KHOKHAM
MOUGSOUG" PUG EIG LOEM:
(2 Kings)
Khokham mougsoug" pug eig loem: gi Israela mungdain: eig loem: da" mhoomyid: ri khokham mougsoug" pug daloem: moo lhid" thang to" jang" mo xo' lhid" to" zi nghoid da:. Mougsoug" pug ri eig du yo" khyo' da:. 1) 850 BC koo: mo shid" wigi Samari gyo" soem" lo" da" ziyo' 722 BC moo mougzhung: shoid mungdain: thang lo" da" ayo, ju" sho' mo mungdain: eig loem: da" mhoomyid:. 2) Israela mungdain: gyo" soem" lo" da" ayo, 586 BC mo zi Babelon khokham Nebukhadneza wigi Yerusalem ri seing: yu wigi phyo' shoin' pyam da" ayo, ju" sho' mo Yuda mungdain: mhoomyid: nghoid da:. Mougsoug" pug ri Babelon byumyu" yi akhoug: moo Yuda zoug: koid da" Gadelia khyoo: yo' Yuda khokham Yehoiakhin Babelon thung: mo loid lo da" khyoo: lu dang: ri lhid" wigi athang: said to" da:.
He: mungdain: da" yau: khi" kyi" khyeug zigi Yuda- Israela khokham joem yo' mung" byu yi jhug azug boem yoomo bue" zi nghoid da:. Yerusalem byo, yoin" lo" ziyo' Yuda byu yi myoo" sho' pyoung" she: loo" shau" zigi Israela mhoomyid: moo: gye" yhouggyen: da" thid loo" nhang: da" khyoo: joem mo daloem: nghoid da:.
Khokham mougsoug" pug eig loem: moo Lapi: khyo" yab lo da" yug gi Elia gung khoo: moo Lapi: xo' koid da" Elisha ga: su: nghoid da:.
1
1 Israela khokham Ahab shid: thang: ri Moba mungdain: gi Israela ri gyi koid ago".
2 Israela khokham Ahazia gi Samari mo nya: khokham kho" yhoemkhung: tho' moo jo, da" gyam" tho' mo byid gyo" wigi xoo: sho' dam dab da:. Houg: yoomo nyang: gi nyang: gi wa agi wa ein: ziri si' wa shid re" Ekron voomoo" mo Philisti yi da" yu phara" nghoid da" Balazebu ri yhe: myid: wa shid re" lagyoo: dayham" ri nhang: kaid da:.
3 Nghoid loug we' Aseing da" moug: lagyoo: gi Tishbe mo Lapi: Elia ri khokham Ahazia da" lagyoo: yi yo' yhe: shoug" nhang: wigi nyangnu" ri ?Ekron yu phara" Balazebu ri dang: myid: wa shid re" nanu" ciwim yhi: go" la". Israela mung" moo yu phara" anyid ein: nanu" myid jhoo: yoomo nghoid go" rhe".
4 Khokham ri ?re" dam agi wa. Shid: wa zi nghoid? ga: Aseing tid da ein: lo" tid kyoo" we'? ga: tid da:.
Elia gi Aseing wigi amyeing" byid: to" ziyo' dakhyo" koid da:.
5 Houg: lang" lagyoo: yigi khokham phoo jhang doem tau" lo" ago". Khokham phoo gi ?Nanu" ciwim doem tau" loo go" lha"? ga: lhoem: myid:.
6 Nyangnu" gi ?Ngoonu" gi Ngoonu" ri doem tau" loo" wa shid re" tid wigi ?nang ri Ekron yu phara" Balazebu ri dang: myid: wa nang ciwim lagyoo: nhang: kaid lha" Israela mung" moo yu phara" anyid ein: nang myid jhoo: yoomo nghoid rhe". Nang gi dam agi wa. Nang shid: wa zi nghoid ga: Aseing tid da: ein: lo" tid kyoo" we'? ga: tid da" byu dayug yo' shoug" yoomo nghoid? ga: phug tid ago".
