24
1 Yoshu gi Shekhem moo: Israela byumyu" kung: dangain" ri khe: zheing" yu da:. Nyang: gi ludaid yi vhujhung: yi tarha" agyi yi yo' Israela gyizoug: yiri khe: da:. Houg: lho: nyangnu" gi Mangsoo shidkhoin" khyoo: yhe: ago".
2 Yoshu gi byumyu" yi dangain" bang: ri ?He: zigi Israela da" Aseing Mangsoo tid da" dang: nghoid da:. Hau: zigi ?Goonham- nanu" phoug" phyid" yigi Uphrad thei: tab moo nyid wigi yu phara" gootu: ri no' bang: nghoid ago". Hau: phoug" phyid" yi mo dayug gi Abraham yo' Nahora tang: da" nya: phoo Tera nghoid da:.
3 Hau: thang: ngoo gi nanu" phoug" phyid" Abraham ri Uphrad lang thei: tab mo shu" yu wigi Khanan mung" goin" khyoo: goem: sho' shu" lid yhi: bye:. Ngoo gi nyang: ri amyed ashen myoo" sho' byid: bye:. Ngoo gi nyang: ri Isag-
4 Isag ri Yaku yo' Eso tang: ri byid: bye:. Ngoo gi Eso ri nya: mougmyid jonu" khyo" Edom boem moug: ri byid: bye:. Nghoid loug we' nanu" da" phoug" phyid" Yaku yo' nya: zoo: yigi Egutu mung" khyoo: gyoo" yhe: ago".
5 Thang: ri ngoo gi Moshe yo' Arun tang: ri nhang: kaid wigi Egutu mung" moo: yau: khi" zeing bui" nhang: bye:. Nghoid loug we' ngoo gi nanu" ri shu" thu loo bye:.
6 Ngoo gi nanu" da" phoug" phyid" yiri Egutu mung" mo shu" thu lo wigi Egutu byu yigi gyi myang: rheing yo' myang: dab bang: cang khaid ago". Nghoid loug we' nanu" da" phoug" phyid" yi Thoem" Ni khyoo: ju" yhi: lang"
7 Nyangnu" gi ngoo ri pang" thoug yu byid: wa shid re" yoid mho' ago". Houg: yoomo nyangnu" yo' Egutu byu yi agyoo: moo: ngoo: gi moug: coid ri to" too" byid: bye:. Ngoo gi Egutu byu yi adang moo: panglai: wigi nhau' said pyam bye:. Egutu mung" ri ngoo khasu" koid bye: ziri nanu" se' da:.
??Nanu" gi dain" pyoid yoo moo: gye" myang" sho' nyid ago".
8 Hau: thang: ngoo gi nanu" ri Yodan gyid lang bidthu shoid moo nyid boem da" Amori byumyu" yi mougmyid khyoo: shu" loo" bye:. Nyangnu" gi nanu" ri khaid zain: ago". Nghoid loug we' ngoo gi nanu" ri nyangnu" adang moo: oung: nhang: bye:. Nanu" gi nyangnu" mung" ri yu pyam bye:. Nanu" shid vhu" khyoo: yhe: lo" ri ngoo houg: bang: ri said toem" pyam bye:.
9 Hau: thang: Moba khokham Balag ga: da" Zipora da" nya: zoo: nanu" ri gyi zain: da:. Nyang: gi Beora nya: yuggi zoo: Balam jhang pyeing: dang: foin: kaid wigi nanu" ri nheing" khoin" kaid byid: wa shid re" nyang: ri koid nhang: da:.
10 Nghoid loug we' ngoo gi Balam da" dang: ri agyoo: byid:. Houg: yoomo nyang: gi nanu" ri mainkaid byid: da:. Hid: su" khyo" wigi nanu" ri ngoo Balag da" lo, mo khyoid yu loo bye:.
11 Nanu" gi Yodan gyid lang ri gu: dab wigi Yerikho khyoo: ju" lo da:. Yerikho voobyu yigi Amori- Perizi- Khanan- Hiti- Girgashi- Hivi- Yebusi byumyu" yi yhang: ti" nanu" ri gyi zain: ago". Nghoid loug we' ngoo gi nanu" ri nyangnu" dangain" bang: adang moo oung: doid nhang: bye:.
12 Nanu" shidvhu" khyoo yhe: lo" uri Amori khokham eig yug ri yo" khaid thu pyam wa shid re" nyangnu" ri ngoo byoo dain yoeb lam" bui" nhang: bye:. Nanu" da" shamcoin" joem yo' lid: joem wigi hau: ziri koid zi anghoid.
13 Ngoo nanu" ri khanham we' moo" azei: yu" da" mougmyid- nanu" atam: da" voomoo" joem ri byid: bye:. Akhid" nanu" hougmoo: nyid nyid wigi nanu" asho" da" zabyid nei mo ashi" yo' zhainloin: gam joem mo ashi" joem ri zo: nyid ago"? ga: tid da:.
14 Yoshu gi xo' lho: ?Akhid Aseing ri ngi: shab wigi nyang: ri deing: deing: main: main: jhug zug tung" dei byid: nyid ge'. Nanu" phoug" phyid" yi Mesopotamia mung" yo' Egutu mung" moo lhung no' da" yu phara" ri yu pyam wigi Aseing ri kyeing" dei byid: ge'.
15 Nanu" nyang: ri anau dei byid: goo" nghoid rigi hang" ri dei byid: wa khyoo: ri akhid" nyid" myid phyed ge'. Mesopotamia mung" mo nanu" phoug" phyid" yi no' lo da" yu phara" joem anghoid lang" nanu" akhid" nyid nyid da" Amori byu yi yu phara" joem ri dei byid: goo" wa la". Ngoo yo' nga" yhoem: byu yi koem' gi Aseing ri dei byid: wa.? ga: tid da:.
