13
(Mar 4:1-9: Luk 8:4-8)
1 Hau: bidnyid moo Yesu gi hau: yhoem: mo thu' lo" lho: gyid thoem" yam moo jhau" byid: wa shid re" zhoung: jo.
2 Hau: uri gye" myo: da" byu phung: moo" zeing gi houg: lang" Aseing ri lheing khoem phoung foem: loo yoomo nyang: gi lhid khoug: moo yhe: vang zhoung: jo,. Hau: byu phung: moo" gi gyid nung" yam moo yab jo, ago".
3 Hau: uri dangtu' myoo" sho khyo" khyoo: myoo" sho' jhau" byid: da" zigi
?shid phyang" byu dayug gi myoug: shi" sain" wa shid re" thu' lo.
4 Ashi" ri sain" kaid da" uri dayham" gi khyoo: gung moo gyoo" loo" yoomo ngho' joem gi hau: ashi" ri koid: zo: pyam.
5 Ashi" dayham" gi myid zhoo" athu: da" lugthi: tho' moo gyoo" lo" lho: myid zhoo" poo" yoomo myab, myab, yug re.
6 Nghoid loug we' bid zho: nge" loo lang" gi agyi: no, sho' ayo" cin' yoomo nyhau" kyoug, shid: lo.
7 Ashi" dayham" gi zubang moo gyo" wigi yug ri" nghoid loug we' zubang gyi: ri" lang" te: foeb said pyam.
8 Myoug: shi" gootu: gi myidjang gi moo gyo" yug yoomo azhang dashoo: azhang khyug xi:- azhang soem" xi: ashi" zei: myo: je: lo.?
9 ?Nookhyab dab mo, dangain" gi tam" gyoo: ge"? ga: Yesu tid.
(Mar 4:10-12: Luk 8:9-10)
10 Nya: cangzoo: yi gi Yesu jhang zheung: lo boem lho: ?Ciwim wigi subi" ri jhau" byid: ri dangtu' ci: ca" lha"? ga: myid: boem ago" da.
11 Yesu gi ?Nanu" gi mougkhung: mungdain: da" no, thang khyoo: ri se' gyo: da" akhang" yo" ago". Gooji koem gi hau: akhang" ri ayoo" nghoid ago".
12 Daja: ja: yoo" su: gi hang" ri nghoid loug we' yoo" su: ri myoo" sho' doem pug lung: byid: lho: nyang: gi je yo" jo, loo wa zi nghoid. Ayoo" ajo, su: jhang mo koem gi nyang: yo" gu: dajhi' kyeing" zi lang" yu pyam byid: wa nghoid.
13 Hid: su" dangtu' khyo" nyang: nu ri tid kyo" da" zigi nyangnu" nyang: gi yu" nyid loug amyang- tam" gyoo: loug ashau" gyo: ziyo' ase' gyoo: yoomo nghoid.
14 He: da" khyoo: ri Lapi: Esaia tid to" dang: gi nyangnu" moo joeb byeung" loo bye:.
He: da" byumyu" gi tam" gyoo: nghoid loug we' se' gyoo: zi anghoid.
Yu" nghoid loug we' myang wa zi anghoid. Ciwim gari nyangnu" gi nheig gyeing: mo anghoid.
15 Khasu" wim gari He: byumyu" gi nheigloem: deig, lid: nyid.
nyangnu" da" nookhyab' we jid jo,
myojid" we' coem" ci: bang: nghoid.
Houg: su" anghoid rigi nyangnu" da" myojid" gi myang boem wa.
Nookhyab' we' shau" gyo: boem wa.
Nheigloem: soo zoo: we' lheung: boem wa zi nghoid.
Hau: lho: nyangnu" nga" jhang phoug lo wigi
nyangnu" nya: dam noo ri ngoo ze: gi byid: wa zi nghoid? ga: Mangsoo tid nyid.
16 ?Nghoid loug we' nanu" gi myo, myang ziyo' nu: gyo: loo yoomo ngilho' boem bye:.
