14
1 Dougno: Bidnyid danyid" moo Yesu gi zoo: noem zoo: wa shid re" Pharishe zoug: dayug da" yhoem: moo vang lo. Houg: lang" nyangnu" gi Yesu ri gau" yu" go" nyid boem.
2 Yesu da" shidkhoin" moo khyid: lo, shid: su: dayug ju" re" lo.
3 Dougno: Bidnyid ri noo ge ze: gi wa la"? ga: Pharishe yo" tarha" sara: yi ri myid?.
4 Nghoid loug we' nyangnu" gi ci: we' aga: boem. Yesu gi noo su: ri khe: yu lho: wigi noo ri ge loo" nhang: wigi nyang: ri thu' loo" nhang.
5 Yesu gi Nanu" mo hang" nghoid loug- nyang: nya: zooshang: nghoid loug- nanu" da" gougnyhoug nghoid loug- Dougno: Bidnyid ri gyid thung" moo byid gyo" jo, ri lhab nyang: axue: thoid yu wa goo" la"? ga: myid.
6 Nghoid loug we' nyangnu" gi dakhoin" we' ase' phougtu boem nghoid ago".
7 Zoo: pui" khe: jangmoo yhi: mo, gi xangshid" ju" yhi: mo, gi je ge da" joyoo ri yhe: khyen: zhung: go" nyid zi Yesu nyang lang" houg: bang: ri dangtu' daja: tid.
8 Yesu tid kyo" zigi Nang ri lo, xo' pui" moo khe: nghoid rigi je reung: da" joyoo moo ayhe: zhung: gyeing" nyang: re" tho' mo myonhoo: je gyi: da" sayen" dayug yug ri we' khe: too" wa zi nghoid.
9 Pui" seing: gi re" jhang moo re" lho: He: zoug: phoo ri joyoo shu byid: we' ga: tid wa. Hau: uri nang gi sho' thu' lho: nyhoem: gyo" da" joyoo moo shau" zhung: wa.
10 Houg: yoomo Nang ri khe: nghoid rigi pui" khyoo: yhe: lho: nyhoem: gyo" da" joyoo moo shi" dayhe: zhung: we. Houg: lang" she pui" seing: gi Re" jhang moo re" lho: bidnoem phoo we" joyoo gi moo zhung: shang ga: tid wa. Houg: lang" she nang gi pui" re" da" being" voo yi da" shidkhoin" moo myonhoo: boo wa zi nghoid.
11 Houg: su" nghoid yoomo nyang: nya: gung ri coung" byid: mo, gi khyo' nyhoem: pyam byid: zi shau" wa. Nyang nya: gung ri khyo' nyhoem: su: gi phau" myang: tu: to' kaid zi shau" wa ga: tid.
12 Hau: thang: ri Yesu gi Yhoem: seing: ri Nang gi nab xi" nghoid loug myen" xoin: nghoid loug doo" zhoo" wa ein: soin da" uri re" byencang" yi bidnoem yi mangnhung" yi nya: byumyu" zoo mo, yug phoo- yoo" zo: yoo" shug da" yhoem: kyoo" cang" yi ri akhi:- khi: nghoid loug nyangnu" we' doem khe: lho: jeju" doem yo" toug" goo" wa zi nghoid.
13 Houg: yoomo zoo: pui" shug pui" khe: nghoid rigi sho" jhen: mo, gang: mo, khyid: agi mo, myo, amyang mo, ri lhoung: khi: ge'.
14 Houg: su" khi: lang" gi nang ngi: lhoo' wa. Khasu" wim gari houg: bang: gi nang ri jeju" yo" phug wa yoem: aboo mo, nghoid. Deingmain" mo, shid: jangmo doem dei to'' lo da" uri Mangsoo gi nang ri jeju" doem toug" byid: zi shau" wa ga: tid.
(Mat 22:1-10)
15 Yesu yo" dage" zhoung: jo, da" byu dayug gi hau: da" dang: ri shoug" gyoo: lang" Mangso da" mungdain: zo: shau" pui" yo" vang loo" su: gi ngi: lhoo' su: nghoid ga: tid.
16 Yesu gi ?Byu dayug gi doo" zhoo" doo" jhoug da" pui" daloem: koid: wa shid re" being" voo myoo" sho' khe: to".
17 Ayo, ju" loo lang" nyang: khe: too" mo, jhang khyoo: deizoo: dayug ri nhang: kaid lho: ri" loo: ge' dangain" bain nyheung too" bye ga: tid nhang: kaid.
