13
1 Ahazia da" yuggi zoo: Yosha gi Yuda khokham khyo" vhoeb zi eig xe: soem" zain ein: zain moo Yehu da" yuggi zoo: Yehoahaza gi Israela khokham bue" lo da:. Nyang: gi Samari moo daxe: nyhed zain vhoeb da:.
2 Nya: shid moo koid lid: lo da" khokham Yeroboam yo' dakhyoo" ti" nyang: gi Aseing ri thougtheung yooboo shoid lho: Israela byumyu" yiri yooboo shu" shoid da:. Nyang: gi nya: akhyeing" da" khyoo: ri khanham we' ato" pyam nghoid da:.
3 Houg: yoomo Aseing gi Israela ri nheig yo: da:. Nyang: gi Suri khokham Hazaela yo' nya: yuggi zoo: Benhadad ri Israela adang moo alheing: lheing: oung: pyam nhang: da:.
4 Hau: thang: Yehoahaza gi Aseing ri akyu" mho' da:. Houg: lho: Aseing gi Suri khokham Israela byumyu" yiri khayhi' thain: sho' zeig zo: ziri myang lang" nya: akyu" mho' dang: ri tam" gyo: byid: da:.
5 Aseing gi Israela ri vhujhung: dayug nhang: kaid byid: da:. Hau: yug gi Suri byu yi lo, mo nyangnu" ri loid byoin nhang: da:. Houg: yoomo Israela byumyu" yigi shid phyang" yo' dakhyo" ngei pyo: yug yoo za: yo" nyid ago".
6 Nghoid loug we' nyangnu" gi khokham Yeroboam wigi Israela byumyu" yiri yooboo shu" shoid da" yooboo joem ri ato" pyam shigoo" nghoid da:. Hau: joem ri xo' lho: shoid nyid boem ashi".Yu phara" myhi' Ashera da" soolhoo: joem gi Samari voo moo deing jo, boem ashi".
7 Yehoahaza gi myang: zhung: gyizoo: wim: xi: yug- gyi myang: rheing" daxi: loem:- gyizoo: damoin yug mo lid wigi gyi yoem: gootu: ayoo" nghoid da:. Ciwim gari Suri khokham gi deing da" gu: ri said pyam wigi pheilhoug: ri yhang: ti" houg bang: ri nang: nhe" pyam da:.
8 Yehoahaza koid da" gootu: lo, moo" ja: khang" moo" yo' nya: sarhi' moo" joem dangain" ri Israela khokham yi mhoomyid shen" dam pug moo lhid" xoem" to" ago".
9 Nyang: gi shid: lo" wigi Samari moo myhoeb shoung: pyam ago". Houg: lho: nya: yuggi zoo: Yehoasha gi nya: khoo: moo: khokham doem xo' koid da:.
10 Yuda khokham Yosha vhoeb zi soem" xe: nyhed zain ein: zain moo Yehoahaza da" yuggi zoo: Yehoasha gi Israela khokham bue" lo da:. Nyang: gi Samari moo daxe: khyug zain vhoebkhang" da:.
11 Nyang we' Aseing ri thougtheung yooboo shoid lho: Israela byu yiri yooboo shu" shoid da" khokham Yeroboam da" akhyeing" da" leug ri cang da:.
12 Yehoasha koid da" gootu: lo, moo" ja: khang" moo"- Yuda khokham Amazia yo' gyi khaid jang" moo nya: sarhi' moo" joem ri Israela khokham yi da" mhoomyid: shen" dam pug moo lhid" xoem" to" ago".
13 Yehoasha gi shid: lo" wigi Samari mo khokham loeb boug moo myhoeb shoung: pyam ago". Houg: lho: nya: yuggi zoo: Yeroboam II gi nya: khoo: moo khokham doem xo' koid da:.
14 Lapi: Elisha gi shid: noo no nyid da:. Nyang: shid: lo" nyid uri Israela khokham Yehoasha gi nya: jhang lam" yhe: da:. Nyang: gi ?Nga" phoo we"- nga" phoo we"- nang gi gyi: sheung: da" Israela gyi goem loem yug bue" lid loo bye:? ga: ngau zoo" ri tid da:.
15 Elisha gi nyang: ri ?Lid: daloem yo' myoo: dajhi' yu loo: we'? ga: amyeing" byid: da:. Yehoasha houg joem ri ci: lo da:.
16 Elisha gi beig wa khyo" soin' we' ga: nyang: ri tid. Khokham phoo we' hougsu" koid bye:. Houg: lho: Elisha gi nya: lo, ri khokham phoo lo, dang moo ke" da:.
17 Hau: thang: Lapi: phoo tid da" dang: ri cang lho: nyang: gi Suri mung" khyoo: myonhoo: shu: to" da" bangzoo: khoem" ri phang da:. Elisha gi ?Myoo: beig kaid we'? ga: amyeing" byid: da:. Khokham phoo myoo: beig kaid yo' Lapi: phoo gi ?Nang gi Aseing da" myoo: nghoid da:. Hau: myoo: yo' Suri mung" ri oung: pyam wa. Nang gi Suri byumyu" yiri Apheg voomoo" moo: nyangnu" ri oung: pyam sho' gyi zain: loo wa? ga: tid da:.
18 Hau: thang: Elisha gi khokham phoo ri myoo: gootu: yu wigi hau: joem yo' myidjang ri baid we' ga: tid. Khokham phoo gi myidjang moo soem" lheing: baid wigi theing: da:.
19 Hougsu" koid yoomo Elisha nheig yo: wigi nyang: khokham phoo ri ?Nang gi wim: khyug lheing: baid eung: da:. Houg: lang" she' nang gi Suri ri bain sho' oung: pyam wa nghoid da:. Nghoid loug we' akhid" nang gi nyangnu" ri soem" lheing: kyeing" za: oung: wa zi nghoid? ga: tid da:.
20 Elisha gi shid: lo" wigi myhoeb shoung: pyam ago". Zain khang" moo" Moba mo mung" ri zain: jhen" yen" bang: gi Israela mougmyid khyoo: lhung jhen" vang re" ago".
21 Dalheing: ri byu shid: pui: moo hau: Moba mo mung" zain: jhen" yen" bang: da phung: ri myang lho: byu yigi shid: mang ri Elisha da" loeb moo she: pyam to" kho' lho: tang" phang: lo" ago". Shid: mang gi Elisha da" shoo youg: yo' zang" tain" yo' byu hau: yug gi doem dei re" lho: to' yab re" da:.
22 Suri khokham Hazaela gi Yehoaza vhoeb da" ayo, moo Israela byu yiri zeig zo: da:.
23 Nghoid loug we' Aseing gi nyangnu" ri nheig khyeug nheig myen: byid: da:. Nyang: gi nyangnu" ri asaid toem" pyam nhang: nghoid da:. Nyangnu" ri pang" thoug byid: da:. Ciwim ga: ri Abraham- Isag- Yaku yo' koid to" da" nya: dang: theing yoomo nghoid da:. Nyang: gi nya: byumyu" yiri khanham we' ato" myhed pyam nghoid da:.
24 Suri khokham Hazaela shid: wigi nya: yuggi zoo: Benhada gi khokham bue" lo da:.
25 Hau: thang: Israela khokham Yehoasha gi Benhada ri soem" lheing: oung: pyam lho: Yehoasha da" nya: phoo Yehoahaza vhoeb da" ayo, moo: Benhada wigi yu pyam byid: da" voomoo" joem ri doem seing: yu da:.