17 Nanu" ri ngoo gyeing" nyang: tid ba:- nanu" yo" myang da" zi joem ri Lapi: yi yo' deung: byeung" da" byu yi myoo" sho' myang noug goo" nghoid loug ashau" myang boem. Nanu" shau" gyo: da" khyoo: ri we' nyangnu" gi ashau" gyoo: nghoid ago".
(Mar 4:13-20: Luk 8:11-15)
18 ?Houg: yoomo myoug: shi" sain" su: da" dangkang: ri tam" gyoo: ge.
19 Khyoo: gung moo gyo" da" myoug: shi" da" khyoo: gi Mungdain: da" tarha" mungdang: ri shau" gyoo: nghoid loug we' ase' gyoo: su: yo" du. Akhyeing" su: ju" re" lho: nheigloem: khoug: moo sain" kaid to" da" myoug: shi" ri yu pyam byid: ga: tid.
20 Lugthi: tho' moo sain" khyo da" myoug: shi" gi mungdang: ri shau" gyoo: lang" gau yi nheigloem: yo" dalheung: dam lhoem: yu bang: ri tid nau zi nghoid.
21 Nghoid loug we' nheigloem: moo agyi: no, no, azug yoomo daso' za: te: bo jo, lho: mungdang: tarha" yoomo sei: daja: ja: thu' lo lho: su" juang" yi shen" yhen zi thoung" shau" lo da" uri hau: yug gi dalheung: dam doem phoug lo" bye:. houg: yhangti" su: ri tid nau zi nghoid.
22 Zubyab moo gyoo" lo" da" myoug: shi" gi tarha" mungdang: ri shau" gyo: lho: Mougmyid tho' mo myidmyoo: ungloug khyoo: yo' ziyoo jonu" ri myo, no, vhoo: bo khyoo: yoomo mungdang: tarha" myoug: shi" ri nghoeb zeig pyam lho: wigi ashi" ayo" zei: dakhyoo: ri tid nau zi nghoid.
23 Myidjang: gi moo sain" khyo da" myoug: shi" gi mungdang: tarha" ri shau" gyo: lho: hau: ziri se' gyoo: su: yo" du nyid. Nyangnu" mo dayham" gi azhang dashoo:- dayham" gi azhang khyug xi:- dayham" gi azhang soem" xi:- myo: je lo da" ashi" ri yo" zei:? ga: tid.
24 Aseing Yesu nyangnu" ri dangtu' gootu: doem tid kyo" da" zigi ?Mougkhung: mungdain: zeing gi khasu" nghoid. Byu dayug gi ge da" gug myoug: ri nya: yoo moo yhe: sain" to".
25 Nghoid loug we' myen" ri byu yhoeb' pyo: jo da" uri nya: gyivoo ju" re" wigi myo, shi" ri re" sain" kaid khare" lho: doem phang: lo" byug.
26 Gug, gam joem yug gyi: lo wigi anham: ashi" thu' lo da" uri myo, we' bo thu' lo.
27 Houg: lang" hau: yau: da" deizoo: yi ju" re" wigi yoo seing: ri ?yhoem: seing: we"- Gug gi myoug: ri re" yoo moo datei: anghoid la". Nghoid loug we' he: myo, gam joem gi khayo, yug lo lha"? ga: zheung: myid: boem.
28 Yoo seing: gi ?he: da" moozoo" gi gyivoo zei: da" lo, moo" nghoid? ga: phoug tu". ?Houg: su" nghoid lang" gi ngoonu" myo, ri yhe: phoin pyam wa nang aveing" la"? ga: doem myid: boem.
29 Yoo seing: gi houg su" ?akoid goo" khasu" wim gari myo, gam phoin lang" gug gam ri bo zang" phoin wa nghoid.
30 Gug yed nham" ju" sho' gug yo" myo, eig ja: goin"- dage" yug jo, lho: gyi: loo goo" baja. Houg: lang" gug yed mo, gi myo, gam joem ri xangshid" yed deung: lho: myi: moo nghe pyam ge' hau: thang: gug rigi nga" da" jhi: moo zheung" kaid too" ge"? ein: wigi ngoo tid wa? ga: tid.
