12
(Mat 10:26-27)
1 Hau: da" uri byu khyeing" moin zoeb foem: lo boem yoomo nyang: cang" nyang: we' nang: khyoid go" lo. Yesu cangzoo: yiri xangshid" tid da" zigi Pharishe" yi da" akug void' doo cid" ri zid" nyid ge.
2 Nghoeb to" da" zi dangain" gi phang shug loo wa. Shoung: to" da" zi dangain" we' shau" myang loo wa.
3 Houg: yoomo mougcoid moo nanu" tid da" dang: gi- moug: boo" moo subi" shau" gyo: loo" wa. Yhoem: mo khoug: lhung khoug: moo nanu" dang: so' so' go" da" dang: gi yhoemkhung: tho' mo nyho: yoid zi shau" wa ga: tid kyo".
(Mat 10:28-30)
4 Nga" bidnoem yi we"- nanu" ri ngoo tid zi gi gungshoo" ri said tho' moo gootu: Ci" we ayo" koid: mo ri agyug goo".
5 Nanu" gyug moin: su: ri ngoo toin" shid ba. Gung shoo" ri said thang: ri nanu" ri moovoo moug: moo yo" khyo kaid su: ri gyoug nyid ge. Nanu" ri ngoo tid. Hau: Aseing ri je:gyoug nyid ge.
6 Jhakhyang wim: du: ri theing" cen eig cu' yo' yo" oung" anghoid goo" la". Nghoid loug we' Mangsoo gi jhakhyang dadu: ri we' ato" myhid.
7 Nanu" da" vhuloem mo xam: rilang" dangain" nghab too" bye:. Houg: yoomo agyug goo"- Nanu" gi jhakhyang joem tho' moo je phoug" dab mo nghoid nyid.
(Mat 10:32-33, 12:32, 10:19-20)
8 Nanu" ri ngoo tid zigi Nga" cangzoo: gyeing" nghoid ga: sube" shid moo yhen: yu su: rigi byu da" nya: zoo: we' Mangso lagyoo: yi da" shidkhoin" moo nya: cangzoo: agyeing" nghoid ga: yhen: yu wa.
9 Ngoo ri su" da" shidkhoin" moo ngeug pyam su: rigi byu da" nya: zoo: we' Mangso lagyoo: yi shidkhoin" moo ngeug pyam wa.
10 Byu da" nya: zoo: ri nhoid wigi shoid su: ri yooboo yo" khyoid pyam byid: nghoid loug we' gyeungshang: da" Venyi: ri tid shoid su: ri koem gi yooboo yo" khyoid pyam byid: loo: wa zi anghoid.
11 Subi" gi nanu" ri tarha" jung yi moo we' khokham amyeung" ci: mo, da" shidkhoin" moo nghoid loug we' khe: shu" lo" da" uri khasu" tid wa zi ce: myid amyoo: goo".
12 Nanu" Khasu" tid wa da" khyoo: ri gyeungshang: da" Venyi: gi hau: uri jhau" byid: loo wam bye: ga: tid.
13 Byu phung: moo" mo da" byu dayug gi Sara: moo" we"- ngoo ri mid gam byid: wa shid re" nga" mang: ri tid byid: we' ga: Yesu ri tid.
14 Yesu gi ?Byu nang we"- Re" shid re" hang" su: wigi ngoo ri tarha" agyi khyo" we' moid gam byid: wa su: khyo" we' nyheung to" lha"? ga: doem myid.
15 Hau: thang: ri vhoo: bo myo, no, da" khyoo: aja: ja: ri zid" pyam ge. Byu da" kangso gi ziyoo jonu" moo geing: zug jo, zi anghoid ga: tid.
16 Hau: thang: ri Yesu gi dangtu' yu lho: Sathi" dayug gi nya: yoo thung" mo gug myoo" sho' yoo" yoomo
17 Nga" yoo mo gug shi" mei: shi" ri shoung: too" wa shid re" joyoo lang" ayu" loo:- ngoo khasu" se' koid: loo: wa lha"? ga: nyang: kyeing" nyid yu nyid.
18 Hau: thang: ri nyang: gi ngoo hid: su" koid: wa jhi: xoug ri phyo pyam lho: jhi: seig je gyi: zi ngoo koid: wa. Nga" da" gug- shivoo: joem yo' ziyoo joem ri hau: jhi: seig moo shoung: too" wa.
19 Houg: lang" nang gi zain nyid myoo" sho' zo: shug wa shid re" ziyoo jonu" ri young: too" bye: yoomo nheigloem: pyoo" pyoo: danyid re- zo: pyoo shug pyoo: nyid re- ein: ngoo nga" gung ri tid wa" ga: tid.
20 Nghoid loug we' Mangsoo gi byu fang: phoo nang we"- akho: myen nyang: re" kangso gi thang loo" wa. Houg: yoomo nang young: to" da" ziyoo jonu" joem gi hang" lo, moo vang loo" wa lha"? ga: tid.
