10
1 Hau: thang: ri Yesu gi hau: joyoo mo Yuda moug: khyoo: yhe: lo" wigi Yodan gyid gyung: thei: tab khyoo: gu: dab lo". Byu Phoung: moo" zeing nya: jhang moo doem zeung: phoung, lo boem lang" nyang: gi khanham we' lhoung koid ziyo' dakhyoo"- nyangnu" ri jhau" byid:.
2 Pharishe" dayham" gi Yesu jhang moo re" lho: nyang: ri leug, yu zoore byu dayug yug gi nya: yhoem: seing: myhi: ri tarha" vang khyo" kang" pyam ge la". Ngoonu" ri" tid kyoo" we"- ga: myid boem.
3 Houg: lang" Yesu gi nyangnu" ri ?Nanu" ri Moshe gi khasu" ga: da" tarha" byid: to" lha"? ga: doemtau" myid.
4 Nyangnu" gi Moshe gi kang" pyam mougsoug" byid: lho: nya: yoem: seing: myhi' ri kang" pyam wa akhang" byid: to"- ga" phoug tu" ago".
5 Houg: lang" Yesu gi nyangnu" ri nanu" nheigloem: thain: boem yoomo he: tarha" gi nanu" shid re" Moshe lhid" too" khare" zi nghoid.
6 Jhoem mungdang; moo tid ziyo' dakhyoo" xangshid" mo phain" so: to" uri gi Mangsoo gi yug gi yo" myiyi: ri phain" so: too" bye:.
7 Yuggi gi nya: myhi' yo' nya: phoo' ri too" kho' lho: nya: yhoem: seing: myhi' yo' gungshoo" daloem za boe" loo" wa..
8 Houg: lang" nya: eig yug gi dagung dashoo" za: bue" loo goo" wa nya: eig yug gi eig yug anghoid- dayug za: nghoid da.
9 Hougsu" wigi Mangso wigi zhoem to" ziri byu hang" wigi we' age kang" pyam ga: tid to".
10 Nyangnu" yhoem: khoug: moo doem lo" nyid uri he: khyoo: ri nya: cangzoo: yi gi Yesu jhang myid ago".
11 Houg: lang" Yesu gi nyangnu" ri ?Nyang: nya: da" yhoem: seing: myhi' ri kang" pyam wigi gootu: dayug ri lo, doem xo' yu su: gi nya: nyhoem: seing: myhi' ri shoid su: nghoid, da.
12 Houg: yo' dakhyoo" nya: yhoem: seing: phoo' ri kang" pyam lho: gootu: dayug yo' lo, doem xo' yu su: gi lang, shoid su: nghoid da:? ga: tid kyo".
Mat.19:13-15, Luk.18:15-17)
13 Byu dayham" gi zooshang: yi ri lo, ke" lho: mainkaid byid: baja" ga: Yesu jhang moo shu" re" ago". Nghoid loug we' cangzoo: yi gi nyangnu" ri gyi koid ago".
14 Hau: ziri Yesu myang lang" nheug yu" yo: ziyo' nya: cangzoo: yi ri hau: zooshang: yi ri nga" jhang khyoo: loo nhang: kaid ge- Nyangnu" ri atoem too" goo"- Khasu" wim ga: ri Mangso mungdain gi houg: te" mo, da" mungdain nghoid.
15 Ngoo nanu" ri deing" deing tid zigi Mangsoo mungdain ri zooshang: dayug yhang ti" alhoem: yu su: gi hau: mungdain: khyoo: khanham we' ayo" vang yhi: wa ga: tid.
16 Hau thang Yesu gi zooshang: yi ri vu, yu lho: yug khang" moo" tho' moo lo, ke" lho: mainkaid byid.
( Mat. 19:16-30,Luk.18:18-30)
17 Yesu gi gyung: khyoo: moo doem so" lo" nyid uri byu dayug gi gei, re" lho: nya shidkhoin" moo poid thug thoug wigi nyang ri ?Ge da" sara we"- apyaid ato: kangso' yo" yu wa shid mo ngoo khasu" koid wa lha"? ga: myid:.
18 Yesu gi nyang ri nang ciwim wigi ngoo ri ge ein: tid lha" Mangsoo dayug mo jain" lho: ge zi hang" anyid.
19 Byu asaid- sube" myi: alhoid- sube" zi akhoug"- adeung amain" da" sagsi akham'- amhau afain" zoo:- re" myhi' yo' re" phoo ri phau" myang: we' ga: da" amyeung" mungdang: joem ri nang si gu, nghoid ga: tid.
