1 David shid: lo" nyid uri nya: zoo: Sholumon ri khe: yu lho: thang: thang da" pyeing: dang: byid: too" kho' da:. 2 ?Ngoo shid: wa da" bidnyid gi ju" lo nyid bye:. Loem jeing" ziyo' nheigloem: myid phyed we'. 3 Nang koid wa shid re" re" Aseing Mangsoo amyeing" byid: to" da" moo" zoo" ri koid nyid we'. Nang so" yen" da" joyoo khyi' khang" moo" nang koid da" moo" zoo" dangain" shoug" zoo: shoug" shug baja". Moshe da" tarha" moo lhid" to" da" ziyo' dayhang: ti" nya: tarha" joem yo' amyeing" dang: joem dangain" ri tam" gyo: wigi cang yhe: nyid we'. 4 Nya: dang: ri nang tam" gyo: nghoid rigi nga" amyed ashen yi nya: da" amyeing" dang: ri loem jeing" wigi nyangnu" da" oung: khoug: nheigloem: dangain"- Venyi dangain" ziyo' loem jeing" nyid nyid gi Israela mungdain: ri shoug" vhoebkhang" nyid wa zi nghoid ga: nyang: ngoo ri tid too" bye: da" dang: theing gi Aseing pyeing byid: wa zi nghoid. 5 Gootu: we' bo shi" zi nghoid. Israela gyizoo: yiri vhoebkhang" da" gyizoug: eig yug nghoid da" Nera nya: zoo: Abna yo' Yethera nya: zoo: Amasa tang: ri said pyam khyo" wigi Yoab ngoo ri khasu" koid ziri nang boin: nyid we'. Meing: zain: go" da" ayo, ri nyangnu" koid thu kaid da" shid: shoug" noo shoug" moo" zoo" shid re" yug yo da" ayo, ri latoo: phug khyo" nya: tang: ri Yoab khasu" said pyam ziri we' boin: nyid we'. Nyang: gi yooboo abo da" byu ri said pyam ziyo' nyang: koid da" moo" zoo" shid re" nga" jang" moo: yoovoin bo nyid yoomo hau: yooboo da" kyi" khyeug ziri ngoo shoug" kham zo: nyid zi nghoid. 6 Ci koid wa ziri nang se' nyid zi nghoid. Nyang: ri nyang: kyeing" nyang: yo" shid: loo" nhang: wa zi anghoid. 7 ?Nghoid loug we' Gilead mung" mo Barazili nya: yuggi zoo: yiri jheddab myid ci: shug wigi coung: yu ca" wa zi nghoid. Ciwim ga: ri ngoo re" mang: Absalom jang" mo phang: yen" uri nyangnu" ngoo ri nheig khyeug shoomyen: yoomo nghoid. 8 Xo' wigi Benyamin mung" Bahurim voogung mo Gera nya: zoo: Shimi we' nyid shi". Mahanaim voogung khyoo: ngoo yhe: lo" uri nyang: ngoo ri kyid: kyid: khoo" sho' nheing" bye: zi nghoid. Nghoid loug we' nyang: ngoo ri Yodan gyid lang yam moo re" shoug" uri nyang: ri ngoo asaid wa ein: Aseing da" myeing" moo nyang: ri ngoo dangsoo" khoin" byid: too" bye: zi nghoid. 9 Nghoid loug we' nang gi nyang: ri dam abyid: looza: ato" too". Nang cikoid wa ein: ziri si' bye: yoomo nyang: ri said pyam wa zi nghoid? ga: tid.

10 David shid: bye: yoomo David da" voogung moo: myhoeb too" bye:. 11 Nyang: gi myid: xi: zain Israela khokham bue" bye:. Hebron voogung moo: nyhed zain- Yerusalem moo: soem" xe: soem" zain vhoebkhang" bye: zi nghoid. 12 Sholumon gi nya: phoo David da" khokham zhungtang moo: khokham bue" nyid bye: ziyo' nya: yoem: so' gi geing: geing: teing teing nghoid nyid bye: da:.

