1 Hau: thang: khokham Sholumon gi David voomoo" Ziun mo Aseing da" Dang: Theing Kuid: ri Noku Yhoem: Moo" khyoo: dang vang loo" wa shid re" Israela byumyu" yi yo' akung: ako'' vhujhung: yi dangain" ri Yerusalem moo nya: jang" khyoo: ri" wa shid re" amyeing" byid: kaid da:. 2 Nyangnu" dangain" bang: gi Ethanin ga: da" lhammoo" nyhed khyab akhoug: mo zoem" pui" ayo, moo re" zeing: foem: nyid boem bye:. 3 Vhujhung: yi dangain" zeing: lang" Dang: Theing Kuid: ri khainjung yi vu, wigi 4 Noku Yhoem: Moo" khyoo: dang vang lo" boem bye:. Levi byu yi yo' khainjung yi we' Aseing da" zoem" yo' houg mo jonu" dangain" ri Noku Yhoem: Moo" khyoo: thoid shu" yu boem bye:. 5 Khokham Sholumon yo' Israela byumyu" yi dangain" bang: gi Dang: Theing Kuid: shidkhoin" moo zeing: foem: to" wigi atho' nghab loo: sho' myo: da" yang kyung nu: kyung joem ri xoin" ngei" byid: bye:. 6 Hau: thang: khainjung yigi Dang: Theing Kuid: ri Noku Yhoem: Moo" khoug: khyoo: dang vang lo" wigi gyeung" shang: thang yab mo dung dab da" dei noem eig du: da" vhoo: moo: to" too" bye:. 7 Dung dab dei noem eig du: pyo: ci: da" dung joem gi koid: yo' hau: ziri dang da" keing youg: joem ri nghoeb to" da:. 8 Gyeung" shang: thang yab shidkhoin" moo yab jo, su: hang" nghoid loug keing: youg: thang: joem ri dain: za: shau" myang da:. Gootu: joyoo mo ayo" myang nghoid da:. (Hau: keing: youg: joem gi akhid" nyid" ju" sho' houg moo jo, ashi" da) 9 Israela byumyu" yi Egutu mung" mo thu lo uri Aseing gi Sina boem moo nyangnu" yo' dang: theing to" wigi Moshe to" to" da" lug yho' eig loem: mo lid lho: hau: Dang: Theing Kuid: moo: ciwe' aboo nghoid da:.

10-11 Khainjung yi Noku Yhoem: Moo" mo thu ri" lang" myo, kyoem: sho' bang da" Aseing phung" yoeb yo' bang da" jhoemmoug" gi hau: ziri nyeigdain tung" nghoeb pyam da:. Houg: lang" nyangnu" gi nyangnu" da" moo" ri ayo" lo" tau" koid loo: nghoid ago". 12 Hau: thang: Sholumon akyu" mho' zigi

14 Houg moo byumyu" yi yab jo, uri khokham Sholumon gi nyangnu" shoid khyoo: myonhoo: shu: lo lho: nyangnu" atho' moo: Mangso da" mainkaid byid: wa shid re" mho' nyid da:. 15 Nyang: tid zigi ?Israela da" Aseing Mangso ri coung" ge'. Nga" phoo David ri nyang: byid: to" da" dangsoo" ri nyang: cang pyeing wigi nyang: David ri 16 ?Nga" byumyu" yiri Egutu mung" mo shu" tho lo da" ayo, mo ngoo ri noku wa da" yhoem: koid wa joyoo ri Israela mung" dangain" jang" mo voomoo" kha" loem: ri we' ngoo akhyen. Nghoid loug we' nga" byumyu" yiri vhoebkhang" wa shid re" David nang ri ngoo khyen: yu bye:?? ga: tid.

17 Xo' lho: Sholumon gi ?Israela Aseing Mangsoo ri noku wa shid re" yhoem: daloem: koid wa khyo" nga" phoo David soin' nyid?. 18 Nghoid loug we' Aseing nyang: ri ?Nga" shid re" yhoem: daloem: koid wa shid re" nang myid vho: nyid zi jo da:. 19 Nghoid loug we' hau: ziri khanham we' yo" koid wa zi anghoid. Nga" da" yhoem: ri koid wa su: gi re" yuggi zoo: nyang: nghoid wa.

