17
(Mar 9:2-13: Luk 9:28-36)
1 Khyug nyid" koo: myang" thang: ri Yesu gi Petru Yaku yo' nya: nhung" Yohan ri khe: shu" lho"- myhang: da" boem tho' khyoo: nyangnu" kyeing" do, lo" boem.
2 Nyangnu" da" shidkhoin" moo Yesu da" gungdu: gi goo" zang" lid loo" khare". Myonhoo: gi bid yhangti" doug bang lho: void to" da" byimi we' doug bang lo.
3 Hau: lho: cangzoo: soem" yug bang: gi Moshe yo" Elia thu' lo lho: Yesu yo" doem go" nyid zi zheung: myang boem.
4 Houg: lang" Petru gi Yesu ri ?Aseing we"- he: joyoo gi nyid wa ge da" houg: yoomo nang veing" rigi Re" shid re" zoem" daloem Moshe shid re" zoem" daloem:- Elia shid re" zoem" daloem:- ngoo koid: byid: wa agi la"? ga: tid.
5 Petru houg: su" ga: dang: da tid nyid shi" uri gye bang da" jhoem: phyu: thei" daloem: gi nyangnu" da" tho' moo ju" gyoo" lho: hau: jhoem: phyu: thei" khoug: mo da" thui: gi ?He: yug gi ngoo jheddab da" nga" zoo: nghoid. Nyang: ri ngoo gye vho: ngei su: nghoid. Nya: da" dang: ri tam" gyoo: ge"? ga: da" thui: myeing thu' lo.
6 Hau: da" thui: ri cangzoo: yi shau" gyoo: lang" gye" gyo: gyug dain lho: goeb' jo, ago".
7 Aseing Yesu ju" lo wigi houg: bang: ri lo, wigi tain" byid: lho: ?too ge" agyug goo"? ga: tid.
8 Nyangnu" to' tu: yu" kaid ri Aseing Yesu mo gootu: hang" dayug ri we' amyang boem loo.
9 Hau: thang: ri Aseing Yesu yo' nya: cangzoo: yi gi boem mo doem gyoo" lo ago". Houg: su" zheung: gyoo" lo da" uri Aseing Yesu gi ?Nanu" shau" myang bye: da" khyoo: joem ri byu da" nya: zoo: shid: jangmo doem dei to' lo da" bidnyid ju" sho' hang" ri we atid kyoo" goo"? ga: wigi cangzoo: yi ri toung: to".
10 Hau thang: ri cangzoo: yigi tarha" sara: yigi ?Ciwim wigi Elia xangshid" ju" ca" ga: tid go" lha"? ga: Yesu ri zheung: myid: boem.
11 Yesu gi ?gyeing" nyang: Elia shi" ju" wigi bue" loo wa da" khyoo: dangain" ri soin wa zi nghoid? ga: tid.
12 ?Nanu" ri ngoo tid nau da" zigi Elia gi gyoo" loo bye:. Nghoid loug we' byu yi nyang: ri asi yoomo nyang: ri cinoug cikoid lo abye: go". Houg: yo' dakhyoo" ti" Nyangnu" gi byu da" nya: zoo: ri we' Houg: bang: da" lo, moo kyikhyeug shen" yhen zi kham: wa? ga: wigi tid.
13 Hau: lho: ri she- cangzoo: yi gi Yesu gi babtisma sara: Yohan ri yeing lho: tid zi dase' gyo: ago".
(Mar 9:14-29: Luk 9:37-43a)
14 Aseing yo" cangzoo: yi gi byu phung: moo" yi nyid da" jangmoo ju" lang" byu dayug gi Aseing da" shidkhoin" moo poid thug re" thoug lho: wigi ?Aseing we"- nga" zoo: ri nheigkhyeig byid: shi" we' o"-
15 nyang: gi ngho' baid baid da" noo bo wigi coid' lo" lho: myikhyoem moo we' gyid thoem" moo we' daso' so' leung vang vang wim nyid.
16 Ngoo nyang: ri re" da" cangzoo: yi jhang khyoo: khe: shu" yhi: nghoid loug we' nyangnu" gi noo gi sho' ayo" koid: nghoid ago"? ga: tid.
