8
1 Hau: thang: atoung" myang" ri byu phung: moo" zeing daphung: doem zeung: phoung, nyid ago". Nyangnu" zoo: wa zoo: noem ayo" boem lang" gi Yesu gi nya: cangzoo: yi ri nya: jhang khe: yu lho:
2 He: mungbyu yi ngoo yo' dage: nyid zi soem" nyid nghoid bye:. Akhid" nyangnu" zoo: noem ci" we' ayoo" loo: go" nghoid da:. Houg: yoomo ngoo he: mungbyu yi ri gung yau yau da:? ga: tid.
3 Nyangnu" ri ci: azhoo" loo: za: yhoem: khyoo: phang: nhang: kaid nghoid loug we' nyangnu" khyoo: laid moo yoid shang" goo" wa khasu" wim ga: ri nyangnu" mo dayham" gi moug: vi: mo ri" mo, nghoid ago" ga: nyangnu" ri tid.
4 Houg: lang nya: cangzoo: yi gi nyang: ri tu" lho: hid: yhang: te" doin" pyoid yoo moo mungbyu dangain" ri zhoo" wa yhi'- zoo: noem khayo yoo" wa lha"? ga: tid ago".
5 Yesu gi nyangnu" moo ?zooyho' khamyhoo, yoo" go" la"? ga: myid. Nyangnu" gi ?zooyho' nyhed yho' yo"? ga: tu" ago".
6 Yesu gi mung" byu yi ri myidjang moo zhung: jo, wa shid re" amyeung" byid:- hau: zooyho' nyhed yho' ri nyang: yu lho: Mangso jeju" ri bain cung" lang" khyu phe yu wigi mung" byu yi ri byid: wa shid re" nya: cangzoo: yi ri byid: kaid- cangzoo: yi gi mungbyu yi ri gam byid: bye:.
7 Nyangnu" we' gi wimdo, dajhi yo" ago"- Yesu gi jeju" ri bain cung" lang" ngoo: ri we' mungbyu yi ri gam byid: wa shid re" nya: cangzoo: yi ri tid.
8-9 Yug khang" moo" tham: sho' shau" zo: ago"- cangzoo: yigi zo: teung to" da" ajab amoin" gyoin nyhid loem: byeung" sho' yo" koid: zheung" yu ago". Zo: da" mungbyu yigi myid: khyeung" koo: nghoid. Houg: lang" Yesu gi mungbyu yi ri- hau: joyoo mo phang: loo" nhang.
10 Hau: uri nyang nya: cangzoo: yi yo' dage" lhid khoug: moo vang zhoung: lho: Dalamanuta moug: khyoo: yhe lo" khare".
(Mat.16:1-4)
11 Pharishe" dayham" Yesu jhang moo re" wigi nyang: yo' re" ngeug go" nyid. Nyang: ri leug, yu yu" nau khyoo:- Mangsoo nyang: ri vho: ngei: khyoo: ri sagsi toin" shid wa shid re" alhoo: again daja: koid shug we' ga: nyang: ri mho' ago".
12 Yesu gi so' moo" she: lho: akhid" nyid" mo byu yi gi ciwim wigi alhoo: again mho' go" lha". Ngoo nanu" ri tid ba:- hid: bang: ri houg: yhang: te"- alhoo: again koid shug zi anghoid ga: tid.
13 Nyang gi nyangnu" ri nyhid: too" kho' lho: lhid khoug: moo doem do, zhoung: wigi thoem" thei: tab khyoo: gu: dab yhe: lo".
(Mat.16:5-12)
14 Cang: zoo: yi gi zooyho' tham: sho' voin wa zi to" myhed pyam abye: go". Lhid khoug: moo zooyho' daloem: za: te: bo.
15 Houg: lang" Yesu gi nyangnu" ri ?Pharishe" bang: da" doo cid" yo' Herod doocid" ri lhid lho: jang" pyam ge? ga: tid poin".
16 Cangzoo: yi gi- nyang: hidsu" tid zigi ngoonu" zooyho' atham: voin yoomo tid zi nghoid da" ga: nyang: cang" nyang tid go" nyid boem.
17 Nyangnu" hougsu" jho: lho: tid go" nyid uri Yesu si' lang" nyang: gi Nanu" ciwim wigi zooyho' atham: voin khyoo: ri tid go" nyid go" akhid" ju" sho' ase' gyoo: shi" goo" la".
18 Nanu" myojid" dab boem nghoid loug we' amyang goo" la". Nanu" nookhyab dab boem nghoid loug we' ashau" gyoo: goo" rhe" amyid boin: goo" rhe".
19 Ngoo gi byu wim: khyeung" ri zooyho' wim: loem za: xeug phi' zho" ziri nanu" aboin: loo: goo" la". Zo: teung da" ajab amoin" joem nanu" khamyhoo gyoin byeung" sho' koid: zheung" yu go" lha" ga: nyangnu" ri myid:- nyangnu" gi daxe: eig gyoin nghoid ga: tid boem.
20 Hau: thang: ri byu myid: khyeung" ri zooyho' nyhed loem: za: xeug phi' zho" uri zo: teing, da" ajab amoin" joem nanu" khamyhoo gyoin byeung" sho' koid: zheung" yu go" lha" ga: myid:- nyangnu" gi nyhed gyoin ga: phoug tu" ago".