20 Akhid" koem' Aseing gi nya: dangsoo" ri pyeing byid: bye:. Israela khokham nghoid da" nga" phoo zhungtang kho" moo ngoo xo' zhung: bye: ziyo' Israela Aseing Mangsoo ri noku wa shid re" Noku Yhoem: Moo" ri ngoo koid too" bye:. 21 Nyang: ngoonu" phoug" phyid" yiri Egutu mung" mo shu" thu re" uri Aseing gi nyangnu" yo' koid to" da" dang: theing lug yho' joem bo da" Dang: Theing Kuid: shid re" Noku Yhoem: Moo" khoug: moo: joyoo daloem: ri we' yo" soin' too" byid: bye:? ga: tid.

22 Hau: thang: Sholumon gi byumyu" yi phung: khyoo: yhe: wigi phoin: shidkhoin" moo yab jo, lho: houg moo nya: lo, ri tu: to' to" 23 ziyo' akyu" mho' zigi ?Israela Aseing Mangsoo we"- mougkhung: tho' moo we' myidjang vhoo: moo we' nang yo' du da" yu phara" gootu: anyid loo: nhung. Nang gi re" byumyu" yi yo' koid to" da" dang: theing ri pyeing byid: wigi nang ri myid nheigloem: dangain" ziyo' tam" gyo: cang yhe: nyid bang: ri re" jheddab myid ri ci: shug nyid da:. 24 Nang gi nga" phoo David yo' koid to" da" dangsoo" ri we' pyeing byid: bye:. Tid gu: dangain" akhid" nyid" joeb byeung" loo bye:. 25 Akhid" Israela Aseing Mangsoo we"- nyang: jhug za: koid yhang: ti" nyangnu" re" dang: ri tam" gyo: cang yhe: lang" Israela ri vhoebkhang" wa khokham nya: amyed ashen yi mo dayug gyeing" thu loo: wa khyoo: nang nyang: ri tid lho: nga" phoo yo' gootu: dangsoo" koid to" da" ziri we' pyeing byid wa nghoid ziri ngoo mho' nyid. 26 Houg: yoomo akhid"- O" Israela Mangsoo we"- re" dei zoo: nga" phoo David ri nang byid: to" da" dangsoo" dangain" ziri gyeing" nyang: bui" nhang: we' o".

27 Nghoid loug we' O" Mangsoo we"- nang gi mougmyid tho' moo gyeing" yo" nyid wa la". Mougkhung: mungdain: dangain" zi nang nyid wa shid re" agi" ri ngoo koid to" da" he: Noku Yhoem: Moo" gi khasu" yo" tho' gi" wa la". 28 Nga" Aseing Mangsoo we"- ngoo gi re" dei zoo: nghoid nga" akyu" mho' dang: ri tam" gyo: wigi akhid" nyid" ngoo nang ri mho' yoid ziri myid veing" byid: we' o". 29 Noku wa shid re" nang khyen: too" bye: da" he: joyoo mo Noku Yhoem: Moo" ri myen" myen" nyid" nyid" lhoug zung" byid: wa o". He: Noku Yhoem: Moo" khyoo: ngoo myonhoo: shu: wigi akyu" mho' dang: ri tam" gyoo: byid: we' o". 30 Nga" akyu" mho' dang: yo' re" byumyu" yi he: joyoo khyoo: shu: wigi mho' da" nyangnu" akyu" mho' dang: ri tam" gyoo: byid: we' o". Mougkhung: mungdain: mo re" yhoem: moo: ngoonu" da" akyu" mho' dang: ri tam" gyo: wigi ngoonu" yooboo ri khyoid byid: we' o". 