17 Aseing Yesu gi ?Nanu" gi loem" jeing" nheigloem: abo zi yo" shoid vhang: nyid boem nhung: lha". Ngoo gi nanu" yo' dage" kha: myhang ju" sho' nyid ca" la". Kha: myhang ju" sho nanu" ri kham: zheung: nyid wa. Hau: zooshang: ri nga" jhang khe: shu" ri" ge'? ga: tid.
18 Aseing Yesu gi ngho' yu ri nheig yo: kaid lang" gi hau: ngho' yu gi zooshang: gung mo phang: thu' loo" bye:. Houg: lang" zooshang: no zi ge loo" bye:.
19 Hau: thang: ri cangzoo: yi gi Yesu jhang moo sam" zoo: yu: yhe: lho: ?Ngoonu" gi hau: ngho' yu ri ci: wim ayo" khaid thu' pyam lha"? ga: zheung: myid: boem.
20 Aseing Yesu gi ?Nanu" moo loem" jeing" nheigloem: ngi, yoomo nghoid. Ngoo deing" deing nanu" ri tid zigi nanu" moo loem" jeing" nheigloem: nghang" shi" cab yhi' koo: bo nghoid rigi He: da" boem ri he: joyoo mo zi fo: joyoo khyoo yu: loo" we' ga: tid nghoid ri yu: loo" khari" wa loem" jeing" nheigloem: bo rigi nanu" ayo" koid: wa zi ci" we ajo.
21 (He: ja: ngho' yu rigi Akyu mho' da" ziyo' zoo: noem zeung: khyo" za: date: yo" khaid thu' ga: jhoug" byid.) ?Loem ge" da" lo, wigi lhid" to" da Jhoem: mougsoug" xoug" myoo" sho' moo he: da" abeing: zoo: gi aboo.
(Mar 9:30-32: Luk 9:43b-45)
22 Yesu da" cangzoo: yi gi Galile moug: moo doem shau" go" uri Aseing Yesu nyangnu" ri tid da" zigi ?Byu nya: zoo: gi sube" da" lo, moo said pyam zi shau" wa nghoid.
23 Nyang: ri said pyam goo" wa hau: thang: ri soem" nyid byeung" loo lang" byu nya: zoo: gi shid: jangmo doem dei to'' loo wa? ga: tid. Nya: cangzoo: yi we nheigloem: gye" agyo: pyo: boem loo.
24 Yesu yo" cangzoo: yi gi Kapernaum voo moo ju" lo" da" uri akyu" mho' yhoem: mo" shid re" kheung" khyu: mo ju" re" boem wigi Petru ri ?re" sara: phoo gi akyu" mho' yhoem: mo" shid re" kheing" gi kaid nyid la"? ga: re" zheung: myid: boem.
25 Petru gi ?kaid nyid? ga: tid.
Petru yhoem: khoug: khyoo vang loo" lang" Yesu xangshid" tid zigi ?Simun we" nang khasu" myang nyid Mougmyid khokham yigi kheing" hang" jhang mo khyu: yu nyid ago" lha". Nyangnu" da" nya: zoo: yi jhang mo khyu: yu la". Houg: su" anghoid lang" gi gootu: da" byu yi jhang mo nghoid la".?
26 Petru gi ?gootu: byu yi jhang mo lhung khyu: yu ago"? ga: tid.
Houg: lang" Yesu gi ?houg: su" nghoid lang" gi nya: myid nya: zoo: yi gi kheung" khyu: jangmo loid byoin da" akhang" yo" boem.
27 Houg: su" nghoid loug we' nyangnu" da" nheigloem: moo anoo nhang: wa da" shid re" gyid thoem" khyoo yhe: lho: wimdo, kuang ge'. Xangshid" shau" kuang yu da" wimdo, ri nhoid' lang: fo, yu" ge'. Ngei dapyi" ri shoug" yu goo" wa. Hau: da" ngei ri yu lho: nanyang: yo' nga" shid re" houg: bang: ri byid: pyam we'? ga: tid.