23
(Mat 27:1-2, 11-14: Mar 15:1-5: Yoh 18:28-38)
1 Phoung: goin" bang: gi to' lo boem lho: Yesu ri Pilaid shidkhoin" khyoo: shu" yhe: lo" boem.
2 Hau: thang: ri nyangnu" gi he: yug gi byu phung: yi ri khyoo: vhang: nhang: wa shid re" Ketha khokham ri khang" doug, ayo" kaid ga: tid khyoo: ri we' ngoonu" nyang: myang boem bye: ga: tid- Hau: lho:? ga: tid yoomo ngoonu" nyang: ri myheig lho: nyang: ri yooboo foin boem.
3 Pilaid khokham gi nyang: ri ?Nang gi Yuda khokham nghoid la"? ga: myid.
Yesu gi nang myid: ziyo' dakhyoo" ti" deung nyid ga: phougtu".
4 Hau: thang: ri Pilaid khokham gi He: yug ri said pyam wa da" amyeung" khyo wa shid re" yooboo daja: ri we' ngoo amyang ga: khainjung agyi moo" yi yo' byu phung yi ri tid kyo".
5 Nghoid loug we' nyangnu" gi He: yug gi Galile mung" mo wigi akhid" Yuda mung" gam: sho' mungbyu yi ri kho: kyo" lhu: phyo' yen" ga: yooboo foin: boem.
6 Pilaid khokham gi hau: dang: ri shoug" gyoo: lang" He: yug gi Galile mungbyu la"? ga: nyang: myid.
7 Herod vhoeb khang" da" moug: mo mungbyu nghoid zi si' lang" nyang: ri Herod jhang nhang: kaid khyoo: Yerusalem hau' yo, ri Herod gi Yerusalem voo moo re" ju" nyid da" ayo, nghoid.
8 Herod khokham gi Yesu ri myang lang" soo" soo" gau khasu" wim gari nya: da" khyoo: myoo" sho' shau" gyo: nyid yoomo nyang: ri myang nau zi we' gye" myang" bye:. Yesu toin" shid da" mau" pho" alhoo: again joem dayham" ri shau" myang yu" yoo: ga: ngham" lang" nyid su: nghoid.
9 Herod khokham gi Yesu ri dang: myoo" sho' ja: myid: nghoid loug we' Yesu gi adoem phoug tid.
10 khainjung agyi moo": yi yo' tarha" sara: yi gi shid khyoo: re" lho: Yesu ri gyi" sho' da" yooboo re" foin: boem.
11 Herod khokham yo' nya: gyizoo: yi gi Yesu ri aphoug" akhyoid koid: lho: juang" yi ago". Hau: thang: ri gye" reung: da" byi: sheing: ri foid lho:- nyang: ri Pilaid khokham jhang khyoo: doem nhang: kaid.
12 Akhang: mo gyi nghoid nyid da" Pilaid khokham yo' Herod khokham eig yug ri hau: bidnyid gi bidnoem bue" loo bye:.
(Mat 27:15-26: Mar 15:6-15: Yoh 18:39-19:16)
13 Pilaid khokham gi khainjung agyi moo" yi vhujhung: yi yo' byu phoung: joem ri zeing: foem: nhang.
14 Hau: thang: ri He: yug gi mungbyu yi ri khyoo: shu" vhang: su: nghoid nyang: ri nga" jhang khyoo: khe: shu" re. Nanu" da" shid moo ngoo cid" kyeing yu" bye:. Nghoid loug we' nanu" tid ziyo' dakhyoo ti" hau: yug ri yooboo foin: wa khyoo: daja: we' ngoo amyang.
15 Herod khokham we ce: yooboo amyang. Houg: yoomo nyang: ri nga" jhang khyoo: doem de" kaid. He: yug gi shid: moin: da" yooboo daja" we' ashoid too.
16 Houg: yoomo nyang: ri ngoo yoo bo dam, byid: lho: doem nhang: kaid wa ga: tid.
17 Pilaid khokham gi lhid: kaid da" pui" moo byu yi shid re" thung: byu phung: dayug yug ri khyam" sa: byid: lhoung lhoid kaid da" thung" bo.
18 byu phung: yi dangain" mo, gi he: yug ri shid: dam, dabyid: we"- ngoonu" shid re" gi Baraba ri khyam" sa: lhoid pyoid byid: we' ga: byu phung: dangain" bang: gi yoid ngoug go" lo boem.
