri zhainloin: boem mo Bedphage voo moo ju" lo" boem.
2 Yesu gi cangzoo: eig yug ri ?re" eig yug shid mo voogung khyoo: loo" ge'- houg: ri nya: zoo: yo' tei" to" da" loozei: dadu: ri lo" myang goo" wa. Hau: zi nga" jhang lo" phoid: she: loo ge.
3 Byu dayug yug re" eig yug ri daja: ja: ga: myid: nghoid rigi ?Aseing ci: ca" ga:? ein: tid kyoo" ge. Houg: lang" nyang: gi loozei: ri kho ga: phoid: she: loo" nhang: zi nghoid? ga: tid kaid.
4 Hid: su" bue" lo da" khyoo: gi Lapi: dang: byeung" loo wa shid re" nghoid.
5 Hau: da" Lapi: dang: gi ?Ziun voo zeing: ri tid kyoo" ge'
Yu" ge' re" da" khokham gi
Nu" nham da" nheigloem: yo' loozei: zoo: dang khung: moo zhoung: wigi
Nghoid bye: loozei: nya: myhi' da" nya: zoo: dang: moo zhoung wigi re" jhang ju" ri" bye:? ga: tid to".
6 cangzoo: eig yug gi thu' lo" lho: Aseing Yesu tid ziyo' dakhyoo" koid: ago".
7 Nyangnu" nyang: gi loozei: zeing yo" loozei: zoo: ri she: lho: Nyangnu" nya: da" byisheung: ri loozei: atho' moo khyoid ke" boem ago". Yesu gi loozei: moo zhung: bye:.
8 Byu phung: moo" yi we' nyang: tu: nya: da" byi: ri khyoo: moo khyoid myhu" byid: boem ago". Byu dayham" we seig kung: joem ri zheung: khyau" yu boem lho: khyoo: moo myhu" byid: ago".
9 Yesu da" shid khyoo: thang: khyoo: cang lo da" byu myoo" sho' mo, gi ?David nya: zoo: myonhoo: ngeilang: ri coung" byid: ge'. Aseing da" myeing yo' ju" ri" su: gi ngi: lho' nyid baja". Mangsoo ri cung" ge'? ga: tid boem.
10 Yerusalem voo moo Yesu vang loo" lang" davoo goin" nhoin: nhoin: bue" lo lho: ?he: yug gi hang" nghoid lha"? ga: myid: boem ago".
11 Byu phung: moo" yi gi ?He: yug gi Galile mung" Nazared voo mo Yesu ga: da" Lapi: nghoid? ga: tid go" nyid.
(Mar 11:15-19: Luk 19:45-48: Yoh 2:13-22)
12 Aseing Yesu gi Mangso yhoem: moo" moo vang lo" ri yhoem: khoug: mo kid" ung" kid" qei mo ri lo" khaid thu' pyam Ngei thid' mo da" zoobui" joem yo' pheing" kyoug" ung" mo da" zhungtang' joem ri tu: sain" pyam byid.
13 Nyang: nyangnu" ri ?Mangsoo tid jhoem: mougsoug" moo lhid" to" zigi ?nga" da" yhoem: ri Mangso yhoem: ein: wa? ga: nghoid loug we' hau: yhoem: ri nanu" gi khyangtoug: lug ug dakoid: nyid ago"? ga: tid.
14 Mangso yhoem: moo" moo myo, amyang mo, yo' khyid: agi mo, ge:- Aseing jhang moo ju" re" boem. Aseing gi nyangnu" da" noophyoo" ri ge loo" nhang.
15 Nghoid loug we' Khainjung moo" yi yo' tarha" sara: yi gi Aseing koid: da" mau" pho" moo" ri zheung: myang ziyo' ?David da" nya: zoo: ri coung" nghei byid: ge'? ga: zooshang: bang: akyu" mho' yhoem: khoug: moo nyho: yoid nyid da" thui: ri shau" gyo: boem lang" gi nheig zheung: gyo: yo: ago".
16 ?He: zooshang: yi khasu" ga: nyho: nyid zi nang shau" gyoo: la"? ga: Yesu ri zheung: myid: boem. Yesu gi ?Ngoo shau" gyoo: bye:?
Aseing gi ?zooshang: yi nhoid' yo' nya: myhi noug" shug zoonu" gi ?Nang ri coung" byid: nhang: wa shid re" jhau" byid: bye: ga: da" Jhoem: dang: ri nanu" gi shidphyang" we ashau" nghab' yu" goo" la"?? ga: myid.