13 Hau: thang: Hagid nya: zoo: Adoniya gi Sholumon nya: myhi' Bathsheba jhang yhi: bye:. Bathsheba gi ?Bid noem khyo" agoin: re" lam" rhe"? ga: myid:. Nyang: gi ?Nghoid? ga: tid wigi 14 xo' lho: ?Ngoo nang ri daja: myid: nau? ga: tid. Bathsheba we' ?Ci myid: wa? ga: tid bye:. 15 Nyang: gi ?Ngoo gi khokham bui" eung: nyid ziyo' Israela byumyu" yugkhang" moo" we' hau: ziri nheig byu nyid ziri nang si' bye: zi nghoid. Nghoid loug we' hau: moo" zoo" gi shai" lo" byug bye:. Aseing da" myid vho: khyo" nghoid yoomo nga" nhung" khokham bue" loo bye: zi nghoid. 16 Akhid" ngoo daja: mho' wa jeju" mo ngoo ri ahe: pyam lhid"? ga: tid. Barsheba gi ?Ci mho' wa? ga: myid: bye:. 17 Nyang: gi ?Nga" yhoem: seing: myhi' koid wa shid re" Shunem myiyi: zoo: Abishaga ri ngoo ri byid: baja". Jeju" mo khokham Sholumon ri bo tid byid: we' nyang: nang tid da" dang: ri ahe: pyam wa ein: ziri ngoo se'? ga: tid. 18 Bathsheba gi ?Gi bye:- Re" shid re" ngoo khokham phoo ri tid byid: wa? ga: tid. 19 Houg: yoomo Bathsheba gi Adoniya gungthid Sholumon ri yhe: tid byid: wa ga: vang loo" bye:. Khokham phoo gi to' yab wigi nya: myhi' ri lo, zei: zei: lho: goeb pid bye: zi nghoid. Hau: thang: nyang: gi nya: khokham zhungtang moo zhoung: wigi nya: myhi' shid re" zhungtang daloem: yu lho: nya: lo, yo shoid moo zhung: nhang: bye:. 20 Bathsheba gi ?Ngoo nang ri mho' yoid wa zi daja: jo,- jeju" mo ahe: pyam lhid"? ga: tid. Nyang: gi ?Ce: noem lha"- nga" yhed we"- ngoo nang ri ahe: pyam wa? ga: tid. 21 Bathsheba gi ?Abishaga ri re" mang: Adoniya da" yhoem: seing myhi' koid nhang: shang? ga: tid. 22 Khokham phoo gi ?Abishaga ri byid: wa shid re" nang ciwim yoomo ngoo ri re" tid lha". Nang ngoo ri hougsu" tid zigi nyang: ri khokham zhungtang ab byid: ziyo' dayhang: ti" nghoid nyid. Hau: tho' ago" nyang: gi nga" mang: we' nghoid nyid. Khainjung Abiatha yo' Yoab tang we' nya: shoid khyoo: nghoid nyid da:? ga: tid. 23 Hau: thang: Sholumon gi Aseing myeing khyang" ri dang: theing theing to" wigi ?Hid: yhang: ti" dang: myid: shid re" Adoniya da" kangso' ri ngoo axab pyam nghoid rigi Mangsoo ngoo ri shid: sho' baid said baja". 24 Hau: Aseing gi nga" phoo David da" khokham zhungtang moo ngoo ri geing: geing: teing teing to" too" bye:. Nya: dang: theing ri nya" phoo cang pyeing bye: ziyo' dayhang: ti" ngoo yo' nga" akung: ako' lo, moo mungdain: we' ab byid: bye:. Adoniya gi akhid" nyid" nyang: shid: baja" ein: kangso' Aseing moo: ngoo dang: theing theing too" bye: zi nghoid? ga: tid. 25 Houg: yoomo khokham Sholumon gi Benaia ri amyeing" byid kaid lho: Benaia gi thu lo" wigi Adoniya ri said pyam bye:.

26 Hau: thang: khokham Sholumon gi khainjung Abiatha ri ?Anathod mo re" co' phyed moug: khyoo: loo" we'. Nang shid: wa shid re" moin: su: nghoid loug we' nga" phoo David yo' nang nyid da" ayo, ri Aseing da" Dang: Theing Kuid: ri yu" zung" ziyo' nya: yau: khi" ri nang bo pang" gam yu yoomo akhid" nang ri ngoo said pyam wa zi anghoid? ga: tid. 27 Houg: lang" Aseing gi Shilo voogung Eli yo' nya: amyed ashen yi khyoo: tid da" zi deing loo baja". Sholumon gi Abiatha ri Aseing shid re" khainjung moo" zei: jang" mo thu pyam nhang: bye: zi nghoid. 28 Ciwim ziri Yoab shoug" gyoo: bye:. (Nyang: gi Adoniya ri pang" thoug nghoid loug we' Absalom rigi apang" thoug nghoid da:.) Houg: yoomo nyang: gi Aseing da" Zoem" khyoo: phang: yhe: wigi phoin: da" khyoug: joem cang yhe: zei: yen" da:. 