1 Akhid" Yoshu gi gye" mang: bye:. Aseing gi nyang: ri ?Nang gi gye" mang: abye:. Nghoid loug we' seing: yu ca" shi" da" mougmyid gye" jo, ashi". 2 Philisti mougmyid yo' Geshuri mougmyid dangain" 3 Mougpyi: shoid Avim mougmyid dangain" (Egutu mung" mougkyoo" Shihora gyid zoo: lang mo zi mougzhung: shoid Ekron mougkyoo" ju sho' gi Khanan byumyu" yi da" mung" ga: myid to" boem da:. Gaza- Ashdod- Ashkelon- Gad- Ekron moo: nyid boem da" Philisti khokham yi bo bo ago".) 4 Khanan mung" dangain" yo' Meara (Houg: zigi Sidon byumyu" yi seing: zi nghoid da) Amori mougkyoo" moo jo, da" Apheg ju" sho'. 5 Gabeli byumyu" yi da" mougmyid- bidthu shoid mo Lebanon mougmyid dangain". Hermon boem mougpyi: shoid moo jo, da" Balagad mo Hamad boem gyoo: ju" sho'. 6 He: zigi Lebanon boem joem yo' Misrephod Main agyoo mo boem moug: moo: nyid boem da" Sidon byumyu" yi da" mougmyid dangain bo da:. Israela byumyu" yi shid khyoo: yhe: loo" lang" hau: byumyu" dangain" ri ngoo khaid thu pyam wa. Nang koid wa shid re" ngoo amyeing" byid: to" ziyo' dakhyo" hau: mougmyid ri Israela byumyu" yiri nang kho' byid: ca" da:. 7 Akhid" nyangnu" jonu" khyo" nyangnu" yo" seing: yu goo" wa shid re" he: mougmyid ri gootu: byumyu" gau: kung: yo' Manashe akung: agung dayi" ri kho' byid: we'? ga: tid da:.

8 Ruben- Gad yo' Manashe byumyu" agung dayi" bang: gi Aseing da" dei zoo: Moshe wigi byid: too" bye: yoomo mougmyid yoo" gu nghoid abye: go". Hau: zigi: Yodan gyid lang bidthu shoid mo nghoid da:. 9 Nyangnu" mougmyid gi Aroera (Armon janggyoin: azoin" moo jo,) yo' hau: janggyoin: agung moo jo, da" voomoo" ju" sho' yo' Medeba mo zi Dibon ju" sho' mo bougdoem: jang: pa: dangain bo jang" moo ju" sho' rua da:. 10 Hau: zigi Amon mougkyoo" ju" sho' yo' Heshbon moo vhoeb lo da" Amori khokham Sihon wigi vhoeb da" voomoo" dangain" bo da:. 11 Hau: zigi Gilead- Geshuri yo' Makhathi mung"- Hermon boem dangain"- Saleka ju" sho' da" Bashan mung" dangain ju" sho' nghoid da:. 12 Hau: zigi Ashtarod yo' Edrei ri vhoeb lid lo da" Rephim byumyu" lo" thang yug nghoid da" Oga da" mung" bo da". Moshe gi hau: byu yiri khaid oung: pyam wigi houg bang: ri khaid thu pyam da:. 13 Nghoid loug we' Israela byumyu" yigi Gashuri yo' Makhathi byumyu" yiri akhaid thu pyam nghoid ago". Nyangnu" gi Israela mung" moo: nyid nyid boem ashi". 14 Moshe gi Levi byumyu" yiri mougmyid abyid: nghoid da:. Aseing wigi Moshe ri tid ziyo' dakhyoo" ti" Israela byumyu" yi da" Aseing Mangso phoin: tho' moo: nghe' ngei" byid: da" xoin" joem mo gamboem ri nyangnu" shau" yu wa zi nghoid.