16 Houg: lang" byumyu" yigi ?Gootu: yu phara" ri dei byid: wa shid re" ngoonu" khanham we' Aseing ri ashe: pyam too".
17 Ngoonu" Aseing Mangsoo gi ngoonu" phoug" phyid" yi yo' ngoonu" ri Egutu mung" moo: join koid da" jang" mo shu" thu lo da:. Houg: lho: nyang: koid shug lo da" mau" pho" alhoo: again ri ngoonu" shau" myang bye:. Ngoonu" lid phyed lo da" byumyu" dangain" phung: moo: ngoonu" yhi: khang" moo" nyang: ngoonu" ri goem loem byid: da:.
18 He: mung" khyoo: ngoonu" jhen" vang yhe: lo" uri Aseing gi hid: moo: nyid boem da" Amori byu yi dangain" ri khaid thu pyam da:. Houg: yoomo ngoonu" we' Aseing ri za: dei byid: wa. Nyang: gi ngoonu" Mangsoo nghoid da? ga: phoug tid ago".
19 Yoshu gi byumyu" yiri ?Nghoid loug we' nanu" gi Aseing ri ayo" dei byid: goo" abe. Nyang: gi gyeung" shang: da" Mangsoo nghoid wigi nanu" yooboo joem ri akhyoid byid: wa. Nyang: gi yoem: shi' nyang: cang hang" ri we' azeing: kham byid: wa.
20 Houg: lho: tungbau yu phara" joem ri dei byid: wa nanu" nya: jang" mo phang lo" nghoid rigi nyang: gi nanu" ri gyi tau" koid wigi yooboo dam byid: loo wa. Nyang: gi shidphyang" nanu" ri ge khyo" koid nghoid loug we' nanu" ri said toem" pyam wa"? ga: tid da:.
21 Byumyu" yi Yoshu ri ?Anghoid- ngoonu" gi Aseing ri dei byid: wa? ga: tid ago".
22 Yoshu nyangnu" ri?Aseing ri dei byid: wa shid re" nanu" nyang: kham: yu boem bye: zigi nanu" nyang: sagse: nghoid ago"? ga: tid da:. Nyangnu" gi ?Nghoid- ngoonu" gi sagse: nghoid? ga: phoug tid ago".
23 Nyang: gi ?Houg: lang" nanu" yo" to" da" tungbau yu phara" joem ri yu pyam ge'. Israela da" Aseing Mangsoo ri nanu" dang: zung" nyid wa khyo" jham' tang: ge'? ga: mho' da:.
24 Houg: lang" byumyu" yigi Yoshu ri ?Ngoonu" gi ngoonu" Aseing Mangsoo ri dei byid: wa. Nya: amyeing" dang: joem ri ngoonu" tam" gyoo: wa? ga: tid ago".
25 Houg: yoomo Yoshu gi hau: bidnyid ri byumyu" yi shid re" dang: theing koid wigi nyang: gi hau: da" Shekhem moo: tarha" yo' thung" ri: joem nyangnu" ri byid: da:.
26 Yoshu gi Mangso da" tarha" mougsoug" pug moo: hau: tarha" joem ri lhid" da:. Hau: thang: nyang: gi lug boem moo" zeing daloem: ri yu lho: Aseing da" gyeung" shang: joyoo mo Shookhi" gam gyid" moo: zhug to" da:.
27 Nyang: gi byumyu" yi dangain" ri ?He: lug boem gi ngoonu" da" sagse: nghoid wa. Aseing ngoonu" ri dang: tid bye: dang: khoin" dangain" ri hau: zi gyoo: baja". Houg: yoomo hau: zigi nanu" shid re" sagse: nghoid wigi nanu" Mangsoo ri thougtheung gyi koid jang" mo toem' pyam loo wa? ga: tid da:.
28 Hau: thang: Yoshu gi byumyu" yiri nhang: kaid da:. Yugkhang" moo" nyang: nya: moug: khyoo: tau" lo" ago".
29 Hau: thang: Aseing da" dei zoo: Yoshu gi zain nyid dasho: daxi: zain ri shid: bye:. Yoshu gi Nun da" nya: yuggi zoo: nghoid.
30 Nyangnu" gi nyang: ri Gasha boem mougzhung: shoid Ephrim boem moug: mo nya: moug: Timnad Sera moo: myhoeb to" ago".
31 Yoshu dei nyid da" gu: moo Israela byumyu" yigi Aseing ri dei byid: wigi nyang: shid: thang: ri nyangnu" gi Israela shid re" Aseing koid byid: lo da" lo, moo" ja: khang" moo" ri shau" myang da" bang: nghoid da" hau: vhujhung: yi dei nyid shi" gu: moo: xo' lho: hougsu" koid ago".
32 Egutu mung" mo Israela byumyu" yi dang lo boem da" Yoseb da" manggung ri Yaku wigi Shekhem da" nya: phoo- Hamora da" nya: yuggi zoo: yi mo ngei dashoo: pyi" yo' qei yu to" da" mougmyid mo Shekhem moo: myhoeb to" ago". He: mougmyid gi Yoseb da" amyed ashen yi shau" yu da" mid mougmyid nghoid da:.
33 Arun da" nya: yuggi zoo: Eleaza gi: shid: wigi nya: yuggi zoo: Phineha ri byid: to" da" Ephrim boem moug: mo Gibea moo: myhoeb to" ago".