37
1 Babelon khokham Nebukhadneza gi Yuda khokham Yoshia da" yuggi zoo: Zedekia ri Yehoiakim da" yuggi zoo: Yehoiakhin da" khoo: moo Yuda khokham koid nhang: da:.
2 Nghoid loug we' Zedekia we' nya: da" gyizoug: yi we' mung" byu yi we' Aseing wigi ngoo ri byid: da" mungdang: ri atam" gyoo: nghoid ago".
3 Khokham Zedekia gi Shelemia da" yuggi zoo: Yehukhala yo' Maseia da" yuggi zoo: khainjung Zephania ri nhang: kaid lho: ngoonu" da" byumyu" yi gungthid ngoonu" da" Aseing Mangsoo ri akyu" mho' wa shid re" ngoo ri tid kaid da:.
4 Ngoo gi thoung: alung" shi" uri byumyu" phung: moo khyoid khyang: yo" so" yen" shi" da" ayo, nghoid.
5 Babelon meing: bang: gyidab gi Yerusalem ri vang: ci: ago". Nghoid loug we' Egutu gyidab gi Egutu mung" mougkyoo" ri lid: phyid re" boem bye: ga: thui: ri shoug" gyoo: lang" nyangnu" doem zoid phang: lo" ago".
6 Hau: thang: Israela da" Aseing Mangsoo gi
7 Zedekia ri tid kyoo" wa shid re" ngoo ri ?Egutu gyidab gi nang ri pang" thoug byid: wa shid re" khyoo: moo re" lo ago". Nghoid loug we' yhoem: moug: khyoo: doem tau" lo" boem wa.
8 Houg: lang" Babelon byu yigi doem ju" re" wigi voomoo" ri gyi re" zain: lho: hau: ziri seing: yu wigi nghe' khyo' pyam boem wa.
9 Nanya: gung ri Babelon byu yigi adoem ju" ri" wa ga: myid jho: yu wigi mhoug zo: zi ashoug" wa shid re" ngoo Aseing tid poin" byid: bye:. Ciwim gari nyangnu" ju" re" boem wa zi nghoid.
10 Nang gi Babelon gyidab goin" ri khaid oung: pyam wigi nyangnu" da" zoem" khoug: moo leung jo, da" dam dab bang: za: dadeing jo, loug we' houg: bang: to' re" wigi he: voomoo" ri myimoeb boem" bui" sho' yo' nghe' pyam shi" wa? ga: zi nghoid.
11 Egutu gyidab joem tab re" nyid yoomo Babelon meing: bang: gyidab gi Yerusalem mo zoid phang: lo" ago".
12 Houg: yoomo ngoo gi Yerusalem mo thu lo" wigi nga" yhoemkhung: ziyoo ri lo" seing: yu wa shid re" Benyamin moug: khyoo: yhe: lo".
13 Nghoid loug we' Benyamin khoem" moo" khyoo: ngoo ju" yhe: uri Hanania da" nya: myid: zoo:- Shelamia da" nya: yuggi zoo:- houg: moo moo" eung: da" gyizoo yi da" vhujhung: gyizoug: pho Iriya ga: su: gi ngoo ri toem' pyam lho: nang gi Babelon mung" byu yi shoid khyoo: phang: dab lo" nyid da? ga: tid da:.
14 Ngoo gi ?Hougsu" anghoid- ngoo phang: zi anghoid? ein: phug tid bye:. Nghoid loug we' Iriya gi nga" dang: ri atam" gyoo: byid: nghoid da:. Hau: gungthid nyang: gi ngoo ri myheig yu wigi moo" voin zoug: yi jhang khyoo: shu" yhe: da:.
15 Nyangnu" gi ngoo ri nheig joem: yo: wigi ngoo ri baid lho: khokham kho" moo" seing: Yonathan da" yhoem: khoug: moo thoung: khyo" myhid" lhoung to" da:.
16 Ngoo ri myid khoug: mo yab moo kaid to" lho: houg moo ayo, myang" sho' lhoung to" ago".
17 Hau: thang: khokham Zedekia gi ngoo ri khe: yu lho: nyang: gi ngoo ri sam: za: ?Aseing mo ju" da" mungdang: gootu: jo, rhe"? ga: myid:.
Ngoo gi ?Jo,- nang gi Babelon khokham lo, khyoo: ab byid: pyam zi shoug" wa? ein: tid bye:.
18 Hau: thang: ngoo gi ?Nang ngoo ri thung: lhung wa shid re" nang ri we' re" moo" voin zoug: yiri we' he: byumyu" yiri we' ngoo ce: yooboo shoid bye: la".
19 Nang ri yo' mungdain: ri Babelon khokham gyi are" zain: wa ga: nang ri tid boem da" re" lapi: yi cibue" boem bye: lha".
20 Akhid" Aseing Khokham we"- nga" dang: ri tam" gyoo: wa yo' ngoo tid khyoo: ri cang koid byid: wa shid re" nang ri ngoo mho' yoid. Jeju" khyo" ngoo ri Yonathan da" yhoem: mo thoung: khoug: khyoo: adoem loo" nhang:. Nang loo" nhang: nghoid rigi ngoo houg: moo gyeing" nyang: shid: zi shoug" wa? ga: mho' yoid.
21 Houg: yoomo khokham Zedekia gi khokham vang khoug: moo ngoo ri lhung too" wa shid re" amyeing" byid: kaid da:. Ngoo gi houg: moo nyid nyid wigi voomoo" khoug: moo zooyho' thang lo" da" ayo, ju" sho' zooyho' koid da" jang: mo zooyho' danyid" daloem: loem: ngoo ri byid: ago".