15 Moshe gi nyangnu" da" jonu" khyo" seing: yu wa shid re" mougmyid da joyoo ri Ruben kung: mo yhoemkhung: bang: ri byid: to" da:. 16 Nyangnu" mougmyid gi Aroera (Arnon jang: gyoin yam moo jo, da) yo' hau: janggyoin: agung moo: jo, da" voomoo" yo' Medeba lheing khoem mo bau doem jang: pa: dangain" ju" sho'. 17 Heshbon yo' bougdoem: jang: pa: moo: jo, da" voomoo" joem dangain nghoid da" Dibon- Bamothbala- Bed Balmeon- 18 Yahaza- Kedemod- Mephad 19 Kiriathaim- Sibma- jang: gyoin mo bau gung moo: jo, da" Zered Shahara 20 Bethpeora- Pisga boug zoin" joem yo' Bed Yeshimod joem bo da:. 21 Hau: zigi bougdoem: jang: pa: moo jo, da" voomoo" dangain" yo' Heshbon moo: vhoebkhang" lid lo da" Amori khokham Sihon da" mungdain: dangain" bo da:. Moshe gi nyang: ri oung: pyam wigi Midian mo vhoebkhang" bang: nghoid da" Evi- Rekem- Zura- Hura yo' Reba bang: ri we' oung: pyam da:. Nyangnu" dangain" bang: gi hau: mougmyid ri Sihon khokham da" shid re" vhoebkhang" lid lo ago". 22 Israela byumyu" yi wigi said pyam jang moo lo, kyo' yu" su: Balam we' bo da:. Nya: phoo gi Beora nghoid. 23 Yodan gyid lang gi Ruben byumyu" yi da" bidvang shoid mougkyoo" nghoid. Hau: joem gi nyangnu" da" mougmyid jonu" khyo" Ruben kung: mo yhoemkhung: yiri byid: da" voomoo" joem yo' voogung joem nghoid ago".

24 Moshe gi nyangnu" da" jonu" khyo" seing: yu wa shid re" mungdain: dadu ri Gad kung: mo yhoemkhung: bang: ri we' byid: to" da:. 25 Nyangnu" da" mougmyid moo: Yazera yo' Gilead voomoo" joem dangain"- Raba bidthu shoid Areora ju" sho' da" Amon mung" agung dayi" 26 Nyangnu" mougmyid gi Heshbon mo zi Ramad Mizpa yo' Betonim ju" sho' Mahanaim mo zi lodebora mougkyoo" ju" sho' nghoid da:. 27 Yodan janggyoin: moo jo, da" Bed Haram- Bethnimra- Sukhod- Zaphon yo' Heshbon khokham Sihon da" mungdain: deing da" gu: joem nghoid ago". Nyangnu" da" bidvang shoid mougkyoo" gi Yodan mo mougzhung: shoid Galile Thoem" ju" sho' nghoid da:. 28 Hau: joem gi nyangnu" da" mougmyid jonu" khyo" Gad kung: mo yhoemkhung: yiri byid: da" voomoo" joem yo' voogung joem nghoid ago".

29 Moshe gi nyangnu" da" mougmyid jonu" khyo" seing: yu wa shid re" mungdain: dadu ri Manashe byumyu" kung: agung dayi" mo yhoemkhung: bang: ri byid: to" da:. 30 Nyangnu" mougmyid gi Mahanaim yo' Bashan mung" nghoid da:. Bashan khokham Oga da" mungdain: goin" Bashan moo jo, da" Yaira voogung khyug xi: zi dangain" bo da:. 31 Hougmoo: Gilead mung" agung dayi"- Bashan Oga da" mungdain: mo voomoo" zeing nghoid da" Astanod yo' Edrei voomoo" we' bo da:. He: zi dangain" gi Manashe da" nya: yuggi zoo: Makhira mo nyid re" da" yhoemkhung: yi: agung dayi" ri kho' byid: da" gu: nghoid da:.

32 He: zigi Moba jang: pa: moo: Moshe nyid nyid uri Yerikho bidthu shoid yo' Yodan mougmyid ri nyang: khasu" kho' byid: da" khyoo: nghoid da:. 33 Nghoid loug we' Moshe gi Levi byumyu" yiri mougmyid dacu' we' akho' gam byid: nghoid da:. Moshe gi nyangnu" ri nyangnu" jonu" gi Israela Aseing Mangsoo ri shugbyid: da" xoin" mo gamboem ri yu wa shid re" tid da:.