19
1 Khokham Ahab gi nya: yhoem: seing: myhi' Yezebela ri Elia koid bye: da" moo" ja khang" moo" yo' nyang: gi Bala lapi: yiri khasu" said pyam khyoo: ri tid kyoo" bye:.
2 Yezebela gi Elia jang" khyoo: mungdang: foin: kaid zigi ?Nang lapi: yiri koid bye: yhang: ti" ngoo we' nang ri nab kyoo' he: yo, ri ayo" koid nghoid rigi yu phara" joem wigi ngoo ri shid: sho' baid baja"? ga: foin: kaid bye:.
3 Elia gi gyoug ziyo nya: kangso' shid re" phang: gau" yen" bye:. Nyang: gi nya: dei zoo: ri shu" ci: wigi Yuda mung mo Berasheba khyoo: yhe: loo" bye:. Houg moo: dei zoo: ri nyhid: too" kho' wigi
4 Elia gi siyoo gyoem" khyoo: danyid" goin" so" yhe: loo" bye:. Nyang: theing: wigi seiggam yoeb moo zhung: lho: nyang: gi shid: nau nyid da:. Nyang: gi ?Aseing we" he: zigi sung nyang: xoo: bye:. Nga" kangso' ri yu pyam byid: we' o". Ngoo gi shid: nau kyi bye:? ga: mho' nyid da:.
5 Nyang: gi seiggam khyid: moo: jhang" jo, wigi yhoeb pyoo: khare" da:. Moug: lagyoo: dayug gi nyeigdain tung" nyang: ri re" tain" wigi ?Too' we' zoo: we'? ga: tid.
6 Nyang: lheing: yu" kaid ri zooyho' daloem: yo' gyid dajhuang: ri nya: vhuloem phyoo" nam moo: myang kaid da:. Nyang: zo: shug wigi dalheing: doem lheing jhang" yhoeb loo" bye:.
7 Aseing da" moug: lagyoo: doem re" wigi nyang: ri eig lheing: ein: lheing: doem re" nhoug" lho: ?Too' we' zoo: we' re" gyung: khyoo: gye" vi: shi"? ga: tid.
8 Elia to' wigi zo: shug da:. Zoo: shug gi gyeung" shang: da" Sina boem khyoo: myid: xi: nyid" so" yhi: wa shid re" yoem: boo nhang: da:.
9 Houg moo: myen" ri theing: wa khyo" lug khyung: khyoo: vang loo" bye:.
Aseing gi nyang: ri nyeigdain tung" ?Elia nang hid moo: cikoid nyid la"? ga: tid.
10 Nyang: gi ?Myhang: thang Aseing Mangsoo we"- ngoo gi nang dayug ri khyeing" dei byid: nyid. Nghoid loug we' Israela byumyu" yigi nyangnu" nang yo' koid to" da" dang: theing ri phyo' pyam bye:. Phoin: ri we' baid phyo' pyam bye: ziyo' re" lapi: yi dangain" ri we' said pyam bye:. Ngoo dayug kyeing" dadeing lo: wigi nyangnu" ngoo ri said wa shid re" yoem: kaid nyid boem? ga: phoug tid.
11 Aseing gi ?Thu' lo lho: boem gung tho' mo nga" shidkhoin" moo: lo" yab yu" we'? ga: tid.
Hau: thang: Aseing lid: lo wigi bau gung ri byo, gyoo" nhang: lho: lugpyo' ri gyoeb, loo" nhang: da" gyoug pho" uglid moo" ri nhang: kaid bye:. Nghoid loug we' Aseing gi lid moo: aboo nghoid da:. Lid moid zi theing: thang: ri myid leig leig nhang: bye:. Nghoid loug we' myid leig leig jang" moo Aseing aboo nghoid da:.
12 Myid leig leig zi bain thang: ri myi: doem ju" bye:. Nghoid loug we' Aseing gi myi: moo aboo nghoid da:. Myi: re" thang: ri sam" sam" ga: dang: so' so' da" thui: thu loo bye:.
13 Elia gi hau: ziri shoug" gyoo: lang" nya: myonhoo: moo phajoid yo' nghoeb lho: thu yhe: wigi lugkhyung: nhoid moo: yhe: yab jo, da:. Nyang: ri tid da" thui: gi ?Elia we" nang hid: moo: cikoid nyid la"? ga: myid: bye:.
14 Nyang: gi ?Myhang: thang Aseing Mangsoo we"- ngoo gi nang dayug ri khyeing" dei byid: nyid. Nghoid loug we' Israela byumyu" yigi nyangnu" nang yo' koid to" da" dang: theing ri phyo' pyam bye:. Phoin: ri we' baid phyo' pyam bye: ziyo' re" lapi: yi dangain" ri we' said pyam bye:. Ngoo dayug kyeing" dadeing lo: wigi nyangnu" ngoo ri said wa shid re" yoem: kaid nyid boem? ga: phoug tid.
15 Aseing tid zigi ?Damasku voomoo" nam mo siyoo gyoem" khyoo: doem tau" loo" we'. Hau: thang: voomoo" khyoo: vang yhe: wigi Hazaela ri Suri khokham khyo" mainkaid xu: yhe: foid gyoin: byid: we'.
16 Israela khokham khyo" Nimshi da" nya: yuggi zoo: Yehu ri mainkaid xu: foid gyoin: bye: wigi re" gungthid lapi: bui" wa shid re" Abela Mehola voogung mo Shaphad da" yuggi zoo: Elisha ri mainkaid xu: foid gyoin: byid: we'.
17 Hazaela said da" jang" mo loid byoin bang: hang" nghoid loug Yehu wigi said pyam zi shoug" wa. Yehu wigi said da" jang" mo loid byoin bang: hang" nghoid loug Elisha wigi said pyam wa zi nghoid.
18 Nghoid loug we' ngoo gi Israela khoug: moo nyhed khyeing" ri kangso' dei nhang: shi". Houg bang: gi ngoo ri dang: zung" nyid wigi Bala ri ano' - nya: yu phara" soolhoo: ri babug abug mo, nghoid wa? ga: tid.
19 Elia thu' lo" ri nu: dagab yo' yoo phug nyid da" Elisha ri yhe: myang. Houg moo nu: gab daxe: dadab gi nya: shidkhoin" moo phug nyid da:. Nyang: gi lo" thang moo nghoid da:. Elia gi nya: adang byisheing: ri khyoid lho: Elisha ri gang" byid: bye:.
20 Hau: thang: Elisha gi nya: nu: gab ri too" kho' wigi Elia thang: khyoo: cang tang" lho: ?Ngoo ri nga" myhi' yo' phoo ri babug bug lho: u" kaid nhang: shi" we' hau: thang: nang yo' dage" ngoo cang ba? ga: tid bye:. Elia gi ?Gi bye:- tau" loo" we' nang ri ngoo toem too" wa zi anghoid.
21 Hau: thang: Elisha gi nya: nu: gab ri lo" said wigi kyoug: joem ri myi: nghe' thang" koid lho: shoo" ri jhoug bye:. Nyang: gi byumyu" yiri shoo" byid: bye: ziyo' hau: ziri nyangnu" zoo: bye:.
Hau: thang: nyang: lo" wigi Elia ri pang" thoug wa shid re" cang loo" bye:.