XOIN" NGEI"
MOUGSOUG"
(Leviticus)
Xoin" ngei" mougsoug" moo Noku coung" tarha" khyoo: yo' shidphyang" Israela byumyu" yi da" laloem lakhoug: pui" tarha" joem bo lho: jhau" shid khyoo: ri shu" koid vhu" she: wa shid re" yoo voin bo da" khainjung yi shid re" tarha" joem bo da:. He: jhoem: mougsoug" pug moo: yhouggyen: thang zigi Mangso da" gyeung" shang: ziyo' nya: byumyu" yi da" noku coung" khyoo: nghoid wigi ?Israela byumyu" yi da" gyeung" shang: Mangsoo? yo' nyangnu" zoem" khau: khyoo: ri zei: zeing wigi kang so' dei wa khyoo: nghoid da:. He: jhoem: pug moo myeing gyi: da" jhoem: du ri 19:18 moo shau" myang wigi hau: ziri eig loem: ein: da" gyi: thang amyeing" dang: nghoid ga: Yesu tid zi nghoid. Hau: zigi ?Re" gung ri jheddab yhang: ti" re" yhoem: kyoo" cang" ri jheddab we? ga: zi nghoid.
1
1 Aseing gi Moshe ri Aseing da" zoem" mo khe: yu wigi
2 Israela byumyu" yi nyangnu" da" xoin" ri ngei" byid: uri cang nyid ca" tarha" joem ri vhoo: mo ziyo' dakhyo" Moshe ri byid: bye:. Byu dayug yug gougnyhoug xoin" ngei" uri hau: zigi nya: nu: nghoid nghoid- nya: yang nghoid nghoid- nya: coidbaid nghoid nghoid- nghoid ca".
3 Nyang: gi myi: nghe' xoin" khyo" nya: nu: ri xoin" ngei" nghoid rigi dam abo da" nuloo: ri byid: ca" wa zi nghoid. Nyang: ri Aseing khab yu wa shid re" hau: ziri Aseing da" zoem" khoem" duang: moo: to" too" ca" wa zi nghoid.
4 Hau: yug gi nu: vhoo" loem moo: nya: lo, ki" byid: wa zi nghoid wigi hau: ziri nya: yooboo khyoid pyam byid: da" xoin" nghoid ein: khyo" khab yu wa zi nghoid.
5 Nyang: gi hau: nuloo: ri houg moo said wigi Arun da" akung: mo khainjung yigi nu: suid" ri Aseing ri ab byid: lho: zoem" khoem" duang: moo jo, da" phoin: myid: shoid goin" jang" khyoo: hau: ziri foid sain" kaid wa zi nghoid.
6 Hau: thang: nyang: gi gougnyhoug shooyid ri khyoid wigi hau: ziri jab wa zi nghoid.
7 Houg: lho: khainjung yigi phoin: tho' moo thang" nyheing zang lho: myi: moid wa zi nghoid.
8 Nyangnu" gi vhuloem yo' xu: we' bo kaid wigi shoo' khyi joem ri myikhyoem tho' moo: ke" wa zi nghoid.
9 Hau: yug gi khoug: loem khoug: seing" yo' khyid: ri cid" pyam wigi xoin" ngei" khainjung phoo gi phoin: tho' moo: du: goin" ziri myi: nghe' xoin" ngei" byid: wa zi nghoid. He: xoin" da" shoem: gi Aseing ri ngei bu: nhang: wa zi nghoid.
10 Byu dayug gi nya: yang anghoid lang" coidbaid ri xoin" ngei" wa nghoid rigi dam abo da" aloo: nghoid ca" wa.
11 Nyang: gi hau: ziri phoin: mougzhung: shoid moo said wigi khainjung yigi suid" joem ri phoin: myid: shoid goin" jang" khyoo: foid sain" pyam wa nghoid.
12 Hau: yug shoo" bain zain: thang: ri xoin" ngei" khainjung phoo gi vhuloem yo' xu: we' bo kaid wigi shoo" dangain ziri myikhyoem' tho' moo: ke" too" wa zi nghoid.
13 Hau: su: gi khoug: loem khoug: seing" khyid: sain: ri cid" pyam wigi khainjung phoo gi hau: xoin" ri Aseing jhang ab byid: lho: hau: zi dangain" ri phoin: tho' moo: nghe' wa zi nghoid. He: xoin" da" shoem: gi Aseing ri ngei bu: nhang: wa zi nghoid.
14 Byu dayug gi ngho' ri nghe' da" xoin" khyo" xoin" ngei" nghoid rigi pheing" kyoug" anghoid lang" jid: u: nghoid ca" wa.
15 Khainjung phoo gi ngho' leung zeung: ri yhen phyed pyam lho: phoin: moo ke" to" wigi vhuloem ri phoin: tho' moo: nghe' ngei" wa zi nghoid. Suid" ri phoin: nam moo: zhain: khyo' pyam wa zi nghoid.
16 Nyang: gi loid ri myiyab shoem" khyo' boem to" da" phoin: bidthu shoid moo: she: lhei" pyam wa zi nghoid.
17 Nyang: gi dung ri zei: ci: wigi dung ri agyoug: nhang: loo: za: gung ri lang: khyam" pyam lho: dagung goin" ziri phoin: tho' moo: myi: nghe' xoin" ngei" byid: wa zi nghoid. Hau: xoin" da" shoem: gi Aseing ri ngei bu: nhang: wa zi nghoid.