31 Byu dayug gi gootu: dayug ri shoid wigi he: Noku Yhoem: Moo" re" phoin: khyoo: shu" re" lho: nya: yooboo adab khyoo ri re" jham' tang: lang" 32 O" Aseing we"- mougkhung: mo tam" gyo: wigi re" dei zoo: yiri tarha" dang: phyed byid: we'. Yooboo yoo" su: ri nyang: yoo" eung: ziyo' dayhang: ti" dam byid: we'. Yooboo ayoo" su: ri koem' gi nhang: kaid byid: we' o". 33 Re" byumyu" yi nang ri thougtheung yooboo koid yoomo nyangnu" gi nyangnu" da" gyivoo lo, moo soem" byug thang: ri nyangnu" re" jang" khyoo: doem lheing: lo wigi yooboo khyoid byid: wa shid re" he: Noku Yhoem: Moo" khyoo: re" lho: khyo' nyhoem: ziyo' re" jang" moo akyu" mho' uri 34 Nyangnu" ri mougkhung: mo tam" gyoo: byid: we' o". Re" byumyu" yi da" yooboo ri khyoid pyam byid: lho: nang nyangnu" phoug" phyid" yiri byid: bye: da" mougmyid khyoo: nyangnu" ri doem shu" yu we' o". 35 Re" byumyu" yi nang ri thougtheung yooboo koid yoomo nang moug: ri avoo nhang: thang: ri nyangnu" nung myid yo" wigi he: Noku Yhoem: Moo" khyoo: myonhoo: shu: lho: khyo' nyhoem: ziyo' re" jang" moo: akyu" mho' uri 36 nyangnu" ri mougkhung: mo tam" gyoo: byid: we' o". Israela khokham yo' byumyu" yi da" yooboo ri khyoid pyam byid: wigi jo da" ziri yo" koid wa shid re" nyangnu" ri jhau" byid: wa o". Houg: lho: O" Aseing we"- nang re" byumyu" yiri byid: to" da" apyaid atoo: seing: mougmyid nghoid da" he: re" mougmyid moo: moug: voo nhang: we' o". 37 ?Hau: meing: moo phang" khoug gyo" uri anghoid lang" lang: yoem" gyo" anghoid lang" lid ngi" wigi lhu: shoin' pyam da" gug shi" mei: shi" anghoid lang" jhenkhyeug phung: moo" dang: yen" anghoid lang" re" byumyu" yiri nyangnu" gyivoo wigi zain: lo uri anghoid lang" noo phyoo" shoug" uri anghoid lang" nyangnu" no nyid uri 38 nyangnu" da" akyu" mho' dang: ri tam" gyoo: byid: we' o". Re" Israela byumyu" hang" nghoid loug we' nyangnu" nheig koug nheig nge ziyo' he: Noku Yhoem: Moo" khyoo: lo, tu: yeing to" lho: akyu" mho' nghoid rigi 39 nyangnu" akyu" mho' dang: ri tam" gyoo: byid: we' o". Re" mougkhung: mungdain: yhoem: mo nyangnu" ri tam" gyoo: byid we' yooboo khyoid byid we' nyangnu" ri pang" thoug we' o". Nang dayug za: byu da" nheigloem: moo myid soin' nyid ziri yo" se' da:. Yugkhang" moo" gi nyang: nya: koid da" moo" yo' dayhang: ti" shoug" kham zoo: baja" o". 40 Houg: lang" ngoonu" da" phoug" phyid" joem ri byid: to" da" meing: moo: nyangnu" nyid nyid da" ayo, dangain" moo re" byumyu" yi nang ri tam" gyoo: nyid boem wa zi nghoid. 