29 Yoab gi Zoem" khyoo: phang: yhe: wigi phoin: ayam moo: nyid nyid ga: ziri khokham Sholumon shoug" gyoo: lang" ciwim yoomo phoin: khyoo: phang: yhe: khyoo: nyang: ri myid: yu" wa ga: Sholumon gi lagyoo: dayug ri nhang: kaid da:. Yoab gi ?Sholumon ri gyoug yoomo Aseing jhang khyoo: phang: yhe: zi nghoid? ga: tid. Houg: yoomo khokham Sholumon gi Yoab ri said pyam wa shid re" Benaia ri nhang: kaid da:. 30 Nyang: gi Aseing shidkhoin" Zoem" khyoo: yhe: wigi Yoab ri ?Thu' ri" loo: we' ga: khokham amyeing" byid: kaid? ga: tid. Yoab gi ?Anau cang- ngoo hid: moo: da shid: wa? ga: tid. Benaia we' khokham phoo jang" khyoo: tau" lo" wigi Yoab citid ga: ziri tid kyoo" bye:. 31 Sholumon gi ?Yoab tid ziyo' dayhang: ti" koid we' yooboo ayo" da" byu ri Yoab said pyam zigi ngoo yo' gootu: David da" amyed ashen yi da" yoovoin anghoid nyid loo: baja"- nyang: ri said wigi myhoeb pyam ge'. 32 Nga" phoo David asi' loo: za: Yoab gi byu said moo" zoo" ri koid too" bye: yoomo Aseing gi nyang: ri dam byid: wa zi nghoid. Yoab gi yooboo adab da" byu eig yug nghoid da" Israela gyizoo: joem ri vhoeb da" Abna yo' Yuda gyizoo: joem ri vhoeb da" Amasa tang: ri said pyam bye:. 33 Nyangnu" byu said da" moo" zoo" yoomo dam gi Yoab yo' nya: akung: ako'' yi adang moo: apyaid atoo: dajo, nyid baja". Nghoid loug we' Aseing gi David da" khokham zhungtang moo zhung: da" nya: akung: ako' yiri khanham we' oung: doid nhang: nyid baja"? ga: tid. 34 Houg: yoomo Benaia gi Aseing da" Zoem" khyoo: yhe: wigi Yoab ri said pyam lho: janggyoin: mo nya: yhoem: moo: myhoeb too" bye:. 35 Khokham gi Yoab joyoo moo: Benaia ri we' Abiatha da" joyoo moo khainjung Zadog ri we' moo" voin nhang: bye:.

36 Hau: thang: khokham phoo gi Shimi ri khe: yu wigi ?Yerusalem moo nanya: shid re" yhoem: daloem: koid we'. Voogung mo athu loo" loo: za: hougmoo: nyid we'. 37 Nang Kidron gyid lang lid sho' thu so" lo" nghoid rigi gyeing" nyang: shid: wa zi nghoid. Nanya: gung nanyang: yooboo byid: zi shoug" wa zi nghoid? ga: tid. 38 Shimi gi ?Aseing: khokham we"- gye" gi bye:- nang tid ziyo' dayhang: ti" cang koid wa o"? ga: tid. Houg: yoomo nyang: gi Yerusalem moo: ayo, myang" sho' nyid bye: zi nghoid. 39 Nghoid loug we' soem" zain myang" thang: ri Shimi da" join eig yug gi Gad khokham Makha nya: zoo: Akhisha jhang khyoo: phang: vang loo" khare" boem. Gad voogung moo: nya: tang: nyid ga: ziri Shimi shoug" gyoo: lang" 40 nya: join tang: ri yhe: shoo: wa ga: nya: loo zei: moo: zhung: wigi Gad voogung moo: khokham koid nyid da" Akhisha jhang khyoo: yhe: loo" bye:. Nya: tang: ri myang lang" yhoem: khyoo: doem shu" loo bye:. 41 Shimi cikoid ga: ziri Sholumon shoug" gyoo: lang" 42 Nyang: ri khe: yu wigi ?Yerusalem voogung mo athu so" yen" wa shid re" Aseing da" myeing khyang" moo ngoo nang ri dangsoo" to" too" bye: zi nghoid. Nang hougsu" thu lo" nghoid rigi gyeing" shid: wa ein: nang ri ngoo zid" nhang: bye:. Nga" dang: ri tam" gyoo: wa shid re" ngoo tid ziri nang aveing" rhe". 43 Ciwim yoomo nang re" dangsoo" khoin" ri phyo' pyam wigi nga" amyeing" dang: ri atam" gyo: lha". 44 Nga" phoo David ri nang koid shoid da" moo" zoo" dangain" ri nang goolhoo' se' nyid. Hau: moo" zoo" yoomo Aseing nang ri dam byid: wa zi nghoid. 45 Nghoid loug we' nyang: gi ngoo ri mainkaid byid: wigi David da" mungdain: ri apyaid atoo: ngei pyo: yug yoo nhang: wa zi nghoid? ga: tid. 46 Hau: thang: khokham phoo gi Benaia ri amyeing" byid: bye:. Benaia gi thu lo" lho: Shimi ri said pyam bye:. Akhid" Sholumon gi bain sho' ri yo" vhoebkhang" bye:.