20 Hau: yug gi Yesu ri sara we" hau: gu: dangain" ri zooyam yo, mo ngoo phau" cang loo bye:- ga: phoug tu".
21 Yesu gi nyang: ri jheddab myid yo, tu: yu" lho: nang daja: ca" shi"- nang loo" shi" we- re" ziyoo jonu" joem ri lo" oung" pyam lho: myoung, shoo" mo, ri gam byid: we' houg: lang" nang mougkhung: mungdain: moo ziyoo jonu" yoo" wa nghoid. Hau: lho: nga" thang: moo cang we' ga: tid da.
22 Hau da" dang: ri nyang: shoug" gyoo: lang" myonhoo: phyoug" wim shoem" lo" byug ziyo' nheug koug zeing, phang: loo" khare". Khasu" wim ga: ri nyang: ziyoo jonu" yoo" zoo su: nghoid.
23 Yesu nya: cangzoo: yi jhang khyoo: lheung: yu" lho: nyangnu" ri tid ?Yoo" zoo: yoo" shug mo, shid re" gi Mangso mungdain moo vangyhi: wa zi gye" yau: ago"? ga: nyangnu" ri tid kyo".
24 Cangzoo: yi gi he: dang: ri gyo: mau" ago"- Houg: lang" Yesu gi nyangnu" ri Nga" zoo: yi we"- Mangso mungdain: khyoo: vang yhi: wa gye" yau: nyid ga: tid.
25 Yoo" zoo: yoo" shoug su: Mangso mungdain khyoo: vang yhi: wa lei, tho' moo gola-ug gi nghab' nhoo: duang: khyoo" vang lid: loo" wa zi gi je lei- ga: doem tid kyo".
26 Cangzoo: yi gi atho' tid loo: sho' mau" byug boem wigi hougsu" danghoid rigi khayug za: khyoid yu zi te: shau" wa lha"? ga: nyang: cang" nyang: tid go" nyid boem.
27 Yesu gi nyangnu" ri tu: yu" lho: hau: zigi byu khyo" age bui"- nghoid loug we' Mangsoo khyo" gi ge bue" da- ja: khang: moo" gi Mangso shid re ge bue" khyoo: za: danghoid.
28 Houg: lang" Petru gi Yesu ri yu" we' ngoonu" gi dangain" ri to" pyam kho' lho: re" thang: moo cang bye: ga: tid.
29 Yesu gi nyangnu" ri ?Ngoo nanu" ri deing" deing tid ba- ngoo yo' ngeibu: ludang: gang mo yhoem: yoo- mangnhung"- nham" moo"- myhi' phoo- zoo: du joem daja: ja: ri to" pyam su: hang" nghoid loug we'.
30 He: da" pyaid moo shen" yhen ziyo' dage" yhoem: yoo- mangnhung"- nham" moo"- myhi' phoo zoo: du joem moo- azhang dashoo: yo" kham: yu boem wa nghoid- thang: pyaid rigi apyaid ato: kangso' yo" yu wa zi nghoid.
31 Nghoid loug we' shidvhu" mo mo, myoo" sho' gi nung thang khyoo: nghoid boem wa thang: mo mo, myoo" sho' gi shid moo nghoid wa? ga: tid.
Mat. 20:17-19,Luk.18:31-34)
32 Houg: lang" nyangnu" gi Yerusalem khyoo: do, lo" nyid boem uri Yesu gi cangzoo: yi da" shid moo so" nyid. Nya: cangzoo: yi gi mau" lho: thang: cang mo, gi gyoug ago". Yesu gi cangzoo: daxe: eig yug ri doem khe: yu wigi nya: tho' moo bue" loo wa da" khyoo: ri tid kyo".
33 Tam" gyo" yu" ge"- ngoonu" gi Yerusalem khyoo: do, lo" nyid bye:. Byu nya: zoo: gi houg: moo khainjung agyi moo" yi yo' tarha" sara yi da" lo, moo ab pyam zi shau" wa nghoid. Houg: su: nyangnu" gi byu nya: zoo: ri said pyam wa shid re" dang: phyed wigi tung: boug yi da" lo, moo ab pyam lho:
34 Tungbau byumyu" yi gi byu nya: zoo: ri shikain" byi" gyoin: lho: baid wigi said pyam boem wa nghoid. Nghoid loug we' soem" nyid" thang ri nyang: gi dei to' loo, wa.
( Mat. 28:20-28)
35 Zebedi da" nya: zoo: tang: Yaku yo' Yohan gi Yesu jhang tain" lo lho: nyang: ri sara we"- nga" tang: ri nang daja: koid byid: wa zi mho' nau ga: tid ago".