(Mar 4:30-32: Luk 13:18-19)
31 Aseing Yesu dangtu' gootu: doem tid da" zigi ?Mougkhung: mungdain: gi byu dayug khyam: moo sain" da" nghang" shi" cab yo' du nyid.
32 Hau: da" nghang" shi" cab gi acab ja: khang" mo" da" tho' moo nge thang da" acab nghoid loug we' gyi: loo lang" gi nghang" poem: dangain" tho' moo je gyi: da" agam nghoid. Moug: moo dang: yen" da" ngho' joem we' akung: ako' moo soid soid to".?
(Luk 13:20-21)
33 Nyang: dangtu' gootu: doem tid da: zigi ?Mougkhung: mungdain: gi doo cid" yo" du nyid. Myiyi: zoo: dayug gi doo cid" ri yu: lho: wigi cen: moin" soem tang moo kaid kaid ri cen: moin" dangain" ri do loo nhang:? ga: tid.
(Mar 4:33-34)
34 Aseing Yesu gi dangtu' joem ri ci: lho: wigi byu phung: moo" yi ri kho" kyo" nyid. Dangtu abo zigi daja: we' akho" kyoo".
35 Hid: su" kho" kyo" da" khyoo: gi Lapi: yi da" dang: moo Nga" da" nhoid phang lho:
?Dangtu' khyo" ngoo tid wa.
Moug: phain" myid phain" da" bidnyid mo wigi
yhoem" to" da" khyoo: ri ngoo phoid: kyoo" wa? ga:
Lapi: tid to" dang: zung" loo wa shid re" nghoid bye:.
36 Hau: thang: ri Yesu gi zoeb phoung: byu yi ri too" khoo lho: yhoem: moo vang lo. Hau: uri nya: cangzoo: yi tain" re" wigi ?yoo moo yug da" dangtu' mo dangkang: ngoonu" ri phoid: kyoo" we? ga: re" mho' boem.
37 Yesu gi ?myoug: shi" sain" su: gi byu da" nya: zoo: nghoid.
38 Yoo thung" gi he: da" mougmyid nghoid ge da" myoug: shi" gi Mungdain: da" nya: zoo: yi ri tid nau zi nghoid. Myo, gam gi akhyeing" su: da" nya: zoo: yi ri tid nau zi nghoid.
39 Sooyo myo, shi" ri re" sain" da" gyivoo gi yu satan nghoid. Gug yham" yo, gi he: mougmyid thang loo" yo' nghoid. Gug yham" mo, gi moug: lagyoo: yi nghoid.
40 Myo, gam ri khyen: yham" lho: myi: moo nghe pyam yhangti" he: da" mougmyid lo" thang da" bidnyid moo we' houg: yo' dakhyoo" bue" loo wa.
41 Byu da" nya: zoo: gi nya: moug: lagyoo: yi ri nhang: kaid lho: byu yi ri shoid vhang: nhang: mo, yo' atarha" da" moo" zei: mo, bain sho ri Nya: mougkhung: Mungdain: mo khyen: thu' yu lho: wigi
42 Dadab jo, da" moo myikhyoem moo khyo kaid nhang: wa houg: moo vang loo" bang: dangain" gi ngougmyeing" shoo" thui: yo' zei yang: ngaid kyeig ga: nyid boem wa.
43 Hau: uri deingbyeing" mo, gi nyangnu" da" nya: pho Mungdain: moo bid yhangti" doug bang to" boem wa. Nookhyab dab mo dangain" tam" gyo: yu ge.