41-42 Re" myeing gyi: khyoo: yo' re" byumyu" yi shid re" nang koid bye: da" gyi: sheung: moo" zoo" joem ri moug: vi: moo nyid da" tungbau byu shau" gyo: wigi re" jang" khyoo: re" lho: he: Noku Yhoem: Moo" moo akyu" re" mho' uri 43 nya: akyu" mho' dang: ri tam" gyoo: byid: we' o". Mougkhung: mungdain: mo nang nyid joyoo mo nyang: ri tam" gyoo: byid: wigi koid wa shid re" nang ri mho' yoid lo da" ziri koid byid: we'. Houg: lang" mougmyid tho' mo byumyu" yi dangain" gi re" Israela byumyu" yi koid ziyo' dayhang: ti" nang ri se' lo wigi nang ri tam" gyo: loo goo" wa nghoid. Hau: thang: nyangnu" gi he: joyoo moo nang ri noku wa shid re" he: Noku Yhoem: Moo" ri ngoo koid too" bye: ziri si' go" wa zi nghoid. 44 Nang gi re" byumyu" yiri nyangnu" gyivoo ri yhe: thougtheung zain: wa shid re" amyeing" byid: lho: nang khyen: byid: wigi re" shid re" ngoo koid too" byid: bye: da" he: Noku Yhoem: Moo" jo, da" voomoo" khyoo: myonhoo: shu: lho: nyangnu" nyid joyoo mo nang ri akyu" mho' uri 45 nyangnu" mho' da" akyu" mho' dang: ri tam" gyoo: byid: we' o". Nyangnu" ri mougkhung: mo tam" gyoo: byid: wigi nyangnu" ri oung: doid khyoo: byid: we' o". 46 Re" byumyu" yi nang ri yooboo koid wa nghoid. Hid moo dayug we' yooboo akoid zi anyid wigi nang nheig yo: ziyo' nyangnu" ri nyangnu" da" gyivoo yi oung: pyam nhang: wigi nyangnu" ri gootu: mung" khyoo: join joem khyo" shu" lo" lho: hau: mung" gi gye ve: zi nghoid loug we' 47 Re" byumyu" yi da" akyu" mho' dang: ri tam" gyoo: byid: la o". Nyangnu" khayhi' yooboo koid wigi akhyeing" ashoeb bue" nyid nghoid loug we' hau: mung" moo nyangnu" nung myid yo" wigi re" jang" moo akyu" mho' uri o" Aseing we" nyangnu" da" akyu" mho' dang: ri tam" gyoo: byid: we' o". 48 Hau: mung" moo nyangnu" gyeing" nyang: nheigloem: phyu: ziyo' nung myid yo" wigi ngoonu" da" phoug" phyid" ri byid: too" bye: da" he: mung" khyoo: myonhoo: shu: lho: nang khyen: too" bye: da" he: voomoo" yo' re" shid re" ngoo koid too" bye: da" he: Noku Yhoem: Moo" khyoo: nang ri akyu" mho' uri 49 nyangnu" da" akyu" mho' dang: ri tam" gyoo: byid: we' o". Mougkhung: mungdain: re" yhoem: mo nyangnu" ri tam" gyoo: byid: wigi nyangnu" ri nheig khyeug shoo" myen: shi" we' o". 50 Nyangnu" yooboo dangain" yo' nang ri gyi koid thougtheung khyoo: dangain" ri yooboo khyoid byid: wigi nyangnu" da" gyivoo yi nyangnu" ri nheig khyeug shoomyen: loo nhang: we' o". 51 Nyangnu" gi Egutu mung moo dab nyid da" myithoem" mo nang shu" thu lo da" nanya: byumyu" nghoid da:. 52 Myhang: thang Aseing we" re" byumyu" Israela yo' nyangnu" da" khokham phoo ri nheig dab ziyo' khanham we' yu" nyid wigi bo pang" wa shid re" nyangnu" nang ri mho' yoid lo da" uri khanham we' nyangnu" akyu" mho' dang: ri tam" gyoo: byid: we' o". 53 Ngoonu" da" phoug" phyid" yiri Egutu mung" mo nang shu" lo uri re" dei zoo: Moshe khyo" wigi nang nyangnu" ri tid bye: ziyo' dayhang: ti" re" byumyu" bui" wa shid re" byumyu" dangain" jang" mo nang nyangnu" ri khyen: yu bye:.

