52
(2kh 24:18-25:7)
1 Zedekia gi nyang: Yuda khokham bue" lo uri eig xe: dazain nghoid da:. Nyang: gi Yerusalem moo daxe: dazain vhoeb da:. Nya: myhi' da" myeing gi Hamutala ga: su: nghoid wigi Libna voomoo" moo nyid da" Yeremia da" myiyi: zoo: nghoid.
2 Khokham Zedekia gi khokham Yehoiakim koid yhang: ti" Aseing ri yooboo shoid da:.
3 Aseing gi Yerusalem yo' Yuda byu yiri sung nheig yoo: yoomo nya: myo, jang mo khaid thu pyam da:.
Zedekia gi Babelon khokham Nebukhadneza ri gyi koid goemlu too' yoomo
4 Nebukhadneza gi Zedekia vhoeb zi goug: zain ein: zain lhammoo" daxi: khyab- daxi: nyid" nyid" moo nya: gyidab dangain" yo' ju" re" wigi Yerusalem ri re" khaid zain: da:. Nyangnu" gi voomoo" tunggung shoid moo dab koid lho: hau: ziri vang khyam: lheing khoem moo koid wigi vang: ci: ago".
5 Zedekia vhoeb zi daxe: dazain byeung" sho' xo' wigi vang: ci: ago".
6 Hau: zain lhammoo" myid: khyab ein: khyab goug: nyid" ein: nyid" mo phang" khoug sung no, yoomo mung" byu yi zoo: noem adeing loo nghoid ago".
7 Voomoo" vang joem ri baid thoid pyam ago". Babelon byu yi vang: ci: nghoid loug gyizoo: yi dangain" gi myen" ri phang: loid lo" byug ago". Nyangnu" gi khokham da" khyam: khyo" thu lo" wigi vang khyam: eig loem: xo' go" to" da" khoem" khyo" thu lo" wigi Yodan gyid lang lang: khung" khyoo: yhe: da" khyoo: shoid khyo" phang: lo" ago".
8 Nghoid loug we' Babelon gyizoo: yigi khokham Zedekia ri cang khaid lho: Yerikho nam mo dain" pa: moo nyang: ri myheig yu da:. Nya: gyizoo: yi dangain" gi nyang: ri phang: cau" too" kho' da:.
9 Zedekia gi Hamad mougmyid mo Ribla voomoo" moo nyid da" Khokham Nebukhadneza jhang shu" lo" zi shau" da:. Nebukhadneza gi houg: moo nyang: ri dang: phyed da:.
10 Nyang: gi Rebla moo Zedekia yu" nyid uri Zedekia da" yuggi zoo: yiri said pyam da:. Yuda gyizoug: yiri we' said pyam da:.
11 Hau: thang: nyang: gi Zedekia da" myojid" ri thau" phug pyam byid: wigi jangcoo" foid lho: Babelon khyoo: shu" loo" shau" da:.
(2kh 25:8-17)
12 Babelon khokham Nebukhadneza vhoeb zi daxe: goug: zain ein: zain lhammoo" wim: khyab daxi: nyid" nyid" moo khokham pho da" phajhi" byid: su: nya: gyizoug: phoo Nebukhadneza gi Yerusalem khyoo: vang yhe: da:.
13 Nyang: gi Noku Yhoem: Moo"- khokham kho" Yerusalem mo yhouggyen: byu yi dangain" bang: da" yhoem: joem ri nghe' pyam da:.
14 Houg: lho: nya: gyizoo: yigi voomoo" vang joem ri phyo' khyo' pyam ago".
15 Hau: thang: Nebuzaradan gi voomoo" moo nyid deing jo, da" voo byu yi deing jo, da" lo, moo" dab bang:- Babelon byu yi jhang phang: dab loo" bang: ri Babelon khyoo: shu" lo" da:.
16 Nghoid loug we' nyang: gi ci: ayoo" myung thang da" bang: ri Yuda mung" moo nyhid: too" kho' lho: nyangnu" ri zabyid khyam: moo yo' yoothung" joem moo moo" zei: nhang: da:.
17 Babelon byu yigi gyid: mid" zeing boung: joem yo' Noku Yhoem: Moo" mo rheing" joem yo' dage" gyid: mid" gyid thung" lhang" ri ajab amhoin' baid khyoeb pyam ago". Nyangnu" gi gyid: mid" dangain" ziri Babelon khyoo: de" lo" ago".
18 Nyangnu" gi phoin: ri shoem" pyam jang" moo ci: da" yab geig yo' myimoeb kaid da" jonu"- myikug joem ri to" da" jonu"- ngei" xoin" joem mo suid" ri kham: yu da" jarung: joem shoem: nam pyo: ja: nghe' ngei" da" jarung: joem Noku Yhoem: Moo" moo dei byid: jang" moo ci: da" gootu: gyid: mid" yo' koid da" jonu" dangain" ri we' yu pyam ago".
