28
1 Hau: zain moo Zedekia khokham koid zi myid: zain ein: zain lhammoo" wim khyab ein: khyab khyab moo Gibeon voomoo" mo Azuri da" yuggi zoo: lapi: Hanania gi Noku Yhoem: Moo" moo ngoo ri dang: tid da:. Khainjung yi yo' byu phung: yi shidkhoin" moo nyang: gi ngoo ri tid.
2 Israela da" Mangsoo Myhang: thang Aseing tid zigi ?Ngoo gi Babelon khokham da" yoem: so' ri khyau" pyam byid: bye:.
3 Eig zain agyoo: moo ngoo gi khokham Nebukhadneza wigi Babelon khyoo: shoem" ci: lo" byug da" noku yhoem: jonu" joem dangain" ri he: joyoo khyoo: doem ci: loo wa.
4 Yehoiakim da" yuggi zoo: Yuda khokham Yehoiakhin ri we' Babelon khyoo: pyoung" shu" lo" jang" moo bo da" Yuda byu yi dangain" yo' dage" ngoo doem shu" tau" loo wa. Nghoid bye:- ngoo gi Babelon khokham da" yoem: so' ri khyau" pyam byid: wa. Ngoo Aseing tid too" bye:? ga: tid da:.
5 Hau: thang: khainjung yi yo' Noku Yhoem: Moo" moo yab jo, boem da" byumyu" yi dangain" bang: shidkhoin" moo ngoo gi Hanania ri
6 ?Gye" mau" pho" zi nghoid. Aseing he: ziri koid wa shid re" ngoo myid byu nyid da:. Re" lapi: dang: ri nyang: zei: pyeing loo wa. Jonu" joem dangain" ri yo' thung: byu yi khyo" Babelon khyoo: shu" loo" shau" da" byumyu" yi dangain" ri Babelon mo doem shu" tau" loo wa ein: ziri ngoo gyeing" nyang: myid byu da:.
7 Nghoid loug we' nang yo' byumyu" yiri ngoo tid da" dang: joem ri tam" gyoo: ge'.
8 Ngoo yo' nanu" shid moo goonham' mo lapi: yigi gyi bue" zi zooyoid zi noo bui" zigi byumyu" yi myoo" sho' yo' yoem: bo da" khokham mungdain: joem moo bue" loo wa lapi: pe: lo ago".
9 Nghoid loug we' ngei pyo: yug yo khyoo: ri lapi: pe: da" lapi: phoo rigi lapi: pho da" lapi: dang: joem joeb byeung" loo lang" za: lapi: phoo gi Aseing wigi gyeing" nyang: nhang: kaid da" lapi: dayug nghoid khyo" xoem" yu byid: ziri shau" da? ga: tid da:.
10 Hau: thang: Hanania gi nga" leung zeung: mo kyoug: ri khyoid yu wigi hau: ziri adu du baid khyau" pyam da:.
11 Houg: lho: byumyu" yi dangain" da" shidkhoin" moo tid zigi ?Nyang: gi byumyu" yi dangain" da" leung zeung: moo khokham Nebukhadneza wigi foin: to" da" kyoug: ri hid su" baid khyau" pyam wa ga: Aseing tid to" abye:. Nyang: gi he: ziri eig zain agyoo: moo koid loo wa ga: tid da:. Houg: lang" ngoo gi houg mo thu loo" bye:.
12 Dayo, thang: ri Aseing gi ngoo ri
13 Hanania jhang yhe: wigi ?Nang gi seig kyoug: ri yo" khyau" pyam wa. Nghoid loug we' nyang: gi hau: ziri joto' kyoug: doem koid thid byid: wa ga: Aseing tid too" bye:.
14 Israela da" Mangsoo- Myhang: thang Aseing gi hau: byumyu" dangain" adang moo joto' kyoug: foin: byid: wigi nyangnu" ri Babelon khokham Nebukhadneza ri dei byid: loo goo" wa. Aseing gi siyoo gougnyhoug lam" rilang" Nebukhadneza ri dei byid: sho' koid wa? ga: tid.
15 Houg: lang" ngoo gi he: dang: ri Hanania ri tid kyo" wigi ?Hanania we"- tam" gyoo: we'. Aseing gi nang ri anhang: kaid nghoid da:. Mhau" da" dang: ri he: byu yi loem" sho' nang koid nyid da:.
16 Houg: yoomo nang ri yu pyam wa ga: Aseing nyang: nyang: tid da:. Aseing ri thougtheung gyi koid boem wa shid re" byumyu" yiri nang tid bye: yoomo he: zain athang shi" ri nang shid: wa? ga: xo' tid da:.
17 Houg: lang" Hanania gi hau: zain mo da" lhammoo" nyhed khyab ein: khyab moo shid: lo" da:.