5
1 Yooboo khyoid xoin" koid ca" da" shoid vhang: moo" joem gi vhoo: mo ziyo' dayhang: ti" nghoid. Dayug yug gi tarha" yab do, moo sagse: koid byid: wa shid re" tarha" vang khyo" khe: zi shau" wigi nyang: shau" myang bye: khyoo: anghoid lang" shau" gyoo: bye: da" khyoo: daja: ja: yo' sen: ziri lu dang: abyid: nghoid rigi bue" loo wa da kyi" khyeug akyu" ri kham ca" wa zi nghoid.
2 Dayug yug gi gougnyhoug shid: mang te" da" thung" khyo" ayung" alho' da" daja: ja: ri pa: yhi: anghoid lho: za: zang" tain" nghoid rigi nyang: koid ziri myid boin: yo' dage" ayung" alho' bue" lho: yooboo yo" nyid da:.
3 Dayug yug gi ayung" alho' da" byu gung mo ce: ja: ri nghoid nghoid pa: yhi: anghoid lho: za: zang" tain" nghoid rigi nyang: koid ziri boin: yo' dage: yooboo yo" nyid da:.
4 Dayug yug gi ce: ja: khyo" sen: zi nghoid nghoid- amyid yu" lho: dang: theing to" nghoid rigi nyang: cikoid ein: ziri myid boin: yo' dage" yooboo yo" nyid da:.
5 Byu dayug yooboo yoo" lang" nyang: gi yooboo ri yen: yu ca" da:.
6 Hau: thang: nya: yooboo shid re" dam khyo" yang myhi' anghoid lang" coidbaid myhi' ri xoin" khyo" wigi Aseing jhang khyoo: ci: ri" ca" zi nghoid. Khainjung phoo gi hau: da" yooboo shid re" xoin" ngei" byid: wa zi nghoid.
7 Byu dayug gi yang anghoid lang" coidbaid ayo" ge bui" nghoid rigi nya: yooboo da" aphoug" khyo" wigi pheing" kyoug" eig du:- anghoid lang" jid: u: eig du: ri dadu: gi yooboo khyoid xoin" khyo" lho: gootu: dadu: gi myi: nghe' xoin" khyo" Aseing jhang ci: ri" wa zi nghoid.
8 Nyang: gi hau: joem ri khainjung phoo jhang ci: yhe: wigi khainjung phoo gi hau: ngho' eig du: mo xang: shi" du: ri yooboo khyoid xoin" shid re" xang: shi" ngei" byid: wa zi nghoid. Nyang: gi ngho' vhuloem ri alang: phyid loo: za: leingzeing: ri yhen khyau" pyam wa zi nghoid.
9 Houg: lho: ngho' suid" dayham" ri phoin: ayam' cang peig sain" pyam wigi deung da" gu: ri phoin: khyid: moo: zhain: khyo' pyam wa zi nghoid. He: zigi yooboo khyoid byid: da" xoin" nghoid.
10 Hau: thang: nyang: gi eig du: ein: da" ngho' ri thung" ri: khyo" myi: nghe' xoin" ngei" byid: wa zi nghoid. Hau: akhyoo" khyo" wigi khainjung phoo gi byu dayug da" yooboo shid re" xoin" ngei" byid: wigi nyang: gi yooboo khyoid pyam shau" wa zi nghoid.
11 Byu dayug gi pheing" kyoug" eig du: anghoid lang" jid: u: eig du: ayo" ge bui" nghoid rigi nyang: gi yooboo khyoid xoin" khyo" cen: moin" 22 rung ri ci: ri" wa zi nghoid. Nyang: gi hougmoo: zhainloin: xu: anghoid lang" nam pyo: ja: age kaid wa zi nghoid- ciwim gari hau: zigi yooboo khyoid xoin" nghoid- shivoo: xoin" ngei" zi anghoid.
12 Nyang: hau: ziri khainjung phoo jhang ci: yhe: wigi khainjung phoo gi hau ziri lo, dazhoeb zhoeb yu lho: Aseing ri dangain" byid: bye: khyo" wigi nyang: gi hau: ziri zoo: noem xoin" khyo" phoin: tho' moo: nghe' ngei" wa zi nghoid. He: zigi yooboo khyoid byid: da" xoin" nghoid.
13 Hau: akhyoo" khyo" wigi khainjung phoo gi byu dayug da" yooboo shid re" xoin" ngei" byid: wigi nyang: gi yooboo khyoid pyam zi shau" wa zi nghoid. Deing da" cen: moin" gi shivoo: xoin" thung" ri: yo' dayhang: ti" khainjung phoo shid re" nghoid wa.
14 Aseing gi vhoo: moo: tid to" da" thung" ri: joem ri Moshe ri byid: bye:.
15 Dayug yug gi pa: yhi: anghoid lho: za: Aseing shid re" gyeung" shang: da" ziri angei" byid: yoomo yooboo yo" nghoid rigi nyang: gi dam abo da" yang loo: anghoid lang" coidbaid loo: ri doem xab byid: da" xoin" khyo" wigi Aseing jhang ci: ri" wa zi nghoid. Hau: da" aphoug" rigi tarha" vang da" laki yo' dakhyo" soin: phyed wa zi nghoid.
16 Nyang: gi byid: ca" ziri abyid: loo: to" to" nghoid rigi shoo: boem eig xi: loung: byid: ca" zi nghoid. Nyang: gi hau: ziri khainjung phoo ri byid: wigi khainjung phoo we' hau: yug da" yooboo shid re" xoin" khyo" gougnyhoug ri ngei" byid: wa zi nghoid wigi nyang: gi yooboo khyoid byid: zi shau" wa.
17 Dayug yug gi pa: yhi: anghoid loo: za:Aseing da" amyeing" dang: daja: ja: ri shoid nghoid rigi nyang: gi yooboo yo" wigi yooboo aphoug" ri doem kham zoo: wa zi nghoid.
18 Nyang: gi yooboo jhen: xab byid: da" xoin" khyo" wigi dam abo da" yang loo: anghoid lang" coidbaid loo: ri khainjung jhang khyoo: ci: yhi: ca" wa zi nghoid. Hau: da" aphoug" rigi tarha" vang da" laki yo' dakhyo" soin: phyed wa zi nghoid. Khainjung phoo gi hau: xoin" ri byu hau: yug da" pa: yhi: anghoid loo: za: shoid lo" da" yooboo shid re" xoin" ngei" byid: wa zi nghoid wigi nyang: gi yooboo khyoid byid: zi shau" wa.
19 He: zigi nyang: Aseing ri shoid lo" da" yooboo shid re" doem xab byid: da" xoin" nghoid da:.