19 Nyangnu" gi sheing: yo' ngei wigi koid to" da" jarung: nu" joem yo' myi: dab da" myigyu: ri kaid da" oug" phain'- ngei" xoin" joem mo suid" ri kham: yu da" jarung: joem myiyab khu joem myikug tang joem shoem: nam pyo: ja: kaid da" jarung: joem zabyid yhid: xoin" foid khyo' da" jarung: joem ri yu lo" ago".
20 Noku Yhoem: Moo" shid re" khokham Sholumon wigi koid to" da" gyid: mid" zi joem nghoid da" zeing boung: eig loem- rheing" joem yo' gyid: gyid thung" lhang" zeing: yo' hau: ziri voin ci: da" nuloo: daxe: eig du: gi atho' leig nghoid da:.
21-22 Zeing boung: eig loem: gi dakhyoo" dayi" za: nghoid da:. Zeing khang" moo" gi myhang: khyoo: 27 pe: bo wigi loem: lheing 18 pe: bo da:. Hau: zigi akhung" bang" wigi gyid: mid" gi 3 lo, shi" thu: da:. Zeing bung: phyoo" khang" moo" moo myhang: khyoo: 7 pe: dakhyam" myang: da" gyid: mid" zeing dab lho: gyid: wigi koid to" da" lamei shi" shicab lhoo: tab to" ago". Hau: joem dangain" ziri gyid: wigi koid to" ago".
23 Zeing bung: khang" moo" moo lamei shi" dashoo: shoo: wigi shoung: tab to" lho: goug: xe: khyug cab gi myidgung mo shau" myang da:.
(2kh 25:18- 21, 27-30)
24 Hau: tho' agoo"- amyeing" byid: nyid zoug: Nebuzaradan gi khainjung moo" Seraia yo' nya: vhoo: mo Zephania- Noku Yhoem: Moo" mo yhouggyen: da" vhujhung: gootu: soem" yug ri thung: byu khyo" shu" lo" da:.
25 Nyang: gi gyidab joem ri vhoeb lo da" gyizoug: phoo- voomoo" moo nyid boem ashi" da" khokham pho da" phajhi" byid: bang: nyhed yug- gyi moo" yo' sen: wigi lhid" xoem" vhujhung: nghoid da" gyizoug: moo" vhoo: mo gyizoug: phoo- yhouggyen: da" byu khyug xi: ri we' shu" lo" da:.
26 Nebuzaradan gi houg: bang: ri Hamad moug: mo Ribla voomoo" moo nyid da" Babelon khokham pho jhang shu" lo" byid: da:.
27 Khokham phoo gi houg: bang: ri houg: moo baid said pyam da:.
Houg: yoomo Yuda byu yigi nyangnu" mung" mo zi pyoung" shu" lo" byug zi shau" da:.
28 He: zigi Nebukhadneza wigi thung: byu khyo" shu" lo" byug da" byu yi zhayhen" nghoid da:. Nyang: khokham koid da" zain nyid nyhed zain: moo nyang: shu" yu pyam da" byu 3023 yug-
29 Daxe: shed zain ein: zain moo Yerusalem mo 832 yug
30 Eig xe: soem" zain ein: zain moo Nebuzaradan shu" lo" da" byu 745 yug nghoid. Dangain" ri 4600 yug ri shu" lo" byug da:.
31 Evilmerodag Babelon khokham bue" lo da" zain moo nyang: ri thung: mo nhang: kaid byid: da" khyo" wigi khokham Yehoiakhin ri nyang: nheig khyeug myid ci shug byid: da:. He: zigi Yehoiakhin ri thung: byu khyo" myheig shu" lo" thang: soem" xe: nyhed zain ein: zain lhammoo" daxe: eig khyab ein: khyab- eig xe: wim: nyid moo bue" zi nghoid.
32 Evilmerodag gi nyang: ri goolhoo' za: koid wigi Babelon moo nyang: yo' dage' pyoung" shu" nyhid: too" shau" boem da" khokham gootu: bang: tho' je: ngi: shab byid: da" joyoo nyang: ri byid: da:.
33 Houg: yoomo Yehoiakhin gi thoung: void byi: void mi ri thid pyam lho: nya: deing da" kangso' dei nyid shi" gyoo: moo khokham pho voem: zoo: zoobui" moo zoo: wa akhang" byid: zi shau" da:.
34 Nyang: Kangso' dei nyid gu: moo nyid" khang" nyid" moo yoo" ca" da" pang" thoug khyoo: ri main: main: shau" yu da:.