16
1 Aseing gi ngoo ri dang: doem ji wigi
2 ?Hid yhang: te" joyoo moo myi: we' ayu- zooshang: we' akhu:.
3 Hid moo khu: re" da" zooshang: yi yo' nyangnu" da" myhi' phoo yi moo bue" loo wa da" khyoo: ri nang ri ngoo tid kyoo" wa.
4 Nyangnu" gi gyoug pho" noo bue" wigi shid: lo" boem goo" wa. Nyangnu" shid re" koug ngau wa. Nyangnu" manggung joem ri du myhoeb wa byu anyid wa. Nyangnu" da" manggung joem gi jen" boem joem yhang: ti" myidgung moo leung jo, boem wa. Nyangnu" gi meing: zain: jang: moo said pyam zi shoug" wa. Anghoid lang" zooyoid shid: lo" boem wa. Nyangnu" da" manggung joem gi ngho' joem yo' gougnyhoug lam" joem shid re" zoo: noem bue" lo boem wa.
5 ?Nang gi koug ngau nyid da" yhoem: khyoo: age vang yhi:. Hang" shid re" we' akug ngau. Ngoo gi nga" byumyu" yiri yug yoo myenjham" ziyo' main akaid byid: loo: wa. Nyangnu" ri jheddab myid yo' nheig khyeug myid ri aci: shug byid: loo: wa.
6 Yoo" zoo: yoo" shug bang: yo' myung shoo" bang: gi he: mougmyid moo shid: lo" boem wa. Nghoid loug we' nyangnu" shid re" hang" akug ngau goo" wa. Nyangnu" ri hang" wigi we' adu: myhoeb pyam goo" wa. Hang" we' nyang: nya: kougshu: khyoo: ri ci: shug da" khyo" so' moo" we' ashi: goo" wa. Vhuloem we' vhudung: adung: pyam goo" wa.
7 Jheddab da" byu dayug shid: lo" ri nyangnu" nheig teing byid: wa shid re" nyang: yo' hang" ci: azoo: ashug goo" wa. Hang" we' nheig khyeug seing" no zi aci: shug goo" wa. Nya: myhi' yo' nya: phoo tang: shid: byug da" su: shid re" lang" nheig khyeug khyoo: aci: shug byid: wa.
8 ?Byu yi pui" koid nyid da" yhoem: khyoo: avang yhi:. Nyangnu" yo' zooshug wa shid re" ayhe: bo gyo" zhung:.
9 Ngoo myhang: thang Aseing- Israela da" Mangsoo tid ziri tam" gyoo: we'. Ngoo gi gau yi thui: yo' ngei pyo: thui: joem ri yo' lo, xo' pui" mo pyo: da" thui: joem ri jham" coug: youg bue" lo" byug nhang: wa. Hid moo nyid da" bang: gi he: khyoo: bue" ziri shau" myang goo" wa.
10 ?Nyangnu" ri nang he: gu: dangain" ri tid kyo" ri nyangnu" gi ciwim yoomo nyangnu" ri ngoo houg yhi' dam xoo: sho' yooboo dam byid: wa myid phyed loug la"- ga: nang ri myid: loo goo" wa. Nyangnu" gi ce: youg: noo yooboo shoid bye: la"- nyangnu" Aseing Mangsoo ri ce: yooboo koid bye: loug la" ga: myid loo goo" wa.
11 Houg: lang" Aseing hid su" ga: tid ein: nyangnu" ri tid kyoo" we'. Nanu" da" phoug" phyid" yigi ngoo mo lheing: phug lo" wigi gootu: yu phara" soolhoo: joem ri no' ziyo' dei byid: lo boem bye:. Nyangnu" gi ngoo ri she: pyam too" kho' lho: nga" jhau" shed dang: ri atam" gyoo: nghoid ago".
12 Nghoid loug we' nanu" gi nanu" phoug" phyid" yi tho' je dam xo: khyo" koid abye: go". Nanu" dangain" bang: gi nheigloem: thain: ziyo' akhyeing" boem wigi ngoo ri aphoug" cang nghoid ago".
13 Houg: lho: ngoo gi nanu" ri he: moug: mo zi nanu" ri asi'. Nanu" da" phoug" phyid" yiri we' ase' da" mougmyid khyoo: khaid thu kaid wa. Houg: lho: nanu" gi hau: moug: moo gootu: yu phara" soolhoo: joem ri myen" ri nyid" ri dei byid: loo goo" wa. Houg: lho: ngoo gi nanu" ri ce: nheig khyeug myid aci: shug byid: loo wa? ga: tid da:.
14 Aseing tid zigi ?Israela byumyu" yiri Egutu mung" mo shu" thu lo da" kangso' dei da" Mangsoo khyo" khanham we' jham' atang: da" bidnyid ju" loo wa.
15 Hau: gungthid nyangnu" ri ngo wigi khaid pyam to" da" mougzhung: shoid mo mung" yo' gootu: mung" mo Israela byumyu" yiri shu" thu yu da" kangso' dei da" Mangsoo moo nga" myeing khyo" jham' tang: loo goo" wa. Ngoo gi nyangnu" ri nyangnu" da" mungdain: khyo" nyangnu" da" phoug" phyid" yiri ngoo byid: to" da" mougmyid khyoo:- doem shu" tau" loo" wa. Ngoo Aseing tid bye:? ga: tid da:.
16 Aseing tid zigi ?Ngoo gi he: byumyu" yiri myheig yu nhang: wa shid re" wimdo, kuang bang: myoo" sho' ri nhang: kaid wa. Houg: lho: nyangnu" ri boem khang" moo"- bouggung khang" moo"- lug pyo' khung" mo lug ug lug khyung: joem moo cang khaid shoo: wa shid re" shoo" kuang bang: myoo" sho' ri nhang: kaid wa.
17 Nyangnu" koid da" ja: khang" moo" ri ngoo shau" myang byid: bye:. Ngoo moo shoung: to" zi ci ajo,. Nyangnu" da" yooboo joem gi nga" da" myo, jang mo aloid.
18 Ngoo gi nyangnu" ri nyangnu" da" yooboo joem yo' nheigloem: goid" da" moo" shid re" eig zhang xab nhang: wa. Ciwim gari nyangnu" gi byu shid: mang yhang: ti" kangso' abo da" soolhoo: joem khyo" wigi nga" da" mougmyid ri aco' ajhoid koid pyam wigi nyangnu" da" yu phara" joem yo' byeung" jo, nhang: bye:? ga: tid.
19 Aseing we"- nang gi ngoo ri goem loem byid: su: yoem vhoo" byid: su: nghoid. Nang gi ngoo ri yau: khi" shau" da" ayo, gu: moo pang" thoug byid: da:. Byumyu" yigi moug: thang: myid thang: mo zi re" jhang re" wigi hid su" ga: tid loo goo" wa. ?Ngoonu" da" phoug" phyid" yigi yu phara" mo jain" wigi ci we' ajo, ce: akyu" abo da" soolhoo: joem mo lid: wigi ci we' ayoo" nghoid ago".
20 Byu yigi nyangnu" da" Mangsoo ri yo" koid yu la". Ayo" koid yu. Nyangnu" yo" koid yu nghoid loug- hau: zigi Mangsoo gyeing" anghoid.
21 Aseing gi ?Hougsu" nghoid rigi byumyu" yigi nga" da" yoem: so' yoem: moo" ri dalheing: za: se' ci: boem baja". Ngoo koid kaid wa. Ngoo Aseing nghoid ziri nyangnu" se' loo goo" wa? ga: tid da:.