21 Nyang: nya: shid re" ziyoo jonu" khamyhoo young: too" nghoid loug we' Mangso da" shidkhoin" moo ayoo" ajo, su: gi hau: da" sathi" phoo yo" dadu nyid ga: tid.
(Mat 6:25-34)
22 Hau: thang: ri Aseing Yesu gi nya: cangzoo: yi ri tid zigi ?Houg: su" yoomo nanu" gi ce: noem se' zoo: wa lha" ein: kangso shid re" seing" akho" nyid goo". Ce: noem se' void wa lha" ein: wigi gungdu: shid re" seing" akhoo" goo"? ga: tid.
23 Kangso gi zoo: noem tho' moo je yhau: gyen:- Gungdu: gi byi: mi tho' moo je yhau: gyen:.
24 Kano, joem ri myid yu" ge. Nyangnu" gi amyoug: ri we' asain" too. Ayham" ashab yu. Nyangnu" moo zei: kaid to" yhoem: zeing ajo, Jhi: moo we' ashoung: too. Nghoid loug we' Mangsoo gi nyangnu" ri zho" jhug nyid. Nanu" gi ngho' joem tho' moo myoo" sho' aphoug" je dab nyid anghoid goo" la".
25 Nanu" mo hang" nghoid loug we' seing" kho" nyid yoomo nyang: nya: da" kangso ri dazain damoo" khyalhang" yo" loung: sheing: nhang: goo" wa la".
26 Hid: yhangti"- nge" da" moozoo" rilang" age bue" nghoid rigi ci: yoomo gootu: moo" ri myid myo: nyid go" lha".
27 Sooyoo mo zukyin: bain: gam joem ri yu" yu" ge. Khyeing: we ani:- yo, gain: we' ayo,- Nghoid loug we' myonhoo: bo da" Sholumun khokham zeing lang" hau: bain: dakyang: yhangti" lang" ashoug" void yoomo nanu" ri ngoo tid zi nghoid.
28 Loem" jeing" loem: khau: khyoo: neing: mo we"- akhid" nyid" siyoo khoug: moo jo lho: nab yo nyid: gi myikhyoem moo vang lo" da:- siyoo mo myo, gam rilang" Mangsoo gi hid: su" foid to" nghoid rigi nanu" ri hau: tho' mo je foid wa zi anghoid goo" la".
29 Cizoo: wa lha" cishug wa lha"- ein: wigi seing" akho" nyid goo".
30 (Houg: yhang te" da" ziri Mougmyid tho' moo nyid da" byumyu" bain sho' mo gi sho: nyid ago".) Hau: da" zi nanu" ca" nyid ziri nanu" da" nya: phoo gi se' nyid gu nghoid.
31 Nanu" gi nya: mungdain: nya: deing: byeung" khyoo: ri xangshid" ri shoo: ge' houg: lang" hau: zi joem nanu" ri byid: wa zi nghoid.
(Mat 6:19-21)
32 Yang" phung: zoo: we"- agyug goo". Khasu" wim gari nanu" da" nya: phoo gi Mungdain: byid: nau nyid.
33 Nanu" gi nyang: nya: da" ziyoo jonu" oung" pyam lho: sho" jhen: mo, ri gam byid: ge'. Ase' pyang: ase' yoin" da" ngei thung: ri daci: ge. Khoug" su: aju"- nhau: ayo" zo: da" mougkhung: tho' moo nanu" ziyoo jonu" ri dayoung: too" ge.
34 Khasu" wim gari nanu" da" ziyoo jonu" jo, jangmoo nanu" da" nheigloem: we' jo, nyid zi nghoid.
35 Nanu" gi khanham we' jen" jen" nghoid nyid wa shid re" phyid" cu" cu" ci: lho: myikug ri tab too" ge.
36 Lo, xo pui" mo doem lo da" nya: yhoem: seing: gi khoem" lo ko, da" uri phyed yo" phang byid: wa shid re" lang" nyid da" deizoo: yi yhangti" lhid nyid ge.
37 Deizoo: yi zung" nyid da" khyoo: ri Aseing doem ju" lo da" uri gyeing: boin: lhid nyid zi lo myang nghoid ri houg: bang: khayhi' ngi: lho': boem wa lha". Nanu" ri ngoo deing" deing tid zigi Aseing gi hau: da" deizoo: yi ri being" voo agyeing" khyo" zoobui" moo zhung: nhang: lho: Aseing nyang: atho' byi: khyoid ci: lho: dei zhoo" dei jhug wa zi nghoid.
38 Nyang: gi myen" gamgung ri nghoid loug- myo, myang zoo" ri nghoid loug we' ju" lo da" uri lhid lang" nyid da" deizoo: yigi ngi: lho' boem wa.
39 Gyeing" nyang: yhoem: seing: gi khoug" su: juri" wa da" ayo, dase' nghoid rigi khoug" su: ayo" baid thoid vang ri" sho' nyang: koid: zi nghoid.