21 Houg: lang" nyang: gi nyangnu" ri ?Nanu" ciwim wigi akhid" ju" sho' ase' gyoo: go" lha"? ga: nyang: nyangnu" ri myed:.
22 Nyangnu" gi Bedsaida voogung moo yhe: ago". Hau joyoo moo byu dayham" gi myo, jed dayug ri Yesu jhang moo shu" re" wigi hau: yug ri tain" byid: wa shid mo nyang ri mho' ago".
23 Yesu gi myo, jed su: ri vooyam, khyoo: shu" she: thu' lo". Nya: myojid" moo shikain" bain teug byid: lang" Yesu gi hau: yug tho' moo lo, ki" byid: lho: daja: ja: ri nang myang la"? ga: nyang: ri myid: da:.
24 Houg: lang" myo, jed su: gi tu" lho: ?Byu joem ri ngoo myang- nghoid loug we nyangnu" gi seiggam joem yhang: ti" so" yen" ago"? ga: tid kyo".
25 Yesu gi hau: yug myojid" tho' moo nya: lo, doem ki" byid:- he: lheung: we' nyang: gi yoem: kaid lho: yu" kaid da:- houg: lang" myo, doem myang lo wigi ja: khang" mo" ri gyeung: gyeung: za: myang bye:.
26 Houg: lang" Yesu gi nyang: ri ?voogung khoug: khyoo: avang, loo"? ga: amyeung" byid: lho: nya: yheom: khyoo: loo" nhang.
(Mat. 16:13-20 Luk.9:18-21)
27 Hau: thang: ri Yesu yo' nya: cangzoo: yi gi Kesare Philipi yo' jhang da" voogung khyoo: yhe: lo" ago". Khyoo: laid moo nya: cangzoo: yi ri ?mungbyu yi gi ngoo ri hang" nghoid da ga: ziri ngoo ri tid ge'? ga: nyang: tid.
28 Nyangnu" gi nyang: ri dayham" gi babtisma byid: su: Yohan nghoid ga: dayham" gi: Elia nghoid ga: hau: lho: dayham" gi Lapi: yi mo, dayug yug nghoid- ga: tid nyid ago"? ga: tu" boem.
29 Nyang: gi nya: cangzoo: yi ri houg: ri nanu" gi ngoo ri hang" nghoid ein: jhoo: go" la"? ga: myid:- houg: lang" Petru phoug tu" wigi ?Nang gi Meshia nghoid ga? tid.
30 Houglang" Yesu gi nya: cangzoo: yi ri- ngoo hang" nghoid ga: ziri nanu" hang" ri we' atid kyoo" goo"- ga: amyeung" byid:.
(Mat. 16:21-28;Luk.9:22-27)
31 Yesu nya: cangzoo: yi ri jhau byid: zigi byu nya: zoo: gi khyeug shu: da" khyoo: myoo" sho' ja: kham: zoo: ca" wa nghoid- zoug: sayen", yi Khainjung zeing yi yo' tarha" sara yi wigi ngeug pyam zi shau" lho: said pyam zi shau" wa. Nghoid loug we' soem" nyid lang" doem dei to'' loo wa ga: jhoug" byid.
32 Nyang: gi he: khyoo: ri gyeung: gyeung: za: nyangnu" ri tid kyoo" bye:. Houg: yoomo Petru gi nyang: ri ayam khyoo: shu" yhe lho: gyi" sho' yooboo foin:.
33 Nghoid loug we' Yesu gi cangzoo: yi ri lheung: yu" lho: Petru ri satan we"- nga" jhang mo gang loo" we' nang gi Mangso shoid khyo" amyid soin" yu"- byu shoid khyo" za: myid soin: ga: wigi Petru ri yooboo foin: dang: tid.
34 Hau: thang: ri Yesu gi cangzoo: yi yo' mungbyu yi ri nya: jhang khe: yu nyangnu" ri nga" thang: moo cang noug su: gi nyang nya: gung ri he: pyam lho: nya: pyang" zeing tu: vu, wigi nga" thang: cang goo" baja" ga: nyang: nyangnu" ri tid..
35 Khasu" wim ga: ri nyang: nya: da" kangso ri khyoid yu noug su: hang" nghoid loug we' kangso soem" loo" wa nghoid loug nga" gang mo yo' ngeibu: ludang" yoomo kangso soem" loo" su: gi nya: kangso yo" yu wa.
36 Hau: lho: byu yi gi mougmyid goin" ziri yo" seung: ci: nghoid loug we' nyang: nya: kangso' soem" lo" byug nghoid ri gi ce: akyu" boo wa lha".
37 byu yi gi nyang: nya: kangso ri ce: ja: wigi thid, lho: doem yo" khyoid yu wa lha".
38 Khasu" wim ga: ri Mangsoo ri aloem khau: ziyo' akhyeung" ashoeb da" he: pyaid moo ngoo yo' nga" jhoug myeung" ri sho' su: hang" nghoid loug we' byu nya: zoo: gi nya: pho phung" yoeb bang, yo' gyeungshang: da" moug: lagyoo: yi yo' dage" ju" re" da" uri nyang: ri sho' thu' nhang wa nghoid.