21
(Mat 12:41-44)
1 Yesu lheung: yu" kaid uri yoo" mo, di mo, Noku" yhoem: moo" mo ngei boin" moo alu: kaid nyid boem ziri myang.
2 Houg: yo' dakhyoo" ti" gyid: pyi" eig pyi" ri gye sho" jhen: da" cougmoo" myhi' dayug re" kaid nyid ziri we myang.
3 Nyang: tid zigi ngoo nanu" ri tid ba:- he: da" sho" jhen: cougmoo" myhi' gi dangain" bang: tho' moo je kaid abye:.
4 Houg: bang: gi nyang: nya: ngei jain" ngei thang: mo alu: dakaid ago". Nghoid sho' loug we' he: da" myiyi: myhi' gi sho" jhen: da" zi nyang: yo' gu: dangain" zoo: wa zi dangain" ri kaid pyam abye: ga tid.
(Mat 24:1-2: Mar 13:1-2)
5 Cangzoo: yi dayham" gi Noku Yhoem: Moo" gi lugloem: joem yo' Mangsoo ri ab noung" to" ziyoo joem gi myang lho: hau: zi khayhi' young" lha" ga: tid go" nyid boem.
6 Hau: uri Yesu gi Nanu" shau" myang da" zi joem dangain" gi lug daloem: we' akhang: joyoo moo ake" too" loo: sho' byo sain" pyam da" ayo, ju" loo wa" ga: tid.
(Mat 24:3-14: Mar 13:3-13)
7 Houg: bang: gi sara: we"- he: da" moo" gi kha: uri bue" loo wa lha". He: moo" bue" lo da" uri ce: noem alhoo: again yi bue" thu' loo wa lha"? ga: zheing: myid: boem.
8 Yesu tid zigi Nanu" ri mhau zi athoung" shau" wa shid re" zid" nyid ge' byu myoo" sho' mo, nga" da" myeing khyo" thu lo lho: ?Ngoo gi nyang: nghoid? ga: tid da" ayo, ju" ri" wa nghoid loug we' houg: bang: da" thang: moo acang loo" goo".
9 Nanu" gi meing byo, lo da" gyi dang: yo' doin: lhoem" keing" khyoo, go" da" lu dang: shoug" gyoo: lo da" uri adain agyug goo"- houg: yhang: te" da" moo" gi xang" shid" bue" loo wa. Nghoid loug we' lo" thang zigi anghoid shi" ga: tid.
10 Nyang: yhe: lho: xo' tid da" zigi ?Byu damyu" yo" damyu"- damoug: yo' damoug: mungdain: daloem: yo" daloem:- gyi pui" phang meing: zain go" loo wa.
11 Joyoo khang" moo" moo myid leig gyi" sho' leig da" khyoo:- zooyoid phang" khoug: gyoo" zi dab lei da" noophyoo" aja: aja: myo: loo wa. Mougkhung: mo gyoug pho" ziyo' mau" pho" alhoo: again bue" thu' loo wa.
12 Nghoid loug we' he: da" moo" abui" loo shi" da" uri byu yi gi nanu" ri myheig yu, lho: shen" yhen lo boem wa. Nanu" ri tarha" yung" moo zheing: ab pyam wigi tarha" dang: kho" lho: thung: khyo pyam zi shau" boem wa. Nanu" gi nga" myeing yoomo kho: kham" yi yo' amyeung" ci: mo, da" shidkhoin" moo ju" lo" boem wam bye:.
13 Hid: su" bue" loo loug- nanu" gi ngeibu: lu dang: ri tid loo" wa shid re" amyeung" akhang" ri yo" yu boem wa nghoid.
14 Houg: yoomo nanu" gi ce: khyo" phougtu" wa ziri agung yug wa shid mo nanu" da" nheigloem: ri nyang: soin' too" ge-
15 Khasu" wim gari nanu" da" gyivoo yi ayo" ngeug- ayo" shang" yab jo, sho' wim da" dang: yo' phajhi" yo' mungdang: ri ngoo nanu" ri byid: wa byid: loo wa yoomo nghoid.
16 Nanu" gi nya: myhi' nya: phoo- nya: mang: nya: nhung"- bidnoem seing" cang" yi yo' nanu" nya: da" byencang" yi wigi gyivoo yi da" lo, moo ab pyam zi shau" boem wa. Nanu" mo dayham" rigi said pyam boem wa nghoid.
17 Nga" myeing yoomo byu yug khang" moo" gi nanu" ri ngheing" lo boem wa.
18 Nghoid loug we' nanu" da" vhuloem mo xam: dakhaid we' byug wa zi anghoid.
19 Nanu" gi geing: geing: teing teing yab, jo, ge' houg: lang" she khyoid yu zi dashau" boem wa.
(Mat 24:15-21: Mar 13:14-19)
20 Yerusalem voomoo" ri gyivoo joem re" lheung: kham: ci: ziri nanu" myang da" uri hau: voo byo, loo" wa zi jhang bye: ein: si' loo: ge.
