5
(Mat 4:18-22: Mar 1:16-20)
1 Dalheung: ri Yesu gi Genesared gyid thoem" yam moo yab jo wigi byu phung: yi gi Mangso da" mungdang: ri tam" gyoo: wa ga: Yesu da" nam moo nyhin" jhab go" lo.
2 Hau: da" uri Yesu gi gyid yam moo tei" to" da" lhid eig khyab, ri myang kaid. Ngoo: kuang mo, gi hau: lhid khoug: mo gyo" lho: nyangnu" da" goin ri cid" shang: go" nyid.
3 Yesu gi hau: lhid eig khyab, mo Simun da" lhid moo do, lo" lho: lhid ri gyid yam mo dajhi ku" kang" kaid wa shid re" Simun ri tid. Hau: thang: ri zhoung: lho: byu phung: moo" ri tarha" kho" kyo".
4 Houg: su" bain kho" kyoo" lang" gi gyid no jang" khyoo: gu: yhi: ge' wimdo, kuang wa shid re" Re" da" goin ri we' re" byencang" yi da" goin ri we' khyo' kaid ge" ga: Simun ri tid.
5 Simun gi Aseing we" hid: moo gi ngoonu" damyen goin" yoem: kaid kuang nghoid loug we' ngoo: dadu: we' ayo" boem. Nghoid sho' loug we' Aseing tid zi yo' dakhyoo" ti" goin joem ri ngoo khyoo wa" ga: tid.
6 Nyangnu" gi goin ri khyo' kaid ri wimdo, myoo" sho' yo" zhoung" lhoung yu yoomo goin joem lang" alug lug jeug lo.
7 Houg: yoomo re" pang" yu wa shid re" gootu: da" lhid mo nyangnu" da" wimdo, kuang byencang" yi ri lo, fe: khe: nyid ago". Houg: bang: we' re" lho: lhid eig khyab, goin" jangmoo ngoo: byeung" wigi lhid lang" alug lug noeb lo.
8 Hau: khyoo: Simun Petru myang lang" gi Yesu da" khyid: yang: moo goeb no" lho: Aseing Yesu we"- ngoo gi yooboo shoid vhang: su: nghoid. Nga" jhang mo thu' loo" we' ga: mho' tid.
9 Simun yo" bo ri" bang: dangain" mo gi nyangnu" shau" du" yu da" ngoo: ri myang lho: dazheung: moug go" nyid lo.
10 Simun da" wimdo, kuang byencang" nghoid da:- Zebedi da" nya: zoo: tang Yaku yo" Yohan eig yug we' houg: su" nyang: dabo mung" go" nyid. Yesu Simun ri tid zigi agyug goo"- akhid" mo wigi Nanu" gi byu kuang mo, bue" loo" wa" ga: tid.
11 Houg: bang: gi lhid joem ri gyid yam moo zheung: tei" to" lho: yo" da" ziyoo dangain" she: pyam too" kho" wigi Yesu da" thang: moo zheing: cang lo" boem bye:.
(Mat 8:1-4: Mar 1:40-45)
12 Danyid" ri Yesu gi Voo moo" davoo moo nyid. Hau: voo moo dagung goin" manggam: noo phu" ci: su: dayug nyid. Nyang: gi Yesu ri myang lang" goeb pid lho: Aseing nang nau rigi ngoo ri yo" ge loo" nhang: we" ga: mho' tid.
13 Yesu gi lo, ri yhoin" kaid lho: hau: yug ri zang" tain byid. Hau: lho: ?Ngoo nau nang ge shang loo" re,? ga: tid. Hau: uri nyang: hau: yug da" manggam: noo gi ge shang loo" bye:.
14 He: khyoo: hang" ri we' atid kyoo" ga: hau yug ri zau" kaid lho: Yesu gi Nang gi khainjung agyi yi jhang khyoo: yhe: lho: re" gung ri thu shug we. Re" da" noo ge loo" bye da" khyoo:- nyangnu" da" shid moo sagsi bui" wa shid re" Moshe tid to" da" xoin" ri we' to' byid: we ga: pyeing: kaid.
15 Nghoid loug we' Yesu da" lu dang: gi lhu: pyo tho' moo je lhu: pyo lo". Houg: su" nghoid yoomo byu phung: moo" gi Yesu da" mungdang: ri tam" gyoo: wa ziyo' nyangnu" nya: da" noophyoo" ze: gi nhang: wa shid re" ju" re" nyid boem.
16 Nghoid loug we' Yesu gi nya: thung" jo, ziyo' dakhyoo" dain" pyoid' yoo khyoo: vang lo" lho: akyu" mho' nyid.
(Mat 9:1-8: Mar 2:1-12)
17 Nyid" da" nyid" moo Yesu tarha" kho" nyid uri Galile mung" yo" Yuda mung" voo khang" moo" mo mo, we' Yerusalem voo mo we' zheung: jure" boem. Pharishe" yi yo" tarha" sara: yi gi jhang jhang moo zheing: zhoung: jo, ago". Noophyoo" aja: ja: ri ge loo" nhang: wa da" yoemso gi Yesu moo bo jo.
18 Hau: uri byu daphung: gi gung joem: shid: da" byu dayug ri dangzuang mo dang go" re. Hau: noo su: ri yhoem: khoug: moo dang vang lo lho: Yesu da" shidkhoin" moo khyo too" wa ga: gye" yoem: kaid nyid ago".
