20
1 Aseing gi Moshe ri
2 Israela byumyu" yiri tid wa shid re" ?Nanu" hang" nghoid loug we' anghoid lang" nanu" moo bo nyid da" tungbau byu yi hang" nghoid loug we' Moleg yu phara" ri no' da" jang" moo ci: wa shid re" nya: zooshang: dayug yug ri byid: su: gi shava byu yi khyo" lugboem wigi du" said pyam zi shau" wa zi nghoid.
3 Hang" nghoid loug we' Moleg shid re" nya: zoo: yi mo dayug ri byid: wigi nga" younglho' da" zoem" ri ayung" alho' bui" nhang: ziyo' nga" gyeung" shang: myeing ri aphoug" amyang: koid nghoid rigi thougtheung gyi koid wigi nga" byumyu" dayug khyo" nyang: ri myid soin: loo: wa zi anghoid.
4 Nghoid loug we' shava byu yigi nyang: koid bye: ziri cishu: anhang: ziyo' nyang: ri asaid pyam nghoid rigi
5 Ngoo hau: yug yo' nya: ikoin deungkhu: dangain" ri nyang: yo' xo' wigi ngoo ri dang: azung" ziyo' Moleg ri no' bang: dangain" ri we' thougtheung gyi koid wa. Ngoo gi nyangnu" ri nga" byumyu" khyo" myid soin: loo: wa zi anghoid.
6 ?Shid: bye: bang: da" soobyoo yo' dang: tid goo" bang: jang" khyoo: phajhi" mho' wa shid re" dayug yug yhe: nghoid rigi ngoo nyang: ri thougtheung wigi nga" byumyu" dayug khyo" myid soin: loo: wa zi anghoid.
7 Nanu" nya: gung ri gyeung" shang: nyid ge'. Ciwim gari: ngoo gi nanu" Aseing Mangsoo nghoid.
8 Nga" tarha" ri tam" gyo: cang yhe: nyid ge'. Ciwim gari: ngoo Aseing nghoid wigi nanu" ri gyeung" shang: nhang: bye:? ga: tid.
9 Ref 20:9: Thu 21:17; Mat 15:4; Mrk 7:10. Aseing gi vhoo: moo: tid to" da" thung" ri: joem ri byid: too" bye:. Nya: myhi' yo' nya: phoo ri nheing" su: hang" ri nghoid loug we' said pyam zi shau" wa. Nyang: shid: zigi nyang: moo yoovoin bo da:.
10 Ref 20:10: Thu 20:14; Xng 18:20; Tid 5:18. Yuggi dayug gi nya: byencang" Israela byumyu" dayug da" yhoem: seing myhi' yo' gung shoo" zoem" khau: shoid nghoid rigi nyang: yo' myiyi: myhi eig tang: goin" said pyam zi shau" wa nghoid.
11 Ref 20:11: Xng 18:8; Tid 22:30; 27:20. Yuggi dayug gi nya: pho yhoem: seing myhi' dayug yo' gung shoo" zoem" khau: khyo" nya: phoo ri sho' phu" nhang: nghoid rigi nyang: yo' myiyi: myhi' eig tang: goin" said pyam zi shau" wa nghoid. Nya: tang: shid: zigi nya: tang: moo yoovoin bo da:.
12 Ref 20:12: Xng 18:15. Yuggi dayug gi nya: du moo" yo' gung shoo" zoem" khau: nghoid rigi nya: eig tang: goin" said pyam zi shau" wa nghoid. Nya: eig tang: gi khoem" boem koid: da" moo" ri koid bye:. Nya: tang: shid: zigi nya: tang: moo yoovoin bo da:.
13 Ref 20:13: Xng 18:22. Yuggi dayug gi gootu: yuggi yo' gung shoo" zoem" khau: nghoid rigi nya: tang: gi aco' ajhoid moo" ri koid abye: yoomo eig tang: goin" zi said pyam shau" wa zi nghoid. Nya: tang: shid: zigi nya: tang: moo yoovoin bo da:.
14 Ref 20:14: Xng 18:17; Tid 27:23. Yuggi dayug gi myiyi: dayug yo' hau: myiyi: nu" da" nya: myhi' ri lo, xo' yu nghoid rigi nyangnu" gi asho' ashid: moo" ri koid bye: yoomo soem" yug goin" ri myi: yo' nghe' said pyam wa zi nghoid. Houg yhang: te" moo" ri nanu" phung: moo: akhang" abyid: goo".
15 Ref 20:15,16: Thu 22:19; Xng 18:23; Tid 27:21. Yuggi dayug gi gougnyhoug dadu: yo' gung shoo" zoem" khau: nghoid rigi nyang: yo' gougnyhoug ri said pyam wa zi nghoid.