18 Nghoid loug we' nyangnu" dangain" mo, gi dayug bain dayug akhang" mho' ago". Xangshid" yug gi ngoo gi yoo thung" dakhyang" qei too" yoomo yhe: yu" ca" ngoo ri akhang" byid: shi" we' ga: mho' mho' sang:.
19 Gootu: dayug gi ngoo gi rheing" nu: wim: zoem" qei too" yoomo yhe: jhoug" ca"- ngoo ri akhang" byid: shi" we' ga: mho'.
20 Gootu: dayug gi akhang: yo, shi" deung: khu: de: lo, xo' too" yoomo ayo" ri" shi" ga: tid.
21 Hau: byu khi: nhang: da" deizoo: phoo gi nya: jhang moo doem lo lho: houg: bang: tid khyo" dangain" lo tid kyo". Houg: lang" yhoem: seing: gi gyi" sho' nheig yo: lo wigi fu" moo" khyoo yo' khyoo: zoo: khaid khang" moo" khyoo: thu' loo" nhang: lho: asho" ajhen: bang: khyid: gyoug myo, jid mo, byubyo, byugang: yi dangain" ri myab khe: shu" loo ge" ga: deizoo: yi ri doem nhang: kaid.
22 Amyang" ri deizoo: yi doem ju" lo lho: Aseing nhang: kaid ziyo' dakhyoo" bain koid: bye:. Nghoid loug we' joyoo akoem: jo, shi" ga: tid.
23 Yhoem: seing: gi soo" yo voogung khyi khang" moo" khyoo: yhe: lho: nga" yhoem: byeung" sho' byu ri agyoo: akhyoid khe: shu" loo ge" ga: tid kaid.
24 Akhang: ngoo xangshid" khe: too" mo, dayug we' nga" voem: zo: pui" moo ayo" zoo: ga: tid.
(Mat 10:37-38)
25 Byu phung: moo" joem gi Yesu yo" dage" cang lo boem. Yesu gi nyangnu" ri bain lheung: yu" lho: tid zigi
26 Nga" thang: cang loo nghoid loug we' Nya: myhi' nya: phoo- nya: myi: nya: zoo:- nya: mang: nya: nhung" yi yo' nyang: nya: gung ri te: je jheddab mo, gi nga" cangzoo: ayo" bui.
27 Nyang: nya: da" pyang" zeing ri vu, lho: nga" thang: acang su: gi nga" cangzoo: ayo" bui.
28 Nanu" mo hang" nghoid loug we' pyu zung daloem: zhug wa ga: myid to" lho: do, pyu zung bain koid: wa shid re" nyhang" nyang: moo houg yo" bain koid: wa sho' da" ngei- tham: atham:- zhoung: jo, lho: asoin: yu" loo: nyid wa go" la".
29 Houg: yhangti"- soin: yu" zi aboo loo: do, pyu zung apoem: ayang: qei: lho: ayo" bain koid: nghoid rigi yu" myang mo, hang" we' hau: yug ri juang" yi pyam boem wa zi nghoid.
30 He: yug gi koid: gi koid: shid" bye:- nghoid loug we' bain sho' ayo" koid: nhung: lha"? ga: tid boem wa zi nghoid.
31 Gootu: daja: khyo" doem tid shang ein: rigi kha: te" gyeing" da" khokham nghoid loug we' Gootu: khokham dayug yo' meingzain: goo" wa da" gyi pui" soin nghoid rigi gyizoo: damoin yo' gyizoo: eig moin" yo' zain: do, lo da" khokham ri lhoem: zain: ung: wa la" ein: zhoung: jo, lho: amyid yu" wa la".
32 Gyeing" nyang: ayo" lhoem: oung: pyam nghoid rigi Nyang: ri gyi zain: wa ga: soin to" da" khokham vi: moo danyid shi" uri Mung" lagyoo: ri nhang: kaid lho: gyi pui" noo: wa da" byen, phyoo" zain: goo" ca.
33 Houg: yo" dakhyoo" ti"- nanu" mo hang" nghoid loug we' nyang: nyang: yo" da" zi dangain" atoo" kho" rigi nga" cangzoo: ayo" bui.
(Mat 5:13: Mar 9:50)
34 Xoo" gi ge nyid nghoid loug we' xoo" mo main phue: loo" lang" gi ngham" da" zi kha: yo ase' yu loo:.
35 Hau: xoo" gi myidjang shid re" nghoid loug we'' jen" kaid wa shid re" nghoid loug we' ce" akyu" we' aboo loo. Houg: yoomo hau: xoo" ri byu yi gi she: lhei" pyam se' nyid. Houg: su" wigi Nookhyab dab mo, gi gyo: yu ge" ga: tid.