6
1 Israela byumyu" yiri gyoug yoomo Yerikho khoem" moo" duang: joem gi myhid" to" ago". Voomoo" ri vang vang thu thu hang" we' ayo" koid nghoid da:.
2 Aseing gi Yoshu ri ?Ngoo gi Yerikho voomoo" ri nya: khokham we' nya: da" seing" yang" gyizoo: dangain" yo' dage" re" lo, moo: kaid byid: wa.
3 Nang yo' re" gyizoo: yigi hau: voomoo" ri danyid" ri dalheing: lheing: khyug nyid" so" lheing goo" wa zi nghoid.
4 Laboo" daloem: loem: ci: da" khainjung nyhed yug gi Dang: Theing Kuid: da" shid moo: soo" ca" goo" wa zi nghoid. Nyhed nyid" ju" lang" nang yo' re" gyizoo: yigi khainjung yi laboo" moid nyid da" uri voomoo" ri nyhed lheing: so" lheing goo" wa zi nghoid.
5 Hau: thang: nyangnu" gi dathui: za: sheing: sho' moid: goo" wa nghoid ago". Nanu" hau: thui: shau" gyoo: yo' dage" byumyu" yi dangain" bang: thui: zeing yo' nyho: wa nghoid. Houg: lang" voomoo" vang khyam: joem leung gyoeb loo wa. Hau: thang: ri gyidab goin" gi dain: za: voomoo" khoug: khyoo: vang yhi: wa zi nghoid? ga: tid.
6 Yoshu gi khainjung yiri khe: yu wigi nyangnu" ri ?Hau: Dang: Theing Kuid: ri vu ge'. Houg: lho: nanu" mo nyhed yug gi hau: shid vhu" moo: laboo" joem ci: wigi yhe: loo" ge'? ga: tid da:.
7 Hau: thang: nyang: gi nya: byu yiri Aseing Dang: Theing Kuid: shid vhu" moo goem loem gyizoo: yi bo wigi hau: voomoo" ri so" lheing shid" loo" goo" wa shid re" amyeing" byid: da:.
8-9 Houg: yoomo Yoshu amyeing: byid: kaid ziyo' dakhyoo" ti" shid moo so" da" goem loem bang: gi laboo" moid nyid da" khainjung yi shid vhu" moo: to' yhe: lo" ago". Houg: bang: thang: moo: Dang: Theing Kuid: ri vu, da" khainjung yi cang wigi hau: thang: moo: nungthang shoid goem loem bang: cang yhe: lo" ago". Hau: ayo, dangain" moo: laboo" moid myheing nyid boem ago".
10 Nghoid loug we' Yoshu gi nya: byu yiri nya: amyeing" dang: abyid: byid: gi anyho: goo" wa yo' thui: we' athu wa shid re" amyeing" byid: to" da:.
11 Houg: yoomo nyang: gi he: byuphung: ri Aseing Dang: Theing Kuid: vu, nhang: lho: voomoo" ri dalheing: yo" lheing nhang: bye:. Hau: thang: nyangnu" gi dab khyoo: tau" lo" wigi hougmoo: damyen lo" theing: yu ago".
12-13 Yoshu gi thang: nyid" nab soin: no' to' da:. Houg: lho: khainjung yi yo' gyizoo: yigi shid re nyid" mo amyeing" dang: yo' dakhyo" eig lheing: ein: lheing voomoo" lheing khab bye:. Xang: shi" moo: shidvhu" mo goem loem gyizoo yi thang: moo: laboo" nyhed loem: ri moid da" khainjung nyhed yug- hau: thang: Aseing Dang: Theing Kuid: ri vu, da" khainjung yi lo" thang moo: nungthang shoid goem loem bang: so" ago". Hau: ayo, dangain" moo: laboo" moid myheing nyid boem ago".
14 Eig nyid" ein: nyid" ri we' nyangnu" voomoo" ri dayoeb so" lheing wigi dab khyoo: doem tau" lo" ago". Hougsu" khyug nyid" ju" sho' koid ago".
15 Nyhed nyid" ju" lang" nyangnu" gi moug: boo" yo' to wigi dashoid khyo" za: voomoo" ri nyhed lheing: so" lheing ago". Hau: nyid" ri kyeing" nyhed lheing: so" lheing ago".
