14
1 Hau: ayo, ri khokham Yeroboam da" nya: zoo: Abiya no nyid da:.
2 Yeroboam gi nya: yhoem: seing: myhi' ri ?Nang ri hang" we' ase' yu" sho' nanya: gung ri gau" shoung: ci: wigi ngoo Israela khokham bue" loo wa ga: tid da" lapi: phoo Ahiya nyid da" Shilo voogung khyoo: yhi: we'.
3 Nya: shid re" zooyho' daxi: loem:- moug dajhi' yo' byoo: yhid: dajuang: ci: yhi: byid: we'. Nyha" tang: zooshang: khasu" bui" wa ein: ziri nyang: ri myid: yu" we'. Nyang: nang ri tid kyoo" wa zi nghoid? ga: tid.
4 Houg: yoomo nyang: gi Shilo mo Ahiya yhoem: khyoo: yhi: bye:. Apyaid gyi: bye: yoomo Ahiya gi myo, amyang loo: nghoid da:.
5 Yeroboam da" yhoem: seing: myhi' gi no nyid su: nya: zoo: khyoo: ri myid: yu" wa shid re" re" nyid ga: Aseing gi Ahiya ri tid da:. Aseing gi Ahiya khasu" lhoem: tid wa ein: ziri tid kyoo" bye:.
Yeroboam yhoem: seing: myhi' ju" loo" lang" gootu: byu dayug khyo" mhau' tid nyid da:.
6 Nghoid loug we' Ahiya gi nyang: khoem" duang: moo vang re" ziri shoug" gyoo: lang" nyang: tid zigi ?Vang re" we' nang Yeroboam nya: yhoem: seing: myhi' nghoid ziri ngoo se'. Ciwim yoomo gootu: dayug yhang: ti" mhau' koid nyid la". Ngoo gi re" shid re" age lu dang: yo" nyid zi nghoid.
7 Yeroboam ri he: zigi Israela Aseing Mangsoo nang ri tid zi nghoid ein: lo" tid kyoo" we'. ?Ngoo gi nang: ri byuphung: mo khyen: yu wigi Israela khokham nang ri koid nhang: bye:.
8 Ngoo gi mungdain: ri David amyed ashen mo yu wigi hau: ziri nang ri byid: bye:. Nghoid loug we' nang gi ngoo moo dang: zung" lho: nga" amyeing" dang: ri tam" gyo: ngoo jang deing to" da" moo" zoo" ri kyeing" koid da" nga" dei zoo: David yo' adu nghoid da:.
9 Re" shid moo vhoebkhang" lid lo da" bang: tho' nang shoid da" yooboo je" myo: nyid da:. Nang gi ngoo ri ngeig pyam wigi noku wa shid re" yu phara" soolhoo: joem: yo' dei noem soolhoo: ri koid khyo" ngoo ri nheig yoo: nhang: nyid da:.
10 Hougsu" yoomo ngoo gi re" khokham akung: ako'' atho' moo noophyoo" shoug" nhang: wigi re" amyed ashen mo yuggi yi ngi zoo: gyi: zoo: dangain" ri said pyam wa. Ngoo re" ikoin deungkhu: ri shoem" pyam wa- nyangnu" gi nukhyid" boem yhang: ti" shoem" pyam zi shoug" wa.
11 Voomoo" khoug: moo shid: da" re" ikoin deungkhu: byu yi hang" ri nghoid loug we' lakhuid" joem wigi zo: pyam zi shoug" wa ziyo' jang: pa: cang shid: da" hang" ri nghoid loug we' join yu wigi zo: pyam zi shoug" wa ngoo Aseing tid zi nghoid? ga: tid.
12 Xo' wigi Ahiya gi Yeroboam yhoem: seing: myhi' ri ?Akhid" yhoem: khyoo: tau" loo" we'. Nang voogung khyoo: vang loo" yo' re" zoo: shid: wa zi nghoid.
13 Israela byumyu" yi dangain" nya: shid re" nheig koug nheig nge ziyo' myhoeb pyam boem bye:. Nyang: dayug kyeing" Israela Aseing Mangso da" myid vho: zi shoug" yoomo Yeroboam ikoin deungkhu: byu yi mo nyang: dayug kyeing" za: goo" lho' myhoeb zi shoug" wa nghoid.
14 Yeroboam khokham akung: ri said toem" pyam wa shid re" Aseing gi Israela atho' moo: khokham dayug ri khoo" zhung: nhang: wa zi nghoid.