17 Hau: thang: ri Aseing Yesu gi nyangnu" jhang mo gang: lho: voomoo" mo thu' lo" wigi mau myen Bethani khyoo: yhe: theung:
(Mar 11:12-14: 20-24)
18 Nab' kyoo no" re Yerusalem voo khyoo doem lo" da" uri Yesu gi zoo so" yoid nyid.
19 Khyoo: yam moo lafoem dagam ri myang yoomo hau: seiggam poem: khyoo yhe: lho: seiggam moo afu' tho' moo gootu: ci" we' amyang lang" Aseing tid da" zigi ?Nang moo khanham we' ashi" azei: loo: baja"? ga: tid. Houg: lang" lafoem gam gi kyoug shid: loo" khari" bye:.
20 Hau: da" khyoo: ri cangzoo: yi myang lang" gye" yu" mau" boem lho: He: lafoem gam gi khasu" wim wigi dalheung: dam kyoug shid: lo" lha"? ga: Aseing ri zheung: myid: boem.
21 Yesu gi ?gyeing" gyeing" nanu" ri ngoo tid ba. Nanu" we' loem" shoid zi aboo loo: loem" jeing" nheigloem: bo nghoid rigi he: lafoem gam ri ngoo koid: ti" yo" koid: boem wa. Houg: za: anghoid ?he: boem ri panglai: gyid mung" khyoo: thoid loo" we'? ga: tid rilang" houg: su" yo" bue" loo" goo" wa zi nghoid.
22 Nanu" gi loem" jeing" da" nheigloem: emyed yo' Akyu" mho' nghoid ri mho' ja: dangain" yo" yu boem wa" ga: tid kyo".
(Mar 11:27-33: Luk 20:1-8)
23 Aseing Yesu gi akyu" mho' yhoem: moo" moo doem vang lo" lho: jhau" byid: nyid da" uri Khainjung moo" yi yo' Yuda sayen" yi gi Yesu da" nam, moo tain" re" boem lho: ?Nang gi he: da" moo" ri hang" da" akhang" aya: yo" koid: lha". He: akho: akhang" nang ri hang" byid: lha"? ga: re" zheung: myid: boem.
24 Aseing Yesu gi ?Nanu" ri ngoo we' dang: dakhoin" myid: yu" ba. Hau: dang: khoin" nanu" yo" phoid: nghoid rigi ce: myeing" akhang" khyo" ngoo koid: zi we phoid: khyoo" wa.
25 Yohan gyid nyhoed kham: byid: da" zigi Mangsoo byid: da" akhang" aya: khyo" nghoid la". Byu yi byid: da" akhang" aya: khyo" nghoid la"? ga: myid:.
Nyangnu" ngeug go" nyid zigi ?Mangso da" akho akhang" khyo" koid: ein: tid nghoid rigi Yohan da" dang: ri nanu" ciwim aloem" jeing" go" ga: doem myid: wa.
26 Nghoid loug we' ?byu da" akho: akhang" khyoo" koid? ein: tid rigi mung" byu yi myoo" sho' Yohan ri lapi: dayug ga: loem" boem yoomo byu yiri ngoonu" gyug ca"? ga: wigi nyang: cang" nyang: sham: go" nyid.
27 Houg: su" nghoid yoomo nyangnu" gi ?Ngoonu" asi? ga: zheung: phougtu" ago".
Houg: yoomo Yesu gi ?Ngoo koid da" moozoo" ri we' hang" da" akho akhang" khyo" koid ziri ngoo nanu" ri atid kyoo" wa? ga: tid.
28 Hau: thang: ri Yesu gi ?Nanu" khasu" ein: shau" myid go". Ludaid dayug moo zooshang: eig yug yo. Nyang: gi nya: zoo: mang: mo" jhang moo yhe: lho: ?nga" zoo: we" akhid" nyid" zabyid khyam: moo moo" yhe: zei: we'? ga: tid.
29 Mang: moo" gi ?ngoo anau yhi:? ga: tid nghoid loug we' thang: ri nheigloem: thid lho: khyam: khyoo yhe: lo".
30 Nya: phoo gi zoo: thang jhang moo doem yhe: lho: ?Nga" zoo: we" akhid" nyid" zabyid khyam: moo moo" yhe: zei: we'? ga: tid. Nya: zoo: thang gi ?gi bye: nga" phoo' we" ngoo yhi: wim bye:? ga: tid.
31 Nghoid loug we' ayhi: loo: za: nyid nyid zooshang: eig yug mo khayug gi nya: phoo vho: da" khyoo: ri koid: lha"? ga: myid: yu" nyangnu" gi ?Mang: mo" yug nghoid? ga: phoid: boem.
Yesu gi ?Nanu" ri ngoo tid ba"- kheung" khyu: zoo: mo, yo' shava myiyi: yigi nanu" da" shid moo Mangso mungdain: khyoo vang lo" nyid boem bye:.