19 Baraba gi voogung khoug: moo byu said su: nghoid yoo mo, thung khoug: moo lhoug too" su: nghoid.
20 Pilaid khokham gi Yesu ri lhoid pyoin khyam" sa: byid: noug yoomo byu joem ri dalheung: doem myid.
21 Nghoid loug we' byu joem gi nyang: ri pyang" zeing: tho' moo baid jen" lho: said pyam ge' pyang" zeing: tho' moo baid jen" said pyam ge" ga: nyangnu" danyhoo: go" nyid.
22 Pilaid khokham gi he: yug ce: noem yooboo ri zei: shoid lha". Nyang: ri said pyam wa shid: moin: da" yooboo daja: we' ngoo amyang. Houg: yoomo nyang: ri yooboo byid: lho: nhang: kaid wa" ga: soem" lheung: ju" sho' houg: su" za: da tid nyid.
23 Nghoid loug we' byu phung: joem gi Yesu ri pyang" zeing: tho' moo baid jen" said pyam wa shid re" khyung" jid' loo" sho' sho' nyho: yoid mho' nyid boem. Houg: yoomo lo" thang moo gi yo" mho' yu lo" boem ago".
24 Pilaid khokham gi nyangnu" mho' ziyo' dakhyoo ti" Yesu ri dang: kho" byid: pyam bye:.
25 Doin: lhoem" theing shang" ziyo' byu said yoomo thung: gyo" jo, su: rigi- nyangnu" yoid mho' nyid ziyo' dakhyoo" ti" lhoid pyoin da" akhang" byid: kaid bye:. Yesu rigi nyangnu" cikoid noug cikoid wa shid re" ab byid: kaid bye:.
(Mat 27:32-34: Mar 15:21-32: Yoh 19:17-27)
26 Gyizoo: yi gi Yesu ri shu" thu lo" uri siyoo voogung mo zi voomoo" khyoo: gyoo" re" nyid da" Kureni byu Simun ga: su: yo' nyangnu" shoug" go" da. Nyangnu" gi nyang: ri myheig yu lho: pyang" zeing yu nhang: wigi Yesu da" thang: moo cang soo" nhang: da.
27 Byu phung: moo" gi nya: hang: moo cang yhe: lo" boem. Myiyi: yi dayham" mo, gi nyang: nya: yanggang' moo thoin: zoore cang ngau yhe: lo" boem.
28 Yesu gi hau: myiyi: yi jhang khyoo: lheung: yu" kaid lho: Yerusalem: myiyi: nu" yi we"- nga" shid re" angoug goo"- nanu" nyang: yo' nanu" da" nya: zoo: yi shid re" da ngoug ge.
29 Zoo: abo ziyo' zoonu" noug" ashug yu" da" myiyi: gi ngi: lhoo' wa" ga: tid da" ayo, gi ju" lo boem wa.
30 Hau: da" bidnyid moo byu yi gi boem lang' joem ri ngoonu" tho' moo re" byo, gyo" du" boem" too" byid: ge' ga: we' bouggung joem ri ngoonu" tho' moo re" boid zeig too" byid: ge' ga: wigi we' mho' yoid da" ayo, gi ju" lo boem wa.
31 Nyau young" jo, da" seig joem: gam yo" du da" ngoo ri- nyangnu" hid: yhangti" shen" yhen nghoid rigi seig kyug gam yo" du da" nanu" ri khasu" je koid: wa zigi si' ge'.
32 Byu yi gi said pyam moin: da" byu eig yug ri we' Yesu yo" dage" said wa ga: bo shu" yhe: lo" boem.
33 Vhugyab' boug ga: da" joyoo moo ju" lang" Yesu yo" said moin: da" byu eig yug ri pyang" zeing: moo baid jen" to" boem. Said moin: da" eig yug ri dayug gi lo, yo shoid khyoo:- dayug rigi lo, koung" shoid khyoo:- bo baid jen" lhang" to" boem.
34 Yesu tid zigi O" nga" phoo we"- hid: bang: da" yooboo ri khyoid pyam byid: we. Nyangnu" zei: da" moo" ri nyangnu" ase' boem ga: mho' mho' sang: byid.
Byu yi gi nya: da" atho' byi: zeing ri me" lab lho: gam, go" boem.
35 byu phung: yi gi yab jo, lho: yu" nyid boem. Yuda byumyu" da" vhujhung: yi gi he: yug gi byu gooji ri yo" khyoid yu gyeing" nyang: Mangso khyen: to" da" Meshia nghoid rigi nya: gung ri we' khyoid yu yu" baja"? ga: tid juang" yi nyid ago".
