22
(2 km 34:1-2)
1 Yoshia gi Yuda khokham bue" lo uri nya: apyaid shed zain shi" danghoid da:. Nyang: gi Yerusalem moo soem" xe: dazain vhoeb da:. Nya: myhi' gi Bozkad voomoo" mo Adaia da" myiyi: zoo: Yedida nghoid da:.
2 Yoshia gi Aseing vho: ngei khyoo: ri koid da:. Nyang: gi nya: phoug" phyid" David da" leig ri cang lho: Mangso amyeing" dang: joem ri jhug za: cang da:.
(2 km 34:8-28)
3 Nyang: vhoeb zi daxe: shed zain ein: zain moo khokham Yoshia gi Meshulam da" myid: zoo:- Azalia da" yuggi zoo: khokham kho" mo moo" seing: koid yug Shaphan ri amyeing" yo' dage" Noku Yhoem: Moo" khyoo: yhi: nhang: kaid da:.
4 Hau: zigi ?Khainjung moo" Hilkia jhang yhe: lho: Noku Yhoem: Moo" khoem" duang: moo moo" eung: da" khainjung yi wigi byumyu" yi mo koid: jheing" to" da" ngei khamyhoo' nghoid ziri lu dang: yhe: yu loo we'.
5 Ngei joem ri Noku Yhoem: Moo" so' koid da" moo" moo yoovoin boo su: ri byid: we' ga: ein: nyang: ri tid we'.
6 Hau: joem ri lo, moo" zei: bang:- yhoem: koid bang:- lugxi' bang: ri aphoug" byid: wigi so' koid jang" moo ci: wa da" seig yo' lug boem ri qei wa zi nghoid.
7 Moo" zei jang" moo gung" wa moo" voin bang: gi citid aca" loo: sho' deingmain" bang: nghoid wigi ngei shid re" ce: zhayhen" amho' ca" nghoid da? ga: zi nghoid da:.
8 Shaphan gi khokham pho da" amyeing" dang: ri Hilkia ri tid kyo" da:. Hilkia gi Noku Yhoem: Moo" mo tarha" mougsoug" pug ri nyang: sho: myang da" khyoo: Shaphan ri lhoem: tid kyo" da:. Hilkia gi hau: mougsoug" pug nyang: ri byid: wigi Shaphan gi hau: ziri nghab da:.
9 Hau: thang: nyang: gi khokham pho jhang doem tau" lo" lho: ?Re" dei zoo: yigi Noku Yhoem: Moo" moo jo, da" ngei joem ri yu lho: so' koid da" mo, ri gung" da" moo" voin bang: lo, moo kaid byid: bye:? ga: lu dang: lo" kyo" da:.
10 Hau: thang: nyang: gi ?Hilkia wigi ngoo ri byid: da" mougsoug" pug dapug ngoo yo"? ga: tid. Houg: lho: nyang: gi khokham phoo ri thui: zeing yo' hau: ziri nghab kyo" da:.
11 Khokham phoo gi hau: mougsoug" nghab thui: ri shoug" gyoo: lang" nyang: gi gyoug dain ziyo' nya: byimi ri lang: ceig pyam da:.
12 Houg: lho: vhoo: mo amyeing" dang: ri khainjung phoo Hilkia- Shaphan da" yuggi zoo: Ahikam- Mikhaia nya: yuggi zoo: Akbora- khokham kho" moo" seing: Shaphan- khokham pho da" dei zoo: lo, nyab pho Asaia bang: ri byid:
13 Hau: zigi ?He: mougsoug" pug mo jhoug" shid da" khyoo: yo' sen: wigi nga" shid re" yo' Yuda byu yi dangain" shid re" Aseing ri dang: yhe: myid: byid: boem ge'. Ngoonu" phoug" phyid" yigi he: mougsoug" moo koid ca" ga: tid to" ziri akoid yoomo Aseing gi ngoonu" ri nheig yo: zi nghoid da? ga: zi nghoid.
14 Hilkia- Ahikam- Akbora- Shaphan- Asaia bang: gi Yerusalem vooseig du mo nyid da" lapi: myhi' Hulda ga: myheing da" myiyi: myhi' jang" khyoo: dang: yhe: myid: wa yhe: lo" da:. (Nya: yhoem: seing: phoo gi Hara da" nya: myid:- Tikava da" nya: yug gi zoo: Shalum nghoid wigi nyang: gi Noku Yhoem: Moo" mo byisheing: joem ri zung" byid: da" moo" voin su: nghoid). Nyangnu" moo bue" lo da" khyoo: joem ri nyang: ri tid kyo" ago".
15 Houg: lang" nyang: gi nyangnu" ri khokham pho jhang doem tau" loo" lho:
16 Vhoo: moo tid da" Aseing mo mungdang: ri lo" byid: wa shid re" tid da:. Hau: mungdang: gi ?Khokham phoo shoug" nghab da" mougsoug" pug moo lhid" too" bye: ziyo' dakhyoo" ti" ngoo gi Yerusalem ri yo' voobyu dangain" bang: ri yooboo dam byid: wa.
17 Nyangnu" gi ngoo ri he: pyam wigi yu phara" gootu: ri xoin" ngei" byid: abye: go". Houg: lho: nyangnu" koid bye: da" moo" dangain" gi nga" nheig yo: khyoo: ri lhu: zhang" kaid da:. Ngoo gi Yerusalem ri nheig yo: thougtheung wigi houg gi nheig yoo: agyoo" wa.
18 Khokham pho shid re" he: zigi Israela Aseing Mangsoo Ngoo tid zi nghoid. Nang gi mougsoug" pug moo lhid" to" ziri tam" gyo: da:.
19 Yerusalem yo' voobyu yiri ngoo khasu" yooboo dam byid: wa ein: kyug nhain' ziri nang shoug" gyoo: lang" nang nung myid yo" wigi nga" shidkhoin" moo nanya: gung ri nyhoem: khyo' nheigloem: thid da- nanya: byimi ri lang: ceig lho: ngau da:. Ngoo gi hau: joyoo ri yu" gyoug sho' koid pyam wa. Hau: joyoo myeing ri nheing" khoin" khyo" ci: loo goo" wa. Nghoid loug we' re" akyu" mho' dang: ri ngoo shoug" gyoo: bye:.
20 Houg: yoomo Yerusalem adang moo ngoo bui" nhang: wa yooboo dam byid: zigi nang shid: sho' aju" ri" nhang: shi" wa. Ngoo gi nang ri yug yoo tung" shid: loo" nhang: wa? ga: zi nghoid
Hau: byu yigi hau: mungdang: voin lho: khokham pho Yoshia jhang tau" lo" ago".