16 Myiyi: dayug gi gougnyhoug dadu: yo' gung shoo" zoem" khau: wa nghoid rigi nyang: yo' gougnyhoug ri said pyam wa zi nghoid. Nya: tang: shid: zigi nya: tang: moo yoovoin bo da:.
17 Ref 20:17: Xng 18:9; Tid 27:22. Yuggi dayug gi nya: nhammoo" yo' nghoid loug we' pho shoid khyo" bo lo da" nhammoo" yo' nghoid loug we' myhi' shoid khyo" bo lo da" nhammoo" ri yo' nghoid loug we' lo, xo' nghoid rigi nyangnu" ri shava phung moo: sho' phu" nhang: wigi byu phung: mo khaid thu pyam wa zi nghoid. Nyang: gi nya: nhammoo" yo' gung shoo" zoem" khau: bye: yoomo bue" thu re" da" akyu" yooboo joem ri kham zoo: wa zi nghoid.
18 Ref 20:18: Xng 18:19. Yuggi dayug gi myiyi: dayug ri nyang: mi ci: nyid da" ayo, moo: gung shoo" zoem" khau: nghoid rigi nya: eig tang: goin" ziri byu phung: mo khaid thu pyam wa zi nghoid. Ciwim gari: nya: tang: gi thung" khyo" ayung" alho' ga: da" thung" ri: ri lhu: phyo yoomo nghoid.
19 Ref 20:19,20: Xng 18:12-14. Yuggi dayug gi nya: nid yi yo' nghoid loug we' nya: myhi' da" nya: bi: nya: nhung" yi yo' nghoid loug we' gung shoo" zoem" khau: nghoid rigi nya: tang: gi khoem" boem koid: da" moo" shid re" bue" thu lo da" akyu" yooboo ri kham zoo: wa zi nghoid.
20 Yuggi dayug gi nya: moo" nya: laid yi da" yhoem: seing myhi' yo' gung shoo" zoem" khau: nghoid rigi nyang: gi nya: moo" nya: laid yiri sho' phu" nhang: wigi nyang: yo' hau: myiyi: myhi' gi yooboo dam ri khyoug" ca" wa zi nghoid. Zooshang: dayug we' yoo" wa zi anghoid.
21 Ref 20:21: Xng 18:16. Yuggi dayug gi nya: mang: nhung" da" yhoem: seing: myhi' ri yu nghoid rigi nya: tang: gi zooshang: ayoo" loo: shid: loo" goo" wa. Nyang: gi thung" khyo" ayung" alho' da" moo" ri koid bye: ziyo' nya: mang: nhung" ri sho' phu" nhang: bye:.
22 Aseing gi ?Nga" tarha" yo' amyeing" dang: dangain" ri cang nyid ge'. Hougsu" nghoid rigi ngoo nanu" ri shu" vang lo" nyid da" Khanan mung" gi nanu" ri he: pyam wa zi anghoid.
23 Hau: mung" moo nyid da" byumyu" yi da" thung" ri: joem ri acang koid goo". Hau: mung" khyoo: nanu" yo" vang loo" wa shid re" hau: yu phara" ri no' bang: ri ngoo khaid thu pyam wa zi nghoid. Nyangnu" gi nyangnu" da" akhyeing" da" moo" dangain" yo' ngoo ri co' nhang: nyid da:.
24 Nghoid loug we' he: myid vhu" nu" mougmyid ge da" mungdain: ri nanu" seing: da" mougmyid khyo" nghoid baja" ein: ngoo dangsoo" koid too" bye:. Ngoo gi hau: ziri nanu" ri byid: wa nghoid. Ngoo gi nanu" Aseing Mangsoo nghoid. Ngoo nanu" ri gootu: byumyu" yi mo gootu: nyang: khyen: kho' too" bye:.
25 Houg: yoomo nanu" gi thung" khyo" younglho' ziyo' ayung" alho' da" gougnyhoug joem yo' ngho' joem ri bang bang za: kho' too" ca". Ayung" alho' da" gougnyhoug joem yo' ngho' joem ri azoo: goo". Ngoo gi hau: joem ri ayung" alho' ein: tid too" bye: yoomo hau: joem ri zo: zigi nanu" ri ayung" alho' bui" nhang: da:.
26 Nanu" gi gyeung" shang: nyid ziyo' ngoo kyeing" seing: da" bang: nghoid nyid. Ciwim gari: ngoo gi Aseing nghoid ziyo' ngoo gi gyeung" shang: nyid. Nanu" ri ngoo dayug kyeing" seing: wa shid re" ngoo gi nanu" ri gootu: byumyu" yi mo gootu: nyang: khyen: kho' too" bye:.
27 ?Shid: mo, da" soobyoo joem yo' tid sham: go" da" yuggi myiyi: hang" nghoid loug we' lug boem yo' du" said pyam wa zi nghoid. Hid su" koid su: hang" nghoid loug we' nyang: shid: zigi nyang: moo: yoovoin bo da? ga: tid.