21
1 Yezrela mo khokham Ahab da" khokham khoo" nam moo Nabod ga: su: seing: da" zabyid khyam: da khyam: jo, da:.
2 Danyid" gi Nabod ri Ahab' gi ?Re" zabyid khyam: ngoo ri byid: we'. Hau: zigi nga" khokham khoo" yo' jhang yoomo hau: joyoo moo nghang" pho khyam: koid nau da:. Hau: shid re" je" ge da" zabyid khyam: dakhyam: nang ri ngoo byid: wa. Anghoid lang" nang vho: nghoid rigi hau: shid re" moin: yi" da" aphoug" ngoo nang ri byid: ba? ga: tid.
3 Nabod gi ?He: zabyid khyam: gi nga" phoug" phyid" byid: too" kho' da" mid danghoid. Ngoo he: ziri nang ri byid: wa akhang" Aseing toem' nyid da? ga: tid.
4 Ahab gi Nabod nyang: ri tid bye: da" dangkhoin" yoomo yoem: shoin: ziyo' nheigloem: yoin ziyo' yhoem: khyoo: lo" da:. Nyang: gi nya: yhoeb yoo moo lheing jhang" jo,- pyiyam khyoo: myonhoo: shu: lho: ci: we' azoo: loo: nyid nyid da:.
5 Nya: yhoem: seing: myhi' Yezebela nya: jang" khyoo: yhe: wigi ?Nang ciwim yoomo yoem: shoin: nyid lha". Nang ciwim yoomo zoo: noem azoo: lha"? ga: myid: bye:.
6 Nyang: gi ?Nabod ngoo ri tid da" dang: yoomo nghoid. Nya: zabyid khyam: ri ngoo qei yu wa anghoid lang" nyang: myid vho: nghoid rigi hau: khyam: shid re" gootu: dakhyam: byid: wa ein: tid nghoid loug we' nyang: gi ngoo ri hau zi ayo" byid: ga: tid? ga: tid.
7 Yezebela gi ?Nghoid bye:- nang khokham nghoid anghoid rhe". Yhoeb yoo mo too' we'- pyoo: pyoo: nyid wigi zoo: shug we'. Nabod da" zabyid khyam: ri ngoo yu byid: ba? ga: phug tid.
8 Hau: thang: nyang: gi mougsoug" dadu zoo: lhid" lho: houg moo Ahab da" lo, xoem" lhid"- nya: dazid thung" lho: Yezrela mo moo" voin bang: yo' byumyu" yi da" vhujhung: yi jang" khyoo: foin: kaid bye:.
9 Mougsoug" moo bo zigi ?Zoo: noem jang" wa da" bidnyid danyid" ri lu dang: fu" kaid ge'. Byumyu" yiri we' khe: zheing" too" ge'. Nabod ri ngi: shab joyoo byid: to" ge'.
10 Mangsoo yo' khokham phoo ri yooboo foin: dang: tid ein: nya: shidkhoin" moo yooboo foin: jau join" wa akhyeing" da" byu dazoem" sho: too" ge'. Hau: thang: nyang: ri voomoo" mo shu" thu lo" wigi lug boem yo' du" said pyam ge'? ga: bo da:.
11 Yezrela mo moo" voin bang: yo' byumyu" yi da" vhujhung: yigi Yezebela amyeing" byid: bye: ziyo' dayhang: ti" koid bye:.
12 Nyangnu" gi zoo: noem jang" wa bidnyid danyid" koid wa khyo" lu dang: fu" bye:. Byumyu" yiri we' dage" khe: zheing" too" bye: ziyo' Nabod ri we' ngi: shab joyoo byid: to" ago".
13 Jau join" su: eig yug we' shava byu yi shidkhoin" moo: nyang: ri Mangsoo yo' khokham phoo ri yooboo foin: dang: tid khyo" wigi yooboo foin: lho: nyang: ri voomoo" mo shu" thu lo" ziyo' lug boem yo' du" said bye:.
14 Yezebela jang" khyoo: foin: kaid da" pyeing: dang: gi ?Nabod ri said pyam bye:? ga: zi nghoid.
15 Yezebela gi pyeing: dang: ri shoug" yu yo' dage" Ahab ri ?Nabod shid: bye:. Akhid" yhe: wigi nyang: nang ri aoung" byid: da" zabyid khyam: ri yhe: seing: yu we'? ga: tid.