44 ?Mougkhung: mungdain: gi hid: su" bue" ziyo' du nyid. Byu dayug gi yoo dakhyang" moo myhoeb to" da" phougdab ziyoo ri myang- Houg: lang" nyang: gi dalheung: doem myhoeb too" khoo lho: gau yi da" nheigloem: yo" lo" wigi nya: ziyoo dangain" oung" pyam lho: doem tau" yhe: wigi hau: yoo ri qei yu.
45 ?Hau: lho: daja: gi Mougkhung: mungdain: gi phoug" dab da" palhe" ri sho: yen" da" phaga: byu yo" du nyid.
46 Hau: da" phaga: byu gi gye phoug" dab da" palhe" ri shau" myang lang" doem tau" lo" wigi nyang: yo" da" zi dangain" ri oung" pyam lho: hau: da" palhe" ri qei yu.
47 ?Hau: lho: daja:- Mougkhung: mungdain: gi wimdo, kuang mo, gyid thoem" moo goin du" ri ngoo: aja: ja: ri yo" du" yu ziyo' du nyid.
48 Hau: goin moo ngoo: myoo" sho' boo lang" tung' gung khyoo: lang: she: yu lho: zhoung: jo, wigi wimdo, ri khyen: ago"- ge da" ngoo: rigi gyoin khoug: moo khyen: kaid lho: age da" ngoo: rigi nghi: khyoo: khyen: du" pyam ago".
49 Houg: yo' dakhyoo" ti" he: mougmyid lo" thang da" bidnyid ri we' bue" loo wa nghoid. moug: lagyoo: yi gi thu' lo lho: deingmain" mo, da" agung mo akhyeing: ashoeb bang: ri khyen: gam thu' to" lho: dab jo, da" fang myikhyoem moo du" zei kaid pyam wa.
50 Hau: joyoo moo ngougmyeing" shu: thui: to"- zei yang: ngaid zeing to" zi shau" boem wa nghoid.
51 Aseing Yesu gi ?he: khyoo: dangain" ri nanu" gi se' gyoo: go" la"? ga: myid: yu" da" uri nya: cangzoo: yi gi ?se gyoo: bye: Aseing we"? ga: tid ago".
52 Yesu gi ?houg: su" nghoid yoomo Mougkhung: mungdain: da" cangzoo: agi yi bue" loo da" tarha" sara: hang" nghoid loug we' Aseig we axoug" ri we yu thu' shug da" yhoem: seing: yo" du nyid? ga: tid.
(Mar 6:1-6: Luk 4:16-30)
53 Hau: dangtu' dangain" ri bain tid kyoo" lang" gi Aseing Yesu hau: joyoo mo thu' lo" wigi
54 Hau: thang: ri nya: voogung moo doem ju" lo" ri tarha" jung moo tid kyeing" tid poin" nyid da" uri voogung bang: gi nya: dang: ri shau" gyoo: mo, gye gyo: mau" boem yoomo ?he: yug gi hid yhang te" da" phajhi" juyhi gi khayo yo" yu lha"? ga: myid boem.
55 ?Hid: yhang te" da" mau" pho" alhoo: again joem gi khasu" wim yo" koid shug la'. Nyang: gi lagsama nya: zoo: anghoid la'. Nya: myhi' myeing gi Mari ga: zi anghoid goo" rhe"- nya: nhung" we' Yaku Yoseb Simun Yuda ga: bang: anghoid goo" la".
56 Nya: nham" moo" yi we' nyha" moug bang: anghoid goo" la". Houg: su" nghoid ri he: yug gi he: phajhi" juyhi gi khayo, yo" yu lha"? ga: wigi Yesu ri alhoem: yu boem.
57 Yesu gi nyangnu" ri ?Lapi: gi nya: voo yo' nya: yhoem: mo gootu: joyoo moo gi myonhoo: bo nyid phau" myang: nyid boem.?
58 Hau: voo byu yi gi nyang: ri loem" jeing" myid abo boem yoomo Aseing Yesu gi hau: voo moo mau" pho" alhoo: again myoo: sho' atoin" shid.