54 Sholumon gi Aseing jang" moo akyu" bain mho' lang" phoin: shidkhoin" moo poid thug thug lho: lo, tu: yeing to" jang" mo to' yab bye: da:. 55 Houg moo: zoeb foem: nyid da" byumyu" yi dangain" mo, shid re" thui: zeing yo' Mangso da" mainkaid jeju" ri mho' bye:. Nyang: mho' zigi 56 ?Nyang: dangsoo" to" to" ziyo' dayhang: ti" nya: byumyu" yiri myenjham" khyoo: byid da" Aseing ri coung" ge' o". Nya: dei zoo: Moshe khyo" wigi jang deung too" byid: da" ge da" dangsoo" dangain" ziri nyang: pyeing byid: bye:. 57 Ngoonu" da" phoug" phyid" yi yo' dage" nyang: nyid nyid ziyo' dayhang: ti" ngoonu" Aseing Mangsoo gi ngoonu" yo' dage" nyid nyid baja" o". Nyang: ngoonu" ri khanham we' atoo" khoo' ashe: pyam baja" o". 58 Nyang: ngoonu" da" phoug" phyid" ri byid: to" da" tarha" yo' amyeing" dang: dangain" ri cang nyid wigi nya: dang: ri tam" gyoo: wa khyo" nyhang" ri nyang: koid baja". Houg: lang" nyang: ngoonu" ri kangso' dei nhang: nau: khyo" ngoonu" kangso' yo" dei nyid wa zi nghoid. 59 He akyu" mho' dang: yo' ngoo nyang: ri mho' yoid da" dang: joem ri ngoonu" da" Aseing Mangsoo gi ayo, dangain" moo myid boin: nyid baja" o". Nyang: gi Israela byumyu" yi yo' nyangnu" khokham phoo ri nyid" khang" nyid" nyangnu" ca" nyid ziyo' dakhyoo" ti" khanham we' nheig myen: shoo" gyoo: baja" o". 60 Houg: yoomo mougmyid mo mungdain: dangain" gi Aseing dayug kyeing" Mangsoo nghoid khyoo: gootu: anyid khyoo: ri si' wa zi nghoid. 61 Nya: byumyu" yi nghoid da" nanu" we' akhid" nyid" koid yhang: ti" nya: tarha" yo' amyeing" joem ri tam" gyo: cang yhe: wigi ngoonu" Aseing Mangsoo ri khanham we' dang: zung" nyid baja" o".

62 Hau: thang: khokham Sholumon yo' byumyu" yi dangain" gi Aseing ri xoin" ngei" byid: boem ago". 63 Nyang: gi zoem" khau: xoin" khyo" nuloo: 22,000 yo' yang 120,000 du: ri ngei" byid: da:. Houg: lho: khokham phoo yo' byumyu" yi dangain" bang: gi Noku Yhoem: Moo" ri shug byid: yhoem: vang pui koid boem bye:. 64 Hau: nyid" ri nyang: Noku Yhoem: Moo" shidkhoin" vang" khyam: agung joyoo ri ab byid: wigi hau: thang: nyang: gi hau: joyoo moo: du: goin" nghe' ngei" xoin"- shivoo: xoin"- zoem" khau: xoin" shid re" gougnyhoug xu: ri ngei" byid: bye:. Nyang: hidsu" koid zigi gyid: mid" phoin: gi he: xoin" dangain" shid re" sung ngi yoomo nghoid. 65 Noku yhoem: moo Sholumon yo' Israela byumyu" yi dangain" bang: gi nyhed nyid" nyang: zoem" pui" koid ago". Houg moo: mougzhung: shoid Hemad mougkyoo" mo zi mougpyi: shoid Egutu mung" mougkyoo" ju" sho' mo da" byumyu" phung: moo" zeing re" ju" zeing: foem: boem ago". 66 Shed nyid" nyid" ri Sholumon gi byumyu" yiri yhoem: khyoo: nhang: kaid bye:. Nyangnu" dangain" we' nya: deizoo: David yo' nya: byumyu" Israela ri Aseing mainkaid byid: yoomo nyang: ri coung" lho: yhoem: khyoo: ngei pyo: tung" lo" boem bye:.