16 Ahab gi dalheing: dam yhe: wigi hau: zabyid khyam: ri yhe: seing: yu bye:.
17 Hau: thang: Tishbe mo lapi: Elia ri Aseing gi
18 ?Samari mo khokham Ahab jang" khyoo: yhi: we'. Nyang: gi Nabod da" zabyid khyam: ri seing: yu wa soin' nyid ziri nang yhe: myang wa nghoid.
19 Ngoo Aseing nyang: ri ?Byu ri said pyam thang: ri nang gi nya: jonu" ri we' seing: nau shi" lha"? ein: tid we'. He: zigi ngoo tid zi nghoid ?Nabod da" suid" ri lakhuid" joem yo, zo: yen" da" joyoo khang" moo" re" suid" ri we' lakhuid" joem yo, zo: wa zi nghoid ein: tid we'?? ga: tid.
20 Ahab gi Elia ri myang lang" nyang: gi ?Nga" gyivoo we" nang ngoo ri cang myheug nyid nhung: lha"? ga: tid.
Elia gi ?Nghoid- ngoo koid nyid. Nang gi Aseing da" shidkhoin" moo age da" moo" zoo" ri bain sho' nanya: gung nanyang: koid bye: nhung:
21 Houg: yoomo Aseing wigi nang ri ?Ngoo gi re" adang moo: noophyoo" yau: khi" shoug" nhang: wa. Ngoo gi nang yo' re" ikoin deungkhu: byu yi mo nge zoo: gyi: zoo: yuggi yi dangain" ri shoem" pyam wa zi nghoid.
22 Nang gi Israela byumyu" yiri yooboo thoem" khyoo: shu" yhe: khyo" nga" nheigloem: ri zhu: nhang: nyid yoomo re" ikoin deungkhu: gi Nebad nya: zoo: khokham Yeroboam ikoin deungkhu: yo' Ahiya nya: zoo: khokham Basha ikoin deungkhu: yhang: ti" bui" wa zi nghoid? ga: tid.
23 Yezebela yo' sen: wigi Yezrela voomoo" khoug: moo: nya: gung ri lakhuid" joem wigi zo: pyam wa zi nghoid ga: Aseing tid.
24 Re" bidnoem yi mo voomoo" moo shid: bang: hang" ri nghoid loug we' lakhuid" joem zoo: wa: zi nghoid wigi pa: dam cang shid: byug da" hang" ri nghoid loug we' join yu joem zo: pyam wa zi nghoid? ga: tid.
25 (Nya: yhoem: seing: myhi' Yezebela wigi jhoin" da" gu: dangain" ri koid da" Ahab yhang: ti" Aseing da" shidkhoin" moo age da" moo" zoo" ri bain sho' nyang: nya: gung yo' nyang: koid zi hang" we' anyid nghoid da:.
26 Israela byumyu" yi meing: zain: oung: ce" vang lo uri Aseing wigi hau: mougmyid mo khaid thu pyam bang: nghoid da" Amori bang: koid ziyo' dakhyoo" ti" soolhoo: ri no' khyo" je" sho' pho" da" yooboo ri nyang: shoid bye: da:.)
27 Elia dang: bain tid lang" Ahab gi nya: byimi ri lang: ceig khyoid pyam lho: jid: moo" byimi ri void ci: bye:. Nyang: gi zoo: noem azoo: looza jid: moo" byimi boem moo: yhoeb jo, da:. Nyang: gi nheigloem: thang ziyo' yoem: shoin: yen" da:.
28 Aseing gi Lapi: Elia ri
29 ?Ahab gi nga" shidkhoin" moo nya: gung nyang: khayhi' khyo' nyhoem: nyid ziri nang xoem" shi" la". He: moo" zoo" ri nyang: koid bye: nghoid loug we' nya: apyaid moo: yau khe" noophyoo" ngoo abui" nhang: wa. Ahab' ikoin deungkhu: moo: nya: zo: pyaid ri she' hau: yau: khe" noophyoo" ri khyoo' byid: wa zi nghoid? ga: tid.