40 Byu da" nya: zoo: gi nanu" ayu" alang" nyid da" ayo moo gyoo" loo wa nghoid yoomo nanu" we' jen" jen" koid: nyid ge'.
(Mat 24:45-51)
41 Petru gi Aseing we"- he: dangtu' gi ngoonu" ri tid la". Houg: su" anghoid lang" gi byu dangain" bang: shid re" la"? ga: myid.
42 Yesu gi dang: zung" lho: phajhi" se' da" deizoo: gi hang" nghoid la". Yhoem: seing: gi deizoo: yi ri vhoeb khang" wa shid re" yo' ayo, ju" lang" vhookung: phoug" thug byid: wa shid re" vhujhung: dayug soin to" ein: shang.
43 Koid: nhang: da" yoovoin ri jhug jhug zei: nyid ziri Aseing lo myang lang" hau: da" deizoo: gi khayhi' ngi: lho' wa lha".
44 Ngoo nanu" ri deing" deing tid zigi Yhoem: seing: gi nya: ziyoo jonu" jo, moojo, ri vhoeb khang" nhang: wa shid re" ab byid: wa zi nghoid.
45 Nghoid loug we' gyeing" nyang: ga: rigi hau: da" deizoo: gi nga" da" yhoem: seing: doem loo wa zigi myang" shi" wa ga: nheigloem: moo myid lho: wigi deizoo: myhi' langjhang phoo yi ri baid nhoug zo: yed shug yed dakoid nyid.
46 Hau: yug amyid to" da" bidnyid amyang to" da" ayo, moo yhoem: seing: gi doem ju" lo wigi hau: yug ri yooboo dam byid: wigi dang: azung" atarha" mo, kham: zo: wa da" dam ri shau" kham: zo: nhang: zi nghoid.
47 Aseing vho: da" khyoo: ri si si- jen" jen" asoin too"- Aseing vho: khyo" acang loo: nyid da" deizoo: yi gi gyoem, thoung" wigi gyi" sho' lo mho' zi shau" zoo: wa nghoid.
48 Houg: su" nghoid loug we' Aseing da" nheigloem: ri asi loo za: gyoem thung" kham: zo: da" khyoo: ri shoid vhang: su: gi dajhi kyeing" da" gyoem thung" dam ri shau" kham: zoo: wa nghoid. Jeju" koid: da" khyoo: myoo" sho' kham: yu" su: gi yoovoin myoo" sho' boo wa. Je loem" jeing" ab nung" su: gi je gyi: da" voin vu, wa moo" je bo loo wa zi nghoid.
(Mat 10:34-36)
49 Ngoo gi he: mougmyid ri myi: nghe kaid wa shid re" jure" zi nghoid. Akhid" nyang: nghe kaid noug bye:.
50 Ngoo kham: yu wa babtisma daloem: jo,- hau: moo" abain zei: zei: gi ngoo nheigloem: amyen.
51 He: mougmyid ri myenjham" ngei pyo: khyoo:- byid: wa ein: ngoo re" ein: jhoo: go" la". Houg: su" anghoid. Byu dayug yo" dayug gang: go" loo" wa shid re" ngoo re" zi danghoid.
52 Akhid" mo byu wim: yug nyid da" yhoem: moo eig yug gi dagang- soem" yug gi daphung: gang: go" loo" wa.
53 Nya: phoo gi yuggi zoo: yo' Nya: myhi gi myiyi: zoo: yo, nya: nid, yo' nya: du moo"- nyang: cang" nyang: gang: go" loo" wa.
(Mat 16:2-3)
54 Hau: thang: ri Yesu gi mungbyu yi ri tid bidvang shoid moo jhoem: moug: do loo lang" gi mougvoo wa amyang" loo: ga: nanu" dalheung: dam se' ago"- nanu" tid ziyo' dakhyoo" bui" se' zi nghoid.
55 Moug: thang: khyo" lid hau, lo zi myang lang" gi loung' loo wa ga: tid se' ago"- nanu" tid yhangti" bui" se' nyid.
56 Akug void mo we"- nanu" gi mougmyid aved asam" ri yu" lho: mougvoo mougphang" rigi se' tid boem. He: pyaid moo bue" loo wa da" alhoo: again rigi ciwim wigi asi go" lha".
57 Tarha" nyeung veing" da" moo" zei: wa da" shid re" ciwim wigi nanu" nya: gung nyang: asham: kho' go" lha".
58 Nang ri tarha" yung" shug su: dayug yug- tarha" agyi jhang khyoo: dage" yhe: lo" da" uri khyoo: moo tid go" phue: pyam ge. Houg: su" anghoid ri nyang: gi nang ri tarha" agyi shidkhoin" moo she: yhe: loo" wa zi nghoid. Tarha" agyi gi nang ri pyada: yi jhang khyoo: ab kaid wa. Pyada: yigi nang ri thung: lhoung: too" wa zi nghoid.
59 Hau: jhen: dangain" phue: pyam sho' axab xab gi nang gi thung: mo yo" thu' loo lho: wa zi anghoid ein: wigi ngoo tid".