15 Aseing gi Israela ri dam byid: wa nghoid wigi nyang: gi gyid lang moo gyidpheing" gam noin" nyid yhang: ti" noin" wa zi nghoid. Nyang: gi Israela byumyu" yiri nyangnu" da" phoug" phyid" ri byid: to" da" moug: gi myid gi mo noid yu wigi Uphrad gyid lang lid sho' khaid sain" pyam wa zi nghoid. Ciwim gari nyangnu" gi Ashera yu phara" myhi' soolhoo: koid khyo" wigi nyang: ri nheig yoo: nhang: nyid da:.
16 Yeroboam yooboo shoid wigi Israela byumyu" yiri yooboo khoug: khyoo: shu" loo yoomo Aseing gi Israela byumyu" yiri she: pyam wa zi nghoid? ga: tid.
17 Yeroboam yhoem: seing: myhi' Tirza khyoo: doem tau" loo" bye:. Nyang: nya: yhoem: khyoo: davang loo" shi" ri nya: zoo: shid: bye:.
18 Aseing gi nya: deizoo: lapi: Ahiya khyo" tid ziyo' dayhang: ti" Israela byumyu" yigi nya: shid re" nheing koug nheig nge lho: myhoeb pyam bye:.
19 Khokham Yeroboam koid lid lo da" khyoo: aja: ja: nghoid da" meing: zain: khyoo: yo' khasu" vhoebkhang" lo khyoo: dangain" ri Israela khokham yi da" mhoomyid: shen" dam pug moo lhid" xoem" to" da:.
20 Yeroboam gi khokham khyo" wigi eig xe: eig zain vhoebkhang" loo bye:. Nyang: shid: wigi myhoeb pyam bye: ziyo' nya: zoo: Nadab khokham doem koid bye:.
(2 km 11:5-12:15)
21 Sholumon nya: yuggi zoo: Rehoboam gi nyang: khokham bue" uri apyaid myid: xe: dazain nghoid bye: ziyo' Aseing ri noku wa shid re" Israela damung" goin" mo nyang: khyen: to" da" Yerusalem mo daxe: nyhed zain vhoebkhang" nyid bye:.
Rehoboam da" nya: myhi' gi Amon mung" mo Nama nghoid da:.
22 Yuda byumyu" yigi nyangnu" phoug" phyid" yi dangain" bang: koid shoid tho' je wigi Aseing ri thougtheung yooboo shoid ziyo' nyang: ri nheigloem: yoin, nhang: nyid da:.
23 Nyangnu" gi anghoid da" yu phara" joem shid re" no' joyoo ri koid bye:. Bau gung tho' moo we' seiggam yoeb vhoo: moo we' no' wa shid re" lug zeingboung: joem yo' Ashera yu soolhoo: joem ri zhug to" boem da:.
24 Dangain" tho' age thang zigi he: tungbau: yu phara" no' joyoo mo shava myhi' shava phoo khyo" koid nyid da" myhi' miyi yo' pho phiyi bang: nghoid nyid da:. Yuda byumyu" yigi Israela byumyu" yi mungdain: khyoo: vang lo uri Aseing wigi hau: mungdain: mo khaid thu pyam da" byumyu" yi koid nyid da" asho' ashid: moo" zoo" dangain" ziri koid nyid boem ago".
25 Rehoboam khokham khoo" zhung" zi wim: zain ein: zain ri Egutu khokham Shishag gi Yerusalem ri meing: vang zain: bye:.
26 Nyang: gi Sholumon sheing: yo' koid to" da" goo yo' dage" Noku Yhoem: Moo" yo' khokham khoo" mo jonu" dangain" ri yu loo" bye:.
27 Hau: gungthid khokham Rehoboam gi gyid: mid" yo' goo ri koid wigi khokham khoo" khoem" moo" duang: ri zung" da" moo" voin bang: ri ab byid: bye:.
28 Khokham gi Noku Yhoem: Moo" khyoo: yhi: khang" moo" gyi zung" mo, gi hau: goo ri vu, ago". Hau: thang: nyangnu" gi gyi zung" yab khyoo: doem lo" boem ago".
29 Khokham Rehoboam koid lid loo bye: moo" zoo" dangain" ri Yuda khokham yi da" mhoomyid: shen" dam pug moo lhid" xoem" too" bye:.
30 Hau: ayo, khoug: moo Rehoboam yo' Yeroboam tang: gi dayug yo' dayug meing: ajang" zain: go" boem ago".
31 Rehoboam shid: bye: ziyo' David voomoo" mo khokham loeb yoo moo: myhoeb too" bye:. Hau: thang: nya: yuggi zoo: Abiya khokham doem koid bye:.