7 Khokham phoo gi ?Byu hau: yug khate" su: nghoid lha"? ga: myid: da:.
8 Nyangnu" gi ?Gougnyhoug shooyid yo' koid da" byi: sheing" void ci: wigi shooyid phyid" cu" cu" ci: da:? ga: tid.
Khokham phoo gi ?Elia nghoid da? ga: tid da:.
9 Hau: thang: khokham phoo gi Elia ri yhe: shu" yu wa shid re" gyizoug: dayug ri byu wim: xi: yug yo' nhang: kaid da:. Gyizoug: phoo gi bau gung tho' moo Elia zhung: jo, ziri yhe: myang wigi nyang: ri ?Mangso byu we" nang ri gyoo" loo wa shid re" khokham phoo amyeing" byid: da:? ga: tid da:.
10 Elia gi ?Ngoo Mangso byu nghoid rigi mougkhung: mo myi: gyoo" re" wigi nang yo' re" byu yiri re" nghe' said pyam baja"? ga: phug tid da:. Dalheing: dam myi: gi gyoo" re" wigi gyizoug: phoo yo' nya: byu yiri nghe' said pyam da:.
11 Khokham pho gi gootu: gyizoug: dayug ri byu wim xi: yo' doem nhang: kaid da:. Hau gyizoug: do, yhe: wigi Elia ri ?Mangso byu we" nang ri akhid" nyang: gyoo" ri" wa shid re" khokham phoo amyeing" byid: da:? ga: lo" tid da:.
12 Elia gi ?Ngoo Mangso byu nghoid rigi mougkhung: mo myi: gyoo" re" wigi nang yo' re" byu yiri re" nghe' said pyam baja" ga: phug tid da:. Dalheing: dam Mangso myi: gyoo" re" wigi gyizoug: phoo yo' nya: byu yiri nghe' said pyam da:.
13 Khokham phoo gi gyizoug: dayug yo' byu wim: xi: yug ri dalheing: doem nhang: kaid da:. Hau: gyizoug: gi bau gung khyoo: do, yhe: wigi Elia da" shidkhoin" moo: poid thug yhe: thug lho: ?Mangso byu we"- ngoo yo' nga" byu yiri nheig khyeug yu la. Ngoonu" kangso' ri loid nhang: la.
14 Gootu: gyizoug: eig yug yo' nya: eig tang: da" byu yigi mougkhung: mo myi: yo' nghe' said pyam zi shoug" bye:. Nghoid loug we' ngoo ri nheig khyeug yu la o"? ga: tid da:.
15 Aseing da" moug: lagyoo: gi Elia ri ?Nyang: yo' dage" cang gyoo" loo" we'- agyug? ga: tid. Houg: yoomo Elia gi gyizoug: phoo yo' dage" khokham phoo jhang cang gyoo" lo" wigi
16 Nyang: ri ?Aseing hid su" tid ?Nang gi Israela mung" moo dang: myid: wa yu phara" anyid loo: yhang: ti" koid wigi Ekron yu phara" Balazebu ri dang: myid: wa lagyoo: yiri nhang: kaid yoomo nang gi noodam agi wa. Nang shid: wa?? ga: tid da:.
17 Elia nhoid khyo" Aseing tid ziyo' dayhang: ti" Ahazia shid: lo" da:. Ahazia gi yuggi zoo: ayoo" yoomo nya: nhung" Yoram gi Yuda khokham Yehoshaphad da" yuggi zoo: Yehoram vhoeb zi eig zain ein: zain ri nya: gung khoo: moo: khokham xo' koid da:.
18 Khokham Ahazia koid da" lo, moo" gootu: ja: khang" moo" gi Israela khokham yi da" mhoomyid: shen" dam pug moo lhid" xoem" to" ago".