36 Gyizoo: yi we' nyang: ri juang" yi, boem lho yhid: jhen: yeung, yhoin" jhoug boem lho: wigi
37 Nang Yuda khokham nghoid rigi nanya: gung ri khyoid yu yu" we' ga: juang" yi nyid ago".
38 Nya: da" vhuloem: phyoo" moo He: Yug Gi: Yuda khokham Nghoid ga: lhid" tab to" boem.
39 Pyang" zeing: moo said moin: yoomo bo baid jen" lhang" too" su: eig yug jangmo we' dayug gi nang Meshia nyang: anghoid la". Nang nyang: ri we' nga" eig yug ri we' khyoid yu yu" we' ga: aphoug" akhyoid juang" yi da.
40 Said moin: su: gootu: dayug gi hau: yug ri tid zigi nang gi Mangsoo ri agyug rhe"- nyha" eig yug gi he: yug su: dam, bo kham: nyid nghoid loug we'
41 Yha" eig yug gi nyang: nyang: kham: eung: da" yooboo dam, dakham: nyid he: Aseing koem gi ce: yooboo we' ashoid yu" ga: wigi tid poin.
42 Hau: thang: nyang: Yesu ri tid zigi khokham yhang: ti" doem ju" gyoo" lo da" uri ngoo ri we myid boin: we'.
43 Yesu nyang: ri tid zigi akhid" nyid"- nang yo" ngoo dage" pharadisu moo nyid wim bye" ga: ngoo nang ri dang: soo" byid.
(Mat 27:45-56: Mar 15:33-41: Yoh 19:28-30)
44 Ayo, gi bid nyidgung tu: 12 nayi: nghoid bye:. Hau: ayo, mo wigi bid gam: lo"- soem" nayi: koo: ju" sho' mougmyid daloem: goin"- bid shoem: lo" byug lho: mougcoid teing: no, khare".
45 Noku" yhoem: moo" mo pain" xiyam we' eig gang gyam: gyo" loo" khare".
46 Yesu gi O" nga" phoo we"- Aseing da" lo, moo nga" Venyi: ab byid: bye" ga: thui: zeing: yo" gyi" sho' nyho: lho: kang: gyoo" khari" bye:.
47 Hid: su" bue" lo da" moozoo" ri gyizoug: zeing: bain sho' myang lang" Mangsoo: ri coung" lha he: yug gi gyeing" gyeing" nyang:- byu gi dayug danghoid'? ga: tid.
48 He: da" moo" ri bo yu" wa ga: zeing: re" da" byu phung: yi gi Houg: su" bue" lo da" khyoo: joem ri myang yoomo nyang: nya: yanggang' moo thoin: lho: dangain" bang: tau" lo" boem.
49 Galile mung" mo Yesu thang: moo bo cang re" da:- myiyi: yi yo" dage" Yesu ri si' mo dangain" gi vi" moo yab jo, lho: yu" go" nyid boem.
(Mat 27:57-61: Mar 15:42-47: Yoh 10:38-42)
50 Hau: uri Yuda mung" Aramathi ga: da" voo mo Yoseb ga: da" Yuda mo zoug: dayug nyid. Nyang: gi deingmain" da" byu gi dayug nghoid lho: wigi Mangso da" mungdain: ju" ri" wa ziri lang" nyid su: dayug nghoid.
51 Nyang: gi kongsi: moo boo su: dayug nghoid loug we' nyangnu" sham: go" phyed to" khyoo: ri abo veing" su: nghoid.
52 Nyang: gi Pilaid khokham jhang khyoo: yhe: lho: Yesu da" nghain" doem: ri mho' yu.
53 Hau: thang: ri nyang gi Nghain" doem: ri pyang" zeing: mo yu khyo lho: pain" yo" thoeb to". Hau: thang: ri lugpyo' moo kyoung" to" da" dalheing" we' aci: shi" da" loeb seig moo myhoeb bye:.
54 Hau: nyid" gi soin' jen" da" bidnyid nghoid wigi Dougno: Bidnyid ju" wa jhang loo bye:.
55 Galile moug: mo Yesu jhang moo bo cang re" da" myiyi: yi we' Yoseb yo' dage" bo cang yhe: lho: loeb ri we' nghain" doem: ri khasu" koid: ziri we' bo myang boem ago".
56 Hau: thang: ri nyangnu" gi yhoem: khyoo: tau" lo" boem lho: nam, pyo: xu: yo" moora: xu: joem ri gungdu: shid: goolhoo' soin' ci: ago". Tarha" yo' dakhyoo" ti" Dougno: Bidnyid ri no: nyid ago".