19 Houg: nghoid loug we' byu phung: moo" ri ayo" kho' vang loo" yoomo yhoemkhung: tho' khyoo do, lo" lho: va: khyam" ri yu pyam wigi noo su: ri dangzuang yo" dage" mo, phung: gung moo Yesu shidkhoin" moo khyo' kaid boem.
20 Yesu gi houg: bang: da" loem" jeing" khyoo: ri myang lang" gung joem: shid: su: ri byu nang we"- re" yooboo ri khyoid pyam byid: bye? ga: tid.
21 tarha" sara: yi yo' Pharishe bang: gi He: yug gi hang" nghoid la". Nyang: gi Mangsoo ri shoid da" dang: tid nyid bye:. Mangsoo mo lid lho: yooboo ri hang" yo" se' khyoid pyam byid: wa ga: myid yu" nyid boem.
22 Aseing Yesu gi houg: bang: houg: su" myid nyid ziri si' yoomo nanu" ci: yoomo houg: su" myid nyid go" lha".
23 Re" yooboo ri khyoid pyam byid: bye: ein: je tid lei la". Houg: su" za: anghoid joyoo mo to' lho: so" loo" we' ein: tid wa je lei la".
24 Nghoid loug we' byu da" nya: zoo: gi Mougmyid mo yooboo ri yo" khyoid pyam byid: ziri nanu" ri si nhang: ba ga: tid lho: gung joem: shid: su: ri nga" dang: tam" gyoo: we' too we' Re" da" dangzuang ri vu lho: yhoem: khyoo: loo" re- ga: amyeung" byid: kaid.
25 Hau: yug gi houg: jang: byu yi shidkhoin" mo to' lo" lho: nyang: leung jo, da" dangzuang ri vu wigi Mangso da" jeju" ri coung" nghei zoore yoem: khyoo: loo" khari" bye:.
26 Byu dangain" mo, gi soo" soo" gyug dain yu" mau" boem wigi Mau" pho" moo" akhid" nyid ngoonu" myang bye ga: tid go" lho: Mangso ri coung" byid: boem.
(Mat 9:9-13: Mar 2:13-17)
27 Hau: thang: ri Yesu gi Kapernaum voo mo thu' lo" ri kheung" khyu: da" yung" moo Levi ga: su: dayug zhoung: jo lang" zi lo" myang. Nyang ri Yesu gi nga" thang: cang we' ga: tid.
28 Nyang: gi yoo" mooyoo" she: pyam kho' lho: Yesu thang: moo cang loo" bye:.
29 Hau: thang: ri Levi gi nya: yhoem: moo Yesu ri kham: yu da" pui" zeing daloem: koid. Pui" re" being" voo yi moo kheung" khyu: mo yo' gootu: being" voo we' myoo" sho' bo re" ago".
30 Pharishe" yo" nyangnu" da" byencang" zheing: nghoid da" tarha" sara: yi gi ciwim wigi nyangnu" gi kheung" khyu: mo, Phoung: thu' to" da" yooboo yoo" mo, yo" dage" voem: shoin" zo: boem lha"? ga: nya: cangzoo: yi ri yooboo foin: juang" yi boem.
31 Hau: uri Yesu gi yangzain: su: gi macid" sara: avho:- noo su: za: date: vho:.
32 Ngoo gi myonhoo: ngilang: yoo" mo nheigloem: thid wa shid re" kho" kyoo" wa ein: jure" zi anghoid. Yooboo yoo" mo, ri khi: wa ein: dare" ga: tid.
(Mat 9:14-17: Mar 2:18-22)
33 Byu dayham" gi Yohan da" cangzoo: yi yo' Pharishe" yi da" cangzoo: yi gi zoo: noem zeung: da" khyoo: yo' Akyu" mho' da" khyoo: ri atheing: loo: lhoung: koid: nyid ago". Houg: nghoid loug we' Yesu da" cangzoo: yi gi dazo: dashug go" nyid boem- nhung: lha"? ga: tid boem.
34 Aseing Yesu gi lo, xo' pui" moo phoo seig danyid nyid gi being" voo yi ri zoo: noem zeung: nhang: wa la".
35 Houg: su" nghoid loug we' lo, xo' phoo seig ri nyangnu" jhang mo shu" yu wa da" ayo, bidnyid ju" loo wa. Houg: lang" nyangnu" gi zoo: noem zeung: boem wa zi nghoid ga: tid.
36 Aseing Yesu gi dangtu' khyo" hang" we' pain" seig mo ceig yu lho: pain" xoug" cu' yo" phoo: wa thung" aboo. Houg: su" phoo: nghoid rigi pain" seig jeug loo" wa zi anghoid- pain" xoug" yo" pain" seig adu goo" wa zi nghoid.
37 Hau: tho' moo gootu: zabyid yhid: aseig ri shooyid thug xoug" moo kaid wa thung" ajo,- to' kaid nghoid rigi shooyid thug gi boug gyam: lo" lho: zabyid yhid: gi yau shoin: pyam wa. Shooyid thug we' byo, loo" wa.
38 zabyid yhid: aseig gi shooyid thug aseig moo dakaid ja: nghoid.
39 Hau: tho' moo zabyid yhid: axoug" ri shug bye: su: gi zabyid yhid: aseig ri anau shug. Zabyid yhid axoug" za: date: ge ga: lhoung tid boem ga: wigi tid kyo".