16 Nyhed lheing: ein: lheing: ri khainjung yi laboo" moid wa soin' lang" Yoshu gi nya: byu yiri nyho: wa amyeing" byid: wigi nyang: gi: ?Aseing gi nanu" ri voomoo" byid: too" bye:.
17 Voomoo" yo' hau: mo ja: khang" moo" ri Aseing ri shugbyid: khyo" dangain" bain sho' phyo' shoin pyam ca". Shava myhi Rahab yo' nya: yhoem: byu yiri za: teing too" wa zi nghoid da:. Ciwim gari: nyang: gi ngoonu" da" jooyu" bang: ri khoug" shoung: too" byid: da:.
18 Nghoid loug we' nanu" koem' gi phyo' shoin pyam wa" da" ci: ri we' age yu goo" wa. Nanu" yu nghoid rigi yau: khi" yo' byo, yoin zi Israela byu yi da" dab khyoo: ju" lo" ri" goo" wa.
19 Ngei- sheing:- gyid: mid"- joto' yo' koid da" ja:- ja: khang" moo" gi Aseing shid re" kho' too" wa zi nghoid da:. Hau: ziri Aseing da" jonu" Kuid: moo: kaid too" wa zi nghoid da? ga: tid.
20 Houg: yoomo khainjung yigi laboo" ri moid myheing kaid ago". Byu yi nyhoo: thui: ri shau" gyoo: yo' dage" nyangnu" gi thui: zeing yo' yoid nyho: wigi vang khyam: joem byo, gyoeb lo" da:. Hau: thang: gyizoo: yi dangain" bang: gi voomoo" khyoo: bouggung khyo" dain: za: do, yhe: lo" lho: hau: ziri yhe: seing: yu pyam ago".
21 Nyangnu" gi nyangnu" da" shamcoin" wigi voomoo" mo yuggi- myiyi: nge zoo:- gyi: zoo: yugkhang" moo" ri said pyam bye:. Nyangnu" gi nu:- yang- loo zei: joem ri we' said pyam ago".
22 Hau: thang: Yoshu gi jooyu" bang: khyo" moo" voin lo boem da" byu eig yug ri ?Re" eig yug nyang: ri dangsoo" byid: to" boem ziyo' dakhyoo" ti" hau: shava myhi yhoem: khyoo: vang yhe: wigi nyang: yo' nya: yhoem: byu yiri yhe: shu" thu loo ge'? ga: tid.
23 Houg: yoomo nya: tang: gi Rahab ri nya: phoo- nya: myhi'- nya: mung yo' deing da" yhoem: byu yi yo' dage" yhe: shu" thu yu boem ago". Nya: tang gi nyangnu" yhoem: byu dangain"- join dangain" ri shu" yu wigi gau: da" joyoo Israela dab nam khyoo: lo" shu" nyhid: to" ago".
24 Hau: thang: nyangnu" gi voomoo" ri myi: nghe' kaid boem wigi sheing:- ngei- gyid: mid"- joto' yo' koid to" da" ja: mo lid lho: voomoo" mo ja: khang" moo" ri myi: nge' khyo' pyam da:. Hau: joem rigi nyangnu" yu lo wigi Aseing da" jonu" Kuid: moo: kaid to" ago".
25 Nghoid loug we' shava myhi' Rahab yo' nya: bidnoem dangain" ri teing to" da:. Ciwim gari: nyang: Yerikho khyoo: nhang: kaid da" jooyu" su: eig tang: ri Rahab gau" shoung: too" byid: yoomo nghoid da:. (Rahab da" amyed ashen yigi Israela mung" moo: akhid" nyid" ju" sho' nyid boem ago").
26 Hau: ayo, moo: Yoshu gi teing teing zid" nhang: da" dang: dakhoin" gi ?Yerikho voomoo" ri doem de: wa soin' su: hang" nghoid loug we' Aseing da" nheing" khoin" zang" loo wa. Ayang: zhug su: hang" nghoid loug we' nya: zooshid" yuggi zoo: shid: wa. Vang khyam: khoem" joem ri zhug su: hang" nghoid loug we' nya: zoothang shid: wa? ga: tid.
27 Houg: yoomo Aseing gi Yoshu yo' dage" nyid wigi nya: myeing gyi: khyoo: gi damung" goin" khyoo: fu" lo" da:.