21 Hau: uri Yuda mung" moo nyid da" mungbyu yi gi boem tho' khyoo: phang: do, loo" ca" goo" wa. Sooyo voogung moo nyid mo, gi voomoo" khyoo: avang loo goo". Voo moo" mo bang: we phang: ca" goo" wa.
22 Khasu" wim gari hau: bidnyid gi jhoem: mungdang: moo tid to" ziyo' dakhyoo ti" joeb byeung" lo da" yooboo dam kaid da" bidnyid nghoid.
23 Hau: ayo, moo gunglid: ci: da" myiyi: yi yo' zoonu" nya: myhi' gi gyoug pho" zi shau" boem wa nghoid. Hau: moug: moo gyoug pho" kyikhyeig ju" lo lho: houg: mo byu yi we' Mangso yooboo dam kaid zi shau" boem wa nghoid.
24 Byu dayham" gi sham: dam yo" said pyam zi shau" boem wa. Dayham" bang: rigi join khyo" myheig shu" lo" boem wigi mung" zoo: mung" zeing: moo byo sain" lo" boem wa. Tungbau byumyu" yi gi nyang: nya: vhoeb khang" da" pyaid athang thang gi Yerusalem voomoo" ri khyidvoo: khoug: moo nang: zeug ci: boem wa.
(Mat 24:29-31: Mar 13:24-27)
25 Bid kyi: lhammoo" joem moo mau" pho" alhoo: again bue" thu' loo wa. Mougmyid tho' mo byumyu" bain sho' mo, gi panglai: gyid mung" mo being mhoid baid poug myheing go" da" thui:- shoug" gyoo: boem yoomo nheig coid coid lo" boem wa.
26 Mougkhung: tho' mo yoem: vhoo" joem ri nyangnu" da" moozoo" mo khaid khyo' kaid zi shug yoomo myidjang tho' moo bue" loo wa shidgyoin noogyoin ri myang yoomo byu yi gi gyug dain coid leung lo" boem wa.
27 Hau: thang: ri jhoem" moug" khoug moo gyi: thang da" yoem: moo" phung" yoeb yo' byu nya: zoo: gi thu' myang gyoo" loo wa.
28 He: da: moozoo" bue" thu' lo da" uri nanu" da" khyoid yu khyoo: gi jhang loo bye yoomo to' yab lho: nanu" da" vhuloem joem tu" yu" ge' khasu" wim gari nanu" da" khyoid yu khyoo: gi jhoug loo bye:.
(Mat 24:32-35: Mar 13:28-31)
29 Hau: thang: ri Yesu gi nyangnu" ri dangtu' yu lho: tid zigi lafoem gam yo" gootu: da" seiggam joem ri tu, yu" ge.
30 Hau: seiggam joem moo anyug toin loo lang" gi nanu" hau ziri myang lang" zain vang khoem" jhang bye: zi se' ago".
31 Houg: yo' dakhyoo" ti" tid kyo" lid lo da" moozoo" joem bue" lo da" ziri myang lang" gi Mangso da" mungdain: gi jhang bye: ein: nanu" xoem" too" loo: ge.
32 Akhid" dei nyid da" byu yi he: yam" dangain" shid: shi" ri he: khyoo: dangain" bue" loo wa ziri myid boin: ge.
33 Mougkhung: yo" myidjang: lid lo" byug nghoid loug we' nga" mungdang: gi khanham we' alid loo" wa.
34 Nanu" gi zo: pyoo: shug pyoo: yed coid ziyo' nyid' lho: he: pyaid shid re" za: myid myo nyid wigi- ge da" ayo, ri aze" thang wa shid re" lhid zid" nyid ge.
35 Houg: su" alhid zid" nyid nghoid rigi tarha" dang: kho" da" bidnyid gi mang: khung" beig gyoo" lo yhangti"- nanu" da" atho' moo dalheung: dam beig gyoo" loo wa. Hau: bidnyid gi byu xangsu: bain sho' mo, da" tho' moo gyoo" loo wa nghoid.
36 Gyeing: gyeing: soo" soo" koid: nyid ge' ju" gyoo" loo wa da" myo, dain' dei: da" shidgyoin noogyoin ri yo" kham: zeing: yab jo, lho: wigi byu nya: zoo: da" shidkhoin" moo dain: dain: yo" yab lho: tarha" dang: kho" ziri yo" kham: wa shid re" khanham we akyu" damho, nyid ge.
37 Yesu gi hau: danyid" goin" Noku Yhoem: Moo" moo jhau" shed byid: nyid lho: myenthang: zoo" rigi zhainloin: ga: da" boug khyoo: do, lo" lho: damyen goin houg: moo lo" nyid.
38 Byu myoo" sho' mo, gi nya: dang: ri tam" gyoo: wa shid re" Noku" yhoem: moo" moo nab kyoo no" re" lo boem.