27
1 Aseing gi Moshe ri
2 Israela byumyu" yi shid re" vhoo moo: tid to" da" thung" tarha" joem ri byid: da:. Byu dayug yug ri Aseing jhang shugbyid: wa ein: gooki lid da" thang" cab to" to" nghoid ri hau: yug gi tarha" vang da" azhang ri ci: wigi vhoo: moo: tid to" da" aphoug" ngei ri byid: lho: yo" loid byoin da:.
3-7 Soem" xi: zain mo khyug xi: zain agyoo: mo
-Yuggi yigi ngei 50 pyi"
-Myiyi: myhi' yigi ngei 30 pyi"
-Wim: zain mo eig xi zain agyoo: mo yuggi yigi ngei 20 pyi"
-Zoomyi: yigi ngei 10 pyi"
-Wim: zain vhoo: mo yuggi nu" yigi ngei 5 pyi"
-Myiyi nu" yigi ngei 3 pyi"
-Khyug xi: zain dang mo yuggi yigi ngei 15 pyi"
-Khyug xi: zain dang mo myiyi: yigi ngei 10 pyi" byid: ca" da:.
8 Thang" cab to" da" byu dayug gi ke' to" da" aphau" ri byid: wa shid re" gye" sho" jhen: nghoid rigi nyang: gi byu hau: yug ri khainjung pho jang" shu" yhe: wigi khainjung phoo gi byu hau: yug yo" byid: wa nhoo' ri cang wigi nyhoem: da" phoug" ri ki' byid: wa zi nghoid.
9 Aseing ri shugbyid: wa da" xoin" khyo" lhoem: yu moin: da" gougnyhoug yo' sen: wigi thang" cab to" da" zi nghoid rigi Aseing ri byid: da" jhungshug ja: khang" moo" gi younglho' nyid da:.
10 Thang" cab to" da" yug gi hau: shid re" gougnyhoug gootu: ri age thid byid: nghoid da:. Nyang: hougsu" koid nghoid rigi gougnyhoug eig du: goin" Aseing re" nghoid da:.
11 Nghoid loug we' thung" khyo" ayung" alho' da" gougnyhoug yo' sen: da" thang" cab nghoid rigi hau: zigi Aseing ri shugbyid: da" xoin" khyo" age lhoem: yu nghoid da:. Hau: gougnyhoug ri khainjung pho jang khyoo: she: yhi: wa zi nghoid.
12 Khainjung phoo gi hau: ziri ge zi age zi moo cang wigi gu ki' byid: wa zi nghoid. Houg: lho: hau: gu gi lo" thang mo gu nghoid wa.
13 Byu hau: yug gi hau: gougnyhoug ri doem tau" qei nau nghoid rigi nyang: gi hau: gu tho' shoo: boem 20 doem pug lung: byid: wigi qei ca" da:.
14 Byu dayug yug nya: yhoem: ri Aseing ri shugbyid: lang" Khainjung phoo gi hau: yhoem: ge zi age ziri cang lho: gu ki byid: wa zi nghoid. Houg: lho: hau: gu gi lo" thang da" gu nghoid wa.
15 Hau: yhoem: ri shugbyid: da" yug gi hau: ziri doem tau" qei nau nghoid rigi nyang: gi hau: gu tho' shoo: boem 20 doem pug lung: byid: wigi qei ca" da:.
16 Byu dayug yug gi nya: mougmyid dadu ri Aseing ri shugbyid: nghoid rigi hau: mougmyid gu ri amyau: khanhoo vang ziri cang wigi yoono, datang ri ngei daxi khyo" gu ki byid: wa zi nghoid.
17 Nyang: gi mougmyid ri yooboo jhen: xab byid: da" zain nyid bain yo' dage" shugbyid: nghoid rigi gu byeung" sho' nghoid ca" da:.
18 Nyang: gi doem tau" byid: da" zain kha yo, ri nghoid nghoid shugbyid: nghoid rigi doem tau" byid: da" zain void khamyhang deing shi" ziri soin: yu" wigi khainjung phoo gi gu ri myid: tu' lho: ki byid: ca" da:. Houg: lho: hau: gu ri khyoo ca" da:.