36 Yesu gi nyang: tang: ri ngoo re" tang: ri cenoem koid byid: wa zi vho: ago" ga: myid:
37 Nyang: tang gi Yesu ri ?Nang myonhoo: phung" yoeb yo' re mungdain mo khokham bue" lo" bidnyid ri nga" eig yug ri re" lo, yo shoid khyoo: dayug- lo, koung" shoid khyoo: dayug- nang yo' dage" zhung: nhang: we'? ga: tid ago".
38 Yesu nyatang ri tid zigi re" tang: cenoem mho' nyid zi re" tang: asi nghoid ago"- re" eig yug gi ngoo shau" ca" da" kyikhyeug ein: da" goem ri yo" shug goo" wa la". Ngoo kham ca" da" babtisma ri yo" kham goo" wa la"? ga: zheung: myid.
39 Houg: lang" nyang: tang: gi ?Nga" tang yo" bue"? ga: tid ago". Yesu gi nyang tang: ri ngoo shug ca" da" goem ri re" tang: shug ca" goo" wa. Ngoo kham: yu wa da" babtisma ri shau" kham: yu ca" goo" wa.
40 Nghoid loug we' nga" lo, yo shoid lo, koung" shoid moo khayug zhung: wa zi gi khyen: yu wa shid mo ngoo moo akho: akhang" ajo, houg: gi Mangsoo nyheung too" mo, shid re" za: hau: joyoo nyangnu" ri byid: wa ga: tid.
41 Gootu: cangzoo: daxi: yug bang: hau: khyoo: ri shau" gyo: boem uri Yaku yo' Yohan eig yug ri nheug yo: ago".
42 Yesu gi nya: cangzoo: yi ri nya: jhang khe: yu lho: nyangnu" ri Mangsoo: ri aloem mo ri vhoeb wa akhang" yo" mo, gi Nyangnu" yi tho' moo yoemso yo" amyeung" akhang" yo' vhoeb khang" ago". Zoug: sayen" yi we' amyeung" akhang" ci: lho: nyid ziri nanu" se' boem ago".
43 Nghoid loug we- nanu" gyoo: moo koem gi hougsu" age nghoid- nanu" mo je gyi: noug su: hang" nghoid loug we' nyang: gi dangain" mo, deizoo: koid ca"-
44 Nanu" mo vhujhung: bui" noug su: hang" nghoid loug we' nyang: gi dangain" mo, deizoo koid ca".
45 Khasu" wim ga: ri byu nya: zoo: lang" ri subi" ri join zoo: wa shid mo ju" re" zi anghoid- subi" ri bo pang zei: wa ziyo' byu myoo" sho' khyoid yu wa shid re" nya: kangso' ri byid: pyam wa ga: ju" re" zi nghoid- ga: tid.
(Mat.20:29-30,Luk.18:35-42)
46 Houg: lang" nyangnu" gi Yerikho" khyoo: ju" re" ago"- Yesu gi nya: cangzoo: yi yo' byu phung: yo' thu' lo" nyid da uri Teme nya: zoo: Barateme gi myo jed da" mho' zoo: su: dayug- khyoo: yam moo zhoung: jo,-
47 Nyang: gi" Nazared mo Yesu ju" nyid khyoo: shoug" gyoo: lang" nyho: yoid zoore David nya: zoo: Yesu we"- ngoo ri nheug khyeug yu shi" we' o"- ga: yoid nyid.
48 Myoo" sho' mo, gi nyang: ri sam" zoo: nyid wa shid re" gyi koid boem ago"- nghoid loug we nyang: gi David nya: zoo: Yesu we"- ngoo ri nheug khyeug yu shi" we' o"- ga: daje nyho: yoid lo.
49 Houg: lang" Yesu gi theung: wigi nyang: ri khe: shu" loo ge' ga: tid. Nyangnu" gi myo, jed su: ri khe: lo wigi nyang: ri ngeipyoo: re- too we nyang: nang ri khe: nyid ga: tid boem.
50 Houg: lang" nyang: gi nya: byisheung: khyoid she: pyam lho: byam to' re" lho: Yesu jhang rhe" lo.
51 Yesu gi nyang: ri ngoo re" shid re" cenoem koid byid: wa zi nang vho: la"? ga: myid:- Houg: lang" myo, jed su: gi Yesu ri sara: we" ngoo myo, doem myang nau"- ga: phoug tid.
52 Yesu gi nyang ri so" loo" we re: loem" jeing" nheigloem: gi nang ri ge loo" nhang" abye:- ga: tid. Houg" lang" jang: nya: myo, myang lo wigi Yesu yhe: lo" da" khyoo: moo nya: thang: cang lo" bye:.