10
1 Arun da" nya: yuggi zoo: Nadab yo' Abihu tang: gi nyang: yug nya: myioug" yu lho: hau: jang" moo myi: dab da" myigyu: kaid- nam pyo: ja: kaid wigi hau: ziri Aseing jhang shugbyid: da:. Nghoid loug we' hau: myi: gi gyeung" shang: zi anghoid. Ciwim gari: hau: zi shugbyid: wa shid re" nya: tang: ri Aseing amyeing" abyid: too" nghoid da:.
2 Aseing gi houg: jang: myi: ri khyo kaid wigi hau: joyoo Aseing shidkhoin" moo nya: tang: ri nghe' said pyam da:.
3 Hau: thang: Moshe gi Arun ri ?He: zigi Aseing nyang: dang: tid uri ?ngoo ri shugbyid: bang: dangain" nga" da" gyeung" shang: ziri phau" myang: ca"- ngoo gi nga" byumyu" yiri nga" phung" yoeb ri pang shug wa nghoid? ga: tid da" dang: nghoid? ga: tid. Nghoid loug we' Arun gi sam zoo: tam" to" da:.
4 Moshe gi Arun da" nya: laid Uziela nya: yuggi zoo: tang: nghoid da" Meshaela yo' Elzaphan tang: re khe: yu lho: ?Hid khyoo: re" lho: he: younglho' zoem" mo re" eig tang: da" mang: nhung" tang: manggung ri re" vu, yu lho: dab tunggung shoid moo yhe: vu, too" ge'? ga: tid.
5 Houg: yoomo nya: tang: gi re" lho: manggung mo byimi moo zei: wigi Moshe amyeing" dang: yo' dayhang: ti" dab tunggung shoid khyoo: yhe: dang pyam ago".
6 Hau: thang: Moshe gi Arun yo' nya: yuggi zoo: tang: nghoid da: Eleaza yo' Ithama tang: ri ?Nanu" kougshu: zi ci: shug khyo" wigi vhuloem akyo'- anghoid lang" byimi lang: ceig khyoo: ri akoid go". Nanu" hougsu" koid rigi nanu" shid: boem wa. Aseing gi byu phung: goin" ziri nheig yo: loo wa nghoid. Nghoid loug we' Aseing wigi nhang: kaid da" myi: wigi nge" shid: pyam da" he: shid: mang ri nanu" da" mang: nhung" Israela byumyu" yigi koug ngau wa da" akhang" yo" da:.
7 Zoem" khoem" duang: mo athu loo" goo"- nanu" thu lo" ri shid: shau" wa. Ciwim gari: nanu" gi Aseing da" mainkaid xu: gyoid lho: shug byid: too" byid: bye: mo, nghoid ago"? ga: tid. Houg: yoomo nyangnu" gi Moshe tid ziyo' dayhang: ti" koid bye:.
8 Aseing gi Arun ri
9 ?Nang yo' re" yuggi zoo: yigi zabyid yhid: anghoid lang" yhid: shed shug thang: ri nga" zoem" khoug: khyoo: age vang wa. Nanu" vang yhe: nghoid rigi nanu" shid: shau" wa zi nghoid. He: zigi nanu" da" amyed ashen yi dangain" cang wa da" tarha" nghoid.
10 Nanu" gi Mangso wigi seing: da" gu: joem yo' shava dangain" mo, shid re" ca" da" ja: joem agyoo: moo we' thung" ri: khyo" younglho' ziyo' ayung" alho' da" ja: agyoo: moo we' kho' too" ca" ago".
11 Nanu" gi Moshe khyo" wigi ngoo nanu" ri byid: to" da" tarha" joem dangain" ri Israela byumyu" yiri jhau" byid: ca" ago"? ga: tid.
12 Moshe gi Arun yo' deing nyid shi" da" nya: yuggi zoo: tang: nghoid da" Eleaza yo' Ithama bang: ri ?Aseing shid re" ngei" byid: da" zoo: noem xoin" mo teing to" da" shivoo: xoin" ri yu lho: hau: ziri doocid" akaid loo: za zooyho' koid wigi hau: zooyho' ri phoin: nam moo zoo: ge'. Ciwim gari: he: xoin" gi gye" gyeung" shang: zi nghoid.
13 Hau: zooyho' ri gyeung" shang: da" joyoo moo: zoo: ge'. Hau: zigi Aseing ri ngei" byid: da" zoo: noem xoin" mo nang yo' re" yuggi zoo: yi shid re" gamboem nghoid da:. Hau: zigi Aseing ngoo ri byid: to" da" amyeing" dang: nghoid.
14 Nghoid loug we' nang yo' re" yhoem: byu yigi khainjung yi shid re" gooki lid jhungshug yo' gooki lid alu: khyo" wigi Aseing ri shugbyid: da" yanggang shoo" yo' bungsain: ri zoo: we'. Nanu" gi hau: xoin" ri thung" ri: khyo" gyeung" shang: da" joyoo khamoo: nghoid loug we' zoo: ge'. He: xoin" joem gi Israela byumyu" yi da" zoem" khau: xoin" mo nang yo' re" zoo: yi gamboem khyo" nanu" ri byid: to" zi nghoid da:.
15 Nyangnu" gi xu: ri zoo: noem xoin" khyo" Aseing ri ngei" byid: da" uri bungsain yo' yanggang shoo" ri ci: ri" wa zi nghoid. Aseing amyeing" dang: yo' dayhang: ti" hau: gamboem gi nang yo' re" zoo: yi shid re" apyaid atoo: nanu" seing: wa zi nghoid da:.
16 Hau: thang: Moshe gi yooboo khyoid xoin" shid re" coidbaid da" khyoo: ri myid: yu" uri hau: zi bain nghe' ngei" bye: ziri se' yu da:. He: zi yoomo Moshe gi Eleaza yo' Ithama tang: ri nheig yo: da:. Houg: lho: nyang: gi
17 ?Ciwim yoomo re" eig tang: yooboo khyoid xoin" ri younglho' joyoo moo azoo go" lha". Hau: zigi gye" gyeung" shang: zi nghoid. Byu phung: da" yooboo ri yu pyam byid: wa shid re" hau: ziri Aseing gi nanu" ri byid: to" zi nghoid.
18 Hau: du: da" suid" ri younglho' da" zoem" khyoo: aci: vang loo" yoomo ngoo amyeing" byid: to" ziyo' dayhang: ti" re" tang: gi hau: xoin" ri houg moo zo: pyam wa eung: zi nghoid? ga: tid.
19 Arun doem ?Akhid" nyid" ngoo he: yooboo khyoid xoin" zo: nghoid rigi Aseing khab yu wa la". Byumyu" yigi akhid" nyid" nyangnu" da" yooboo khyoid xoin" joem ri Aseing ri shugbyid: lho: nyangnu" da" nghe' ngei" xoin" ri we' ci: re" ago". Nghoid loug we' hau: gyoug pho" moo" zoo" joem gi nga" jhang bue" nyid abye:? ga: tid.
20 Moshe he: ziri shau" gyoo: lang" nyang: nheugshid: nheugdeug bye: da:.