32 Yohan gi nanu" jhang moo re" lho: deingmain" da" khyoo: ri jhau" byid: nghoid loug we' nanu" nya: dang: ri aloem" jeing" boem. Nghoid loug we' khyu: zoo: mo, yo' shava myiyi: yigi nya: dang: ri loem" jeing" boem bye:. He: da" akhyoo" again ri shau" myang uri lang" nanu" gi nheigloem: thid lho: Yohan da" dang: ri loem" jeing" lo da" khyoo: abo boem nghoid da.
(Mar 12:1-12; Luk 20:9-19)
33 ?Dangtu gootu: ri we' doem tam" gyo: yu" ge'. Zabyid sho" to" da" khyam: seing: dayug nyid' nyang: gi khyam: kyam, lho: zabyid shi" pyeig wa duang: we' du: to". Pyu zung we' daloem: zhug to". Hau: thang ri nya: khyam: gi khyam: moo" zei: mo, ri nghoo" byid: khoo lho: so" lo.
34 Zabyid shi" myheing: yo' jhang loo lang" nya: dei, zoo: yi ri zabyid khyam: koid: mo, jhang khyoo: khyam: phoug" zabyid shi" ri mho' nhang: kaid.
35 Khyam: moo" zei: mo, gi nya: deizoo: yiri lhoem: myheig yu lho: dayug yug- dayug ri said- dayug ri luggo, yo' du"- lhoem: koid: boem.
36 Hau: thang: ri khyam: seing: gi xangshid" tho' moo je myoo: da" nya: deizoo: yi ri doem nhang: kaid. Nghoid loug we' khyam: moo" zei: mo, gi hau: deizoo: yi ri we' xangshid" mo mo, ri yhangti" nyang:- lhoem: doem koid: boem.
37 Lo" thang moo nyang: gi ?Nga" zoo: rigi houg: bang: phau" myang: boem wa? ga: nya: zoo: ri nyang: khyam: moo" zei: mo, jhang khyoo nhang: kaid bye:.
38 Nghoid loug we' nyangnu" gi khyam: seing: da" nya: zoo: ri lhoem: myang lang" ?He: yug gi moid seing: zoo: wa su: nghoid da:- ri" ge' nyang: ri said pyam lho: nya: da" ziyoo jonu" lhoid yu byid: pyam shang? ga: zheung: sham: go" lho: wigi
39 nyang: ri myheig tei" lho: zabyid khyam: nghe: shoid khyoo du" lhei" thu' kaid wigi said pyam boem bye:.
40 ?Akhid" houg: su" nghoid yoomo khyam: seing: doem ju" lo da" uri gi khyam: moo" zei: mo, ri khasu" lo koid: wa lha"? ga: nyangnu" ri myid:.
41 Nyangnu" khyam: seing: ri ?khyam: seing: gi hau: akhyeing" mo, ri gyeing" gyeing" nyang: said pyam wa zi nghoid. Khyam: ri nghoid loug- ashi" phyo' yo, ri khyam: phoug" main" main" nau byid: mo, gootu: byu yi ri thoid nghoo" byid: wa zi nghoid? ga: phoid: kyo" boem.
42 Yesu gi ?lug yhoem: zhug mo she: lhei" to" da"
lugloem: gi yhau: gyen: thang da" yhoem: jhoin mo lugloem: bue" loo bye:.
He: da" moo" gi Mangsoo koid: da" moo" nghoid. Ngoonu" da" shid khoin" moo
mau" pho" moo" bue" loo bye: nhung:- ga: lhid" to" jhoem: dang yi ri nanu" anghab' yu" goo" la".
43 Yesu doem tid ?houg: su" nghoid yoomo nanu" ri ngoo gi athang agoin da" Mangso Mungdain: ri nanu" jhang mo yu pyam lho: hau: mungdain yo" moin: yi" da" ashi" yo zei: byid: wa da" byumyu" yi da" lo, moo byid: pyam wa nghoid.
44 Hau: lugloem: tho' moo gyo" baid mo, gi gyau: moin" loo" goo" wa hang" da" tho' moo" we hau: lugloem: shau" gyo" baid su: gi mhoin' kaid wa? ga: wigi tid.
45 Yesu da" dangtu' joem ri Khainjung moo" yo" Pharishe yi shau" gyoo: lang" Yesu gi nyangnu" ri yeing lho: tid zhug nyid ziri se gyo: boem ago".
46 Houg: yoomo nyangnu" gi Yesu ri myheig tei" wa da" khyoo: sho: lo" nyid ago". Nghoid loug we' nyangnu" gi mungbyu yi ri gyoug boem ago". Khasu" wim gari mung" byu yi gi Yesu ri Lapi: nghoid ga: loem" jeing" nyid boem yoomo nghoid.