19 Mougmyid ri shugbyid: to" da" yug gi: hau: ziri doem tau" qei yu nau nghoid rigi nyang: gi hau: gu tho' shoo: boem 20 doem pug lung: byid: wigi qei yu ca" da:.
20 Byu dayug gi Aseing mo xang: shi" atau" qei yu lho: gootu: dayug yug ri hau: mougmyid oung" nghoid rigi nyang: gi doem tau" qei yu wa da" akhang" ayoo" loo wa.
21 Thang: lheing: doem tau" byid: da" zain nyid moo hau: mougmyid gi Aseing da" apyaid ato: jonu" gyeing" nyang: bue" ri" wa. Hau: zigi khainjung yi shid re" nghoid wa.
22 Byu dayug gi nyang: qei yu da" yoo mougmyid ri Aseing ri shugbyid: nghoid rigi
23 khainjung phoo gi thang: lheing: doem tau" byid: da" zain nyid ju" sho' gyoo: mo zain void joem ri soin: yu" wigi hau: aphoug" gu ri myid tu lho: ki byid: wa zi nghoid. Houg: lho: byu hau: yug gi hau: gu ri hau: nyid" nyang: byid: ca" da:. Hau: ngei gi Aseing seing: da" ngei nghoid da:.
24 Hau: khyam: yoo mougmyid ri doem tau" byid: da" zain void moo xang: shi" seing: da" yhoem: seing anghoid lang" nya: amyed ashen yiri doem tau" byid: wa zi nghoid.
25 Aphoug" gu dangain" ri tarha" vang da" azhang ri ci: wigi ki wa zi nghoid.
26 Xang: shi" xang" da" gougnyhoug gi Aseing da" zi nghoid yoomo hang" we' nyang: nya: myid vho: xoin" khyo" Aseing ri age shugbyid: nghoid da:. Nu nu"- yang nu"- coidbaid nu" gi Aseing seing: zi nghoid da:.
27 Nghoid loug we' xang shi" xang" da" ayung" alho' gougnyhoug rigi tarha" vang gu da" shoo: boem 20 doem pug lung: byid: wigi doem tau" qei yu ca" da:. Hau: ziri adoem tau" qei yu nghoid rigi gootu: dayug ri tarha" vang da" aphoug: gu yo' yo" oung" pyam wa zi nghoid.
28 Aseing ri bain bain shugbyid: to" da" xangsu: byu- gougnyhoug- mougmyid ci: nghoid nghoid- hang" we' hau: ziri age oung" age qei yu wa zi nghoid. Hau: zigi Aseing seing: da" zi nghoid da:.
29 Xangsu: byu rilang" shugbyid: too" bye: yug ri age doem tau" qei yu nghoid da:. Nyang: gi said pyam zi shau" ca" da:.
30 Shivoo: nghoid ri nghoid shi" nghoid ri nghoid mougmyid mo thu da" gu dangain" daxi boem mo daboem gi Aseing shid re" nghoid.
31 Byu dayug yug gi houg mo doem tau" qei yu nau nghoid rigi nyang: gi tarha" vang da" aphoug" gu moo shoo: boem 20 ri doem pug lung: wigi byid: ca" da:.
32 Yhoem: gougnyhoug daxi: du: mo dadu: khang" moo" gi Aseing shid re" nghoid da:. Gougnyhoug joem ri nghab uri daxi du: mo dadu: gi Aseing shid re" nghoid da:.
33 Ayung" da" gougnyhoug joem ri khyen: wa khyo" yhoem: seing: gi gougnyhoug joem ri age jung nghoid da:. Nyang: gi ciri: we' gootu: age thid nghoid da:. Nyang: gi dadu: shid re" gootu: dadu: ri thid kaid nghoid rigi hau: gougnyhoug eig du: goin" gi Aseing zi bue" ri" wa. Hau: joem ri age tau" qei yu nghoid da:.
34 He: joem gi Israela byumyu" yi shid re" Sina boem dang moo: Moshe ri Aseing wigi byid: da" amyeing" dang: joem nghoid da:.